སྒོང་ལོག་ལོག

དབང་ཆེན་ནས།        2010-12-16

གྲོའི་བག་ཕྱེ་ཆུར་བརྫིས་ཏེ་ལེབ་མོ་བྱས་པ་རྫ་མའམ་ཁྲོ་ལྕགས་སོགས་ཀྱི་སླ་ངའི་ནང་སྐོམ་སྲེག་བྱས་པའི་བག་ལེབ་ལ་གོ་རེ་ཞེས་པའམ་འཁུར་བ་ཟེར་གྱི་ཡོད་ལ།དཀར་མཛེས་རྫོང་ཕྱོགས་ཀྱི་དེ་ལ་སྒོང་ཞེས་འབོད་ཀྱི་ཡོད།སྒོང་ལོག་ལོག་ཞེས་པ་དེ་ནི་ས་ཁུལ་གཞན་ནས་མཐོང་ཐོས་ཉུང་ཞིང་ཡུལ་གྱི་ཁྱད་ཐོན་འདྲ་བ་ཆགས་ཡོད།དེ་ནི་གྲོའི་བག་ཕྱེ་བུལ་ཏོག་འདེབས་པའི་ཆུར་བརྫིས་ནས་ཞིང་དུ་མཐོ་གང་ཙམ་དང་དཔངས་སུ་སོ་གསུམ་བཞི་ཙམ་ཡོད་པའི་སྒོར་སྒོར་བཅོས་ནས་རྫ་མའམ་ཁྲོ་ལྕགས་སོགས་ཀྱི་སླ་ངའི་ནང་སྐོམ་སྲེག་བྱས་ཏེ་ཅུང་སྲ་མཁྲེགས་ཅན་དུ་གྱུར་རྗེས་དེ་ཐབ་ཀའི་གོ་རའི་མེ་མུར་འོབསནང་ཆུ་ཚོད་ཕྱེད་ཙམ་བཏུམས་ནས་ཚོས་པ་ན།གོ་ཐལ་གཙང་མར་ཕྱིས་པའི་སྒོང་ལོག་ལོག་དེའི་ཐོག་ངོས་སུ་ཁ་གཅོད་ལྟ་བུའི་སྒོང་ལྤགས་གོ་གོ་ཞིག་དྲལ་ནས་ནང་སྙིང་སོབ་སོབ་དུ་གཤོངས་ནས་དེའི་ནང་མར་དང་ཕྱུ་ར་དང་བྱེ་མ་ཀ་ར་སོགས་བསྲེས་ནས་བཟའ་ནས་རོ་བྲོ་བ་ཞིམ་ལ་གསོ་བཅུད་ཀྱང་ཕུན་སུམ་ཚོགས་པོ་འབྱུང་གི་ཡོད།དེ་མིན་སྒོང་དེའི་ནང་ལོ་མ་དང་སྣུམ་ཚིལ་མཉམ་བཙོ་བྱས་པའི་ཁུ་བ་གར་མོ་བསྲེས་ནས་ཟོས་ནའང་བཟའ་ཆས་དྲི་རོ་ཞིམ་པོ་དམིགས་བསལ་ཅན་ཡོང་གི་ཡོད།སྒོང་ལྤགས་ཇ་ཐེངས་དེ་རང་དུ་ཟ་མ་ཐུབ་ཚེ་ཕྱི་ངོས་སུ་མར་ཅུང་ཙམ་བྱུགས་ཇ་ཐེངས་རྗེས་མའམ་ཉི་མ་ཁ་ཤས་སོང་རྗེས་ཕོ་བའི་ནང་ཇ་ཚ་མོའི་ནང་གཏུབས་ནས་ཟོས་ནའང་ཞིམ་ཡོད་པ་རེད།
  • ལེ་ཚན་སྔོན་མ།:དཀར་མཛེས་ཆུ་གཤེར་རྩམ་པ།
  • ལེ་ཚན་རྗེས་མ།:བསྒྲིལ་ཐུག་རོང་བྲག་སྐད་དུ་བསྒྲིལ་བསྒྲིལ་པུ་ཏེ་ཟེར།