གཞི་ཚང་ཟླ་བ་གྲགས་པ། 2021-02-03
སྙན་ངག་པ་རྩེ་སྲས་ཨ་རྡོ་ལ།
སྐབས་འདིར།
ང་ལ་ཆ་མེད་ཅེས་མ་གསུང་རོགས།
ཁྱོད་རང་མཐོ་སྒང་གི་ཕྱུགས་རྫི་འབྲོག་པ་ཞིག་མིན་ནམ།
ངས་ཁྱོད་ཀྱི་གངས་འདབས་ཀྱི་སྦྲ་དང་
ནོར་གནག་མཐོང་།
ཁྱོད་རང་དབུས་ལ་ལོག་པའི་ཨ་ཇོ་ཉམ་ཆུང་
ཞིག་མིན་ནམ།
ངས་དངུལ་ཆུས་བྲན་པའི་ཁྱོད་ཀྱི་རྡོག་ཁྲེས་དང་
རྐང་རྗེས་མཐོང་།
ཁྱོད་རང་ལག་ན་སྨྱུ་གུ་ལས་མེད་པའི་མགར་བ་
ཞིག་མིན་ནམ།
ངས་དབྱངས་གསལ་གྱིས་བརྡུངས་པའི་ཁྱོད་ཀྱི་
“དགུ་ཟི་དགུ་རོགས”མཐོང་།
ང་ལ་ཆ་ཡོད་ཅེས་ཀྱང་མ་གསུང་རོགས།
ཁྱོད་ཀྱིས་ཉི་ཟླའི་སྒེའུ་ཁུང་ནས་ཕུར་ཚུགས་སུ་ཅེར་ཏེ།
རྨི་ལམ་ཅི་ཞིག་ལ་རྒྱང་མིག་གློད་ཡོད་དམ།
ཁྱོད་ཀྱིས་ཚིལ་དྲེགས་མ་ཆགས་པའི་འབྲི་དེབ་
སྟོང་པའི་ངོས་སུ།
ཞི་རྒྱས་དབང་དྲག་གི་ལྷ་ཚོགས་གང་གི་སྐྱ་ཐིག་
འཐེན་ཡོད་དམ།
ཁྱོད་ཀྱིས་བཀླག་འཕྲོར་ལུས་པའི་རིག་བྱེད་གཏམ་རྒྱུད་
ཁྲོད་དུ།
མུ་ཏིག་བཞིན་དཀར་བའི་རྨི་ལམ་ག་ཙམ་
བསྐུངས་ཡོད་དམ།
ངས་གློག་རྡུལ་མ་ལག་སྣ་ཚོགས་ཀྱི་སྒོ་མོ་ཇི་ལྟར་ཕྱེས་ཀྱང་།
གསང་གྲངས་འདི་ཁོ་ན་གཏོར་ཐབས་མ་བྱུང་།
གངས་རི་ལ་བཅངས་པའི་ཆགས་སྡང་གི་རུས་པ་
མཁྲེགས་པོས།
ཟག་མེད་འོད་སྐུ་དང་རྒྱང་ཐག་རིང་དུ་ཕྱིན་ཡང་།
མི་ལོ་ཉི་ཤུའི་རྗེས་ནས།
འུ་ཅག་སྔར་བཞིན་གངས་རིའི་འདབས་ནས་འཛོམ་ཡོང་།
སྡིག་སྒྲིབ་ཀྱི་གཉེར་མས་ང་ཚོའི་
ངོ་གདོང་སྒྲིབ་ཚར་ནའང་།
སྨག་ནག་པའི་མཚན་མོའི་རྒྱ་མཚོ་བརྒལ་དུས།
འུ་ཅག་གཟིངས་གཅིག་པའི་གྲུ་ཤན་པ་འབའ་ཞིག་ཡིན།
འོད་ལམ་ལམ་གྱི་ཉི་མས་རི་ལུང་ལ་བྱིལ་བྱིལ་གནང་དུས།
འུ་ཅག་གངས་གྲོང་ནས་རྒུམ་བུ་ལྷན་དུ་སྒྲུག་པའི་
བྱ་བྱེའུ་ཤ་སྟག་ཡིན།
རྩོམ་གསར། 10