བསམ་ཡས་གཙུག་ལག་ཁང་མཚན་རྒྱས་པར་འབོད་ན་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཞེས་གྲགས།གཙུག་ལག་ཁང་འདི་ནི་བོད་ལྗོངས་ལྷོ་ཁ་ས་ཁུལ་གྲ་ནང་རྫོང་ཁོངས་ཡར་ཀླུང་གཙང་པོའི་བྱང་ངོས་ཀྱི་རི་འདབས་ཤིག་ན་གནས་ཤིང༌། དེ་ཡང་སྔོན་སྲོང་བཙན་རིང་ལྷ་སའི་གཙུག་ལག་ཁང་རྣམ་གཉིས་དང་མཐའ་འདུལ་ཡང་འདུལ་བཅས་ཀྱི་ལྷ་ཁང་དང་། རྒྱལ་པོ་ཁྲི་ལྡེ་གཙུག་བཙན་གྱི་སྐབས་སུ་བྲག་དམར་མགྲིན་བཟང་ལ་སོགས་པའི་ལྷ་ཁང་བཞེངས་པར་བཤད་ཀྱང་། དེ་རྣམས་ནི་ལྷ་ཁང་ཙམ་སྟེ་ལྷ་རྟེན་བཞུགས་སའི་ཁང་པ་ཁོ་ན་མ་གཏོགས་གཞན་ཆོས་སྤྱོད་ཀྱི་བྱ་འགུལ་སྤེལ་ས་མེད་པར་བརྟེན། སྤྱི་ལོ༧༦༢ལ་ཆོས་རྒྱལ་ཁྲི་སྲོང་ལྡེ་བཙན་དང་མཁན་པོ་ཞི་བ་འཚོ། སློབ་དཔོན་པདྨ་འབྱུང་གནས་ཏེ་ཡོངས་ཁྱབ་ལ་མཁན་སློབ་ཆོས་གསུམ་ཞེས་བོད་ཀྱི་ལོ་རྒྱུས་སྟེང་རླུང་ལྟར་གྲགས་པའི་ཁོང་རྣམ་པ་གསུམ་ཞལ་འཛོམས་པས། སྔར་གྱི་ལྷ་ཁང་དེ་རིགས་ཀྱིས་ནང་བསྟན་དར་རྒྱས་སུ་གཏོང་མི་ཐུབ་པར་གཞིགས་ནས་ལྷ་ཁང་ཆེན་པོ་བོད་དབུས་ཀྱི་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཞེས་པ་དེ་བཞེངས་ཤིང་། ལྷ་ཁང་འདི་བཞེངས་གྲུབ་ཀྱི་ལོ་ནི་ལོ་རྒྱུས་ཡིག་ཆ་རྣམས་སུ་བཞེད་པ་མི་མཐུན་པ་ཡོད་ཀྱང་། དཔྱིད་ཀྱི་རྒྱལ་མོའི་གླུ་དབྱངས་སུ་བཀོད་པའི་བཙན་པོ་དགུང་ལོ་ཉེར་གཅིག་པ་ཆུ་ཕོ་སྟག་སྟེ་སྤྱི་ལོ༧༦༢ལ་རྨང་བཏིང་ནས་མེ་ཕོ་རྟ་སྟེ་སྤྱི་ལོ༧༦༦ལ་གྲུབ་པའི་ཞལ་ལུང་འདི་བདེན་པར་སྙམ་མོ།།