ཕོ་ལོག

རིག་བསྟན།        2014-06-11

ཕོ་ལོག

དེ་ཡང་མི་ཉག་གི་ཟ་མའི་རིག་གནས་ཀྱི་ཡ་གྱལ་ཕོ་ལོག་གི་ལོ་རྒྱུས་ཅུང་ཟད་གླེང་ན།དེ་ཡང་གནའ་སྔ་མོ་འཛམ་གླིང་གེ་སར་རྒྱལ་པོས་རྒྱ་ནག་ལ་ཇ་རྫོང་དབབ་ས་འགྲོ་སྐབས་ཁོང་མི་ཉག་དར་མདོ་དང་ཀླུ་ལྡིང་ལྕགས་ཟམ་ཁ་སོགས་ལ་བཞུགས་དུས།དགྲ་དོགས་ཧ་ཅང་ཆེ་བས་མཚན་མོ་མ་གཏོགས་ཉིན་དཀར་ཇ་བསྐོལ་རྒྱུའི་གོ་སྐབས་མེད་པར་འཕྲད།མི་ཉག་གི་མི་རྒན་ཚོས་བློ་ཐབས་ཤིག་བེད་སྤྱོད་བཏང་ནས་ཟས་གསར་པ་ཕོ་ལོག་ཅེས་པ་ཞིག་གསར་བཏོད་བྱས།མི་ཚང་མས་ཕོ་ལོག་བཅས་ནས་ཟོས་ཏེ་ལྟོ་ཟ་རྒྱུའི་དཀའ་ངལ་སེལ།ཕོ་ལོག་གི་ནང་སྙིང་མར་དང་རྩམ་པའི་ཕྱེ་མར་བརྫིས་ཤིང་ཕྱི་ཤུན་གྲོ་རྗེན་གྱིས་བྱས་ཡོད་པས།ལྟོ་བ་འགྲང་ཞིང་ཧམ་ས་དང་རུལ་ས་དཀའ།ནང་དུ་སྦྲང་སོགས་བསྲེས་ཡོད་པས་བྲོ་བ་ཞིམ་ལ།རི་མགོ་ལ་ཁུར་ས་སྟབས་ཤིན་ཏུ་བདེ་མོ་ཡིན་པས་གེ་སར་ཐུགས་ཤིན་ཏུ་མཉེས་ཞེས་སྔོན་གྱི་མི་རྒན་ཚོས་བཤད།སྐབས་དེར་ཉིན་དཀར་དུ་བ་བཏང་ནས་ཟ་མ་བཙོ་མི་ཕོད།ཆུ་འཁྱགས་འཐུང་ནས་ཕོ་ལོག་ཟོས་ན་ཕོ་བ་རྒྱག་ཐུབ།དགོང་མོ་ནི་ཁོང་ཚོས་མེ་བུས་ཏེ་དུ་བ་བཏང་ནས་ཟ་མ་བཙོས་ཤིང་ཇ་བསྐོལ་བ་ཡིན་ཞེས་བཤད་པ་ལྟར་འདིར་བྲིས་སོ།།རྗེས་སུ་འཕེལ་རྒྱས་བྱུང་ནས་ཕོ་ལོག་ལ་དབྱེ་བ་སྣ་ཁ་མང་པོ་ཞིག་བྱུང་ཡོད།དཔེར་ན།མར་ཕོ་ལོག་དང་།ཤ་ཕོ་ལོགསྐྱུར་པོ་ཕོ་ལོགསྐྱུར་ལོག་ཕོ་ལོགསྒོག་པ་ཕོ་ལོགཕྱུར་བ་ཕོ་ལོགཡུང་མ་ཕོ་ལོགཞོག་ཁོག་ཕོ་ལོག་བཅས་ཀྱི་དབྱེ་བ་བྱུང་ཡོད།ཟས་འདི་ནི་མི་ཉག་གི་ཡུལ་དུ་གནའ་ནས་ད་ལྟའི་བར་དུ་དར་རྒྱས་ཆེན་པོ་བྱུང་མོད།འོན་ཏེ་དེང་སང་ནི་མི་ཉག་གི་ཕོ་ལོག་རིག་གནས་འདི་བོད་ཀྱི་ས་ཆ་མ་ཟད་རྒྱ་སོགས་གཞན་གྱི་ས་ཆ་ལའང་དར་ཁྱབ་འགྲོ་བཞིན་ཡོད།སྔོན་ཆད་ཟ་མ་འདི་མི་ཉག་གི་ཐུན་མོང་མ་ཡིན་པའི་ཟས་རིགས་ཤིག་ཡིན་ནོ།།སྤྱིར་ཕོ་ལོག་ཅེས་པའི་གོ་དོན་ལ་དབྱེ་ན་གཉིས་ཏེ།གཅིག་ནི་ཕོ་ཐམས་ཅད་དམག་སོགས་ལ་འགྲོ་སྐབས་ལོག་ལོག་བྱས་ཏེ་འགྲོ་སྐབས་ཟ་མ་མཆོག་ཏུ་གྱུར་པ་ཞིག་ཡིན་པས་དོན་གྱི་མིང་ལ་ཕོ་ལོག་ཅེས་མིང་བཏགས།གཉིས་པ་ནི་ཟ་མ་དེའི་ཕྱིའི་གཟུགས་དབྱིབས་དེ་རིལ་རིལ་ལམ་ཕོ་བ་དེ་ལོག་ལོག་ཅིག་ཡིན་པས་ཕོ་ལོག་ཅེས་བཤད་སྲོལ་མི་འདྲ་བ་གཉིས་བྱུང་ཡོད་དོ།།
 
  • ལེ་ཚན་སྔོན་མ།:སྐྱུར་ལོག
  • ལེ་ཚན་རྗེས་མ།:ཁམས་མི་ཉག་འདྲ་པའི་ཕག་རྙིང་།