བོད་ཀྱི་ལོ་རྒྱུས་ཐོག་ཕྱི་རྒྱལ་དུ་སློབ་སྦྱོང་བྱེད་པར་སློབ་གྲྭ་བ་མངགས་པའི་ལོ་རྒྱུས་དེ་དུས་རབས་བདུན་པའམ་དེ་ལས་སྔར་མོ་ནས་ཡོད་མོད།ཕལ་ཆེར་ནང་བསྟན་ཆོས་སློབ་པར་འགྲོ་བའི་སློབ་གྲྭ་བ་དག་ཡིན་ཞིང་སྤྱི་ཚོགས་ཚན་རིག་དང་སྒོས་སུ་ཚན་རྩལ་སློབ་པར་མངགས་པ་དང་འགྲོ་བའི་སློབ་གྲྭ་བ་ནི་ཉིན་མོའི་སྐར་མ་ལས་དཀོན།
དུས་རབས་བཅུ་དགུ་པར་དབྱིན་ཇི་བཙན་རྒྱལ་རིང་ལུགས་ཀྱིས་བོད་ལ་བཙན་འཛུལ་བྱས་རྐྱེན་བོད་ལ་དབྱིན་འགོག་དམག་འཁྲུག་ཐེངས་མ་གཉིས་ལངས་པ་དང་།རྗེས་སུ་རྒྱལ་དབང་སྐུ་ཕྲེང་བཅུ་གསུམ་པས་དབྱིན་ཇི་བཙན་རྒྱལ་རིང་ལུགས་པས་རྒྱ་གར་དུ་ཉེ་རབས་ཀྱི་འཛུགས་སྐྲུན་མང་པོ་བྱས་ཡོད་པ་གཟིགས་རྗེས་སྐུལ་མ་ཆེན་པོ་ཐེབས་ཏེ་བོད་དུ་བཅོས་བསྒྱུར་དང་འཛུགས་སྐྲུན་འགའ་ཞིག་བྱེད་དགོས་དགོངས་པར་བརྟེན།ལྷ་སའི་མི་དྲག་གི་གཞོན་དུ་ཁག་གཅིག་དབྱིན་ཇི་དང་རྒྱ་གར་དུ་སློབ་སྦྱོང་བྱེད་པར་གཏོང་གནང་བ།ཁག་དང་པོར་དབྱིན་ཇི་རུ་གཏེར་འདོན་ལག་རྩལ་དང་ཐིག་ལེན་དཔེ་རིས་འབྲི་བའི་ཤེས་བྱ།གློག་རླངས་ཨར་ལས།དམག་དོན་བཅས་སྦྱོང་མཁན་སློབ་གྲྭ་བ་བཞི་མངགས་ཡོད་པ། རྒྱལ་དབང་སྐུ་ཕྲེང་བཅུ་གསུམ་པའི་རྣམ་ཐར་ནང་བཀོད་པར་གཞིགས་ན།བྱང་ངོས་པ་རིག་འཛིན་རྡོ་རྗེ་དང་སྨོན་གྲོང་མཁྱེན་རབ་ཀུན་བཟང་།སྐྱིད་སྦུག་པ་དབང་འདུས་ནོར་བུ།སྒོག་མཁར་བ་བསོད་ནམས་མགོན་པོ་བཅས་བཞི་དབྱིན་ཇིར་སློབ་སྦྱོང་བྱེད་པར་གཏོང་སྐབས།བཀའ་ཤག་གིས་རྩིས་དཔོན་ལུང་ཤར་སློབ་གྲྭ་བ་དེ་ཚོར་ལྟ་སྐུལ་བྱེད་ཁམན་དུ་བསྐོས་པ་རེད།དེ་ནས་རྩིས་དཔོན་ལུང་ཤར་གྱིས༡༩༡༥ལོར（མིན་གོའི་སྲིད་ལོ༤པ）སློབ་གྲྭ་
་བ་རྣམས་ཁྲིད་ནས་དབྱིན་ཇིའི་ལུན་ཏུན་གྲོང་ཁྱེར་དུ་ཕྱིན་པ་རེད།བྱང་ངོས་པ་རིག་འཛིན་རྡོ་རྗེས་གློག་གི་འཕྲུལ་འཁོར་སློབ་སྦྱོང་དང་སྐྱིད་སྦུག་པ་དབང་འདུས་ནོར་བུས་གློག་འཕྲིན་སློབ་སྦྱོང་།སྨོན་གྲོང་མཁྱེན་རབ་ཀུན་བཟང་གིས་གཏེར་ཁ་འདོན་ཚུལ་སློབ་སྦྱོང་།སྒོག་མཁར་བ་བསོད་ནམས་མགོན་པོས་དམག་དོན་སློབ་སྦྱོང་བཅས་བྱས་ཡོད་པ་རེད། ༡༩༢༠ལོར་ཁོ་ཚོ་བོད་དུ་ཕྱིར་ལོག་རྗེས།སྐྱིད་སྦུག་པ་དབང་འདུས་ནོར་བུས་ལྷ་སའི་ཏར་ཁང་འཛུགས་རྒྱུའི་སྟ་གོན་བྱེད་འགོ་བཙུགས་ཏེ་ལྷ་ས་ནས་རྒྱལ་རྩེའི་བར་གྱི་གློག་སྐུད་འཐེན་ཅིང་།（རྒྱལ་རྩེ་ནས་རྒྱ་གར་བར་གྱི་གློག་སྐུད་དབྱིན་ཇིས་འཐེན）རྗེས་སུ་ཏར་ཁང་གི་གཙོ་འགན་ཁུར་བ་རེད།སྒོག་མཁར་བ་བསོད་ནམས་མགོན་པོ་ཡུན་རིང་མ་སོང་བར་ཤི་བ་རེད།སྨོན་གྲོང་མཁྱེན་རབ་ཀུན་བཟང་བོད་དུ་ཕྱིར་ལོག་རྗེས་བཀའ་ཤག་གིས་ཁོ་ལྷ་སའི་བྱང་རིར་གསེར་གྱི་གཏེར་ཁ་འདོན་པར་བཏང་སྐབས་ས་འོག་ནས་སྦལ་བ་གཅིག་ཐོན་པས་གྲྭ་པ་རྣམས་ཀྱིས་དེ་ནི་བཀྲ་མི་ཤིས་པའི་རྟགས་རེད་ཅེས་བཤད་ནས་ངོ་རྒོལ་དྲག་པོ་བྱས་པའི་རྐྱེན་གྱིས།གཏེར་ཁ་འདོན་མཚམས་མ་བཞག་ཀ་མེད་བྱུང་བ་རེད།དེ་ནས་ཡུན་རིང་མ་འགོར་བར་སྨོན་གྲོང་མཁྱེན་རབ་ཀུན་བཟང་ཡང་ཤི་བས་དེ་ནས་བཟུང་གཏེར་ཁ་འདོན་པའི་ལས་དོན་དེ་བདག་གཉེར་བྱེད་མཁན་མེད་པར་གྱུར་པ་རེད།བྱང་ངོས་པ་རིག་འཛིན་རྡོ་རྗེས་རྗེས་སུ་ལྷ་སའི་འཕྲུལ་འཁོར་བཟོ་གྲྭ་བདག་གཉེར་བྱེད་རྒྱུའི་ལས་འགན་ཁུར་བར་མ་ཟད།
༡༩༢༧ལོར（མིན་གོའི་སྲིད་ལོ༡༦པ）ལྷ་སའི་ཆུ་ཤུགས་གློག་འདོན་ཁང་བཙུགས་ནས་གྲོང་ཁྱེར་ལྷ་སར་གློག་ཞུ་སྤར་རྒྱུ་བྱུང་བ་རེད། དེ་ནས་བོད་ཀྱིས་དབྱིན་ཇིའི་ལུན་ཏུན་དུ་སློབ་གྲྭ་བ་བཏང་མེད་རུང་།རྒྱ་གར་དུ་སློབ་སྦྱོང་བྱེད་པར་འགྲོ་མཁན་མི་ཉུང་བ་ཞིག་བྱུང་ཡོད་པ་རེད།