2023/12/29 9:53:15 ཡེ་ཤེས་ཀྱིས་བསྒྱུར།
འདབ་པ་རྫོང་ནི་དཀར་མཛེས་བོད་རིགས་རང་སྐྱོང་ཁུལ་གྱི་ལྷོ་རྒྱུད་དུ་ཡོད་པ་དང་། ཤར་ཕྱོགས་ན་བརྒྱད་ཟིལ་རྫོང་། ནུབ་ཕྱོགས་སུ་ཕྱག་ཕྲེང་རྫོང་། བྱང་ཕྱོགས་ལ་ལི་ཐང་རྫོང་། ལྷོ་ཕྱོགས་སུ་མུ་ལི་བོད་རིགས་རང་སྐྱོང་རྫོང་དང་འབྲེལ་ཡོད་པ་རེད།འདབ་པ་ནི་མཐོ་སྒང་གི་ཡུལ་སྐོར་རྫོང་ཞིག་ཡིན་པར་མ་ཟད་དགུན་དུས་ཀྱི་འདབ་པ་རྫོང་ལྷག་པར་མཛེས།
འདབ་པའི་ཉི་སྟེན་ཏེ་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་གྱི་སྙན་གྲགས་རྒྱལ་ཁབ་ཕྱི་ནང་ཀུན་ཏུ་ཁྱབ།མཛེས་ལྗོངས་གྲགས་ཆེ་བ་ནི་ཤར་ཕྱག་ན་རྡོ་རྗེའི་གནས་རི་དང་ལྷོ་འཇམ་དཔལ་དབྱངས་ཀྱི་གནས་རི།བྱང་སྤྱན་རས་གཟིགས་ཀྱི་གནས་རི་བཅས་རིགས་གསུམ་མགོན་པོའི་གནས་རི་ནི་ཡུལ་ཕྱོགས་སོ་སོ་ནས་ཕེབས་པའི་གནས་སྐོར་བ་རྣམས་ཀྱིས་གངས་རིའི་བརྗིད་ཉམས་དང་རང་བྱུང་གི་མཛེས་སྡུག་ལ་རོལ་མྱོང་བྱེད་པའི་ཡུལ་ཁྱད་དུ་འཕགས་པ་ཞིག་ཡིན།
འདབ་པའི་སྦྱར་ལྕང་ནགས་ཚལ་གྱི་སྐྱེ་ཁམས་ཡུལ་སྐོར་ས་ཁུལ་ནི་འདབ་པ་རྫོང་གི་གྲོང་ཁུལ་ཉེ་འདབས་ཀྱི་འདབ་པའི་ཆུ་མིག་གྲམ་ཁ་ལ་གནས་ཤིང་།མཚོ་འཕགས་སྨི3600ཡོད་ལ།རྒྱ་ཁྱོན་མུའུ་ཁྲི་གཅིག་ལྷག་ཡོད་པ་དང་དེ་ནི་སི་ཁྲོན་ཞིང་ཆེན་དང་ཐ་ན་རྒྱལ་ཡོངས་སུ་རྒྱ་ཁྱོན་ཆེས་ཆེ་བའི་སྦྱར་ལྕང་ནགས་ཚལ་ཡིན།
འདབ་པའི་རྩྭ་ཐང་དམར་པོ་ནི་རྫོང་གྲོང་གི་བྱང་རྒྱུད་དུ་སྤྱི་ལེ28རྒྱང་བའི་གསུམ་འདུས་གྲོང་རྡལ་གྱི་གཞུང་ལམ་འགྲམ་དུ་ཆུ་རྫིང་ཆུང་ཆུང་ཞིག་ཡོད།ལོ་རེའི་སྟོན་ཁར་ཆུ་རྫིང་དེར་ཆུ་རྩྭ་དམར་པོས་ཁེངས་ཤིང་།དམར་མདངས་རྒྱས་པའི་རྩྭ་ཐང་ཆུང་ཆུང་དེས་འགྲུལ་བཞུད་པ་རྣམས་ཀྱི་ཡིད་ཀྱི་དབང་པོ་ཅིག་ཅར་འཕྲོག་པའོ།།
ལེ་ཚན་སྔོན་མ།：ལྟ་ན་སྡུག་པའི་ཁྲི་ལེབ་རི་བོའི་སྟོན་ལྗོངས།
ལེ་ཚན་རྗེས་མ།：གནས་སྐབས་མེད།