ཀླད་ཁུ། 2021-05-10
ལེའུ་དང་པོ།
ཞོགས་པ་སྔ་མོར་ལངས་མ་ཐུབ་ན་ཡང་།
ནམ་ལངས་ཐུབ་ན་དེ་དུས་ལང་བར་བྱ།
ཞོགས་ཇ་འཐུང་ཁོམ་མེད་ན་མེད།
ཁ་ལག་ཡག་པོ་བཀྲུ་ཁོམ་མེད་ན་ཡང་མེད།
སྤྲིན་དང་རྡོག་ཁྲེས་ཀྱིས་དྲུད་པའི་ཐག་
རིང་དེ་དག།
ཞོགས་པ་འདི་དང་འབྲེལ་བ་ཡོད་མེད་
ངས་ད་རུང་མི་ཤེས།
མིག་ཤེལ་འདིའི་ནང་གི་རི་དྭགས་རྣམས་
གང་དུ་སོང་རུང་།
ངའི་ལུས་ཀྱི་དྲི་མ་དང་མེ་རོ་ཁུར་འདུག།
ངའི་སྐྲ་ལོ་དང་ལང་ཚོ་སྒུལ་བའི་མིག་ཟུང་
ཁུར་འདུག།
རང་བྱུང་ཁམས་ལ་དད་པའི་མ་འོངས་པ་
ཁུར་འདུག།
ང་རང་འདིའི་ཆེད་དུ་ཉིན་ཞག་དུ་མར་
འཚོ་དགོས་པ་འདྲ།
ད་ནངས་ཞོགས་པར་སྤྲིན་པ་མི་འདུག།
སྤྲིན་པའི་ནང་གི་རི་མོ་ཞིག་ཚར་སོང་།
རི་མོ་ནང་གི་བརྩེ་དུང་འཇགས་ཏེ།
རོལ་མོ་སྙན་མོ་ངའི་སྤྱོད་ཡུལ་དུ་མ་གྱུར་པར།
ཞོགས་པ་ཁོ་རང་གཅིག་པུས་ཁོག་ལ་
བཅུག་སོང་།
ཁོག་གི་རོལ་མོ་དེ་དག་ཀྱང་སྒྲ་གདངས་
མེད་པར་གྱུར།
མིག་ཟུང་ཇི་ལྟར་ཡུན་རིང་དུ་ཅེར་ན་ཡང་།
ངས་སྔར་ལྟར་ཞོགས་པའི་ནང་དུ་གཏན་
ཚིགས་མཐོང་མ་སོང་།
ཉི་འོད་གྱང་རོ་སྟེང་དུ་ཤེད་ཀྱི་ཤུད་རྗེས།
སྨད་འཚོང་མ་དེ་དག་ཉི་ལྡེ་བའི་ལས་ལ་
སྦྱོར་གྱིན།
ངའི་སྲང་ལམ་དུ་མི་སྡུག་པའི་རོལ་མོ་གྲགས།
རོལ་མོ་དེས་ངའི་དུས་ཚོད་ཀྱི་ནགས་ཚལ་
སྒུལ་གྱིན།
ཡུན་རིང་གཉིད་མ་ཟིན་པའི་མལ་ཁང་དེ་ནས།
ངས་རྒྱང་རིང་ལ་གླུ་དབྱངས་སྙན་མོ་ཞིག་
མི་ལེན་གཏོལ་མེད་བྱུང་།
ལེའུ་གཉིས་པ།
མ་འོངས་པར་ངས་རང་གི་མིག་གཉིས་ཀྱི་
ཆེད་དུ།
མེ་ལོང་རྒྱ་ཆེན་ཞིག་ཉོས་ཏེ།
མེ་ལོང་དེའི་ནང་གི་དགའ་སྐྱོ་ཡོད་ཚད་
ཐམས་ཅད།
ནགས་ཚལ་ཞིག་གི་འདབས་སུ་འདེབས་དགོས།
དེར་རྩྭ་ཆུ་འཛོམས་ཤིང་།
རྨི་ལམ་ནང་གི་རྒྱ་སྟག་གི་ངར་སྒྲ་རྣམས་གླིང་
བུ་ལ་འཐོགས་ཏེ།
བདག་མེད་པའི་ངོ་གདོང་སྟེང་གི་སྡུག་
བསྔལ་དེ་དག།
མེ་ཏོག་དང་རྒྱ་མཚོའི་འགྲམ་དུ་ཡང་ཡང་
སྐྱེས་ངེས།
མ་འོངས་པའི་མེ་ལོང་དེས་ངའི་བདེ་
སྡུག་ཐམས་ཅད་གཅིག་ཏུ་བསྡུས་ནས།
རོལ་དབྱངས་ལ་འཁྲི་བའི་སེམས་པ་ཕལ་བ་
དེ་དག།
ཞོགས་པར་ཡར་ལ་ལངས་བའི་སྤྲིན་པ་དང་།
དགོང་མོ་མར་དུ་ནུབ་འགྲོ་བའི་མཚམས་
སྤྲིན་ནང་དུ།
ལང་མ་ཐུབ་པའི་མི་དེའི་མིག་སྐྱག་ཇི་
བཞིན་འབྱར་བར་གྱུར།
དེ་ནི་ལན་ཆགས་ལྷག་མ་ཞིག་ཡིན་ཏན་
ཏན་རེད།
དེ་རིང་ང་རང་ཉི་མ་ལྷ་ས་ལྟ་བུའི་ངོ་གདོང་
ཁུར་ནས་འགྲོ་འདོད།
རྒྱུ་མཚན་ང་ནི་ཆུང་ནས་ཉི་མ་ལྷ་སའི་ཉི་འོད་
ལ་བསྡད་དེ།
ཉི་མ་ལྷ་ས་དང་མིའི་རིགས་ཀྱི་རི་དྭགས་ཤིག་
ལ་གྱུར་ཚར་འདུག།
ཞེན་ཆགས་ཀྱི་དབང་གིས་ཤར་བའི་ཉི་
ཟླ་གཉིས་པོ།
རྡོ་ལེབ་གཅིག་གི་སྟེང་ལྷུང་བའི་དྲོད་ཁོལ་
ཞིག་དང་འདྲ་བར།
ངའི་ལག་པའི་མཛུབ་རྩེའི་སེན་མོ་ལས་
དྲོད་སྦྱིན་མ་ནུས།
དེ་ནི་ཞེ་ཆགས་དྲགས་པའི་འཕར་རྩ་དེ་ལ་
འབྲེལ་བ་འདུག་སྙམ།
སྨིན་མ་རྣམས་རེངས་པོར་གྱུར་ཚར་རྗེས།
དྲན་གདུང་གིས་བརྩིར་བའི་སེམས་པ་དེ་དག།
ཁོ་ར་ཁོར་ཡུག་ཏུ་རྨི་ལམ་རྨིས་པའི་ཀོ་གྲུ་རུ་གྱུར།
ཀོ་གྲུ་དེས་ངའི་ནགས་ཚལ་དང་སྟག་སེང་
ཁྲིད་ནས་གང་ལ་སོང་ན་ཡང་།
དེའི་ཡུལ་གྱི་ན་ཟུག་ཐམས་ཅད་ངའི་དགའ་
སྐྱོ་ཡིན་སོང་།
ངའི་གཤོག་པ་ན་ཟུག་གིས་བརྐྱངས་ཏེ་
འཕུར་ན་ཡང་།
ངའི་ཡུལ་ལྗོངས་མེ་ཏོག་དང་མཚོ་མོས་
བརྒྱན་ནས་ཡོད།
དེའི་ནང་དུ་ཟེར་མི་ཤེས་པའི་གདུང་བ་རིང་
མོ་དང་།
གཏན་ཚིགས་ཅི་ཡང་མེད་པའི་འཚོ་བའི་
ཁ་དོག་གིས་གྲུབ་ཡོད།
ཁ་འབྲལ་བཞིན་པའི་དུས་ཚིགས་ཐམས་ཅད་དུ།
ངའི་ལོངས་སྤྱོད་དུ་འཁྲུངས་པ་མེ་ཏོག་
དང་ལྗོན་པ་ཡིན་ཨང་།
ངའི་རྨི་ལམ་དུ་རྨིས་པ་ན་ཟུག་གི་མི་
ཚོགས་དང་།
དེའི་ངོ་གདོང་ལས་རྙེད་པའི་རོལ་དབྱངས་
ཡིན་ཨང་།
ལེའུ་གསུམ་པ།
ཤི་ཟིན་པའི་གླུ་མ་ཞིག་དང་འཕྲད་རྗེས།
ངའི་མིག་ཟུང་གཉིས་མེ་ཏོག་ལྟར་གད་ནས་
ས་ལ་ལྷུང་།
མིག་ནང་གི་གླུ་ངག་གིས་ངའི་བྲང་གཞུང་
ད་རུང་རྡུང་བཞིན།
ཞོགས་པ་དང་མཚན་མོ་གཉིས་ལ་བྲོ་གླུ་ལེན།
བྲོ་གླུ་དེས་ངའི་སྐྱེ་བ་སྟོང་གི་གདུང་བ་དང་སྐྱོ་
བ་མཚོན་པར་བྱས།
གླིང་བུ་ཞིག་གིས་རྗེས་ལ་དྲུད་པའི་ཡུལ་
ལྗོངས་ཐམས་ཅད།
བརྩེ་དུང་ལྷག་མ་ཞིག་གི་རོལ་དབྱངས་
ལས་མཆེད།
མེ་ཏོག་དང་སྔོ་ལྗང་གསེང་གི་ཤུག་གླུ་ཤེད་
ཀྱིས་ལེན་མཁན་རྣམས།
ངའི་རྨི་ལམ་ནང་དུ་གླུ་ལེན་གྱིན་ཡོང་
མཁན་དང་།
ཤི་ཟིན་པའི་ཕ་ཡུལ་གྱི་གླུ་མ་དེ་དང་ཧ་ཅང་
འདྲ་བོ་འདུག།
ང་ལ་མི་ཚེ་འདིའི་ནང་དུ་མཉན་ཆོག་པའི་
གླུ་དབྱངས་འགའ་ཡོད།
གླུ་དབྱངས་དེའི་ནང་དོན་ལ་འཐིམས་པའི་
ན་ཟུག་འགའ་ཡོད།
ན་ཟུག་དེས་ང་ལ་བྱིན་པའི་མུན་པ་འགའ་ཡོད།
མུན་པ་དེས་མིག་ལ་བྱིན་པའི་ཡུལ་
ལྗོངས་འགའ།
དེ་ནི་མི་ལོ་མང་པོ་ང་རང་མི་ཡུལ་དུ་ཡོང་
བའི་བསྡུས་གཟུགས་ཡིན།
ངས་སྐབས་རེར་གླུ་དབྱངས་དེ་དག་ན་
ཟུག་གིས་མཉན་པ་ཡིན།
ཡང་སྐབས་རེར་ངས་གླུ་དབྱངས་དེ་སེམས་
ཀྱིས་མཉན་པ་ཡིན།
སྐབས་རེར་ལུས་ཐོག་གི་སྟེང་དུ་བབས་པའི་
རྨ་ཁས་མཉན་པ་ཡིན།
ཡིན་ན་ཡང་། གླུ་མ་དེ་བུད་སོང་རྗེས།
གླུ་དེ་གློ་བུར་ངས་ཆེས་ཕལ་བའི་མི་ཚེ་
ཡིས་མཉན་དགོས་པར་གྱུར།
ལེའུ་བཞི་པ།
ཁ་བ་བབས་ནས་ཡུན་རིང་ཕྱིན་སོང་།
ངའི་སེམས་ནང་གི་ཉི་ཟླ་མེ་ལ་བསྒྲོན་ན།
འོད་སྣང་གིས་སྒུལ་བཞིན་པའི་ཡུལ་
ལྗོངས་ཐམས་ཅད།
ཁ་བ་འདིའི་རྨི་ལམ་ནང་དུ་ལྷོད་ཀྱིས་བཞུར།
མཚན་མོ་དང་ལྷན་དུ་སྦྲེལ་བའི་མིག་ཟུང་
ནག་པོ་འདིས།
ཁྱོད་ཀྱི་གྱེས་ལམ་ལ་མྱ་ངན་ཞུ།
བདེ་ལེགས་ཀྱིས་འཕུར་བའི་བྱ་རྒོད་འདི།
བྲག་ཐེམ་སྟོང་བ་ཞིག་གི་སྙིང་ཉེ་རུ་གྱུར་རུང་།
བྲག་ཐེམ་དེ་ལ་འབྲེལ་བ་རྩ་ནས་མེད་
པའི་གཤོག་རྡེབ་དེས།
ཉི་འོད་ཀྱིས་དྲུད་ནས་འགྲོ་བའི་ནགས་
ཚལ་རྒྱང་ལ་ལུས་སོང་།
ཞོགས་པ་ཚེས་ཐེངས་རེར་ངས་བྱ་རྒོད་དེ་
དྲན་འོང་།
བྱ་རྒོད་དེའི་ལམ་ཐག་རིང་མོ་དེ་དྲན་འོང་།
ངའི་མིག་ཟུང་དང་ཧ་ཅང་འདྲ་བའི་རི་མོ་དེས།
ངའི་མི་ཚེའི་རོ་གོས་ཕུད་ནས་ཐག་རིང་དུ་
འགྲོ་བཞིན་པ་ཚོར།
རྩོམ་གསར། 10