གུ་གེ་རྒྱལ་ཕྲན་གྱི་གནའ་ཤུལ་ནི་བོད་རང་སྐྱོང་ལྗོངས་ཀྱི་གནའ་བོའི་མཁར་གྲོང་གི་ཤུལ་རྙིང་ཞིག་རེད། དེ་ནི་མངའ་རིས་ས་ཁུལ་རྩ་མདའ་རྫོང་ཁོངས་སུ་ཡོད་ཅིང་། རྒྱལ་ཡོངས་ཀྱི་རིག་དངོས་སྲུང་སྐྱོང་སྡེ་ཚན་ཁོངས་སུ་གཏོགས་པ་ཡིན།

གུ་གེ་རྒྱལ་ཕྲན་གྱི་གནའ་ཤུལ་ནི་རི་འདབས་ཀྱི་དེའུ་འབུར་ཆེན་པོ་ཞིག་གི་སྟེང་དུ་ཆགས་ཤིང་། སྟེང་འོག་བར་གྱི་མཐོ་ཚད་སྤྱི་ཁྲེ་སུམ་བརྒྱ་ཙམ་ལ་ཟིན་པ་དང་། དོང་སྦུབས་སུམ་བརྒྱ་སྐོར། གཞན་ཡང་མཐོ་ཚད་སྤྱི་ཁྲེ་བཅུ་ཙམ་ཡོད་པའི་མཆོད་རྟེན་ཁག་གསུམ་བཅས་ཡོད་ལ་ད་དུང་མཁར་ཤུལ་དེའི་ཁྲོད་དུ་མི་རྣམས་ཀྱིས་ཡིད་འཇོག་ཆེན་པོ་བྱེད་པའི་མཆོད་ཁང་དམར་པོ་དང་། མཆོད་ཁང་དཀར་པོ། འཇིགས་བྱེད་ལྷ་ཁང་། དུས་འཁོར་ལྷ་ཁང་། སྨན་བླའི་ཕོ་བྲང་། ཚོམས་ཆེན་སོགས་ཡོད། ལྷ་ཁང་སོ་སོའི་ནང་ལྷའི་འཇིམ་སྐུ་ཆག་རོ་མང་པོ་ཡོད་པ་མ་ཟད། གྱང་ལྡེབས་སུ་ལྡེབས་བྲིས་ཚར་དུ་དངར་བ་མང་པོ་ཡོད་དོ། ས་མཐོའི་ཁུལ་འདི་ནམ་ཟླ་སྐམ་ཤས་ཆེ་ལ་དབྱང་རླུང་ཉུང་བ་སོགས་ཀྱི་རྒྱུ་རྐྱེན་ཡོད་ནའང་གནའ་ཤུལ་གྱང་རོ་དང་གནའ་བོའི་དངོས་རྫས་དེ་རྣམས་དུས་ད་ལྟའང་ཉམས་ཆག་བྱུང་མེད།