ཡར་ཀླུང་གཙང་བོ་ནི་ཁ་འབབ་ཆུ་བཞིའི་ཡ་གྱལ་དང་ཆུ་ཀླུང་མང་པོའི་འབྱུང་ཁུངས་ཡིན།  སྟོད་མངའ་རིས་གངས་མཚོའི་ཤར་ཕྱོགས་བྱེ་མ་གཡུང་དྲུང་གི་ཕུ་ཨབ་སྲིའི་རྒྱབ་ཀྱི་བྲག་རྟ་མཆོག་འདྲ་བའི་ཁ་ནས་འབབ་ཅིང་། ཧོར་ཚོ་ལྔ་བརྒྱུད་འབྲོང་པ་ཚོ་དགུའི་ལྷོ་ཕྱོགས་དང་། རུ་གསར་གལ་ཆོས།  འབའ་བ།  བཀྲ་བདུན། གཞུང་རུ་དང་ས་ག་ཟང་ཟང་ལྷོ་བརྒྱུད་དེ་གཙང་བཀྲ་ཤིས་ལྷུན་པོའི་གཡས་ཕྱོགས་ནས་བཞུར་ཏེ་ལྕགས་ཟམ་ཆུ་བོ་རིར་ལྷ་སའི་སྐྱིད་ཆུ་དང་འདྲེས་ནས་ཡར་ཀླུང་གཙང་བོར་འབོད། དྭགས་པོ་དང་ཀོང་པོ་བརྒྱུད་དེ་རིམ་བཞིན་གཡུ་འབྲུག་འཕྱོ་བ་བཞིན་སྨན་གླིང་ཕད་ཆུས་ཤུལ་ནས་ཁ་བྱང་ཤར་ངོས་སུ་འཁོར་ནས་བཞུར་ཞིང་། རི་བོ་གནམ་ལྕགས་འབར་བར་བསྐོར་བ་རྟ་རྨིག་འདྲ་བ་བརྒྱབ་རྗེས་སླར་ཡང་ལྷོ་ནུབ་ཁུལ་གྱི་གཅོང་རོང་ཟབ་མོ་འགྲིམས་ནས་མཐར་ཀློ་ཡུལ་བརྒྱུད་རྒྱ་གར་དུ་བཞུར་ཏེ་གཙང་པོ་པུ་ལ་མ་བོ་ཐེ་ལ་བྱ་སྟེ།  དེ་ནས་བྷང་ག་ལ་མཚོ་དབུག་ཏུ་འདྲེས།  དེའི་རིང་ཚད་སྤྱི་ལེ༢༠༥༧དང་། འབབ་ཡུལ་རྒྱ་ཁྱོན་སྤྱི་ལེ་གྲུ་བཞི་མ༢༤༠༤༨༠ཡོད།
   གཙང་བོའི་རྒྱུད་ཀྱི་སའི་ཆ་སྙོམས་མཐོ་ཚད་མཚོ་ངོས་ལས་སྤྱི་ཁྲེ༤༥༠༠ཙམ་ཟིན་པས་འཛམ་གླིང་སྟེང་ས་བབ་མཐོ་ཤོས་ཀྱི་གཙང་བོ་ཞིག་ཡིན།  ཡར་ཀླུང་གཙང་པོ་ནི་རང་རྒྱལ་གཙང་ཆེན་ཁག་གི་ཁྲོད་རིང་ཚད་ཨང་རིམ་ལྔ་བར་སླེབས་ཤིང་། གཙང་རྒྱུད་ཀྱི་ས་རྒྱ་ཆེ་ཆུང་ཨང་དྲུག་པ་ཟིན་ལ་གཙང་ཆུའི་རྒྱུག་འབོར་ཨང་རིམ་གསུམ་པར་སླེབས་པ།  གཙང་ཆུའི་ནུས་པ་ཆེ་ཆུང་ཨང་གཉིས་པ་ཟིན་ཐུབ་པ་བཅས་ཡིན།  གཙང་བོ་འདིའི་གཡས་གཡོན་དུ་གཙང་ལག་མང་པོ་ཡོད་པ་སྟེ། ཆུ་གསོག་རྒྱ་ཁྱོན་སྤྱི་ལེ་གྲུ་བཞི་མ་ཁྲི་ཚོ་བརྒལ་བའི་རྡོ་གཞོང་གཙང་བོ་དང་། མྱང་ཆུ། སྐྱིད་ཆུ།  ཉང་ཆུ། ཕར་ལུང་གཙང་པོ་བཅས་ཡོད། ཡར་ཀླུང་གཙང་བོ་བཞུར་རྒྱུད་དུ་མི་གྲངས༨༧༠༠༠༠ལ་ཉེ་ཞིང་། ས་ཞིང་སོན་ཁལ༢༣༠༠༠༠༠ལྷག་ཙམ་ཡོད་པས། གཙང་རྒྱུད་ཀྱི་ས་ཁང་མི་གསུམ་བོད་ཡོངས་ཀྱི་ཕྱེད་ཙམ་ཟིན།  དེ་བཞིན་ལྷ་ས་དང་།  གཞིས་རྩེ།  རྒྱལ་རྩེ།  རྩེད་ཐང་། ཉིང་ཁྲི་སོགས་གྲོང་ཁྱེར་དང་གྲོང་བརྡལ་ཆེ་གྲས་རྣམས་ཀྱང་གཙང་པོ་འདིའི་གཞུང་དུ་ཆགས་ཡོད་པས་གཙང་པོ་འདི་བོད་ཀྱི་ཆུ་ཆེན་དང་པོར་གྲགས།