འདམ་གྱིས་མ་གོས་པའི་འདམ་སྐྱེས།

        2021-04-16

ཉེས་དམིགས་དགེ་སྡིག་ཀུན་གྱི་ཆུ་མགོ་རུ།།

མི་སེམས་ཆགས་སྡང་འཐབ་པའི་འདུ་ར་ཞིག།

འཇག་རུལ་ལུད་སྙིགས་མང་བའི་མུན་ནག་ཅིག།

ལྟ་གྲུབ་མྱགས་འདམ་འཁྱིལ་བའི་རྫོབ་དོང་ཞིག།

མིག་གིས་མཐོང་ཞིང་ལག་པས་མྱོང་བ་དང་།།

སེམས་ཀྱིས་ཚོར་ཞིང་འཛིན་པའི་འདམ་སྙིགས་ཀྱི།།

མུ་དང་ཕ་མཐའ་མེད་པའི་རྫིང་བུ་རུ།།

ཕན་ཚུན་དམོད་པའི་དྲག་སྔགས་ཟམ་མི་ཆད།།

མཐའ་མེད་འཁོར་བར་ཆགས་སྡང་གོས་སུ་བྱེད།།

ལས་ཉོན་སྡིག་པའི་སྤྱོད་པ་ཟས་སུ་ཟ།།

སྙིགས་མའི་དབུས་ན་སྡང་མིག་ཧྲིག་ཧྲིག་ཏུ།།

བདག་ནི་མཐའ་འཁོབ་ཀླ་ཀློའི་གཤང་འབུ་བཞིན།།

འདམ་གྱིས་སྦགས་པའི་ཆོས་ཉིད་མ་རྙེད་ཅིང་།།

འདམ་གྱི་གཏན་ཚིགས་སྟོང་བའི་ཤེས་རབ་མེད།།

གཏིང་མཐའ་མི་དམིགས་འདམ་གྱི་ཀློང་དཀྱིལ་དུ།།

གཙང་ཞིང་དབེན་པའི་ཁོར་ཡུག་འགྲིམས་མ་ཐུབ།།

འབུ་སྡོམ་ཇི་བཞིན་གཏད་སོ་བྲལ་བ་ན།།

ཁྱེད་ཀྱི་སྐྱེས་སྦྱངས་རྩལ་གྱི་བར་སྣང་དུ།།

སྣ་ཚོགས་འབྲས་བུ་མངར་བའི་མངར་བ་ཡི།།

སྦྲང་རྩིའི་ཟས་ཀྱིས་འཐོར་ཞིག་མ་སོང་ཙམ།།

ཉེ་རིང་ཆགས་སྡང་ཕྱོགས་རིས་རྨང་ནས་སྤངས།།

དགེ་སྡིག་སེམས་ཀྱི་ཞེན་པ་རྩད་ནས་བཏང་།།

ཉོན་མོངས་སྙིགས་མའི་ཕྲ་རགས་བཞི་སྡེའི་དཔུང་།།

ས་མང་བག་ཆགས་མ་ལུས་བསྲེགས་ཤིང་བཅོམ།།

ལུས་ཀྱི་རིག་བྱེད་གཡའ་ཡིས་མ་གོས་ཤིང་།།

ངག་གི་འདབ་མ་དུག་གིས་མ་བསྣད་པར།།

ཡིད་ཀྱི་རྣམ་ཤེས་ཕྱི་གཙང་ནང་གསལ་དུ།།

རྟོགས་ཤིང་སད་པའི་གནས་སྐབས་བག་གིས་གཞོལ།།

འདམ་གྱི་ངོ་བོས་རྐང་ནས་མ་ཟིན་ཞིང་།།

འདམ་གྱི་ཀློང་ལས་ཤར་གྱིས་བུད་པ་ཁྱེད།།

མ་སྨད་བདག་བློའི་དག་གཙང་སྐམ་ས་རུ།།

འདམ་གྱིས་མ་གོས་ཆོས་ཉིད་གཤིས་ཀྱིས་འཛུམ།།

༼ ལོང་ལྐུག་གཟའ་སྨྱོན། ༽


  • ལེ་ཚན་སྔོན་མ།:འདུ་འབྲལ་བརྩེ་གླུ་ཐན་ཐུན།
  • ལེ་ཚན་རྗེས་མ།:ཆུ་ཡི་གྲོང་ཁྱེར་ལ་བལྟས་པ།