ཚང་མས་རྒྱུན་དུ་གཟིགས་གསལ་བཞིན་རྩེ་ཕོ་བྲང་གི་ཤར་ནུས་གཉིས་ཀྱི་རྩིག་ངོས་དཀར་པོ་དང་།དབུས་ཀྱི་རྩིག་ངོས་དམར་པོ།ཤར་ངོས་དང་གཤམ་འོག་གི་ཁང་པ་འགའ་ཞིག་གི་རྩིག་ངོས་སེར་པོ་བཅས་ཡིན།རྩེ་ཕོ་བྲང་གི་ཕྱིའི་རྩིག་ངོས་སུ་ཚོན་མདོག་དཀར་དམར་སེར་གསུམ་སྒྲོན་དགོས་དོན་ནི་ཕྱིའི་མཛེས་ཆ་ཙམ་ཅི་ནས་མིན་པས།དེར་རང་གི་བསྟན་བྱའི་ནང་དོན་གཏིང་ཟབ་རེ་ལྡན་ཡོད་དེ།དམར་པོ་ལས་ཁམས་གསུམ་དབང་དུ་འདུས་པ་མཚོན་ཞིང་།དཀར་པོ་ལས་ཡོངས་སུ་ཞི་བར་གནས་པ་བསྟན་པ་དང་།སེར་པོ་ལས་ཚེ་དང་བསོད་ནམས་འབྱོར་པ་སོགས་དར་ཞིང་རྒྱས་པ་མཚོན་གྱི་ཡོད།ཕོ་བྲང་གི་གཙོ་བོའི་ཚོན་མདོག་དཀར་དམར་གཉིས་ནི་བོད་ཀྱི་ཆོས་སྲིད་ཉིན་ཟླ་ཟུང་འབྲེལ་གྱི་མཚོན་ཚུལ་ཞིག་ཡིན་པས་ན།ཕྱི་ངོས་གངས་རི་ཇི་བཞིན་རབ་ཏུ་དཀར་བའི་ཕོ་བྲང་དཀར་པོ་ནི་སྲིད་གཞུང་གི་བྱེད་སྒོ་སྤེལ་སའི་ཕོ་བྲང་དང་།གྲྭ་ཤག བང་མཛོད་སོགས་ཡིན་པ་དང་།དམར་པོ་ནི་ཆོས་ལུགས་ཀྱི་བྱེད་སྒོ་སྤེལ་སའི་མཆོད་ཁང་དང་ལྷ་ཁང་ཤ་སྟག་རེད།རྩིག་ངོས་ལ་སྒྲོན་པའི་ཚོན་མདོག་དང་བཟོ་སྐྲུན་གྱི་བཀོད་པའི་ཐོག་ནས་སྔ་མོའི་སྲིད་ཀྱི་ལམ་ལུགས་དང་ཆོས་ཀྱི་ནང་དོན་ཟབ་མོ་མཚོན་ཐབས་བྱེད་པ་དེ་ཡང་བོད་ཀྱི་ཐུན་མོང་མིན་པའི་རིག་གནས་ཤིག་རེད།