ལོར་ལ་སྟོད་ལྷོར་སྐུ་འཁྲུངས།འདི་ཉིད་ཀྱིས་ལྷོ་བལ་དུ་མཁས་པ་མང་པོ་ལ་གཏུགས།འདི་རྒྱ་གར་ཕྱག་ནའི་ཡང་སློབ་ཡིན།རྒྱ་གར་དུ་ཁ་ཆེ་དགོན་པ་བ་དང་།ཨ་བྷྰ་ཡྰ་ར་གུབྷ་ལ་སོགས་པར་གསན་པ་མང་དུ་མཛད་ཅིང་བཞུགས་པ་ན་བླ་མ་དེ་རྣམས་ཀྱིས་ཁྱོད་བོད་དུ་སོང་ལ།འཕགས་པ་སྒྲོལ་མའི་སྤྲུལ་པ་འདི་ལྟ་བུ་ཞིག་ཡོད་པ་ཕྱག་རྒྱར་བསྟེན་ནས་གསང་བ་དང་ཤེས་རབ་ཡེ་ཤེས་ཀྱི་དབང་གི་ཉམས་ལེན་གྱིས་ཤིག་གསུངས།དེ་ལྟར་བོད་དུ་བྱོན་ནས་མ་གཅིག་ཕྱག་རྒྱར་མཛད་པ་ཡིན་ནོ།།དེ་ནས་རྨ་ལོ་ཙྰ་བས་ཁྱུང་པོའི་ཐད་དུ་རབ་ཏུ་བྱུང་།དགུང་ལོ་ཞེ་དྲུག་ལ་ཕེབས་སྐབས་འཁོན་ཕུ་བ་ཉེ་གནས་སུ་ཁྲིད་དེ་ཤབ་ཏུ་བྱོན་པའི་ཚེ་གཞན་གྱིས་དུག་དྲངས་ནས་གྲོངས་སོ།།འདི་ཉིད་ཀྱི་འགྱུར་ལ།བསྟན་འགྱུར་ལས།《དགྱེས་པ་རྡོ་རྗེའི་སྒྲུབ་ཐབས》《དཔལ་ཧེ་རུ་ཀའི་སྒྲུབ་ཐབས》《དཔལ་འཁོར་ལོ་སྡོམ་པའི་མན་ངག》《དཔལ་རྡོ་རྗེ་རྣལ་འབྱོར་མའི་སྒྲུབ་ཐབས་ཞལ་གཉིས་མ་ཆུང་བ།》《དབུ་བཅད་མའི་སྒྲུབ་ཐབས》《སྒྲོལ་མ་ལྷ་ལྔའི་སྒྲུབ་ཐབས་རིན་པོ་ཆེ་གསལ་བ》ཞེས་བྱ་བ་སོགས་མང་ངོ་།།
ལོ་ཙྰ་བ་རིན་ཆེན་བཟང་པོ།བོད་ཀྱི་ལོ་རྒྱུས་ཐོག་བསྟན་པ་ཕྱི་དར་གྱི་དུས་སུ་བྱུང་བའི་གསང་སྔགས་གསར་མ་བསྒྱུར་མཁན་གྱི་ལོ་ཙྰ་བ་མཚན་སྙན་གྲགས་ཤིན་ཏུ་ཆེ་བ་ཞིག་ཡིན།རབ་བྱུང་དང་པོའི་གོང་གི་ལོ་དྲུག་ཅུ་རེ་དགུ་པ་ས་རྟ༩༥༨ལོར་སྟོད་མངའ་རིས་ཀྱི་གུ་གེའི་ས་ཆར་འཁྲུངས།དགུང་ལོ་ཆུང་དུས་ནས་སློབ་སྦྱོང་ལ་བརྩོན་འགྲུས་ཆེ་བས།མངའ་རིས་རྒྱལ་པོས་ཁོང་སོགས་མི་ཉི་ཤུ་རྩ་བདུན་ཁ་ཆེའི་ཡུལ（ཀསྨིར）དུ་མངགས་པ་ལྟར་བྱོན་ཏེ།བཎྜི་ཏ་མཁས་པ་མང་པོ་བསྟེན་ནས་སྒྲ་རིག་པ་དང་།ཚད་མ།གསོ་བ་རིག་པ།མདོ་དང་།སྔགས་སོགས་ལ་སྦྱངས་པ་མཐར་ཕྱིན་པ་མཛད་དེ་བོད་དུ་བྱོན།མངའ་རིས་གུ་གེའི་རྒྱལ་པོ་ལྷ་བླ་མ་ཡེ་ཤེས་འོད་ཀྱིས་མཐུན་རྐྱེན་གནང་སྟེ་གསང་སྔགས་ཀྱི་གཞུང་མང་པོ་དང་།གསོ་བ་རིག་པའི་གཞུང་《སྨན་དཔྱད་ཡན་ལག་བརྒྱད་པ》ལ་སོགས་པ་རྒྱ་གར་གྱི་སྨན་གཞུང་མང་པོ་བསྒྱུར།སློབ་མ་སྨན་པ་མཁས་པ་མི་དགུ་སོགས་བྱུང་སྟེ།བོད་ཀྱི་གསོ་བ་རིག་པའི་ཐོག་སླར་ཡང་གོང་འཕེལ་གསར་པ་ཞིག་གི་དུས་སུ་སླེབས།ཁོང་གིས་གསང་སྔགས་གསར་མ་དང་།རྒྱ་གར་གྱི་སྨན་གཞུང་མང་པོ་རྒྱ་གར་སྐད་ནས་བོད་སྐད་དུ་བསྒྱུར་གནང་མཛད་པ་དེ་དག་བོད་ཀྱི་མཁས་པ་ཆེན་པོ་ཀུན་གྱིས་ཚད་མར་འཛིན་པ་ཞིག་ཡིན།དགུང་ལོ་དགུ་བཅུ་གོ་བརྒྱད་པ་རབ་བྱུང་དང་པོའི་ཤིང་ལུག༡༠༥༥ལོར་སྐུ་གཤེགས།ལོ་རྒྱུས་ཞིབ་པར་ཁོང་གི་དངོས་སློབ་ཁྲི་ཐང་པ་ཛྙ་ནས་མཛད་པའི་《ལོ་ཆེན་རིན་ཆེན་བཟང་པོའི་རྣམ་ཐར》དང་།ལས་ཆེན་ཀུན་དགའ་རྒྱལ་མཚན་གྱིས་མཛད་པའི《བཀའ་གདམས་ཆོས་འབྱུང་མཁས་པའི་ཡིད་འཕྲོག》ཤོག་གྲངས་༦༦ནས་༦༧བར་གསལ།