༢ དེང་སྐབས་རྒྱལ་ཡོངས་མི་དམངས་འཐུས་མིའི་ཚོགས་ཆེན་དང་རྒྱལ་ཡོངས་ཆབ་སྲིད་གྲོས་མོལ་ཚོགས་འདུ་སོགས་རྒྱལ་ཁབ་ཀྱི་ཚོགས་ཆེན་གལ་ཆེན་གྱི་སྟེང་དུ་གྲངས་ཉུང་མི་རིགས་ཀྱི་སྐད་ཡིག་དེ་ཉིད་གྲོས་ཚོགས་སུ་སྤྱོད་པའི་སྐད་ཡིག་ཏུ་གཏན་ལ་ཕབ་ཡོད། འབྲེལ་ཡོད་ཀྱི་གཏན་འབེབས་ལྟར་ན། མི་རིགས་རང་སྐྱོང་ས་གནས་ཀྱིས་མི་རིགས་གྲངས་ཉུང་གི་སྐད་ཡིག་དང་རྒྱ་ཡིག་གཉིས་མཉམ་དུ་སྤྱོད་བཞིན་ཡོད་ཅིང་། མི་རིགས་གྲངས་ཉུང་ཁག་གིས་ཉིན་རྒྱུན་གྱི་འཚོ་བ་དང་། ཐོན་སྐྱེད་ངལ་རྩོལ། འཕྲིན་གཏོང་འབྲེལ་གཏུག སྤྱི་ཚོགས་ཐོག་འགྲོ་འོང་བྱེད་པ་ལ་སོགས་པའི་སྐབས་སུ་མི་རིགས་རང་གི་སྐད་ཡིག་སྤྱོད་པ་གཙིགས་སུ་འཛིན་པར་བཅའ་ཁྲིམས་ཀྱིས་ཁག་ཐེག་བྱས་ཡོད།
     མི་རིགས་རང་སྐྱོང་ལས་ཁུངས་ཀྱིས་དབང་ཆ་ཉམས་སུ་བསྟར་བའི་སྐབས་སུ་བཅའ་ཁྲིམས་ལྟར་མི་རིགས་ཀྱི་སྐད་དང་ཡི་གེ་སྤྱོད་བཞིན་ཡོད། མི་རིགས་རང་སྐྱོང་ས་གནས་ཀྱི་རང་སྐྱོང་ལས་ཁུངས་ཀྱིས་དབང་ཆ་ཉམས་སུ་བསྟར་བའི་སྐབས་སུ། མི་རིགས་རང་སྐྱོང་ས་གནས་ཀྱི་སྲོལ་ཡིག་ནང་དུ་འཁོད་པའི་གཏན་འབེབས་ལྟར། ས་དེ་གས་སྤྱི་ཁྱབ་ཏུ་སྤྱོད་པའི་སྐད་དང་ཡི་གེ་གཅིག་གམ་ཡང་ན་དུ་མ་ཞིག་བཀོལ་སྤྱོད་བྱེད་དུ་འཇུག་བཞིན་ཡོད། རང་སྐྱོང་ལས་ཁུངས་ཀྱིས་དེ་དང་མཉམ་དུ་ཐུན་མོང་དུ་སྤྱོད་པའི་སྐད་དང་ཡི་གེ་དུ་མ་ཞིག་སྤྱད་ནས་དབང་ཆ་ཉམས་སུ་བསྟར་བ་ཡིན་ན། ས་ཁོངས་རང་སྐྱོང་བས་པའི་མི་རིགས་དེའི་སྐད་དང་ཡི་གེ་གཙོ་བོ་ཉིད་དུ་བས་ནས་སྤྱད་ཆོག་པ་ཡིན། རང་སྐྱོང་ལྗོངས་དང་། རང་སྐྱོང་ཁུལ། རང་སྐྱོང་རྫོང་བཅས་ཀྱིས་ས་གནས་རང་གི་མི་རིགས་དེའི་སྐད་དང་ཡི་གེ་སྤྱད་ནས་འདེམས་བསྐོའི་ཡིག་ཆ་དང་། འདེམས་མིའི་མིང་ཐོ། འདེམས་མིའི་ལག་འཁྱེར། འཐུས་མིའི་རྗེས་འདེམས་མཁན་གྱི་མིང་ཐོ། འཐུས་མིར་བདམས་པའི་ལག་འཁྱེར། འདེམས་བསྐོའི་ཨུ་ཡོན་ལྷན་ཁང་གི་གཞུང་ཐམ་སོགས་བཟོ་དགོས། མི་རིགས་རང་སྐྱོང་ས་གནས་ཀྱི་རྒྱལ་ཁབ་ཀྱི་ལས་ཁུངས་དང་། མི་དམངས་ཀྱི་ཚོགས་པ། ཁེ་ལས་དང་བྱ་ལས་སྡེ་ཚན་བཅས་ཀྱིས་དེ་གས་སྤྱི་ཁྱབ་ཏུ་སྤྱོད་པའི་མི་རིགས་ཀྱི་ཡི་གེ་དང་རྒྱ་ཡིག་གཉིས་སྦྲགས་མ་བྱས་ནས་ཡིག་ཆ་འགྲེམས་པ་དང་། དཔང་ཐམ། སྒོ་བྱང་། ཚོང་རྟགས་སོགས་བཟོ་དགོས་ཞེས་གཏན་ལ་ཕབ་ནས་ཁྱབ་བསྒྲགས་བྱས་ཡོད།
     ༣ འབྲེལ་ཡོད་སློབ་གྲྭ་རྣམས་ཀྱིས་མི་རིགས་གྲངས་ཉུང་གིས་སྤྱི་ཁྱབ་ཏུ་སྤྱོད་པའི་སྐད་དང་ཡི་གེ་བཀོལ་ནས་སློབ་ཚན་ཁྲིད་པའམ་ཡང་ན་སྐད་ཡིག་གཉིས་སྤྱད་ནས་སློབ་ཚན་ཁྲིད་བཞིན་ཡོད། མི་རིགས་གྲངས་ཉུང་གི་སློབ་མ་གཙོ་བོར་བྱས་ཏེ་བསྡུ་བའི་སློབ་གྲྭ་ཆ་རྐྱེན་ཡོད་པ་རྣམས་ཀྱིས་མི་རིགས་གྲངས་ཉུང་གི་ཡི་གེ་སྤྱད་ནས་བསླབ་དེབ་བསྒྲིགས་པ་དང་། མི་རིགས་གྲངས་ཉུང་གི་སྐད་ཀྱི་སྟེང་ནས་སློབ་ཚན་ཁྲིད་བཞིན་ཡོད། སློབ་ཆུང་གི་ལོ་རིམ་མཐོན་པོའམ་འབྲིང་རིམ་སློབ་གྲྭ་རྣམས་སུ་རྒྱ་ཡིག་གི་སློབ་ཚན་བཀོད་སྒྲིག་བྱས་ནས་རྒྱལ་ཡོངས་ཀྱིས་ཐུན་མོང་དུ་སྤྱོད་པའི་སྤྱི་སྐད་ཁྱབ་གདལ་དུ་གཏོང་བཞིན་ཡོད།
     ༤ མི་རིགས་ཁག་གིས་ཕན་ཚུན་གྱི་སྐད་ཡིག་ལ་སློབ་སྦྱོང་བྱེད་པར་རྟིང་སྐུལ་བྱེད་བཞིན་ཡོད། མི་རིགས་རང་སྐྱོང་ས་གནས་ཀྱི་རང་སྐྱོང་ལས་ཁུངས་ཀྱིས་མི་རིགས་ཁག་གི་ལས་བྱེད་པ་རྣམས་ལ་ཕན་ཚུན་གྱི་སྐད་ཡིག་ལ་སློབ་སྦྱོང་བྱེད་དགོས་པའི་སྐོར་གྱི་སློབ་གསོ་བཏང་ནས་རྟིང་སྐུལ་བྱེད་བཞིན་ཡོད་ཅིང་། རྒྱ་རིགས་ཀྱི་ལས་བྱེད་པས་རང་ཉིད་གནས་པའི་ས་དེ་གའི་མི་རིགས་གྲངས་ཉུང་གི་སྐད་ཡིག་ལ་སློབ་སྦྱོང་བྱེད་དགོས་པ་དང། མི་རིགས་གྲངས་ཉུང་གི་ལས་བྱེད་པ་རྣམས་ཀྱིས་རང་མི་རིགས་ཀྱི་སྐད་དང་ཡི་གེར་སློབ་སྦྱོང་བྱས་ནས་བཀོལ་སྤྱོད་བྱེད་པ་དང་ཆབས་ཅིག་ཏུ་རྒྱལ་ཡོངས་ཀྱིས་ཐུན་མོང་དུ་སྤྱོད་པའི་སྤྱི་སྐད་དང་རྒྱ་ཡིག་ལའངསློབ་སྦྱོང་བྱེད་བཞིན་ཡོད། མི་རིགས་རང་སྐྱོང་ས་གནས་ཀྱི་རྒྱལ་ཁབ་ཀྱི་ལས་ཀ་བྱེད་མཁན་རྣམས་ཀྱིས་རང་ཉིད་གནས་པའི་ས་དེ་གའི་སྐད་ཡིག་གཉིས་ཡན་ཐོགས་པ་མེད་པར་འཆད་ཐུབ་པ་ཞིག་ཡིན་ན། དེ་ལ་བྱ་དགའ་སྤྲོད་བཞིན་ཡོད།
     ༥ མི་རིགས་གྲངས་ཉུང་གི་སྐད་དང་ཡི་གེ་བཀོལ་སྤྱོད་བྱས་ཏེ་དར་རྒྱས་གཏོང་བར་རོགས་རམ་བྱས་ནས་ཆ་རྐྱེན་ལེགས་པར་བསྐྲུན་ཡོད། ཀྲུང་གོ་གསར་བ་དབུ་བཪྙེས་རྗེས་མི་རིགས་གྲངས་ཉུང་ཁག་རང་མོས་ཡིན་པ་གཞིར་བཞག་བྱས་ནས་བརྟག་དཔྱད་དཔྱིས་ཕྱིན་པ་ཞིག་བྱས་པ་ཡིན། མི་རིགས་གྲངས་ཉུང་བཅུ་ལ་ཡི་གེ་གསར་གཏོད་བྱེད་རོགས་བྱས་ཤིང། མི་རིགས་ཁ་ཤས་ལ་ཡི་གེ་ཇེ་ལེགས་སུ་གཏོང་རོགས་བྱས་པ་ཡིན། ཀྲུང་དབྱང་དང་ས་གནས་སུ་མི་རིགས་གྲངས་ཉུང་གི་ཡི་གེའི་དཔེ་སྐྲུན་ལས་ཁུངས་དང་། ཡིག་བསྒྱུར་ལས་ཁུངས། གྲངས་ཉུང་མི་རིགས་ཀྱི་སྐད་ཀྱི་རླུང་འཕྲིན་ལས་ཁུངས་དང་བཪྙན་འཕྲིན་ལས་ཁུངས་བཙུགས་ཡོད་མ་ཟད། ད་དུང་མི་རིགས་ཀྱི་ཡི་གེའི་ཚགས་པར་ཡང་ཡོད། དེང་སྐབས་རྒྱལ་ཡོངས་སུ་མི་རིགས་གྲངས་ཉུང་གི་ཡི་གེའི་དཔེ་སྐྲུན་ཁང་༣༠ལྷག་ཡོད་པའི་ཁར། རྩོམ་བསྒྱུར་ལས་ཁུངས་ཀྱང་ཡོད་པ་དང་། ལོ་རེར་མི་རིགས་༢༠ལྷག་གི་ཡི་གེའི་དཔེ་དེབ་སྣ་ཚོགས་རིགས་༥༩༠༠པར་དུ་འདེབས་བཞིན་མཆིས། ཀྲུང་དབྱང་མི་དམངས་ཀུན་ཁྱབ་རླུང་འཕྲིན་ལས་ཁུངས་ཀྱི་ཁོངས་སུ་སོག་པོ་དང་། བོད། ཡུ་གུར། ཧ་ཟགཁྲའོ་ཞན་སོགས་མི་རིགས་ལྔའི་སྐད་ཀྱི་རླུང་འཕྲིན་ཡོད། མི་རིགས་༢༠ལྷག་གི་སྐད་ཀྱི་སྟེང་ནས་གཏམ་རྒྱུད་ཀྱི་གློག་བཪྙན་༣༤༡༠ཕབ་བསྒྱུར་བྱས་ཡོད་པ་དང་། མི་རིགས་གྲངས་ཉུང་གི་སྐད་དང་ཡི་གེར་བསྒྱུར་བའི་གློག་བཪྙན་ཁྲི་༡.༠༤ཡོད་པ་རེད།
     ༦ མི་རིགས་ཀྱི་སྐད་ཡིག་ལས་སྒྲུབ་པ་ཅི་ཐུབ་གང་ཐུབ་ཀྱིས་གསོ་སྐྱོང་བྱས་ཡོད། སྲིད་གཞུང་གིས་སྔ་ཕྱིར་ཀྲུང་དབྱང་དང་མི་རིགས་རང་སྐྱོང་ས་གནས་ཁག་ཏུ་མི་རིགས་གྲངས་ཉུང་གི་སྐད་ཡིག་ལས་སྒྲུབ་ལས་ཁུངས་དང་ཞིབ་འཇུག་ལས་ཁུངས་བཙུགས་ཡོད། ཀྲུང་དབྱང་མི་རིགས་སློབ་གྲྭ་ཆེན་མོ་དང་། མི་རིགས་སློབ་གླིང་ཁ་ཤས། སྐད་ཡིག་ཚན་པ་དང་འབྲེལ་བ་ཡོད་པའི་མཐོ་རིམ་སློབ་གླིང་བཅས་སུ་མི་རིགས་གྲངས་ཉུང་གི་སྐད་ཡིག་སྡེ་ཚན་〔འཛིན་གྲྭ〕ནམ་ཡང་ན་མི་རིགས་གྲངས་ཉུང་གི་སྐད་ཡིག་ཆེད་ལས་རྣམ་པ་སྣ་ཚོགས་བཙུགས་ཏེ་མི་རིགས་གྲངས་ཉུང་གི་སྐད་ཡིག་ལས་ཀ་སྒྲུབ་པའི་ལས་བྱེད་པ་དང་ཞིབ་འཇུག་པའི་དཔུང་སྡེ་ཤིན་ཏུ་མང་པོ་ཞིག་གསོ་སྐྱོང་བྱས་ཡོད་པ་ཡིན།