ཨ་སྟག་ལྷ་མོའི་མཁར་ཤུལ་ལས་ཕྱིར་ལོག་སྟེ། གངས་པ་ཡུལ་ཚོའི་གངས་པ་དགོན་པའི་ཐོག་གི་ལུང་པ་ནང་ཡོད་པའི་སྟག་རོང་ཨ་ནུ་གཟིག་འཕེན་གྱི་མཁར་ཤུལ་མཇལ་དུ་སོང་། གནམ་གྲུ་གསུམ། ས་གྲུ་གསུམ་ཞེས་པ་ལྟ་བུའི་རི་གདོང་གསུམ་བར་ལ་རྡོ་རྩིག་གི་ཤུལ་གྲུ་བཞི་མ་མཐོང་ལ་མ་མཐོང་ཙམ་ཞིག་ཡོད་པ་དེ་ནི། སྟག་རོང་ཨ་ནུ་གཟིག་འཕེན་གྱི་མཁར་རྫོང་མི་འགྱུར་བེའུ་སྟག་རྫོང་གི་ཤུལ་རེད་ཟེར། ཁོང་ནི་སྟག་རོང་དཔོན་པོ་ཁྲོ་ཐུང་གི་བུ་གཉིས་པ་ཡིན་ཡང་། ཁྲོ་ཐུང་གི་གཡོ་སྒྱུ་དང་དགྲ་བོ་ལ་མགོ་འདོགས་པའི་བྱ་སྤྱོད་ལ་མཐའ་གཅིག་ཏུ་དགག་པ་རྒྱག་མཁན་ཞིག་རེད་ཟེར། ལ་ལ་ཡིས་ཁོང་ནི་སྟག་རོང་ཁྲོ་ཐུང་གི་བུ་མིན་པར་སྤུན་ཡིན་ཚུལ་ཡང་བཤད་སྲོལ་འདུག  ཁོང་གིས་ཧོར་གླིང་གཡུལ་འགྱེད་སོགས་ཀྱི་སྐབས་སུ་བྱས་རྗེས་བླ་ན་མེད་པ་བཞག་ཡོད་པ་ནི། གླིང་སྒྲུང་དེ་དག་ལ་ལྟོས་དང་ཤེས། རྒན་ཞི་ཆུང་གིས་གསུངས་པ་ལྟར། གླིང་དཔའ་ཐུལ་སུམ་ཅུའི་ནང་ལས་ཨ་ནུ་གཟིག་འཕེན་ནི་གྲི་རྩལ་དང་ཞགས་པ་སྤྲུལ་གྱི་ཨ་ལུང་གི་འགུགས་རྩལ་ལ་ཤིན་ཏུ་མཁས་ཏེ། དཔའ་ཐུལ་སུམ་ཅུས་ཤར་རྨ་རྒྱལ་སྦོམ་རའི་མདུན་ལ་དམག་རྩལ་སྦྱོང་བའི་སྐབས་སུ། ཨ་ནུ་གཟིག་འཕེན་གྱིས་ཨ་མྱེས་རྨ་ཆེན་སྦོམ་རའི་བླ་གཟིག་ཁྱུང་གི་སྒོ་ང་ཟེར་བ་དེ། ཞགས་པ་སྦྲུལ་གྱི་ཨ་ལུང་གིས་བཟུང་སྟེ་དཔའ་ཐུལ་རྣམས་ཀྱི་དབུས་སུ་འཕངས་པ་ན་མཚན་དེ་ལྟར་ཐོགས་པར་གྲགས། 

《ཧོར་གླིང་གཡིལ་འགྱེད》ནང་གསལ་བ་ལྟར་ན། ཨ་ནུ་གཟིག་འཕེན་གྱི་ཆིབས་རྟ་ལ་ཕོ་རོག་སྟོང་འཚང་ཟེར་བ་དང་། ཁོང་གི་ཆ་ལུགས་ནི་གོས་ཆེན་དམར་པོའི་གོས་གཅིག་གྱོན། ལིང་ཕོ་བ་རིས་སྐེད་རགས་བཅིངས། ཞྭ་མོ་པད་མ་གཡས་འཁྱིལ་ལ་སྟོང་སྐུད་དམར་པོའི་འཛར་ལོ་བརྒྱན། རྨ་བྱའི་སྒྲོ་ཡིས་འཕྲུ་གཅིག་བཙུགས། སག་ལྷམ་འཇའ་རིས་དགུ་སྐོར་ལ། དར་སྐུད་སླས་མས་ལྷམ་སྒྲོག་བཅིངས། ཞེས་པ་ལྟར་ཁྱད་ཆོས་མངོན་གསལ་དོད་པ་དང་། ཁོང་གིས་ཧོར་གླིང་གཡུལ་འགྱེད་སོགས་ཀྱི་སྐབས་སུ་བྱས་རྗེས་ཆེན་པོ་བཞག་ཡོད་པ་ཞིག་རེད། 

     མཁར་ཤུལ་དེའི་འགྲམ་ལ་མ་ཎི་རྡོ་འབུམ་རྙིང་པ་མང་པོ་མཇལ་རྒྱུ་འདུག  ལུང་པ་ལས་བཞུར་བའི་ཆུ་ཕྲན་ཞིག་གི་འགྲམ་ལ་ཡོད་པའི་རྡོ་ཟུར་གསུམ་མ་ཞིག་གི་ཐོག་ལ། དཔའ་བོ་ཞིག་གིས་རྟ་བཞོན་པའི་རྡོ་བརྐོས་རི་མོ་འདྲ་མོ་ཞིག་སྣང་མོད། གསལ་པོར་མི་མཐོང་བས་འོལ་ཚོད་བྱས་པ་ཙམ་ལས་རྡོ་བརྐོས་ཡིན་མིན་གཏན་འཁེལ་བྱེད་མ་ཕོད།  མཁར་ཤུལ་གྱི་ཕར་གའི་རི་གདོང་དེ་ལ་གླང་མའི་གདོང་ཞེས་འབོད་པ་ལས། དེ་མིན་ས་མིང་དང་ཆུ་མིང་སོགས་གོ་མ་བྱུང་ལ། གླིང་སྒྲུང་དང་འབྲེལ་བ་ཡོད་པའི་རྟགས་མཚན་གཞན་ཅི་ཡང་མི་སྣང་མོད། མཁན་སྤྲུལ་རྣམས་ཀྱིས་སྒྲུང་ཡིག་ནང་བཀོད་པ་ལྟར་དུ་དེ་ནི་སྟག་རོང་ཨ་ནུ་གཟིག་འཕེན་གྱི་མཁར་ཤུལ་དུ་ངོས་འཛིན་མཛད་པ་རེད་འདུག