གཡར་བྱ་ལྷ་ཡི་ཁྲུང་ཁྲུང་། །
ཐག་རིང་རྒྱང་ལ་འཕུར་རོགས། །
ཁ་བ་ཅན་གྱི་ལྗོངས་སུ། །
གུས་པའི་ནང་མི་བཞུགས་ཡོད། །
 
འཕྲིན་བཟང་གཏམ་གྱི་ཡིག་ཆུང་། །
ཕ་མ་གཉིས་ལ་ཕུལ་ནས།།
བུ་མོ་བདག་གི་གནས་ཚུལ། །
མ་གསང་དྲང་པོ་ཞུས་ཡོད ། །
 
རྒྱང་རིང་ས་མཐའི་གནས་ལ། །
ཉིན་མཚན་སྦྲེལ་ནས་བསྐྱོད་པས། །
ཕ་མ་དྲན་པའི་གདུང་བ། །
དགུན་གྱི་ཆུ་དར་མཚུངས་སོ།།
 
ཐལ་མོ་སྙིང་གར་སྦྱར་ནས། །
མིག་ཟུང་བྱང་ལ་གཏོད་དེ། །
མ་འོངས་མཇལ་བའི་སྨོན་ལམ། །
སེམས་ཀྱི་དཀྱིལ་ནས་འདེབས་སོ། །
 
ཆུ་འཛིན་དུང་གི་འདབ་མ། །
ཡངས་བའི་མཁའ་དབྱིངས་བརྒྱུད་ནས། །
མཐོ་སྒང་བོད་ཀྱི་ཡུལ་ལ། །
སྦྲང་ཆར་བསིལ་བསིལ་སྟེར་རོགས། །