བོད་མིས་བསང་གཏོང་རྒྱུར་དང་དོད་ཆེན་པོ་བྱེད་ཀྱིན་ཡོད་པ་རེད།བོད་མིའི་ཁང་པ་མང་ཆེ་བའི་ཡང་ཐོག་ཏུ་བསང་བུམ་ཡོད་པ་དང་།བསྐོར་ལམ་དང་ལྷ་ཁང་སོགས་སྒོ་འགྲམ་གང་སར་བསམ་བུམ་མཐོང་རྒྱུ་ཡོད་པ་རེད།དུས་རྒྱུན་དུ་རི་བསང་དང་ཀླུ་བསང་སོགས་དར་སྲོལ་ཡོད་ཅིང་།ད་རུང་བོད་མིའི་གོམས་གཤིས་སུ་བླ་སྤྲུལ་དང་།དཔོན་ཆེན་ཁག་ཕེབས་དུས་བསང་བཏང་ནས་བསུ་མ་བྱེད་སྲོལ་ཡང་ཡོད་པ་རེད།
 བོད་མིའི་བསང་གཏོང་བའི་གོམས་སྲོལ་དེ་དུས་ཇི་ཙམ་ནས་དར་བ་ཡིན་པ་དང་།དེའི་འབྱུང་རྩ་གང་ཡིན་པ་ཞིག་ཁ་གསལ་ཡིག་ཐོག་ལ་བཀོད་པ་ཞིག་མཇལ་རྒྱུ་མ་བྱུང་ཡང་།མཁས་དབང་ཆབ་སྤེལ་ཚེ་བརྟན་ཕུན་ཚོགས་མཆོག་ནས་བསང་ནི་བོད་རིགས་ཀྱི་ལྷ་གསོལ་བའི་བྱེད་སྒོའི་ནང་མེད་དུ་མི་རུང་བའི་ཆ་ལག་ཅིག་ཡིན།ལོ་རྒྱུས་ཀྱི་ཐོག་ནས་བཤད་ན།གཙོ་བོ་མི་ཡུལ་གྱི་བཙོག་གྲིབ་མཐའ་དག་སེལ་ནས་ལྷ་སྤྱན་འདྲེན་པའི་སྔོན་འགྲོའི་ཆོ་ག་ཡིན་པར་གསུང་ཞིང་།བོན་གྱི་ཡོངས་རྩེའི་འགྲེལ་པ་ཞེས་པ་ལས།གཉའ་ཁྲི་བཙན་པོ་ལས་ལྷ་ཡུལ་ནས་བྱོན་ཚུལ་གླེང་སྐབས་བོན་ཡང་ངལ་དང་།མཚེ་མི།ཙོ་མི་གསུམ་ཡང་མཉམ་དུ་མངགས་པར་“ཡབ་ཀྱི་ཞལ་ནས།གནམ་ལྷ་དོ་ལ་གཤེགས་པ་ན།མི་ཡུལ་བཙོག་དང་ནལ་ཆེ་བས།ཡ་ངལ་གྱིས་སྣ་དྲོངས་ཤིག  མཚེ་མིས་སྐུ་གཡས་རྟེན་ཅིག ཙོ་མིས་སྐུ་ཡི་གཡན་རྟེན་ཅིག ཡ་ངལ་གྱིས་སེལ་དང་བསང་གྱིས”ཞེས་བསྟན་ཡོད།དེ་ལྟར་ན་ལྷ་ཡི་རིགས་སྤྱན་འདྲེན་ཞུ་བའི་དུས་སུ།ཐོག་མར་བསང་དུད་བདུགས་ནས་ཡུལ་ཁམས་ཀྱི་བཙོག་གྲིབ་རྣམས་སེལ་དགོས་པ་རང་ཤུགས་སུ་མཁྱེན་ཐུབ་པར་མ་ཟད།བོད་མི་ཡིས་བསང་གཏོང་བའི་གོམས་སྲོལ་དེ་དར་ནས་ད་བར་ལོ་ཉིས་སྟོང་ལྷག་གི་དུས་ཡུན་ཡོད་པ་དང་།བསང་གཏོང་བའི་སྲོལ་དེ་བོན་ཆོས་ཀྱི་ཤུགས་རྐྱེན་ཡིན་ཅིང་།དེའི་བསམ་པའི་སྐུལ་སློང་བཙོག་གྲིབ་སེལ་རྒྱུའི་ཆེད་དུ་ཡིན་པ་བཅས་གསལ་པོ་རྟོགས་ཐུབ།།