དར་རྩེ་མདོའི་བཞི་བརྒྱད་དུས་ཆེན་སྐོར་བཤད་པ།

ལྕང་ཞབས་པ་འགྱུར་མེད་ཚེ་དབང་།        2013-07-30

དར་རྩེ་མདོའི་བཞི་བརྒྱད་དུས་ཆེན་སྐོར་བཤད་པ།
སྟོན་པའི་གོས་སྐུ་བཤམས་པ།དར་རྩེ་མདོའི་བཞི་བརྒྱད་དུས་ཆེན་སྐོར་བཤད་པ།
མཐོ་སྒང་གི་དགའ་སྟོན།

 ཟླ་བ5པའི་ཚེས17ཉིན།དར་མདོའི་བཞི་པའི་ཚེས་བརྒྱད་གདན་ཐོག་རི་བོའི་རྒྱལ་སྤྱིའི་གནས་བསྐོར་དུས་ཆེན་དེ་གཟབ་རྒྱས་ངང་སྤེལ་བ་དང་།ཕྱོགས་བཞི་མཚམས་བརྒྱད་ནས་ཕེབས་པའི་སྐུ་མགྲོན་རྣམ་པ་སྐྱིད་པའི་མཛའ་གཞས་གྲོང་ལ་ལྷན་དུ་འཛོམས་ཏེ་དུས་ཆེན་གྱི་དགའ་སྟོན་རོལ།
དེ་ཡང་ཆོས་ལུགས་ཆེན་པོ་གསུམ་གྱི་ནང་གསེས་ཡེ་ཤུ་ཡི་འཁྲུངས་སྐར་ལ་སྣང་འཇོག་མཐོ་བ་དང་།འཁྲུངས་སྐར་དེར་རྟེན་འབྲེལ་ཞུ་ནི་ཧ་ཅང་མང་ཞིང་འཛམ་གླིང་ལ་རྒྱ་ཁྱབ་ལྟ་བུ་ཞིག་ཏུ་གྱུར་ཡོད།བདག་ཅག་གི་སྟོན་པ་ཤྰཀྱ་ཐུབ་པའི་འཁྲུངས་སྐར་ལ་ཡང་གང་འཚམ་གྱིས་རྟེན་འབྲེལ་ཞུ་བ་དང་།གང་འཚམ་གྱིས་དགེ་སྦྱོར་ལ་འབད་འབུངས་བྱེད་མཁན་བྱུང་དང་འབྱུང་བཞིན་ཡོད་པར་མ་ཟད་ད་ལྟ་དོ་སྣང་ཇེ་ཆེར་འགྲོ་ཡི་འདུག ཁྱད་པར་དུ་དར་རྩེ་མདོའི་བཞི་བརྒྱད་ནི་གནའ་ནས་སྟོན་པའི་འཁྲུངས་སྐར་དུ་རྩིས་པ་དང་།རྟེན་འབྲེལ་ཞུ་བ།དུས་ཆེན་གྱི་དགའ་སྟོན་ལ་རོལ་བ་ནི།རྒྱུན་ཆགས་ཀྱི་རང་བཞིན་ཅན་དུ་སྣང་།དར་མདོའི་གླིང་ན་དམངས་སྲོལ་གྱི་དུས་ཆེན་ཆེས་ཆེ་བ་དེ་བཞི་བརྒྱད་འདི་རང་ཡིན་ཞིང་།བཞི་བརྒྱད་ནི་དར་མདོའི་དུས་ཆེན་ཆེས་སྐད་གྲགས་ཆེ་བ་དེ་རེད།བཞི་བརྒྱད་སྟོན་པའི་འཁྲུངས་སྐར་ལ་དམིགས་ནས་གདན་ཐོག་རི་བོ་ལ་སྟོན་པའི་འཁྲུངས་རབས་ལས།འབྲུག་དགུས་ཆབ་ཀྱི་མཆོད་པ་འབུལ་བ་དང་།
སྟོན་པས་གོམ་པ་བདུན་སྤོ་བས་མེ་ཏོག་བདུན་ཤར་བ་སོགས་ཀྱི་མཛད་རྣམ་དེ་ཚོ་ཇི་བཞིན་བཟོས་ཡོད་པ་ཉེ་བའི་ལོ་ཤས་སྔོན་ལ་མཐོང་མྱོང་ཡོད།ད་ལྟ་ནི་ཧ་ཅང་ཕུན་སུམ་ཚོགས་པའི་ལྷ་ཁང་།སྟོན་པའི་མཛད་རྣམ་ཆ་ཚང་བཅས་བཞེངས་ཟིན་པ་སྨྲོས་མ་དགོས་པ་ཞིག་རེད།དར་རྩེ་མདོའི་བཞི་བརྒྱད་གཏོང་ལུགས་ལ།སྔོན་དུས་བཞི་བརྒྱད་ཀྱི་ཉིན་ལ་སྐྱ་སེར་ཕོ་མོ་ཚོས་གཟབ་མཆོར་སྤྲས་ནས།ཟས་བསོད་པའི་རིགས་ཁུར་ནས།དེང་སང་གངས་ཆུའི་ཟམ་པ་ཡར་སྔོན་དེ་དག་སྔོན་དུས་ལྕང་གླིང་ངམ་སྤང་གླིང་ལྟ་བུ་ཞིག་ཡིན་འདུག་པས་དེ་དག་ཏུ་སྐྱིད་པོ་གཏོང་བ་དང་།གངས་ཆུ་ཟམ་པ་ནས་གདན་ཐོག་རི་བོའི་རྩེ་མོའི་བར་རྟ་རྒྱུག་བྱེད་པའི་རིམ་པ་དང་།
དེ་རྗེས་དར་མདོའི་དགོན་ཁག་བརྒྱད་ལ་སྐོར་བ་བྱེད་ཀྱི་ཡོད།སྐོར་བ་བྱེད་སྟངས་ཀྱང་རྡོ་རྗེ་བྲག་ནས་མགོ་བཙུགས་སྟེ།དེང་གི་ལྷ་མོ་རྩེའི་དགོན་པ་ཡོད་ས་ནས་རིམ་བཞིན་དུ་གད་ཐོག་ནས་མར་བསྐོར་ཏེ་ཟམ་པ་འོག་མ་དང་གྲོང་རྒྱབ་ནས་སྐོར་གྱི་ཡོད།སྐོར་བ་བྱེད་པ་འདི་བཞི་བརྒྱད་ཀྱི་སྔོན་གྱི་ཉིན་དང་།བཞི་བརྒྱད་ཀྱི་ཕྱི་ཉིན་རྣམས་ལ་ཡང་སྐོར་མཁན་ཡོད་འདུག འདིའི་དུས་ཆེན་ནི་ཧ་ཅང་གིས་གལ་ཆེན་གནད་ཆེན་ཞིག་ཏུ་བརྩི་བའི་རྒྱུ་མཚན་གྱིས་དར་མདོའི་རིག་གནས་ལོ་རྒྱུས་མང་པོ་ཞིག་ཤུགས་ཀྱིས་གོ་ཐུབ་པ་འདུག
དར་རྩེ་མདོའི་ས་ཁོད་ནི་རི་གསུམ་འདུས་མདོ་ཡིན་ཞིང་རི་གསུམ་ལས་གདན་ཐོག་རི་བོ་ལྷ་མོའི་གཞི་བདག་ནི་མཛེས་ཤིང་ལྟ་ན་སྡུག་པའི་གཞོན་ནུ་མ་ཞིག་ཡིན་ཞིང་ཟུར་ཕུག་ཕྱོགས་ཀྱི་རི་གདོང་ནི་ཨ་ལེ་བུ་སྒང་ཟེར་བའི་གཞི་བདག་ཡིན་པ་དང་དེ་ནི་བྱད་བཞིན་ལེགས་པ།ཕོ་སར་སྟག་འདྲ་བ་ཞིག་ཡིན།ཤར་ཕྱོགས་རི་བོ་ནི་རྫོང་བྲག་ཟེར་བའི་བོན་དམུ་རྡོ་ཚང་ནས་བྱུང་བའི་གཞི་བདག་དེ་རྔམ་བརྗིད་ཆེ་ལ།དྲག་ཉམས་དོད་པ།སྐྲག་དགོས་པ་ལྟ་བུ་ཞིག་ཡིན།རྫོང་བྲག་ཚང་དང་།ཨ་ལེ་བུ་སྒང་ཚང་གཉིས་ཀྱིས་གདན་ཐོག་ལྷ་མོའི་དོན་ལ་ཐོབ་ཤོར་གྱི་རྩོད་པར་བྱེད་པའི་ལོ་རྒྱུས་ཀྱང་ཡོད་འདུག་པས།དར་མདོའི་མཛའ་གླུ་དང་།དར་མདོའི་མཛའ་བརྩེ་ཕུན་སུམ་ཚོགས་པོ་ཡོད་པའི་རྟེན་འབྲེལ་ཡང་འདི་དག་གིས་གྲུབ་བོ་སྙམ།བཞི་པའི་ཚེས་བརྒྱད་ཀྱི་དུས་ཆེན་གྱི་ཁུངས་བཤད་ན།དེ་ཡང་ཡུལ་འདི་ན་ཆེས་སྔ་མོ་ཞིག་ནས་བྱང་གཏེར་རྙིང་མའི་ཆོས་བརྒྱུད་བྱུང་ཡོད་ལ།ས་སྐྱའི་ས་ངོར་གཉིས་ཀྱི་ཆོས་རྒྱུད་འཛིན་པ་དང་།བཀའ་བརྒྱུད་པའི་ཆོས་རྒྱུད་འཛིན་པ་སོགས་ཆོས་བརྒྱུད་ཁག་མང་པོ་ཞིག་དར་ཡོད།དེ་བཞིན་བོན་གྱི་ཆོས་བྱེད་པ་ཡོད་པའི་རྟགས་ནི།ཁྱིམ་མིང་ལ་བོན་གྱི་ལྷ་མིང་ཐོགས་པ་ནི་ཝ་གསས་སྐྱབས་ཚང་ཟེར་བ་དང་།ས་མིང་བོན་གྱི་ལྷ་མིང་ཐོགས་པ་ཝ་གསས་ལུང་པ་ཟེར་བ་སོགས་ཤིན་ཏུ་མང་།ཀརྨ་པཀྴི་གནས་འདིར་ཕེབས་པའི་ལོ་རྒྱུས་ནི་ཡོངས་སུ་གྲགས་ལ།ཀརྨ་པ་དེ་བཞིན་གཤེགས་པའི་སྐབས་སུ་ཡུལ་འདིར་ཀརྨ་བཀའ་བརྒྱུད་ཀྱི་བསྟན་པ་ཧ་ཅང་རྒྱས།གདན་ཐོག་རི་བོ་རང་ན་བཀའ་བརྒྱུད་པའི་དགོན་པ་ཞིག་བཏབ་ཡོད།གནའ་དུས་གདན་ཐོག་རི་བོ་ལ་ལྷ་མོ་རྩེ་ཞེས་གྲགས་ལ།དེའི་རྒྱུ་མཚན་ལ་བཤད་སྟངས་གཉིས་འདུག གཅིག་བུམ་པ་གཡུ་མཚོའི་རྒྱབ་རི་རི་རྩེ་ལྔ་ཡོད་པར་ལྷ་མོ་ཚེ་རིང་མཆེད་ལྔའི་གནས་ཡིན་པས་ལྷ་མོ་རྩེ་ཟེར་བ་དང་།རྡོ་རྗེའི་ཕག་མོའི་གནས་ཡིན་པས་ལྷ་མོ་རྩེ་ཟེར་བ་རེད་ཅེས་བཤད་ཚུལ་གཉིས་བྱུང་།དགའ་ལྡན་ཕོ་བྲང་གི་དུས་སུ་བོད་ས་ཁུལ་གྱི་བཀའ་བརྒྱུད་པ་དང་ཇོ་ནང་པའི་དགོན་པ་མང་པོ་ཞིག་དགེ་ལུགས་པའི་དགོན་པར་བསྒྱུར་བའི་སྐབས་སུ།དར་མདོའི་བཀའ་བརྒྱུད་པའི་དགོན་པ་རྣམས་དགེ་ལུགས་པར་བསྒྱུར་བས་བཀའ་བསྟན་ཉམས་ན་ཡང་།སངས་རྒྱས་འཁྲུངས་སྐར་གྱི་དུས་ཆེན་དེ་མི་དམངས་ཀྱི་དུས་ཆེན་ཞིག་ཏུ་གྱུར་ཏེ་ད་བར་མུ་མཐུད་ནས་དུས་ཆེན་གཏོང་སྲོལ་ཡོད་པ་རེད།འོན་ཀྱང་དེང་དུས་ཀྱི་དར་མདོར་བོད་ལུགས་ཀྱི་བཞི་པའི་ཚེས་བརྒྱད་དེ་རྒྱ་ནག་ཞིང་རྩིས་ལུགས་ཀྱི་བཞི་པའི་ཚེས་བརྒྱད་ལ་དུས་ཆེན་གཏོང་སྲོལ་དེ་རིམ་བཞིན་ཆགས་འདུག འདིར་གསལ་བཤད་དགོས་པ་ཞིག་ལ།གོང་ཞུས་ལྟར་གནའ་དུས་གདན་ཐོག་རི་བོ་ལ་ལྷ་མོ་རྩེ་ཞེས་གྲགས་ལ།རྗེས་སུ་བཀའ་བརྒྱུད་པའི་ཆོས་བརྒྱུད་འཛིན་པ་ད་ལྟའི་ལྷ་མོ་རྩེ་དགོན་པ་འདི་གྱེས་སོང་བས།འདིའི་ཕྱོགས་ལ་ལྷ་མོ་རྩེ་ཐོགས་སོང་བ་རེད།དེང་སང་ལྷ་མོ་རྩེའི་དགོན་པ་ནི་དགེ་ལུགས་པའི་ཆོས་བརྒྱུད་འཛིན་པ་ཡིན་ནོ།།
 

  • ལེ་ཚན་སྔོན་མ།:རྒྱལ་རོང་ས་ཁུལ་གྱི་དམངས་ཁྲོད་དུས་ཆེན།
  • ལེ་ཚན་རྗེས་མ།:བོད་ཀྱི་ལོ་སར།