ཁམས་ཉག་རོང་དུ་བོད་ཟླ་བཅུ་གཉིས་པའི་ཚེས་བཅུ་གསུམ་ཉིན་དེ།ལོ་སྐོར་ཟླ་བ་བཅུ་གཉིས་ཀྱི་ནང་ཚན་དུས་ཆེན་ཆེས་ཆེ་བ་ཞིག་ཏུ་བརྩིས་ནས་ཟབ་རྒྱས་སུ་རོལ་བ་སྟེ།རྒྱའི་ལོ་སར་དང་བོད་ཀྱི་བཅུ་གསུམ་ཞེས་དེ་ལས་ཆེ་བའི་དུས་ཆེན་མེད་པར་བཤད།
ཉག་རོང་དུ་བཅུ་གསུམ་གྱི་དུས་ཆེན་རོལ་ཅིང་།དུས་ཆེན་འདི་ལོ་སར་བརྩིས་པའི་སྲོལ་འདི་ཇི་ལྟར་བྱུང་བའི་སྐོར་ལ་ཤོད་ཚུལ་མི་འདྲ་བ་གསུམ་སྣང་སྟེ།དང་པོར།ཉག་དཔོན་ཨ་མགོན་གྱིས་ཁམས་ཆབ་མདོ་མན་ཆད་དང་།ཤར་རྒྱལ་མོ་རོང་ཡན་ཆད་དྲག་པོ་དཔུང་གིས་དབང་དུ་སྡུད་སྐབས།དམག་ཇུས་ལ་བྲེལ་བས་ལོ་སར་བོད་ཟླ་བཅུ་གཉིས་པའི་ཚེས་བཅུ་གསུམ་དུ་སྔར་སྣུར་བྱས།དེ་ནས་ཡུལ་གཞན་དུ་དམག་དྲངས་པས་གཡུལ་ལས་རྣམ་པར་རྒྱལ་པས་གོང་གི་ཟླ་ཚེས་དེ་བརྩི་མི་དགོས་པའི་གཟའ་སྐར་བཟང་པོར་བརྩིས་ཏེ་དུས་ཆེན་རོལ་བའི་སྲོལ་བྱུང་ཚུལ་དང་།གཉིས་པ།ལྕགས་མདུད་ཤེས་རབ་རྒྱ་མཚོ་དེ་ཉིད་མཁས་དང་གྲུབ་པའི་སྙན་པ་ཕྱོགས་མེད་དུ་ཁྱབ།ཉག་སྟོད་སྡེ་བཞིའི་བཀུར་གནས་སུ་གྱུར་པར།བོད་ཟླ་དང་པོར་ལོ་སར་རོལ་ན།ཆོ་འཕྲུལ་ཆེན་པོའི་ཟླ་བའི་ནང་བཤས་མང་པོ་བཤའ་བར་དགོངས་ཏེ་ཟླ་བ་སྔ་མའི་གཟའ་སྐར་ཤིན་ཏུ་དགེ་བའི་ཚེས་བཅུ་གསུམ་ཉིན་ལོ་སར་སྔར་སྣུར་བྱས་པ་ལས་སྲོལ་ཚུགས་ཚུལ་དང་།གསུམ་པ།ཁམས་ཉག་རོང་ནི་སྔོན་ཁྲ་མོ་གླིང་གི་ས་ཆ།འབྲུ་དགའ་བདེ་ཆོས་སྐྱོང་བེར་ནག་གི་གདན་ས།གྲུབ་བརྙེས་ཀྱི་རིག་འཛིན་བར་མ་ཆད་པར་འབྱུང་བའི་རོང་ཆེན་སྟེ།གླིང་རྗེ་གེ་སར་རྒྱལ་པོ་དེ་ཉིད་ཀྱིས་ཕྱོགས་བཞིའི་དགྲ་བཞི་བཏུལ།ནག་པོ་བདུད་དང་སེར་པོ་ཧོར།སྨུག་པོ་འཇང་ལ་སོགས་པའི་ཡུལ་ཐམས་ཅད་དུ་སངས་རྒྱས་ཀྱི་བསྟན་པ་ཉི་འོད་བཞིན་ཁྱབ་པར་མཛད་དེ།མི་ཡུལ་གྱི་འགྲོ་དོན་རེ་ཞིག་རྫོགས་ནས་ལྷ་ཡུལ་དུ་གཤེགས་ཁར་གྱི་བོད་ཟླ་བཅུ་གཉིས་པའི་ཚེས་བཅུ་གསུམ་ཉིན།གླིང་དཀར་སྟོད་སྨད་ཐམས་ཅད་དགའ་སྟོན་གྱི་དཔལ་ལ་རོལ་བས།དེའི་རྗེས་དྲན་གྱི་ཆེད་དུ་སྲོལ་འདི་ཚུགས་པ་ཡིན་ཚུལ་གྱི་ངག་རྒྱུན་དུ་ཡང་སྣང་ངོ་།།
བཅུ་གསུམ་རོལ་བའི་དུས་བཟའ་བཅའ་བཏུང་གསུམ་གྱི་རིགས་དང་རྒྱན་གོས་གཟབ་མཆོར་སྤྲས་སྟངས།རྟའི་བང་རྩལ་འགྲན་སྟངས་སོགས་ནི་བོད་ཡུལ་སྤྱི་དང་འདྲ་བ་རེད།ཡུལ་ལྷ་གཞི་བདག་མཆོད་བསྟོད་ཀྱི་སྟ་གོན་ལ།བསང་ཤིང་།བསང་རྫས།དཀར་གསུམ་མངར་གསུམ་གྱི་ཕྱེ་མ།ཇ་ཕུད།ཆང་ཕུད།འོ་ཕུད།ལ་བཙས་གསོ་བྱེད་ཀྱི་རྒྱལ་མཚན་རྩེ་མོ་སོགས་ཀྱི་རླུང་རྟ་སྣ་ཚོགས།གཞི་བདག་གི་སྐོང་རྫས་ཤིང་ལས་གཞོག་པའི་མདའ་གཞན་ན་མ་དར་བའི་སྲང་ཤིང་ཞེས།ཤིང་སྟག་པའི་ཡལ་ག་འདམ་དོ་ཙམ་གྱི་ཡུ་བ་ཅན་ཡལ་ག་མང་པོ་ཡོད་པར་ཁབ་ཀྱིས་བུ་ག་གཏོར་པར་བྱ་དཀར་གྱི་སྤུས་བརྒྱན་པ།ཀླུ་མཆོད་སོགས་ལ་མཁོ་བའི་བལ་མཚོན་དང་།དར་ཕྲེང་སྒོ་དར་རྣམས་སོ།།
ཚེས་བཅུ་གཉིས་ཉིན་གྱི་དགོང་མོར།ཁང་པའི་སྟེང་འོག་ཐམས་ཅད་གཙང་མར་ཕྱགས།ཁང་པའི་ཀ་གདུང་དང་ཐབ་ཀ་སོགས་ལ་གྲོ་ཕྱེས་ཁྲ་རྟགས་བཀོད།རྒྱས་པ་ལ་གཡུང་དྲུང་དང་དཔལ་བེའུ་སོགས་བཀྲ་ཤིས་པའི་རི་མོ་འབྲི་ཆང་སྣོད་སོགས་ལ་མར་གྱི་ཁྲ་རྟགས་ཀྱིས་བརྒྱན།
བཅུ་གསུམ་དངོས་རོལ་གྱི་གོམས་སྲོལ་ལ།ཉིན་དང་པོ་སྟེ་བཅུ་གསུམ་ཉིན།སྐྱ་རེངས་མ་ཤར་གོང་ཙམ་ནས་ལངས་ཏེ་ཁ་ལག་གཙང་མར་བཀྲུས་རྗེས་སྐྱེས་པ་རྣམས་ཀྱིས་རང་རང་གི་ཁང་སྟེང་ནས་ལྷག་བསང་བཏང་།བུད་མེད་རྣམས་ཆུ་ཁ་ནས་ཆུ་དང་འཁྱགས་རོམ་ལེན་ཏེ་ཆུའི་སྣོད་བཀང་།ཟས་ཀྱི་ཐོག་མར་ཁྱིམ་དུ་ལོ་ན་མཐོ་བའམ་ཡང་ན་བཟའ་དཔོན་གྱིས་ཁྱིམ་མི་ཐམས་ཅད་ལོ་གསར་པའི་ནང་བཀྲ་ཤིས་བདེ་ལེགས་ཡོང་བའི་སྨོན་ཚིག་བརྗོད་པ་དང་སྦྲགས།ཁ་ཕྱེ་མས་གསོ་ཞེས་དཀར་གསུམ་མངར་གསུམ་གྱི་ཕྱེ་མ་འགམ་དུ་འཇུག  དེ་ནས་གང་འདོད་ཀྱི་ཟས་ལ་ལོངས་སྤྱད་དེ་རང་ཁྱིམ་དུ་སྐྱིད་སྐྱིད་བཏང་བ་ལས་ཕྱི་ལ་འགྲོ་སྲོལ་མེད།
ཚེས་བཅུ་བཞི་ཉིན།ཉེ་འཁོར་གྱི་གྲོང་ཚོ་དུ་མ་ཞིག་གི་རྐྱ་པ་རྣམས་འདུས་ནས་རི་བསང་གཏོང་བ།སྐྱེས་པ་རྣམས་ཀྱིས་གོས་བཟང་གྱོན།སྒ་བཀྲ་སྟན་བཀྲ་བྱས་པའི་རྟ་ལ་བཞོན་ནས་གཡས་ལ་བཙས་གསོ་བྱེད་ཀྱི་སྲུང་ཤིང་རླུང་རྟས་བརྒྱན་པ།ཕྲག་ཏུ་བསང་རྫས་ཁུར་ནས་རྟ་པ་བཅུ་ཕྲག་དུ་མ་ལྷ་རིའི་རྩེར་འགྲོ་ནས།
ལྷ་བསང་ནམ་མཁའ་གང་བ་བཏང་།ལ་བཙས་གསོ།ལ་བཙས་གསོས་ཟིན་རྗེས་ལྷ་རྒྱལ་ལོ་ཞེས་འུར་དིར་གྱིས་གནམ་ས་བཀང་མཐར།རྟ་པ་བསང་མཆོད་འདོན་མཁན་དང་བཅས་པས་ཡུལ་ལྷ་གཞི་བདག་དགྱེས་པའི་ཆེད་དུ་ལྷ་རིའི་འགོར་བསང་རག་འཐུང་སྲོལ་ཡོད་དེ།ཕོག་སར་ཕལ་ཆེར་བཟི་ནས་རྐྱ་པ་རྣམས་ལྷ་རི་ལས་བབ་སྐབས་ལྟད་མོ་ངོ་མཚར་བ་སྣ་ཚོགས་མཐོང་རྒྱུ་ཡོད་དོ།།དེ་ནས་ཐང་ལ་བབས་ཏེ་ཐང་གི་བསང་ཆེན་ལ་བསང་སྐོར་རྒྱུག་འཕྲལ་དུ་རྟ་རྒྱུག་གི་འགོ་ཚུགས་ཏེ།རྟ་རྩལ་ལ་བཟང་བའི་ཕོ་སར་རྣམས་ཀྱིས་སྒ་འགྱུར་དང་།ཅོག་ཙེ་རྟ་བབ་དང་།སྒ་མཆོང་དང་།རྟ་ཐོག་ནས་བོའུ་རྩལ་འགྲན་པ་དང་།མདའ་རྩལ་འགྲན་པ།ཁ་བཏགས་ལེན་པ་སོགས་རྐྱ་རྩལ་དང་།རྟའི་མགྱོགས་ཚད་འགྲན་པ་སོགས་ཏེ།ལྟད་མོ་བ་རྣམས་ཀྱིས་ཆང་འཐུང་བཞིན་ལྟད་མོའི་སྐབས་བསྟུན་དུ་ཀི་སོ་ཧོ་གསུམ་གྱིས་དུས་འདའ་བ་ལ།དགོང་ཁར་བཀྲ་ཤིས་པའི་རྟ་རྒྱུག་ཅེས་རྟ་པ་ཐམས་ཅད་མཉམ་དུ་རྒྱུག་པར།ཡུལ་ལུང་ཀུན་རྟ་མང་གི་རྨིག་སྒྲ་དང་།རྟ་སྐེའི་དྲིལ་ཆུང་དང་བྱེའུ་གཡེར་པའི་སིལ་སྒྲ།རྟའི་ཧུར་སྒྲ།རྟ་པ་དང་ལྟད་མོ་བ་རྣམས་ཀྱིས་ཤིས་བརྗོད་འདོད་གསོལ་གྱི་སྒྲ་བཅས་ཀྱིས་བཀང་།མཐར་རྟ་པ་ཐམས་ཅད་རྟ་ལས་བབས་ཏེ་ཞྭ་ཕུད་ནས་བཀྲ་ཤིས་ཀྱིས་མཐར་བརྒྱན་ནས་རང་ཁྱིམ་དུ་ལོག་གོ།
ཚེས་བཅོ་ལྔ་ཉིན་ནི།བྲོ་འཆམ་པའི་ཉིན་ཏེ།ན་ཚོད་དར་ལ་བབས་པའི་སྐྱེས་ཕོ་མོ་ཀུན་རྒྱན་གོས་ཀྱིས་མཛེས་པར་བྱས་ཏེ་བྲོ་རར་ཕྱིན།བྲོ་རའི་དཀྱིལ་དུ་ཅོག་ཙེ་གྲུ་བཞིའི་སྟེང་འབྲུ་སྣས་བཀང་བའི་འབྲུ་འབོའི་ཁར་དར་ཚོན་སྣ་ལྔས་བརྒྱན་པའི་ཚེའི་མདའ་དར།མདུན་དུ་ཆང་གིས་བཀང་བའི་དངུལ་ལྟིར་དང་དངུལ་ཕོར།ཁ་བཏགས་བཅས་བཤམས་ལ།དེར་བསྐོར་ནས་ཉག་བྲོ་དལ་ལ་རིང་མོ་དེ་འཆམ་འགོ་བརྩམ་པར།བྲོའི་འགོ་མ་ངེས་པར་དུ། ཉི་མ་སེར་པོ་ཤར་ནས་ཤར།།བླ་མ་བཟང་པོའི་མདུན་ལ་ཤར།།ཆོས་ཀྱི་བསྟན་པ་དེ་ནས་དར།།ཉི་མ་སེར་པོ་ཤར་ནས་ཤར།།དཔོན་པོ་བཟང་པོའི་མདུན་ལ་ཤར།།ཁྲིམས་ཀྱི་བསྟན་པ་དེ་ནས་དར།།ཉི་མ་སེར་པོ་ཤར་ནས་ཤར།།མ་སྲུ་བཟང་པོའི་མདུན་ལ་ཤར།།མགྲོན་གྱི་བསྟན་པ་དེ་ནས་དར།།ཞེས་པ་དེ་འཆམ་ལ།དེ་ནས་བྲོ་དཔོན་གང་འདོད་ཀྱི་བྲོ་འཆམ་པར།སྡེ་དེའི་སྤྱི་གཉེར་པས་ཐོག་མར་བྲོ་དཔོན་ལ་ཁ་དར་བཏང་སྟེ།ཚུལ་འདི་སྔར་སྲོལ་བཟང་པོའི་རྒྱུན་མ་ཆད་པ་ཡིན་ལུགས་དང་།དེང་འདིར་སྐྱ་སེར།རྒན་གཞོན།ཕོ་མོ་ཀུན་གྱིས་འབད་པ་མཐུན་འགྲིག་ལ་བརྟེན་ནས།སྡེ་འདིའི་མི་ནོར་དར་ཞིང་རྒྱས་པའི་ཚུལ་དང་།ཕན་ཚུན་ཀྱང་སྤྱོད་བཟང་དར་སྤེལ་དགོས་ཚུལ་གྱི་གཏམ་བཤད།བྲོ་པ་ཐམས་ཅད་ལའང་ཁ་བཏགས་གཏོང་བར།སྐྱེས་པ་ལ་ཕྲག་པ་གཡས་དང་།བུད་མེད་ལ་ཕྲག་པ་གཡོན་ནས་བསྐོར་ཏེ་པ་བཏགས་བསྐོན་དགོས།
ད་ལྟར་བྲོ་འཆམ་པ་ལ།བྲོ་པ་ཕོ་མོའི་བར་བྲོ་གསར་འགྲན་སྲོལ་ཞིག་ཡོད་དེ།ཡུལ་དེར་མ་དར་བའི་བྲོ་གསར་ཞིག་ཕོ་གསར་ཚོས་ཤེས་ན་བུད་མེད་རྣམས་ལ་གསང་བ་དང་།བུད་མེད་རྣམས་ཀྱིས་ཤེས་ན་ཕོ་གསར་ཚོར་གསང་བ་སྟེ།དངོས་སུ་འགྲན་སྐབས་ཕོ་མོ་སུའི་ཕྱོགས་ནས་མ་ཤེས་ནས་བྲོ་ཆད་ཚེ་ལྟད་མོ་བ་ཀུན་གྱིས་དགོད་སྒྲས་ཁྱབ་པ་དང་།སྨྲ་ལྕེ་བདེ་བ་དག་གིས་ཕམ་མཁན་ལ་ཁ་བཏགས་བཏང་བ་སོགས་ཀྱིས་ཤིན་ཏུ་ངོ་ཚ་བར་གྱུར་ཕྱིན།བྲོ་གསར་འགྲན་པར་རྩོད་པ་ཧ་ཅང་ཆེ་བ་སྟེ།བྲོ་གསར་སློབ་སྐབས་འགྲན་སྡུར་སྔོན་དུ་ཕྱོགས་གཞན་ལ་མི་སློབ་པའི་དམ་བཅའ་འཇོག་པ་དང་།མནའ་བོར་བའི་སྲོལ་ཡང་ཡོད་ཅེས་གླེང་།
ཉག་བྲོ་འཆམ་རིང་སྤྱི་པ་ཁག་དང་།མགྲོན་པོ་སོགས་ཀྱིས་བྲོ་སྟོན་འབུལ་སྲོལ་ཡང་ཡོད་དེ།སྤྱི་གཉེར་པས་བྲོ་འཆམ་མཚམས་རན་པའི་སྐབས་དང་བསྟུན།མི་སུ་ཞིག་དང་ཡང་ན་སྤྱི་ཁག་གང་གིས་བྲོ་ར་རྒྱས་པའི་རྟེན་འབྲེལ་ཏུ་བྲོ་སྟོན་གང་ཞིག་འབུལ་བའི་ཚུལ་དང་།འབུལ་མཁན་ལ་བསྟོད་པ་དང་ཤིས་བརྗོད་ཀྱི་ཚིག་སྙན་འཇེབས་ཡིད་དུ་འོང་བ་བཤད་ཤེས་དགོས།
ད་དུང་ཚེས་བཅོ་ལྔའི་ཉིན་ནི།ལོ་གཅིག་གི་རིང་ནང་རྒྱུ་ཕྱི་ལ་ངོམས་པའི་ཉི་མ་སྟེ།ལྟད་མོ་བ་འགའ་ཞིག་ནི་རྒྱན་གོས་ལ་ལྟད་མོ་ལྟ་འོང་བའང་ཡོད།
དེའི་ཕྱི་ཉིན་ནས་རིམ་བཞིན་རྒྱན་གོས་སྟབས་བདེ་སྤྲས་ཏེ།མདའ་རྩལ་འགྲན་པ་དང་།དེ་བཞིན་བོའུ་རྩལ་དང་།མགྱོགས་རྩལ་དང་།འགྱོག་ཤེད་དང་།སྐེ་འཐེན་དང་།རྨ་བྱ་ཆུ་འཐུང་གི་རྩལ་འགྲན་པ་དང་།ཁ་ཤགས་དང་།གླུ་ཤགས་དང་།མགུར་མོ་ལེན་རེས་དང་།མགུར་མོ་འདེབས་པ་སོགས་དང་།ཡང་ན་ཉིན་མཚན་ཀུན་ཏུ་དགའ་སྟོན་གྱི་དཔལ་ལ་རོལ་ཏེ།ཕོ་གསར་མོ་གསར་ཚོས་དགའ་རོགས་སྒྲིག་པའི་རྙེད་པར་དཀའ་བའི་དུས་ཚིགས་ཡིན་ལ།ཕོ་སར་རྣམས་ཆང་གི་ནུས་པ་ལ་བརྟེན་ནས་སྤོབས་པ་ཆེར་བསྐྱེད་པའི་དུས་ཆེན་ཞིག་ཀྱང་ཡིན་ནོ།།
དེ་ལྟར་ཉིན་ཤས་རོལ་མཐར།མཇུག་ཏུ་བཀྲ་ཤིས་བརྒྱན་སྲོལ་ལ།སྔར་ཡོད་བྲོ་པ་རྣམས་ཀྱི་ཁར་སྐྱེས་ཕོ་མོ་ཀུན་དང་།ཁྱད་པར་དུ་ཁ་རྒན་བཀྲ་ཤིས་ཞེས་ལོ་ན་མཐོ་ཞིང་ལུས་སྟོབས་བཟང་བ།ཁྱིམ་ཚང་སྐྱིད་ཅིང་དཔལ་ཕྱུག་འཛོམས་པ།མི་སེར་ཀུན་གྱིས་བརྩི་མཐོང་ཆེ་བ་ཞིག་གིས་བྲོ་དཔོན་བྱས་ཏེ།བཀྲ་ཤིས་ལུང་པའི་ཕུ་ལ།བཀྲ་ཤིས་གངས་རི་ཆགས།བཀྲ་ཤིས་གངས་རི་དེ་ལ།གངས་ཀྱི་སེང་གེ་འཁོར།གངས་ཀྱི་སེང་གེ་འཁོར་བར།སེང་ལ་གཡུ་རལ་རྒྱས།བཀྲ་ཤིས་ལུང་པའི་སྐེད་ལ།བཀྲ་ཤིས་ནགས་རི་ཆགས།བཀྲ་ཤིས་ནགས་རི་དེ་ལ།ནགས་ཀྱི་སྟག་མོ་འཁོར།ནགས་ཀྱི་སྟག་མོ་ཆགས།བཀྲ་ཤིས་སྡེ་བཞི་ཆགས་པར།ཕ་མོ་བཀྲ་གསུམ་རྒྱས།ཕོ་མོ་བཀྲ་གསུམ་རྒྱས་ཤིང་།བཀྲ་ཤིས་རྟག་ཏུ་འབར།ཞེས་པའི་བྲོ་ངག་རིང་མོས་མཐར་བརྒྱན་ཏེ།བྲོ་ཡག་བྲོ་ཡག་ཅེས་འབོད་ཞོར་དུ་ཞྭ་ཕུད།དེ་ལྟར་འདུ་ར་གྱེས་པ་ན།ཕོ་མོ་ལོ་ཆུང་རྣམས་ཕན་ཚུན་འབྲལ་དགོས་པའི་སྡུག་འསྔལ་དང་།རྒན་དགོན་འགའ་ཞིག་གིས་ད་ལོའི་བཅུ་གསུམ་འཕྲེང་བཞིན་དུ།གཉེན་ཉེའི་བར་ཕན་ཚུན་འཁྱུད་པ་དང་།ལག་པར་འཆང་བ་སོགས་ཡང་ཡང་བྱས་མཐར་རང་སྡེར་ལོག་གོ།