མཚོ་སྔོན་གྱི་ཡུལ་སྡེ་སྐོར་ཞིག་བཀའ་མ་ལོག་གི་རྒྱུད་པ་ཡིན་ཞེས་བཤད་དོན་ཅི་ཡིན།

        2011-07-07

༄༅།།དེ་སྔོན་བཙན་པོ་ཁྲི་སྲོང་ལྡེ་བཙན་དང་།དེའི་སྲས་ཁྲི་ལྡེ་སྲོང་བཙན་གྱི་སྐབས་བོད་ས་གནས་ཀྱི་ཕྱོགས་བཞིར་མཐའ་སྲུང་དཔུང་སྡེ་བཞག་ཅིང་།བོད་དམག་ཁྲི་སྟོང་མང་པོས་བྷ་ཏ་ཧོར་གྱི་སྒོམ་གྲྭ་བཅོམ་ནས་དེའི་ནོར་རྫས་རྣམས་བོད་དུ་དྲངས་ཏེ་ཕྱིར་ཕེབས་གནང་དུས་དཔའ་བོ་མི་དགུའི་དམག་མང་པོ་དང་བཅས་ས་སྲུང་ལ་བཞག  སྐབས་དེར་ཁོ་ཚོས་ངེད་རྣམས་བོད་དུ་ནམ་ཕྱིར་ལོག་བྱེད་དགོས་སམ་ཞུས་པར།ངེད་ཀྱི་བཀའ་མ་བྱུང་བར་དུ་མ་ལོག་པར་སྡོད་ཅེས་གསུངས་པར་ཁོང་ཚོ་ཡུལ་དེར་གཞིས་ཆགས་པས་དཔའ་བོ་མི་དགུའི་རྒྱུད་པ་ལ་མིང་དེ་ལྟར་ཐོགས་པ་ཡིན།ཡོན་རྒྱལ་རབས་ཀྱི་གོང་མ་ཧུ་པི་ལི་སེ་ཆེན་ཧན་གྱི་ནང་བློན་སམ་གྷ་ཆིང་སང་ཟེར་བ་ཡང་བཀའ་མ་ལོག་གི་རྒྱུད་པ་ཡིན་ཞེས་བཤད་སྲོལ་དང་།ས་སྐྱའི་ཡུལ་པོ་ཆེ་མི་གསུམ་གྱི་ནང་ཚན།དགེ་བཤེས་རིན་ཆེན་བརྩོན་འགྲུས་ཀྱང་བཀའ་མ་ལོག་ཆེ་བརྒྱུད།མཚོ་སྔོན་གྱི་སྐ་གསར་པ་དང་།བྱག་རོང་པ།ཅུ་དགུ་མེར་བཅས་ཡུལ་ཁམས་ཆེན་པོ་གསུམ་གྱི་བདག་པོ་ཡིན་པ་དེ་བྱུང་བ་དང་ཁོང་གིས་ཡུལ་སྡེ་རྣམས་སྤུན་མཆེད་ལ་འཛིན་དུ་བཅུག་ནས་ས་སྐྱར་ཕེབས།འགྲོ་མགོན་འཕགས་པ་རིན་པོ་ཆེ་སོག་ཡུལ་ནས་བོད་དུ་ཐེངས་དང་པོ་ཕེབས་དུས་མཇལ་ཏེ་ས་སྐྱར་སློབ་གཉེར་གནང་བ་སོགས་ཀྱི་ལོ་རྒྱུས《རྒྱ་བོད་ཡིག་ཚང་》སྟག་ཚང་རྫོང་པའི་ལོ་རྒྱུས་ཀྱི་སྐབས་སུ་གསལ་བས་དེར་གཟིགས།(རྩོམ་སྒྲིག་པ་བདེ་ཆེན་དབང་མོ།)
  • ལེ་ཚན་སྔོན་མ།:མཁལ་ནད་བཅོས་ཐབས།
  • ལེ་ཚན་རྗེས་མ།:བ་མོའི་འོ་མ་འབབ་ཚད་ཇེ་མང་དུ་གཏོང་ཐབས་གསུམ།
  • དོ་སྣང་ཆེ་བའི་རྩོམ།