མངའ་མཛད་ཐོག་མར་བྱུང་བ་ཞེས་པ་ནི་མི་ཡིས་མི་ལ་དབང་སྒྱུར་བྱེད་པའི་དུས་རབས་ཀྱི་འགོ་ཚུགས་པ་ལ་ཟེར།         དེ་ནི་བསྐལ་པ་ཡ་ཐོག་གམ་གདོད་མའི་སྤྱི་ཚོགས་ཀྱི་མཇུག་རྫོགས་ནས་བྲན་གཡོག་ལམ་ལུགས་ཀྱི་འགོ་ཚུགས་པའི་དུས་རབས་སུ་བྱུང་ལ།   རང་རེ་བོད་ཀྱི་ཡུལ་འདིར་སྤྱི་ལོའི་སྔོན་གྱི་ལོ་ངོ་ཁྲི་སྟོང་མང་པོའི་གོང་ན།    བོད་ཀྱི་ལོ་རྒྱུས་ཐོག་ཏུ་མངའ་མཛད་ཀྱི་ཐོག་མ་ནི་གནོད་སྦྱིན་ནག་པོའི་དུས་རབས་ནས་འགོ་ཚུགས་ཏེ།   གནའ་བོའི་དཔེ་རྙིང་རྣམས་ཀྱི་ནང་དུ་སྤུ་རྒྱལ་གོང་དུ་མངའ་མཛད་དྲུག་གམ་བཅུ་བྱུང་ཚུལ་《བཀའ་ཐང་སྡེ་ལྔ་》ལས།   
དེ་དུས་བོད་ཁམས་མི་ལ་རྗེ་མེད་པས།   '
རི་བྲན་བྲག་མཁར་ཀུན་ལ་རྫོང་ཡང་བཅས།   ། 
གོས་དང་ཁ་ཟས་བཙན་མཁར་ནོར་བུ་བཅུག། 
རྒོལ་དུ་མི་ཐུབ་དམག་གྲངས་ཉུང་བའི་དུས།   ། 
རང་ལ་དབང་མེད་ཚོགས་རྒྱབ་སྲབ་པའི་དུས།   ། 
བོད་ཡུལ་གངས་རི་རྩེ་དགུའི་ལྗོངས་འདི་རུ།   ། 
སྤུར་རྒྱལ་གོང་དུ་མངའ་མཛད་དྲུག་ཏུ་བྱུང༌།   ། 
ཞེས་དང༌།  《ཆོས་འབྱུང་མཁས་པའི་དགའ་སྟོན་》ལས།   
བོད་ཁམས་ཡུལ་དུ་རུང་བར་གྱུར་ནས་ཀྱང༌།   ། 
དང་པོ་མི་མ་ཡིན་གྱི་ཡུལ་དུ་གྱུར།   ། 
གནོད་སྦྱིན་ལ་སོགས་བཅུ་ཡིས་དབང་བྱས་སྐད།   ། 
ཅེས་སོགས་གསུངས་ཡོད་པ་དང༌།    གཞན་ཡང་ཆབ་མདོ་ཁ་རུབ་དང༌།    ལྷ་སའི་ཆུ་གོང་སོགས་ནས་ལོ་ངོ་བརྒྱད་སྟོང་ནས་ལྔ་སྟོང་བར་གྱི་རྡོ་ཆས་གསར་པའི་དུས་རབས་ཀྱི་གནའ་རྫས་མང་པོ་ཞིག་རྙེད་ཡོད་པ་དང༌།     དེར་བརྟེན་གནོད་སྦྱིན་ནག་པོ་ལ་སོགས་པའི་དུས་རབས་དེ་དག་མི་ཡི་འགྲོ་བ་བྱུང་བའི་དུས་རབས་ཡིན་པ་ལ་ཐེ་ཚོམ་གཏན་ནས་མེད་པ་ཞིག་རེད།     དེ་ལྟར་དབང་སྒྱུར་གྲལ་རིམ་གྱི་ཚོ་པ་དག་ཆགས་པ་ནས་བཟུང་རྟག་པར་ཕན་ཚུན་གཡུལ་བཀྱེས་ཏེ།     ཚོ་པ་གཅིག་གིས་གཅིག་ལ་དབང་སྒྱུར་བྱེད་ཅིང་འོག་སྡེ་མངའ་འབངས་ཇེ་མང་དང༌།     སྟོབས་རྩལ་ནུས་ཤུགས་ཇེ་ཆེར་ཆགས་པའི་མཐར་བྲན་གཡོག་བདག་པོའི་རྒྱལ་ཁབ་ཞིག་ཏུ་ཆགས་པ་ནི་ཆོས་ཉིད་ཅིག་རེད།     གདོད་མའི་དུས་མཇུག་ཏུ་བྱུང་བའི་དབང་སྒྱུར་བྱེད་མཁན་ལྷ་དང་གཉན་དང་གནོད་སྦྱིན་ལ་སོགས་པ་བཅུ་པོ་དེ་དག་ནི་རིགས་སྤྱིའི་མིང་ཡིན་པ་ལས།     གང་ཟག་གཅིག་མཚོན་པར་བྱེད་པའི་མིང་མིན་ཏེ།    དཔེར་ན་བོད་ཀྱི་དུས་རབས་དང༌།   རྒྱ་ཡི་དུས་རབས།   སོག་པོའི་དུས་རབས་ཟེར་བ་ལྟ་བུ་དང་གཅིག་པ་ཡིན་པའི་ཕྱིར།    དེས་ན་འདིའི་ནང་གསལ་བའི་དུས་རབས་རེ་ལ་མ་མཐར་ཡང་དཔོན་རབས་བཅུ་ཕྲག་ཁ་ཤས་དང༌།    ལོ་གྲངས་བརྒྱ་ཕྲག་ཁ་ཤས་ཀྱི་དུས་ཡུན་ཡིན་པར་ཤེས་དགོས།