ཉེ་ཆར། བོད་ཀྱི་ལོ་ཙཱ་བ་ཆེན་མོ་འབལ་འཇམ་དབྱངས་དར་རྒྱས་ལགས་ཀྱིས་བསྒྱུར་ཅིང་མཆན་བཏབ་པའི«མཚོ་བོད་མཐོ་སྒང་གི་གནའ་བོའི་མི་རིགས་འབྲེལ་འདྲིས་སྐོར་གྱི་ཡིག་ཚང་བསྒྱུར་འགྲེལ»ཞེས་པའི་པོད་དྲུག་གི་བདག་ཉིད་ཅན་གྱི་དཔེ་ཚོགས་ཤིག་བོད་ལྗོངས་མི་དམངས་དཔེ་སྐྲུན་ཁང་གིས་དཔེ་སྐྲུན་འགྲེམ་སྤེལ་བྱས། དེ་དག་ལས་པོད་དང་པོ་ནི《ཐང་རྒྱལ་རབས་ཀྱི་ལོ་རྒྱུས་རྙིང་མ》དང《ཐང་རྒྱལ་རབས་ཀྱི་ལོ་རྒྱུས་གསར་མ》 《ཐུང་ཏེན》《ཐང་རྒྱལ་རབས་ཀྱི་ལམ་སྲོལ་གནད་བསྡུས》བཅས་ཀྱིས་གྲུབ་པ་ཡིན། འདི་དག་ནི་ཐང་རྒྱལ་རབས་དུས་ཀྱི་ལོ་རྒྱུས་ཆ་ཚང་བ་བཀོད་པ་སྔ་ཤོས་ཀྱི་དེབ་ཐེར་དང་རྒྱལ་རབས་སོ་སོའི་ཁྲིམས་སྲོལ་ལམ་ལུགས་བཟོས་ཚུལ་དང་འཕེལ་རིམ་སོགས་ཀྱི་སྐོར་ཡིན། པོད་གཉིས་པ་ནི《སྲིད་སྐྱོང་མེ་ལོང》ཡིན་ལ། དེ་ནི་སུང་བྱང་མའི་དུས་ཀྱི་ཆབ་སྲིད་པ་དང་ལོ་རྒྱུས་སྨྲ་བ་གྲགས་ཅན་སི་མ་ཀོང་སོགས་ཀྱིས་སྤྱི་ལོ1084ལོར་བརྩམས་ནས་གྲུབ་པ་ཞིག་ཡིན་འདུག། པོད་གསུམ་པ་ནི《ཡིག་ཚང་མ་ཧཱ་རུས་སྦལ》ཡིན་ལ། དེ་ནི་ཀྲུང་གོའི་གནའ་རབས་ཀྱི་རིགས་དབྱེ་དེབ་ཏུ་གཏོགས་པའི་དེབ་ཐེར་གྲགས་ཅན་ཞིག་ཡིན་ལ། སུང་རྒྱལ་རབས་བྱང་མའི་དུས་ཀྱི“དེབ་ཆེན་བཞིའི”ཡ་གྱལ་ཡང་ཡིན། འགྱུར་དེབ་སྟོད་སྨད་གཉིས་ཀྱི་བདག་ཉིད་ཅན་ཞིག་བྱས་ནས་གྲུབ་འདུག། པོད་བཞི་པ་ནི《ཧན་རྒྱལ་རབས་ཀྱི་ལོ་རྒྱུས》《ཧན་རྒྱལ་རབས་ཤར་མའི་ལོ་རྒྱུས》《ཅིན་རྒྱལ་རབས་ཀྱི་ལོ་རྒྱུས》《སུང་རྒྱལ་རབས་ཀྱི་ལོ་རྒྱུས》《ཆིང་རྒྱལ་རབས་ལྷོ་མའི་ལོ་རྒྱུས》《ལིའང་རྒྱལ་རབས་ཀྱི་ལོ་རྒྱུས》《ཝེ་རྒྱལ་རབས་ཀྱི་ལོ་རྒྱུས》《ཀྲོའུ་རྒྱལ་རབས་ཀྱི་ལོ་རྒྱུས》《རྒྱལ་རབས་བྱང་མའི་ལོ་རྒྱུས》བཅས་རྒྱ་ཡིག་གི་དེབ་ཐེར་དགུ་རུ་བཀོད་པའི་མཚོ་བོད་མཐོ་སྒང་གི་གནའ་བོའི་རྒྱལ་ཕྲན་དང་ཚོ་པ་ཁག་ཅིག་གི་ལོ་རྒྱུས་རྒྱུ་ཆ་བོད་ཡིག་ཏུ་བསྒྱུར་བ་ཞིག་ཡིན། པོད་ལྔ་པ་ནི《སུའེ་རྒྱལ་རབས་ཀྱི་ལོ་རྒྱུས》《ཐང་རྒྱལ་རབས་ཀྱི་ལོ་རྒྱུས་རྙིང་མ》《ཐང་རྒྱལ་རབས་ཀྱི་ལོ་རྒྱུས་གསར་མ》《རྒྱལ་རབས་ལྔའི་ལོ་རྒྱུས་རྙིང་མ》《རྒྱལ་རབས་ལྔའི་ལོ་རྒྱུས་གསར་མ》《སུང་རྒྱལ་རབས་ཀྱི་ལོ་རྒྱུས》《ལིའོ་རྒྱལ་རབས་ཀྱི་ལོ་རྒྱུས》《ཅིན་རྒྱལ་རབས་ཀྱི་ལོ་རྒྱུས》བཅས་རྒྱ་ཡིག་གི་དེབ་ཐེར་དགུ་རུ་བཀོད་པའི་མཚོ་བོད་མཐོ་སྒང་གི་གནའ་བོའི་རྒྱལ་ཕྲན་དང་ཚོ་པ་ཁག་གི་ལོ་རྒྱུས་རྒྱུ་ཆ་བོད་ཡིག་ཏུ་བསྒྱུར་ནས་གྲུབ་པ་ཞིག་ཡིན་ནོ།།