བྲོ་ཞིམ་ཕག་གཟུག

ཨ་ཚོགས་ཀྱིས་བྲིས།        2010-12-17

བྲོ་ཞིམ་ཕག་གཟུག་བཙོས་མ་ནི་རོང་བྲག་བོད་པ་ཚོས་ཟས་མཆོག་ཅིག་ཏུ་བརྩིས་ཏེ་དུས་སྟོན་དུ་དུས་ཆེན་ཐོག་རང་གིས་ལོངས་སུ་སྤྱོད་པ་དང་།མགྲོན་པོ་སྣེ་ལེན་བྱེད་པར་གསོལ་ཚིགས་སུ་སྦྱིན་པ་དང་།རྩ་ཆེ་བའི་ཉེ་དུ་མཛའ་གྲོགས་དང་གོང་དཔོན་པོ་རྣམས་ལ་ལག་རྟགས་སུ་གནང་གི་ཡོད་པ་རེད།ཁྱད་པར་དུ་རོང་བྲག་ཏུ་ཡུལ་སྐོར་ལྗོངས་རྒྱུའི་ལས་རིགས་དེ་དར་འཕེལ་བྱུང་ནས་བཟུང་བྲོ་ཞིམ་ཕག་གཟུག་དེར་ལྗོངས་རྒྱུ་བ་རྣམས་ཀྱི་དགའ་བསུ་ཚད་མེད་ཐོབ་ཡོད་པ་རེད། བྲོ་ཞིམ་ཕག་གཟུག་གི་ལས་སྟངས་ནི།ཕག་པའི་ཤ་ཁོག་གཅིག་གི་སྟོད་སྨད་གཟུག་སོ་སོ་ཕུད་རྗེས་ཕྱིའི་པགས་པ་བཀོད་པ་ཚིལ་དང་རུས་པ་ཚང་མ་ལེན་རྗེས་སྨྱུག་མའམ་ཤིང་དབྱུག་མཉེན་མོ་ཞིག་གིས་ཤ་ཚང་མ་ལེབ་ལེབ་ཏུ་རྒྱ་ཆེར་བཀྲམས་པ།དེ་ནས་བྲོ་ཞིམ་རྩྭ་སྨན་གྱི་ཕྱེ་མ་ཤ་ལེབ་མོའི་ངོས་སུ་སྙོམས་པོ་བསྐུས་ཏེ་རླངས་སྐམ་བྱེད་བཅུག་ན་ཆོག ཕག་གཟུག་ཟ་ཁར་མེ་ཚད་འབྲིང་བས་ཆུ་འཁོལ་རྗེས་ཆུ་ཚོད་ཕྱེད་ཀ་ཙམ་བཙོས་ནས་བྲོ་བ་ཧ་ཅང་ཞིམ་པོ་རེད།བོད་ཕག་གི་ཤ་གཟུག་ལ་གཞན་དང་མི་འདྲ་བའི་བྲོ་ཞིམ་ཞིག་ལྡན་པའི་ཟེར་སྒྲོས་མཆིས་སོ།
  • ལེ་ཚན་སྔོན་མ།:བསྒྲིལ་ཐུག་རོང་བྲག་སྐད་དུ་བསྒྲིལ་བསྒྲིལ་པུ་ཏེ་ཟེར།
  • ལེ་ཚན་རྗེས་མ།:བཀྲ་ཤིས་ཉི་མ་ལུང་པའི་མིང་གྲགས་སིལ་ཟས།