བློ་བཟང་ཚེ་རིང་ངམ་ཨ་ཁུ་སྟོན་པ་ནི་ལོ་རབས་བཞི་བཅུ་དང་ལྔ་བཅུའི་ནང་ལྷ་མོ་སོགས་ཀྱི་སྒྱུ་རྩལ་བྱང་ཆུབ་པའི་མི་སྣ་གྲགས་ཅན་ཞིག་རེད། ཁོང་འཕན་ པོ་རྒྱལ་ལྷ་ཁང་གྲོང་ཚོའི་ཤར་མ་ཞེས་པའི་ཞིང་པའི་ཁྱིམ་ཚང་ཞིག་ལ་སྐྱེས་པ་དང་། ཆུང་དུས་ནས་གཟུགས་བྱད་ལེགས་ལ་སྤྱང་གྲུང་འཛོམས་པ། གྲུང་ཤ་ དོད་ལ་དྲན་རྒྱུ་རྒོད་པ། རྩེད་མོར་དགའ་བ། གཞས་དང་ཞབས་བྲོར་དགའ་ ཞིང་གཞས་ཚིག་སྣ་ཚོགས་སྐྱེས་སྟོབས་ཀྱིས་འཕྲལ་མར་བཟོ་ཐུབ་པ། མི་གཞན་ ལ་སྤྱང་གྲུང་སློབ་མཁས་པ་སོགས་ལ་བརྟེན་ཡུལ་མི་ཚོས་སྔོན་གྱི་ཨ་ཁུ་སྟོན་པ་དང་འདྲ་བས་ཨ་ཁུ་སྟོན་པ་ཞེས་མིང་བཏགས་པ་དེ་རྗེས་སུ་ཡོངས་གྲགས་སུ་གྱུར། རིག་གནས་སྒྱུ་རྩལ་ལ་སྦྱང་གོམས་ལེགས་པར་ཐོན་པ་མ་ཟད། ཕྱུགས་ ནད་འགོག་བཅོས་ཤེས་ལ་རྟ་ལེགས་ཉེས་བརྟག་དཔྱད་དང་། རྟ་ནད་ཀྱང་ བཅོས་ཤེས་སྟབས་རྭ་སྒྲེང་སྐུ་ཕྲེང་ལྔ་བ་རྒྱལ་ཟུར་གནང་རྗེས་སུ་ཨ་ཁུ་སྟོན་པ་དང་དགའ་ཆོས་དབུ་ཟུར་གསང་བདག་ཟེར་བ་གཉིས་རྭ་སྒྲེང་སྤྲོ་ཁང་དུ་ཐུགས་ཤག་ཀྱང་བཀོད་སྒྲིག་གནང་སྟེ་ལྷ་མོའི་རྣམ་ཐར་དང་གར་རོལ་ལ་དགྱེས་ཚུལ་བཞེས་སྐད། རབ་བྱུང་བཅུ་དྲུག་པའི་མེ་ཕག（༡༩༤༧）ལོར་ར་སྟག་ དོན་རྐྱེན་ནང་རྭ་སྒྲེང་ལ་ཇུས་ཉེས་བྱུང་རྗེས་བོད་ས་གནས་སྲིད་གཞུང་ནས་ཨ་ཁུ་སྟོན་པ་ལྷ་སའི་སྐྱོར་མོ་ལུང་ལྷ་མོ་ཚོགས་པའི་ནང་བཅུག ཨ་ཁུ་སྟོན་ པས་ལྷ་མོའི་ཚོགས་པའི་རྒྱ་ལུ་རྒན་པ་དང་འཁྲབ་ཚན་ནང་གི་མི་སྣ་གཙོ་བོ་་འགའ་ཞིག་འཁྲབ་སྟོན་བྱེད་ཅིང་། ཁོང་གི་སྐད་གདངས་ཧ་ཅང་སྙན་ལ་ རྣམ་ཐར་གྱི་མགྲིན་འགུག་ལེགས་པ། ཕོ་འཁྲབ་མོ་འཁྲབ་གང་ཡིན་ ཡང་ལུས་ ཀྱི་འཁྱེར་བཟོ་དང་། རྐང་ལག་སྟངས་སྟབས། དགའ་སྐྱོ་ཁྲོ་གསུམ་གྱི་རྣམ་ འགྱུར། འཁྲབ་བྱ་གང་ཡིན་དེའི་ཉམས་འགྱུར་ དང་རྣམ་ཐར་ཚིག་གདངས་ སོགས་ལ་དམིགས་བསལ་གྱི་ཁྱད་ཆོས་ལྡན་པས་ནོར་བུ་གླིང་གའི་ཞོ་སྟོན་སོགས་ཀྱི་སྐབས་ཨ་ཁུ་སྟོན་པས་རྣམ་ཐར་གཏོང་ སྐབས་ལྟད་མོ་བ་ཚོས་ཀྱང་ གཟབ་ནན་གྱིས་ཉན་གྱི་ཡོད། རྒྱུན་དུ་འཕན་པོ་ རྒྱལ་ལུག་ལྷས་ལྷ་ཁང་གི་ཉེ་ འགྲམ་དུ་ཡོད་པའི་རང་ཁྱིམ་དུ་སྡོད་པ་ལས་སྐོར་བསྐྱོད་འཁྲབ་སྟོན་བྱེད་པ་འགྲོ་གི་མེད། དམངས་གཙོའི་བཅོས་བསྒྱུར་རྗེས་སུ་ ཕ་ཡུལ་དུ་ལྷ་མོ་ཚོགས་པ་ བཙུགས་ནས་འཁྲབ་སྟོན་བྱས་པ་དང་། ལྷུན་གྲུབ་ རྫོང་མི་དམངས་སྲིད་ གཞུང་ནས་འཐབ་ཕྱོགས་གཅིག་གྱུར་གྱི་ཁོངས་སུ་བསྡུས་ཤིང་། རིག་གནས་ གསར་བརྗེའི་ནང་ཁོང་ལ་རྡུང་རྡེབ་ཕོག་ནས（༡༩༧༠）ཙམ་ལ་ངལ་རྩོལ་ བསྒྱུར་བཀོད་ཁོངས་སུ་གྲོངས།