《དཀར་མཛེས་ཉིན་རེའི་ཚགས་པར》གསར་དུ་བཏོན་ནས་ལོ70འཁོར་བའི་དོན་ཆེན་ཟིན་ཐོ།

སྤྱི་ལོ1954ལོའི་ཟླ་བ8པའི་ཚེས23ཉིན་ལ་བཏོན་པའི《དར་མདོའི་གསར་འགྱུར》

སྤྱི་ལོ1954ལོའི་ཟླ་བ8པའི་ཚེས23ཉིན་ལ《དར་མདོའི་གསར་འགྱུར》（《དཀར་མཛེས་ཉིན་རེའི་ཚགས་པར》གྱི་སྔ་མིང་།）ཀློག་པ་པོའི་སྤྱན་ལམ་དུ་བསྟར་ནས་ད་བར་ཏག་ཏག་ལོ70འཁོར་ཡོད། ལོ70ནི་མི་ལ་མཚོན་ན་རྒན་རྒོན་གྱི་གྲས་སུ་ཚུད་མོད། འོན་ཀྱང་བྱ་གཞག་ཅིག་གི་ངོས་ནས་བརྗོད་ན་དེ་ནི་དར་རྒྱས་ཆེ་བའི་དུས་དང་ཏག་ཏག་འཁེལ་ཡོད། 《དཀར་མཛེས་ཉིན་རེའི་ཚགས་པར》གྱི་མདུན་སྐྱོད་གོམ་པ་རེ་རེ་ནི་ཁུལ་ཨུ་དང་ཁུལ་སྲིད་གཞུང་གི་ཐུགས་ཁུར་དང་། ཁུལ་ཨུའི་དྲིལ་བསྒྲགས་པུའུ་ཡི་ཐད་ཀར་འགོ་ཁྲིད། རྒྱ་ཆེ་བའི་ཀློག་པ་པོ་དང་གསར་འགོད་པའི་རྒྱབ་སྐྱོར་བཅས་དང་ཁ་འབྲལ་ཐབས་མེད་ལ། ཚགས་པར་ཁང་གི་ལས་སྒྲུབ་པ་མི་རབས་ནས་མི་རབས་བར་གྱིས་མཐུན་སྒྲིལ་རོགས་རེས་དང་འབད་བརྩོན་ལྷོད་མེད་བྱས་པ་དང་ཡང་ཁ་འབྲལ་ཐབས་མེད། དེ་རིང《དཀར་མཛེས་ཉིན་རེའི་ཚགས་པར》གསར་དུ་བཏོན་ནས་ལོ70འཁོར་བའི་ཉིན་མོ་ཡིན་པས་མ་ཚད། འཕྲིན་སྦྱོར་མཉམ་འདྲེས་ཀྱི་དུས་མཚམས་ཤིག་ལའང་འཁེལ་འདུག་པས། འདིར་ང་ཚོས་ལོ70རིང་ལ《དཀར་མཛེས་ཉིན་རེའི་ཚགས་པར》གོང་འཕེལ་ཡོང་བར་བྱས་རྗེས་འབུལ་མཁན་བློ་མཐུན་ཚང་མར་ཐུགས་རྗེ་ཆེ་ཞུ་རྒྱུ་ཡིན།

ལོ་ངོ་བཅུན་ཅུར་འཕོ་འགྱུར་ཆེན་མོ་བྱུང་ཞིང་བགྲང་བྱ་བདུན་ཅུར་དཀའ་སྤྱད་འབད་བརྩོན་བྱས། དྲན་གསོ་འོས་པའི་ཉིན་མོ་འདིར་ང་ཚོས་ལོ་ངོ་བདུན་ཅུའི་ཀྱག་ཀྱོག་གི་བཞུད་ལམ་རིང་མོར《དཀར་མཛེས་ཉིན་རེའི་ཚགས་པར》གྱི་ལམ་རིམ་ལ་ཕྱི་མིག་ཐེངས་ཤིག་བལྟ།

《དཀར་མཛེས་ཉིན་རེའི་ཚགས་པར》གྱི་སྔ་མིང་ལ《དར་མདོའི་གསར་འགྱུར》ཟེར།

སྤྱི་ལོ1950ལོའི་ཟླ་བ3པར། ཀྲུང་གུང་ཀྲུང་དབྱང་ལྷོ་ནུབ་ཅུས་དང་ལྷོ་ནུབ་དམག་ཁུལ་ཁང་གིས་ཆོག་མཆན་བཀོད་པར་བརྒྱུད། ཀྲུང་གུང་དར་མདོའི་ས་ཁུལ་ཨུ་ལྷན་དང་དར་མདོ་ཡན་ལག་དམག་ཁུལ་བཙུགས་པ་གཡག་རྔ་ནས་ཁྱབ་བསྒྲགས་བྱས། ལོ་དེའི་ཟླ་བ11པར། ཞི་ཁམས་ཞིང་ཆེན་བོད་རིགས་རང་སྐྱོང་ལྗོངས་མི་དམངས་སྲིད་གཞུང་བཙུགས་པ་དང་། དེ་ནི་ཀྲུང་གོ་གསར་པ་བཙུགས་རྗེས་བཙུགས་པའི་ས་ཁུལ་རིམ་པའི་མི་རིགས་ས་ཁོངས་རང་སྐྱོང་སྲིད་དབང་དང་པོ་ཡིན། ཀྲུང་གུང་དར་མདོ་ས་ཁུལ་ཨུ་ལྷན་བཙུགས་རྗེས་རང་སྐྱོང་ལྗོངས་ཀྱི་རྒྱ་ཆེ་བའི་ལས་བྱེད་པ་དང་མང་ཚོགས་ལ་ཁ་ཕྱོགས་ནས་རྒྱལ་ཁབ་ཕྱི་ནང་གི་དོན་ཆེན་སྒྲོག་སྤེལ་དང་། རང་སྐྱོང་ལྗོངས་ཀྱི་སྲིད་འབྱོར་རིག་གསུམ་གྱི་འཛུགས་སྐྲུན་བྱ་གཞག་དང་མི་རིགས་ཁག་གི་མི་དམངས་ཀྱི་བསམ་བློ་དང་འཚོ་བ་མཚོན་ཅིང་མཛུབ་སྟོན་བྱེད་པའི་ཚགས་པར་ཞིག་གསར་དུ་འདོན་པའི་གྲ་སྒྲིག་ཐེངས་འགའ་བྱས། 1951ལོའི་ཟླ་བ9པར་ཚགས་པར་འདོན་པའི་འཆར་གཞི་ཞིབ་ཕྲ་བཀོད་པར་མ་ཟད། རང་སྐྱོང་ལྗོངས་མི་དམངས་སྲིད་གཞུང་བཙུགས་ནས་ལོ་གཅིག་འཁོར་བའི་སྐབས་སུ་ཚགས་པར་གསར་དུ་གདོན་རྒྱུ་གཏན་ལ་ཕབ། 1952ལོའི་ལོ་འགོར། ཀྲུང་གུང་དར་མདོ་ས་ཁུལ་ཨུ་ལྷན་གྱིས་སྒོར་ཁྲི་བཅུ་ལྷག་བཏང་ནས་ཚགས་པར་བཞི་དྲས་མ་པར་དུ་སྐྲུན་པའི་འཆར་གཞི་བཟོས་པར་མ་ཟད། ཚགས་འདོན་ཇུས་གཞི་ཀྲུང་གུང་ཞི་ཁམས་ཞིང་ཆེན་ཨུ་ལྷན་ལ་ཡང་སྙན་སེང་ཞུས་པ་རེད། 1953ལོར་ཡང་བསྐྱར་ཚགས་པར་འདོན་པའི་འཆར་གཞི་གཏན་ལ་ཕབ། 1954ལོའི་ཟླ་བ7པར། ཀྲུང་གུང་དར་མདོ་ས་ཁུལ་ཨུ་ལྷན་གྱིས་ཚང་འཛོམས་གྲོས་ཚོགས་བསྡུས་ཏེ《དར་མདོའི་གསར་འགྱུར》གསར་དུ་འདོན་པའི་ཐག་བཅད། ལོ་དེའི་ཟླ་བ7པའི་ཚེས19ཉིན། ཀྲུང་གུང་དར་མདོ་ས་ཁུལ་ཨུ་ལྷན་གྱིས་ཚགས་པར་འདོན་པའི་གནད་དོན་སྐོར་ཞི་ཁམས་ཞིང་ཆེན་ཨུ་ལྷན་ལ་སྙན་སེང་བྲིས། ཟླ་བ8པའི་ཚེས3ཉིན། ཞི་ཁམས་ཞིང་ཆེན་ཏང་ཨུས་སྙན་སེང་ལ་ཆོག་མཆན་བཀོད་དེ། ཀྲུང་གུང་དར་མདོ་ས་ཁུལ་ཨུ་ལྷན་གྱིས《དར་མདོའི་གསར་འགྱུར》གསར་དུ་འདོན་ཆོག་པའི་མོས་མཐུན་བྱས། དེ་ནས《དར་མདོའི་གསར་འགྱུར》ཁང་དངོས་སུ་བཙུགས་པ་དང་། 1954ལོའི་ཟླ་བ8པའི་ཚེས23ཉིན《དར་མདོའི་གསར་འགྱུར》འདོན་ཐེངས་དང་པོ་ཀློག་པ་པོའི་སྤྱན་ལམ་དུ་ཕུལ་ཡོད།

1954ལོའི་ཟླ་བ12པའི་སྔོན་ལ་པར་དུ་བསྐྲུན་པའི《དར་མདོའི་གསར་འགྱུར》འདོན་གྲངས་དང་པར་གྲངས་ལ་ངེས་མེད་ཡིན་ཞིང་། འདོན་གྲངས་ཡུན་རིང་ན་ཉིན17ལ་ཚགས་པར་ཐེངས་གཅིག་དང་། ཐུང་ན་ཉིན7ལ་ཚགས་པར་ཐེངས་གཅིག་ཡིན། པར་ངོས་ནི་སྐབས་འགར་པར་ངོས་བཞི་རེ་དང་། སྐབས་འགར་ཕྱེད་དྲས་མའི་པར་ངོས་གཉིས་རེ་ཡིན། 1954ལོའི་ཟླ་བ12པའི་ཚེས10ཉིན་གྱི་རྗེས་སུ་ཕལ་ཆེར་ཉིན་བཅུའི་ནང་ཚགས་པར་ཐེངས་རེ་བཏོན་ཐུབ་ཡོད་ལ། 1955ལོའི་ཟླ་བ་དང་པོའི་རྗེས་སུ་གཟའ་འཁོར་ཚགས་པར་དུ་བསྒྱུར། ཞི་ཁམས་ཞིང་ཆེན་དང་སི་ཁྲོན་ཞིང་ཆེན་ཟླ་བསྒྲིལ་རྗེས། སི་ཁྲོན་ཞིང་ཆེན་ཏང་ཨུའི་དྲིལ་བསྒྲགས་པུའུ་ཡིས་ཆོག་མཆན་བཀོད་པར་བརྒྱུད《དར་མདོའི་གསར་འགྱུར》1956ལོའི་ཟླ་བ་དང་པོ་ནས་བཟུང་རེས་གཟའ་རེར་འདོན་ཐེངས་ལྔ་རུ་བསྒྱུར། ཐོག་མར་ཚགས་པར་གྱི་པར་ངོས་རེ་རེ་ལ་རྒྱ་བོད་ཤན་སྦྱར་ནས་བསྒྲིགས་ཡོད། རྗེས་མར་བོད་ཡིག་དང་རྒྱ་ཡིག་པར་ངོས་སོ་སོ་ཕྱེ་ནས་སྡེབ་སྒྲིག་བྱས་པ་སྟེ། པར་ངོས་དང་པོ་དང་གཉིས་པ། གསུམ་པ་བཅས་ནི་བོད་ཡིག་གི་པར་ངོས་ཡིན་ཞིང་། པར་ངོས་བཞི་པ་རྒྱ་ཡིག་པར་ངོས་ཡིན།

《དར་མདོའི་གསར་འགྱུར》གྱི་པར་གཞི་བཟོ་བཅོས།

1956ལོའི་ཟླ་བ10པར། ཚགས་པར་ཁང་གིས་སྐབས་དེའི་དུས་བབ་འཕེལ་རྒྱས་ཀྱི་དགོས་མཁོ་ལྟར། ཀྲུང་གུང་དར་མདོ་ས་ཁུལ་ཨུ་ལྷན་ལ“《དར་མདོ་ཚགས་པར》བསྒྱུར་བཅོས་དང་པར་གཞི་བཟོ་བཅོས་བྱེད་པའི་སྙན་སེང”བཏོན་པས། ས་ཁུལ་ཨུ་ལྷན་གྱིས་མྱུར་དུ་ཚགས་པར་ཁང་གི་སྙན་སེང་ལ་ཞིབ་འཇུག་བྱས་ཤིང་། ཟླ་བ10པའི་ཚེས16ཉིན། ཁུལ་ཨུའི་དྲིལ་བསྒྲགས་པུའུ་ཡིས《དར་མདོའི་གསར་འགྱུར》གྱི་པར་གཞི་བཟོ་བཅོས་བྱེད་པར་ཁུལ་ཨུས་མོས་མཐུན་བྱས་ཡོད་པའི་བརྡ་ཐོ་བཏང་། སྐབས་དེར་རང་ཁུལ་ཞི་ཁམས་ཞིང་ཆེན་བོད་རིགས་རང་སྐྱོང་ལྗོངས་ནས་དཀར་མཛེས་བོད་རིགས་རང་སྐྱོང་ཁུལ་ལ་མིང་བསྒྱུར་བ་དང་བསྟུན་ནས《དར་མདོའི་གསར་འགྱུར》གྱི་མིང་དེ་ཡང《དཀར་མཛེས་ཚགས་པར》ཞེས་པར་བསྒྱུར་ཡོད།

《དར་མདོའི་གསར་འགྱུར》གསར་དུ་བཏོན་པ་ནས་པར་གཞི་བཟོ་བཅོས་དང་མིང་བསྒྱུར་བའི་བར་ཁྱོན་བསྡོམས་ལོ་གཉིས་དང་ཟླ་བ་གཉིས་སོང་བ་དང་། ཁྱོན་བསྡོམས་ཚགས་པར་འདོན་ཐེངས119པར་དུ་བསྐྲུན་པ་དང་། ཚགས་པར་འདོན་ཐེངས་རེར་ཚགས་པར་ཚར3000བཀྲམ་པ་རེད།

པར་གཞི་བཟོ་བཅོས་ཀྱི་དུས་འགོའི《དཀར་མཛེས་ཚགས་པར》ལ་བོད་རྒྱ་ཡིག་རིགས་གཉིས་ཀྱི་པར་ངོས་ཡོད། ཚང་མ་ནི་བཞི་དྲས་མའི་པར་ངོས་བཞི་ཡིན་ལ་གཟའ་འཁོར་གཅིག་ལ་འདོན་ཐེངས་གཉིས་རེ་ཡོད། བོད་ཡིག་ཚགས་པར་གཟའ་ལྷག་པ་དང་གཟའ་གཟའ་སྤེན་པར་དང་རྒྱ་ཡིག་ཚགས་པར་གཟའ་མིག་དམར་དང་གཟའ་པ་སངས་ལ་པར་དུ་བསྐྲུན་པ་རེད། 1957ལོའི་ཟླ་བ9པར། ཁུལ་ཨུས《དཀར་མཛེས་ཚགས་པར་གྱི་ལས་དོན་ལ་ཤུགས་སྣོན་དང་ལེགས་སུ་བཅོས་པའི་སྐོར་གྱི་ཀྲུང་གུང་དཀར་མཛེས་ཁུལ་ཨུའི་མཛུབ་སྟོན》བཏོན་ཏེ།《དཀར་མཛེས་ཚགས་པར》ལོ་དེའི་ནང་ཚུད་དུ་གཟའ་འཁོར་གཅིག་ལ་འདོན་ཐེངས་གསུམ་དུ་གཏང་དགོས་པའི་བླང་བྱ་བཏོན། 1957ལོའི་ཟླ་བ11པའི་ཚེས1ཉིན།《དཀར་མཛེས་ཚགས་པར》གྱི་བོད་རྒྱ་ཡིག་གི་ཚགས་པར་གཉིས་ཀ་གཟའ་འཁོར་གཅིག་ལ་འདོན་ཐེངས་གསུམ་རེ་ཅན་དུ་བསྒྱུར། འདོན་གྲངས་བསྒྱུར་རྗེས་སྔར་བཞིན་བཞི་དྲས་མའི་པར་ངོས་བཞི་རེ་ཡིན།

《དཀར་མཛེས་ཚགས་པར》དེ《དཀར་མཛེས་ཉིན་རེའི་ཚགས་པར》དུ་བསྒྱུར་ཞིང་། ཚགས་པར་གྱི་མིང་སྐུ་ཞབས་ལི་པན་ལིས་བྲིས་གནང་མཛད།

1958ལོའི་ཟླ་བ3པར། ཚགས་པར་ཁང་གིས1958ལོ་ནས1962ལོའི་བར་གྱི་འཕེལ་རྒྱས་འཆར་གཞི་གཏན་ལ་ཕབ་ཅིང་། ལོ་དེའི་ཟླ་བ5པར། འཆར་གཞི་དེའི་རྨང་གཞིའི་ཐོག《དཀར་མཛེས་ཚགས་པར་ཁང་གི་མཆོང་སྐྱོད་རྩ་གནད》བཟོས་ཤིང་། སྤུན་ཟླ་ཚགས་པར་ཁང་གི་བར་མཛའ་མཐུན་གྱི་འགྲན་རྩོད་བྱས་པ་དང་། ཟླ་བ་བཞི་རིང་ལ་དཀའ་སྤྱད་སྡུག་རུས་བརྒྱབ་རྗེས་ཚགས་པར་གྱི་སྤུས་ཚད་ཇེ་མཐོར་གཏོང་བའི་རྨང་གཞིའི་ཐོག་ཉིན་རེའི་ཚགས་པར་དུ་བསྒྱུར། དེའི་རྗེས་སུ། ཚགས་པར་ཁང་གི་སྡེ་ཚན་བར་དར་དམར་འགྲན་བསྡུར་སྤེལ་ནས་འདོན་གྲངས་བསྒྱུར་བར་བསུ་མ་ཧུར་ཐག་ཞུས། ཚགས་པར་ཁང་གི་སྤྱི་ཁྱབ་རྩོམ་སྒྲིག་ཁང་གིས་ཟླ་བ9པར《དཀར་མཛེས་ཚགས་པར་གྱི་སྒྲིག་སྡེབ་ཚད་གཞི》བཟོས་ཏེ། ཉིན་རེའི་ཚགས་པར་གྱུར་རྗེས་པར་ངོས་ཀྱི་རྣམ་པའི་གཞི་རྐང་རགས་ཙམ་ཚུགས་པ་དང་ཉམས་འགྱུར་གཅིག་གྱུར་ཡོང་དགོས་པའི་བླང་བྱ་བཏོན། 1958ལོའི་ཟླ་བ10པའི་ཚེས1ཉིན་ནས་བཟུང་།《དཀར་མཛེས་ཚགས་པར》（འདོན་ཐེངས364པ）གྱི་བོད་རྒྱ་ཡིག་ཚགས་པར་གཉིས་ཀ་གཟའ་འཁོར་རེ་ལ་འདོན་ཐེངས་གསུམ་རེ་ནས་འདོན་ཐེངས་དྲུག་རེའི་བར་དུ་ཇེ་མང་དུ་བཏང་བ་དང་། ཚགས་པར་གྱི་མིང་ཡང《དཀར་མཛེས་ཉིན་རེའི་ཚགས་པར》ལ་བསྒྱུར་བར་མ་ཟད། སྐབས་དེར《སི་ཁྲོན་ཉིན་རེའི་ཚགས་པར》གྱི་ཧྲེ་ཀྲང་དང་ཡིག་གཟུགས་མཁས་ཅན་སྐུ་ཞབས་ལི་པན་ལི་གདན་འདྲེན་ཞུས་ནས་རྒྱ་ཡིག་ཚགས་པར་གྱི་མིང་འབྲི་རུ་བཅུག།

《དཀར་མཛེས་ཉིན་རེའི་ཚགས་པར》ཕྱིར《དཀར་མཛེས་ཚགས་པར》དུ་བསྒྱུར།

1959ལོའི་རྗེས་སུ། རྒྱལ་ཡོངས་སུ་ལོ་གསུམ་གྱི་དཔལ་འབྱོར་དཀའ་ངལ་བྱུང་བ་དང་། ཁུལ་ནང་ཁུལ་གྱི་གསར་འགོད་པའི་གསར་འགྱུར་འབྱོར་ཚད་ཇེ་ཉུང་དུ་སོང་བ་དང་། 《དཀར་མཛེས་ཉིན་རེའི་ཚགས་པར》གྱི་གསར་འགྱུར་འབྱུང་ཁུངས་མི་འདང་བས་དཀའ་ངལ་གྱི་གནས་སུ་ལྷུང་། 1960ལོར། ཞིང་ཆེན་ཏང་ཨུ་དང་ཁུལ་ཨུའི་མཛུབ་སྟོན་ལྟར་ཟླ་བ11པའི་ཟླ་སྟོད་ནས་བཟུང་ཚགས་པར་ཁང་གིས་ཚགས་པར་དྲིལ་བསྒྲགས་ལས་དོན་ལ་ཞིབ་བཤེར་བྱས། 1961ལོའི་ཟླ་བ2པར། ཁུལ་ཨུས་ཆོག་མཆན་གནང་བར་བརྒྱུད 《དཀར་མཛེས་ཉིན་རེའི་ཚགས་པར》བོད་ཡིག་ཚགས་པར་གཟའ་འཁོར་གཅིག་ལ་འདོན་ཐེངས་གསུམ་ལས་མི་དགོས་པར་ཇེ་ཉུང་དུ་བཏང་། རྗེས་སུ་ཡང་གཟའ་འཁོར་གཅིག་ལ་འདོན་ཐེངས་གཉིས་ལས་མེད་པར་བྱས་ནས་གཟའ་མིག་དམར་དང་གཟའ་པ་སངས་ཉིན་པར་དུ་བསྐྲུན་དགོས་པར་བྱས། 《དཀར་མཛེས་ཉིན་རེའི་ཚགས་པར》གྱི་རྒྱ་ཡིག་ཚགས་པར་ལོ་དེའི་ཟླ་བ7པའི་ཚེས9ཉིན་ནས་བཟུང་གཟའ་འཁོར་གཅིག་ལ་འདོན་ཐེངས་གསུམ་ལས་མེད་པར་བྱས། ཚགས་པར་གྱི་མིང་དེ་སྔའི《དཀར་མཛེས་ཉིན་རེའི་ཚགས་པར》ནས《དཀར་མཛེས་ཚགས་པར》ལ་བསྒྱུར་བ་རེད།

《དཀར་མཛེས་ཚགས་པར》གློག་འཕྲིན་པར་གཞི་བསྒྱུར་རྗེས་ཡང་བསྐྱར་རྒྱུན་ལྡན་གྱི་ལམ་དུ་བསྐྱོད་པ།

“རིག་གསར”གྱི་སྐབས་སུ། 《དཀར་མཛེས་ཚགས་པར》པར་སྐྲུན་མཚམས་བཞག་ནས་གློག་འཕྲིན་པར་གཞིར་བསྒྱུར། 1974ལོའི་ཟླ་བ2པའི་ཚེས1ཉིན་ད་གཟོད《དཀར་མཛེས་ཚགས་པར》གྱི་བོད་ཡིག་དང་རྒྱ་ཡིག་ཚགས་པར་བསྐྱར་དུ་སླར་གསོ་བྱས། 1987ལོའི་ཟླ་བ9པའི་ཚེས5ཉིན། རྒྱལ་ཡོངས་ཀྱི་ཚགས་པར་དང་དུས་དེབ་ལ་བསྐྱར་དུ་ཐོ་འགོད་ལག་ཁྱེར་བརྗེ་བའི་ལས་དོན་བསྒྲུབས་ཏེ། 《དཀར་མཛེས་ཚགས་པར》གྱི་གཙོ་སྒྲུབ་དང་གཙོ་གཉེར་ལས་ཁུངས་ནི་ཀྲུང་གུང་དཀར་མཛེས་ཁུལ་ཨུ་ཡིན་པ་དང་། ཁྲིམས་བཀོད་འགན་འཁུར་བ་ནི་ཁུལ་ཨུའི་མགོ་ཁྲིད་གཙོ་བོ་ཡིན་པ། དཀར་མཛེས་ཚགས་པར་ཁང་ནི་བྱེ་བྲག་གི་ཏང་ཨུ་ལས་ཁུངས་ཚགས་པར་གྱི་པར་སྐྲུན་སྡེ་ཚན་ཡིན་པ་སྔར་ལྷག་གིས་གཏན་འབེབས་ཁ་གསལ་བཟོས་པ་རེད། དུས་མཉམ་དུ་ཞིང་ཆེན་གསར་འགྱུར་དཔེ་སྐྲུན་ཅུས་ཀྱིས《དཀར་མཛེས་ཚགས་པར》གྱི་བོད་རྒྱ་ཡིག་གི་ཚགས་པར་གྱི་འདོན་གྲངས། ཤོག་རྒྱ། པར་ངོས་ཀྱི་གྲངས་ཀ། ཡོངས་བསྒྲགས་འགྲེམས་སྤེལ་བཅས་ཚང་མར་གཏན་འབེབས་གསལ་པོར་བྱས་པས། དུས་དེ་ནས《དཀར་མཛེས་ཚགས་པར》ཡང་བསྐྱར་རྒྱུན་ལྡན་གྱི་ལམ་དུ་བསྐྱོད་པ་རེད།

ཞིན་ཧྭ་གསར་འགྱུར་ཁང་གི་གསར་འགྱུར་བླངས་ནས་ཐད་ཀར་འཕྲིན་མཛོད་དུ་ཉར་ཆོག།

ཚགས་པར་གསར་དུ་བཏོན་པའི་དུས་འགོར། ཚགས་པར་ཁང་ལ་སྒྲ་སྡུད་འཕྲུལ་འཁོར་གཉིས་ལས་མེད་ཅིང་ཞིན་ཧྭ་གསར་འགྱུར་ཁང་གི་གསར་འགྱུར་ལེན་བཤུ་རུ་སྤྱད་ཡས་རེད། 1957ལོར་སྐུད་མེད་གློག་ཁང་བཙུགས་ནས། གསལ་ཨང་ནས་ཞིན་ཧྭ་གསར་འགྱུར་ཁང་གི་གསར་འགྱུར་ལེན་བཤུ་བྱེད་པར་བསྒྱུར་ཡོད། དེ་ནས་ཨང་གྲངས་ཡི་གེ་རུ་བསྒྱུར་ནས་སྡེབ་སྒྲིག་བྱས་རྗེས་གསར་འགྱུར་བཏང་བ་རེད། 1970ལོར་ལད་འབྲི་འཕྲུལ་ཆས་སྤྱད་དེ་ཚགས་པར་བླངས་ཤིང་ཨང་སྒྱུར་བརྒྱུད་རིམ་མི་དགོས་པ་བྱས་ཡོད། 1992ལོར་འཁོར་སྐར་ནས་ཐད་ཀར་ལེན་སྟངས་ཀྱིས་ལད་འབྲི་བྱེད་སྟངས་ཀྱི་ཚབ་བྱས་ནས་གསར་འགྱུར་སྡུད་ལེན་དེང་རབས་ཅན་དུ་གྱུར། 2003ལོར་ཚགས་པར་ཁང་གི་གློག་རྡུལ་འདྲི་སྒྲིག་མ་ལག་ཚོད་ལྟ་སྤྱོད་འགོ་བཙུགས་ནས། ཞིན་ཧྭ་གསར་འགྱུར་ཁང་གི་ཡི་གེ་དང་པར་རིས་ཐད་ཀར་འཕྲིན་མཛོད་དུ་འཇུག་ཆོག་པ་བྱུང་ཡོད།

ཚགས་པར་པར་འདེབས་ཞ་ཉེ་དང་མེར་བརྟེན་པ་ལས་ཐར།

ཚགས་པར་གསར་དུ་བཏོན་དུས། ཚགས་པར་ཁང་གིས་ཁང་ཡུས་སྤྱི་གཉེར་ཁང་ཆི་ཁང་པར་འདེབས་བཟོ་གྲྭ་རྩིས་ལེན་བྱས་ཤིང་། སྐབས་དེར་སྒོར་གདན་འཕྲུལ་ཆས་གསུམ་དང་རྡོ་འདེབས་འཕྲུལ་ཆས་ལྔ་བླངས་ཡོད། དེ་ཚོ་ཚང་མ་ནི་ཆིང་རྒྱལ་རབས་ཀྱི་དུས་མཇུག་ཏུ་སི་ཁྲོན་མཐའ་ཁུལ་གྱི་བློན་ཆེན་ཀྲའོ་ཨེར་ཧྥུང་གིས་སྲིད་འགན་བཞེས་དུས་ཕྱི་རོལ་ནས་འདྲེན་ཡོང་བ་རེད། གཏོར་སྐྱོན་ཚབས་ཆེན་ཐེབས་ཡོད། 1955ལོར《ཞི་ཁམས་ཚགས་པར》བཏོན་མཚམས་བཞག་པ་དང་། གོང་རིམ་གྱིས《དར་མདོའི་ཚགས་པར》ལ་པར་འདེབས་སྒྲིག་ཆས་འབོར་ཆེན་སྤྲད་ཡོད། དེའི་ནང་དུ་ཟངས་པར་དང་། ཡིག་གཏར་འཕྲུལ། པར་བཟོ་འཕྲུལ། པར་འདེབས་འཕྲུལ་སོགས་ཡོད། དེ་ནས《དར་མདོའི་ཚགས་པར》གྱི་པར་འདེབས་ཆུ་ཚད་མཐོན་པོར་སོང་ཡོད། དུས་དེ་ནས་བཟུང་སྤྱི་ལོ1993ལོའི་བར། 《དཀར་མཛེས་ཚགས་པར》གྱི་པར་འདེབས་སྒྲིག་ཆས་ལ་གསར་བརྗེ་རྒྱུན་ཆད་མེད་པར་བྱུང་ཡོད་ན་ཡང་། སྤྱིའི་ཆ་ནས་བཤད་ན་ངོ་བོ་རང་བཞིན་གྱི་འགྱུར་ལྡོག་བྱུང་མེད། ཧ་ལམ་ཞ་ཉེ་དང་མེ་ལ་བརྟེན་པའི་པར་འདེབས་བྱེད་ཐབས་རྒྱུན་སྐྱོང་བཞིན་ཡོད། 1993ལོར། ཁུལ་ཨུ་དང་ཁུལ་སྲིད་གཞུང་གིས་ཐད་ཀར་ཐུགས་ཁུར་འོག། རྣོ་འོད་པར་སྒྲིག་དང་འགྱིག་པར་སྒྲིག་གཏོང་། པར་འདེབས་སྒྲིག་ཆས་བཅས་ཉོས་པར་བརྟེན། དཀར་མཛེས་ཚགས་པར་ཁང་གི་པར་འདེབས་ཞ་ཉེ་དང་མེར་བརྟེན་ལས་ཐར་ཐུབ་པ་བྱུང་ཡོད། 2006ལོར། ཁུལ་ཨུ་དང་ཁུལ་སྲིད་གཞུང་གི་རྒྱབ་སྐྱོར་འོག། ཉིས་དྲས་མདོག་གཉིས་ངོས་སྙོམས་འགྱིག་པར་འཕྲུལ་ཆས་ཆེ་གྲས་ཉོས་ཏེ། བོད་ཡིག་དང་རྒྱ་ཡིག་ཚགས་པར་ཚོན་བཀྲ་ཅན་གྱི་པར་འདེབས་ཐུབ་པ་བྱུང་ཡོད། 2017ལོར། རྒྱལ་ཁབ་ཀྱི་འབྲེལ་ཡོད་སྡེ་ཚན་གྱི་རྒྱབ་སྐྱོར་འོག། མདོག་བརྒྱད་རྐྱང་སྒྲོམ་པར་འདེབས་འཕྲུལ་ཆས་ཉོས་པར་བརྟེན། ཚགས་པར་མགྱོགས་མྱུར་པར་འདེབས་ཐུབ་པ་དང་ཚོན་མདངས་སྡེབ་པར་ཡང་སྔར་བས་གནད་ཐིག་པོ་བྱུང་ཡོད་པ་རེད།

དུས་རབས་གསར་པར་ཚགས་པར་ཁང་གི་རྨང་གཞི་སྒྲིག་ཆས་ལ་འགྱུར་ལྡོག་ཆེན་པོ་བྱུང་།

དུས་རབས་སྔ་མའི་ལོ་རབས་དགུ་བཅུ་ནས་དུས་རབས་ཉེར་གཅིག་པའི་དུས་འགོ་ནི་དཀར་མཛེས་ཁུལ་ལོ་རྒྱུས་སུ་འཕེལ་རྒྱས་ཅུང་མགྱོགས་པའི་དུས་སྐབས་ཡིན། ཁུལ་ཨུ་དང་ཁུལ་སྲིད་གཞུང་གིས《དཀར་མཛེས་ཚགས་པར》ཚགས་པར་ཆེན་པོ་དང་ཉིན་རེའི་ཚགས་པར་དུ་བཟོ་དགོས་པ་ཐེངས་མང་བཏོན་པར་མ་ཟད། བླང་བྱ་དེ་ཐེངས་གཉིས་ལ་སྲིད་གཞུང་ལས་དོན་སྙན་ཞུར་བཙུད་ཡོད། དཀར་མཛེས་ཚགས་པར་ཁང་གི་ཏང་ཨུས་ཁུལ་ཨུ་དང་ཁུལ་སྲིད་གཞུང་གི་མཆན་བཀོད་སྙིང་དོན་ལྟར། སྔར་ཡོད་དཀར་མཛེས་ཚགས་པར་ཁང་ལ་སྔར་བྱུང་མྱོང་མེད་པའི་བསྒྱུར་བཀོད་ཆེན་པོ་བྱས་ཏེ། སྔོན་རྗེས་སུ་ལས་བཟོའི་སྡོད་ཁང་སྨི་གྲུ་བཞི་མ3600ཡོད་པ་ཞིག་གསར་དུ་བཞེངས་པ་དང་། ལས་བཟོའི་སྡོད་ཁང་ཁྱོན་སྨི་གྲུ་བཞི1000ཡོད་པ་གཉིས་གནས་སྤོ་བཅོས་སྐྲུན་བྱས། པར་འདེབས་ཁང་གི་གཞུང་ལས་ཁང་དང་འཁོར་ཁང་ཕྱོགས་འདུས་ཁང་གཅིག་གསར་དུ་བསྐྲུན་ཅིང་རྒྱ་ཁྱོན་སྨི་གྲུ་བཞི1000ལྷག་ཡོད། ཚགས་པར་ཁང་གི་ལས་སྒོའི་ཕྱོགས་བསྡུས་ཐོག་ཁང་ཆེན་མོ་གཅིག་བསྐྲུན་པ་དང་རྒྱ་ཁྱོན་སྨི་གྲུ་བཞི2000ལྷག་ཡོད། 2022ལོའི་ཟླ་བ12པར། རྒྱ་ཁྱོན་སྨི་གྲུ་བཞི་མ5466ཡོད་པའི་ཚགས་པར་ཁང་གི་རྒྱ་བོད་འཕྲིན་སྦྱོར་ཀུན་འདུས་ལས་གཞི་བསྐྲུན་ནས་ལས་གྲུབ་རྩིས་ལེན་ཐོབ་ཡོད།

ཚགས་པར་ཆུང་བ་ནས་ཚགས་པར་ཆེ་གྲས་སུ་བསྒྱུར་བ་དང་དེ་ནས་ཉིན་རེའི་ཚགས་པར་དུ་བསྒྱུར་བ།

1996ལོར《དཀར་མཛེས་ཚགས་པར》རྒྱ་ཡིག་ཚགས་པར་པས་ཟླ་མཇུག་ཚགས་པར་བཏོན། 2002ལོ་ནས་བཟུང་། དཀར་མཛེས་ཚགས་པར་ཁང་གིས་ཕྱོགས་གཅིག་ནས་འཛུགས་སྐྲུན་དམ་འཛིན་དང་ཕྱོགས་གཅིག་ནས་ཚགས་པར་འཕེལ་རྒྱས་དམ་དུ་བཟུང་ནས། ཚགས་པར་ཁང་གི་གཞུང་ལས་ཁོར་ཡུག་དང་སྒྲིག་ཆས་ལ་གསར་སྒྱུར་རིམ་པ་སྤར་རྗེས། ནང་ཁུལ་དུ་ཁོངས་ཆུང་དྲ་བ་བཙུགས་ནས《དཀར་མཛེས་སྒེའུ་ཁུང》དྲྭ་ཚུགས་ཤིག་བཙུགས། དེ་དང་ཆབས་ཅིག་རྒྱལ་ཁབ་དང་ཞིང་ཆེན། ཁུལ་བཅས་ཀྱི་རྒྱབ་སྐྱོར་ཤུགས་ཆེན་འོག་ཞིང་ཆེན་ཏང་ཨུའི་དྲིལ་བསྒྲགས་པུའུ་ཡི་མོས་མཐུན་ཐོབ་པ་དང་ཞིང་ཆེན་གསར་འགྱུར་དཔེ་སྐྲུན་ཅུས་ཀྱི་ཆོག་མཆན་ཐོབ་པར་བརྒྱུད《དཀར་མཛེས་ཚགས་པར》གྱི་རྒྱ་ཡིག་ཚགས་པར་དེ2003ལོའི་ཟླ་བ་དང་པོའི་ཚེས1ཉིན་ནས་བཟུང་ཕྱེད་དྲས་མའི་ཚགས་པར་ཆེ་བར་བསྒྱུར། 《དཀར་མཛེས་ཚགས་པར》གྱི་རྒྱ་ཡིག་གི་ཟླ་མཇུག་ཚགས་པར་དེ་གཟའ་མཇུག་ཚགས་པར་ལ་བསྒྱུར། བོད་ཡིག་ཚགས་པར་གནས་སྐབས་སུ་བཞི་དྲས་མའི་པར་ངོས་བཞི་ལྟར་བཞག་ཡོད། ལོ་གཅིག་ལྷག་འཁོར་སྐྱོད་ཀྱི་རྗེས་སུ། ཚགས་པར་ཁང་ལ་ཚགས་པར་ཆེ་གྲས་བཟོ་བའི་ཉམས་མྱོང་ཐོབ་པས་དེ་ནས་ལྕགས་ཚ་ཐོག་རྡུང་བ་དང་བོང་བུ་འགྲོ་ཐོག་དེད་ནས་དེའི་ལོ་མཇུག་ཏུ་རྒྱལ་ཁབ་གསར་འགྱུར་དཔེ་སྐྲུན་སྤྱི་ཁྱབ་ཁང་ལ་རེ་ཞུ་བྱས་ནས་ཆོག་མཆན་ཐོབ་པར་བརྒྱུད། 2004ལོའི་ཟླ་བ་དང་པོའི་ཚེས1ཉིན་ནས《དཀར་མཛེས་ཚགས་པར》གྱི་རྒྱ་ཡིག་ཚགས་པར་དེ་དངོས་སུ《དཀར་མཛེས་ཉིན་རེའི་ཚགས་པར》དུ་བསྒྱུར་བ་རེད། ཕྱེད་དྲས་མའི་པར་ངོས་བཞི་ཡོད་ཅིང་གཟའ་འཁོར་རེར་འདོན་ཐེངས་དྲུག་ཡོད། བོད་ཡིག་ཚགས་པར་དེ་ཡང་ཕྱེད་དྲས་མའི་ཚགས་པར་ཆེ་གྲས་སུ་བསྒྱུར་ནས། ཕྱེད་དྲས་མའི་པར་ངོས་བཞི་ཡོད་ལ་གཟའ་འཁོར་རེར་འདོན་ཐེངས་གསུམ་ཡིན་པ་རེད། སྔར་ཡོད་ཟླ་མཇུག་ཚགས་པར་དང་གཟའ་མཇུག་ཚགས་པར་གྱི་རྨང་གཞིའི་ཐོག། 《དཀར་མཛེས་ཉིན་རེའི་ཚགས་པར》 རྒྱ་ཡིག་ཚགས་པར་གྱིས་《ཁམས་ཀྱི་གཟའ་མཇུག》བཏོན་པ་དང་། བོད་ཡིག་ཚགས་པར་གྱིས་ཟླ་མཇུག་ཚགས་པར་བཏོན་ཡོད། དེར་བརྟེན། 《དཀར་མཛེས་ཉིན་རེའི་ཚགས་པར》ནི་དཀར་མཛེས་ཁུལ་གྱི་རྒྱལ་ཡོངས་སུ་ཡོངས་བསྒྲགས་ངང་འགྲེམས་སྤེལ་བྱེད་པའི་ཚགས་པར་གཅིག་པུ་དེ་ཡིན། ཚགས་པར་གསར་དུ་བཏོན་ནས་ལོ50འཁོར་བའི་སྐབས་སུ། ཞིང་ཆེན་ཡོངས་ཀྱི་གྲོང་ཁྱེར་དང་ཁུལ་གཞན་དག་གི་ཏང་ཚགས་པར་དང་འདྲ་བར་ཚགས་པར་ཆེན་པོ་དང་ཉིན་རེའི་ཚགས་པར་དུ་མངོན་འགྱུར་བྱུང་བ་རེད།

འཕྲིན་སྦྱོར་ཀུན་འདུས་ཀྱི་ལིང་བསྟར་རགས་ཙམ་གྲུབ་པ།

2005ལོའི་ཟླ་བ་དང་པོར《དཀར་མཛེས་ཉིན་རེའི་ཚགས་པར》གྱི་རྒྱ་ཡིག་ཚགས་པར་དེ་གཟའ་འཁོར་རེ་ལ་འདོན་ཐེངས་བདུན་རེ་ལ་བསྒྱུར་ཡོད།

2010ལོའི10པའི་ཚེས22ཉིན་ཁམས་པའི་བོད་ཡིག་དྲ་བ་དངོས་སུ་དྲྭ་ལམ་ནས་རྒྱལ་སྤྱིའི་སྒང་དུ་གཏོང་མགོ་ཚུགས། འདི་ནི་ཁམས་ཕྱོགས་ཀྱི་ཆེས་ཐོག་མའི་གཞུང་གི་དྲྭ་ཚུགས་ཆེན་མོ་དེར་གྱུར། ལེ་ཚན་ཆེན་པོ22དང་། ལེ་ཚན་ཆུང་བ105བཅས་ཡོད་པ་ཡིན། ཁམས་ཕྱོགས་ཀྱི་གསར་འགྱུར་དང་ལོ་རྒྱུས། དམངས་ཁྲོད་རིག་གནས་སོགས་འབྱུང་སའི་སྒོ་ཆེན་ལྟ་བུ་ཞིག་ཏུ་གྱུར་ཡོད་པ་རེད། ཟླ་རེར་ཀློག་གྲངས་ཁྲི་ལ་ཉེ་བར་བསླེབས།

2012ལོའི་ཟླ་བ་དང་པོར《དཀར་མཛེས་ཉིན་རེའི་ཚགས་པར》རྒྱ་ཡིག་ཚགས་པར་གྱིས《དཔལ་འབྱོར་དམངས་འཚོའི་གཟའ་མཇུག་ཚགས་པར》(ཚགས་པར་འདི2015ལོར་མཚམས་བཞག་ཡོད)བཏོན་པ་རེད། ལོ་དེར《དཀར་མཛེས་ཉིན་རེའི་ཚགས་པར》བོད་ཡིག་ཚགས་པར་གྱིས་གཉེར་འགན་འཁུར་བའི《ཁམས་པའི་འཛུམ་རིས》ལོ་རེ་ལ་འདོན་ཐེངས་བཞི་རེ་ཅན་གྱི་དུས་དེབ་གསར་དུ་བཏོན།

2013ལོའི་ལོ་མཇུག་ཏུ་ཁམས་ཀྱི་དྲ་བའི་རྒྱ་ཡིག་དྲ་བ་དྲྭ་ལམ་ནས་གཏོང་འགོ་ཚུགས། རྒྱ་ཡིག་གི་དྲྭ་ཚུགས་འདིར་གསར་འགྱུར་དང་། རིག་གནས། ཡུལ་སྐོར། པར་རིས། འཚོ་བ། གློག་རྡུལ་ཚགས་པར། བརྙན་ལམ་སོགས་པར་གཞི8ལས་གྲུབ་པ་དང་ཡན་ལག་ལེ་ཚན27བཀོད་སྒྲིག་བྱས་ཡོད་པ་རེད། བོད་ཡིག་དང་རྒྱ་ཡིག་གི་དྲྭ་ཚུགས་གཉིས་ཀྱིས་ཁུལ་ཡོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་སྤྱི་ཚོགས་ཞི་མཐུན་བརྟན་བརླིང་གི་ཕྱོགས་ཁག་དང་དེ་བཞིན་རང་རེའི་ཁུལ་གྱི་ཐུན་མོང་མ་ཡིན་པའི་རིག་གནས་ཡུལ་སྐོར་ཐོན་ཁུངས་སོགས་གཅིག་སྡུད་ཐོག་འགྲེམས་སྟོན་བྱས་ཡོད།

2014ལོའི་ཟླ་བ2པར། རང་ཁུལ་གྱི་ཆེས་དབང་གྲགས་ལྡན་པ་དང་ཆེས་ཆ་ཚང་བའི་ཕྱོགས་འདུས་ཅན་གྱི་གསར་འགྱུར་དྲྭ་ཚུགས་ཏེ་ཁམས་ཀྱི་འཕྲིན་སྦྱོར་དྲ་བ་དྲྭ་ཐོག་ནས་གཏོང་འགོ་བཙུགས། དེ་ནི《དཀར་མཛེས་ཉིན་རེའི་ཚགས་པར》འདེགས་སྐྱོར་དུ་བྱས་ཏེ། དཀར་མཛེས་ཁུལ་ལ་གཞི་ཚུགས་ཤིང་། ཁམས་ཀྱི་ས་ཆ་ཡོངས་ལ་ཁྱབ་པ། འཛམ་གླིང་ལ་ཕྱོགས་པའི་ཕྱོགས་འདུས་རང་བཞིན་གྱི་སྐད་གཉིས་གསར་འགྱུར་དྲྭ་ཚུགས་ཡིན་ཞིང་། དྲྭ་ཐོག་ལ་བཏང་རྗེས། ཞིང་ཆེན་ཏང་ཨུའི་དྲིལ་བསྒྲགས་པུའུ་ཡིས་གསར་འགྱུར་དྲྭ་ཚུགས་གལ་ཆེན་དུ་གཏན་ལ་ཕབ་ཡོད། ལོ་དེའི་ཟླ་བ5པར། ཁམས་ཀྱི་དྲ་བའི་རྒྱ་ཡིག་འཕྲིན་ཕྲན་སྤྱི་སྟེགས་གཏོང་འགོ་ཚུགས།

2015ལོའི་ཟླ་བ7པར། དཀར་མཛེས་ཁྱབ་སྒྲོག་འཕྲིན་ཕྲན་སྤྱི་སྟེགས་དྲྭ་ཐོག་ནས་གཏོང་འགོ་བཙུགས། ལོ་དེར《དཀར་མཛེས་ཉིན་རེའི་ཚགས་པར》གྱི་བོད་ཡིག་སྡེ་ཁག་གིས་ཁམས་ཀྱི་བོད་ཡིག་འཕྲིན་སྟེགས་གསར་དུ་བཏོན་པ་དང་དགོན་སྡེ་ལ་ཁ་ཕྱོགས་ནས་དུས་ཚིགས་རེ་ལ་ཐེངས་རེ་པར་བསྐྲུན་བྱས་པའི《ཞི་མཐུན་པད་མའི་མེ་ཏོག》བོད་ཡིག་ཚགས་པར་གསར་དུ་བཏོན།

2017ལོར་ཁུལ་ཨུའི་བཀོད་སྒྲིག་གཞིར་བཟུང་ནས་ཁུལ་ཨུ་དྲིལ་བསྒྲགས་པུའུ་སོགས་ལས་ཁུངས་ཁག་གི་རྒྱབ་སྐྱོར་ཤུགས་ཆེན་འོག་ལོ་དེའི་ཟླ་བ་དང་པོའི་ཚེས1ཉིན་ནས་བཟུང《དཀར་མཛེས་ཉིན་རེའི་ཚགས་པར》གྱི་རྒྱ་ཡིག་ཚགས་པར་དེ་འདོན་ཐེངས་རེ་ལ་པར་ངོས་བརྒྱད་རེ་ཡོད་པར་བསྒྱུར། པར་ངོས་བསྒྱུར་རྗེས་ཀྱི《དཀར་མཛེས་ཉིན་རེའི་ཚགས་པར》གྱི་རྒྱ་ཡིག་ཚགས་པར་ནི་གཟའ་འཁོར་རེ་ལ་འདོན་ཐེངས་ལྔ་ཡིན་ལ། གཟའ་ཟླ་བ་ནས་པ་སངས་བར་ཡིན། ཐེངས་རེར་ཕྱེད་དྲས་མའི་པར་ངོས་བརྒྱད་ཡོད་པ་རེད། དེའི་ནང་དུ་གཟའ་པ་སངས་ཀྱི་ཚགས་པར་གྱི་པར་ངོས་ལྔ་པ་ནས་བརྒྱད་པའི་བར《ཁམས་ཀྱི་གཟའ་མཇུག》ཚགས་པར་ཡིན། པར་ངོས་ཀྱི་ཚད་དཔོག་ཐད་ལ། པར་ངོས་བཟོ་བཅོས་ཀྱི་རྗེས་སུ《དཀར་མཛེས་ཉིན་རེའི་ཚགས་པར》རྒྱ་ཡིག་ཚགས་པར་གྱི་པར་ངོས་དང་པོ་ནས་བཞི་པ་ཡིས་གསར་འགྱུར་རང་བཞིན་དང་དབང་གྲགས་རང་བཞིན། ཁྲིད་སྟོན་རང་བཞིན། ཉེ་བཅར་རང་བཞིན་མངོན་གསལ་དུ་བཟོ་བ་དང་། པར་ངོས་ལྔ་པ་ནས་བརྒྱད་པས་ཆེད་དོན་དང་། རྩོམ་རིག། ཁྱད་འཕགས་གཙོ་དོན་དུ་བྱས་ནས་ཁྲིད་ཕྱོགས་དང་རང་ཡུལ། ལྟ་བཟོད་པ། ཀློག་སྤྲོ་བའི་རྩ་དོན་རྒྱུན་འཁྱོངས་ཏེ། ཚགས་པར་གྱིས་ཏང་གི་སྐད་ཆ་མགྱོགས་པོར་སྒྲོག་ཐུབ་པ་དང་ཆབས་ཅིག། དངོས་ཡོད་དང་འཚོ་བ། མང་ཚོགས་བཅས་ལ་ཉེ་བར་བཅར་ཐུབ་པ་བྱུང་ཡོད། ལོ་དེར《དཀར་མཛེས་ཉིན་རེའི་ཚགས་པར》གྱི་བོད་ཡིག་ཟླ་མཇུག་ཚགས་པར་དེ་གཟའ་མཇུག་ཚགས་པར་ལ་བསྒྱུར། ཁམས་ཀྱི་འཕྲིན་སྦྱོར་པོད་འཕྲིན་དྲྭ་ལམ་དུ་གཏོང་འགོ་བཙུགས།

2018ལོའི་ཟླ་བ7པར། དཀར་མཛེས་ཁྱབ་སྒྲོག་འཁྱུག་དབྱིངས་དྲྭ་ལམ་དུ་བཏང་།

2019ལོའི་ཟླ7པར་ཁམས་པའི་འཕྲིན་སྦྱོར་གྱི་བོད་རྒྱའི་སྐད་གཉིསAPPབཀོལ་སྣེ་དྲྭ་ལམ་དུ་བཏང་།

2020ལོའི་ཟླ2པར་ཁམས་པའི་འཕྲིན་སྦྱོར་གྱི་མགྲོན་སྣེ་དྲྭ་ཐོག་ཏུ་སྤེལ་བ་དང་ཟླ་བ་དེའི་ནང་ཁམས་པའི་འཕྲིན་སྦྱོར་གྱི་མགྱོགས་འཕྲིན་དྲྭ་ཐོག་ཏུ་སྤེལ་བ་རེད། ལོ་དེའི་ཟླ་བ4པར་ཁམས་ཀྱི་འཕྲིན་སྦྱོར་བརྙན་ལམ་དྲྭ་ལམ་ནས་སྤེལ། 2024ལོའི་ཟླ་བ་བཞི་པར་བོད་ཡིག་འཕྲིན་ཕྲན་བརྙན་ལམ་དྲྭ་ཐོག་ནས་སྤེལ།

2021ལོའི་ཟླ་བ12པའི་ཚེས25ཉིན། “སློབ་སྦྱོང་རྒྱལ་དར”དཀར་མཛེས་སློབ་སྟེགས་དྲྭ་ལམ་ནས་དངོས་སུ་གཏོང་འགོ་བཙུགས། སློབ་སྟེགས་འདི་ནི་དཀར་མཛེས་ཁུལ་ཨུ་དྲིལ་བསྒྲགས་པུའུ་ཡིས་གཙོ་གཉེར་བྱས་པ་དང་དཀར་མཛེས་ཉིན་རེའི་ཚགས་པར་ཁང་གིས་སྒྲུབ་འགན་འཁུར་བ་ཡིན་ལ། རྒྱལ་ཡོངས་བོད་འབྲེལ་ས་ཁུལ་གྱི་ཨང་དང་པོ་དང་། སི་ཁྲོན་ཞིང་ཆེན་གྱི་གྲོང་ཁྱེར་དང་ཁུལ་རིམ་པའི“སློབ་སྦྱོང་རྒྱལ་དར”གྱི་སློབ་སྦྱོང་སྟེགས་བུ་གསུམ་པ་ཡིན་པ་རེད། དེར་བརྟེན། དཀར་མཛེས་ཉིན་རེའི་ཚགས་པར་ཁང་གི་འཕྲིན་སྦྱོར་ཀུན་འདུས་ལིང་བསྟར་རགས་ཙམ་གྲུབ་པ་དང་། རྒྱ་ཡིག་དང་བོད་ཡིག་ཚགས་པར་དང་འཕྲིན་སྦྱོར་གསར་པ། “སློབ་སྦྱོང་རྒྱལ་དར”དཀར་མཛེས་སློབ་སྟེགས་བཅས་ཤིང་རྟ་འཁོར་ལོ་གསུམ་གཤིབ་མཉམ་དུ་སྐྱོད་པའི་གནས་བབ་ཅིག་ཆགས་ཟིན་པ་རེད།།

རྩོམ་འདི་ནི《དཀར་མཛེས་ཉིན་རེའི་ཚགས་པར》གསར་དུ་བཏོན་ནས་ལོ50འཁོར་བའི་ཆེད་དེབ《ལོ་ཟླ་ནི་གླུ་དབྱངས་ཤིག་དང་མཚུངས》ཞེས་པའི་འགོ་བརྗོད་དང་། དཀར་མཛེས་ཏང་གི་ལོ་རྒྱུས་དང་ཚགས་པར་ཁང་གི་འཕེལ་རྒྱས་གནས་ཚུལ་མདོར་བསྡུས་བཅས་ལ་གཞིགས་ནས2024ལོའི་ཟླ8པར་ལེགས་པར་བསྒྲིགས།

（ཐུབ་བསྟན་དང་ཨོ་རྒྱན། ཡེ་ཤེས་བཅས་ཀྱིས་བསྒྱུར་ཅིང་པར་བླངས།）