སྤྲེལ་རྫོང་བསྟན་རྒྱས། 2021-04-02
རྣམ་དཔྱོད་ཤེས་རབ་རྩལ་གྱིས་ས་གསུམ་གཡོ།།
ལེགས་བཤད་གསུང་གི་བདུད་རྩིའི་རྒྱ་མཚོ་འཁྱིལ།།
གྲགས་པའི་བ་དན་དཀར་བོ་མཁའ་རུ་འཕྱོ།།
ཁམས་གསུམ་འགྲོ་བའི་བླ་མ་གཙུག་ན་རྒྱལ།།
དྭངས་གསལ་རི་བོའི་ཕྱོགས་ནས་བྱོན་པ་ཡི།།
གླེགས་བམ་ཁུར་བའི་དགེ་སློང་ངོ་མཚར་ཅན།།
ཡབ་ཀྱིས་ཁྱིམ་དུ་བསུས་པའི་མཚན་ལམ་འདི།།
འཇམ་དཔལ་དབྱངས་ཀྱི་སྤྲུལ་པ་འཁྲུངས་པའི་རྟགས།།
ཡབ་ཡུམ་ཟུང་གི་མཚན་གྱི་རྨི་བལྟོས་ལ།།
ལྟས་བཟང་སྣ་ཚོགས་འཁོར་བའི་རྟེན་འབྲེལ་ལས།།
རིགས་གསུམ་མགོན་པོའི་རྣམ་པར་སྤྲུལ་པ་མཆོག།
མལ་གྱི་རུས་སུ་འཁྲུངས་བའི་རྟགས་མཚན་བསྟན།།
བགྲང་བྱ་མེ་བྱའི་སྨིན་དྲུག་ཟླ་བ་ཡི།།
ཚེས་གྲངས་བཅུ་ཡི་ཉིན་མོའི་ཐོ་རེངས་ལ།།
རྟགས་མཚན་འབུམ་གྱི་མེ་ཏོག་ཆར་བའི་ཀློང་།།
ཙོང་ཁའི་ཉི་མ་སེར་པོ་གླིང་འདིར་ཤར།།
ངོ་མཚར་ལྟས་བཟང་སྟོང་གི་ཀློང་ཡངས་སུ།།
སྐུ་གཞོན་ལང་ཚོ་འཁྲུངས་པའི་རྗེས་ཤུལ་ན།།
རང་བྱོན་ཙན་དན་ལོ་མ་འབུམ་དབུས་ལ།།
རྒྱལ་མཆོག་སེང་གེ་ང་རོའི་སྐུ་གཟིགས་ཤར།།
ཤར་ཕྱོགས་རིག་པའི་དཔའ་བོའི་སྐུས་བཀོད་ལས།།
དབུས་ལྡན་ཆོས་ཀྱི་ཞིང་ལ་ཞབས་བཀོད་བཅག།
མདོ་སྔགས་གཞུང་བརྒྱ་མ་ལུས་ཐུགས་སུ་ཆུད།།
སྙན་པའི་གྲགས་པ་སྲིད་པ་གསུམ་ལ་འབར།།
འཇམ་དཔལ་དབྱངས་དངོས་སྤྲུལ་པའི་བླ་མ་སྟེ།།
དགེ་ལྡན་ལུགས་ཀྱི་ཤིང་རྟའི་སྲོལ་འབྱེད་པའི།།
མཛད་ཆེན་བཞི་ཡི་འཕྲིན་ལས་འོད་སྟོང་མཆོག།
འཛམ་གླིང་མཛེས་པར་བྱེད་པའི་རྒྱན་གཅིག་ཡིན།།
རབ་འབྱམས་གཞུང་ལུགས་རྒྱ་མཚོ་ཟླ་མེད་པའི།།
ཞྭ་སེར་བསྟན་པའི་བྱེད་པོ་ཙོང་ཁ་པའི།།
མཛད་འཕྲིན་གསེར་གྱི་འཁོར་ལོའི་འོད་སྣང་གིས།།
སྟོང་གསུམ་ཁམས་ལ་སྣང་བ་འབུམ་གྱིས་ཁྱབ།།
མདོ་སྔགས་ཟབ་དོན་གཞུང་བརྒྱའི་བདུད་རྩིའི་བཅུད།།
གཅིག་ཏུ་བསྡུས་ནས་གླེགས་བམ་མཛད་མཁས་པའི།།
རྒྱལ་བ་གཉིས་པ་བློ་བཟང་གྲགས་པའི་དཔལ།།
སྒོ་གསུམ་གུས་པ་ཆེན་པོས་ཕྱག་འཚལ་ལོ།།
ཕྱོགས་གླང་ཡབ་སྲས་རིག་པའི་གཞུང་ལུགས་ལ།།
ལན་གཅིག་མ་ཡིན་བརྩོན་པ་ཆེན་པོ་ཡིས།།
ཡང་ནས་ཡང་དུ་སྦྱངས་པ་མཐར་ཕྱིན་པའི།།
ཟླ་མེད་བླ་མ་མཆོག་ལ་ཕྱག་འཚལ་ལོ།།
རྒྱལ་བའི་ཐེག་པ་ཀུན་གྱི་མཆོག་གྱུར་པའི།།
མཆོག་དང་ཐུན་མོང་དངོས་གྲུབ་གཏེར་ཆེན་ཏེ།།
གསང་བ་སྔགས་ཀྱི་ཐེག་མཆོག་ཟབ་མོ་ལ།།
ཞུགས་ནས་འབད་པ་སྟོང་གིས་རིང་དུ་སྦྱངས།།
བློ་ཡི་རྨོངས་མུན་ཚོགས་ཀུན་འཇོམས་པ་དང་།།
གཞུང་ལུགས་ཉམས་ལེན་གདམས་པར་འཆར་བའི་ཕྱིར།།
གཡོ་མེད་དད་པས་ཟུར་ཕུད་ལྔ་བ་བརྟེན།།
བསགས་སྦྱངས་རྒྱུ་ཚོགས་ཀུན་ལ་རབ་ཏུ་འབད།།
རིས་མེད་བླ་མ་བཅུ་ཕྲག་བཞི་ཡི་གྲངས།།
དད་པའི་གཙུག་ཏུ་བཀུར་ནས་གཞུང་ལུགས་ཀུན།།
ལེགས་པར་བསླབ་པའི་བླ་མ་ཙོང་ཁ་པ།།
ཡངས་པའི་རྒྱལ་ཁམས་ཀུན་ན་སྙན་གྲགས་འབར།།
མདོ་སྔགས་གཞུང་ལུགས་ལེགས་བཤད་རྒྱུ་སྐར་གྲངས།།
གསལ་བོར་མཛད་པའི་སྐྱེས་བུ་རླབས་པོ་ཆེ།།
བསྟན་དང་འགྲོ་བའི་མགོན་པོ་ཙོང་ཁ་བས།།
ནམ་ཡང་འབྲལ་མེད་རྗེས་སུ་འཛིན་གྱུར་ཅིག།
རྩོམ་སྒྲིག་པ། མགར་རྒྱལ་སྲས།
རྩོམ་གསར། 10