ཁོ་བོ་ཡབ་རྗེ་བླ་མ་དམ་པའི་སྲས།གཞུང་ལུགས་མང་དུ་ཐོས་པས་བཤད་པ་ཚ།མི་རིགས་སྣ་ཚོགས་འགྲོགས་པས་གོམས་པ་ཆེ།།དེ་ཕྱིར་སྙིང་གི་བུ་ལ་འདི་ལྟར་བཤད།ཀུན་དང་མཐུན་པ་རྩ་བ་ཡིན་མོད་ཀྱང་།མཐོང་ཚད་ལད་མོ་བྱས་ན་ཀླད་མེད་ཡིན།།སྐད་རིགས་ཐམས་ཅད་ཤེས་ན་བཟང་མོད་ཀྱང་།རང་གི་ཕ་སྐད་བརྗེད་ན་ངོ་ཚ་ཡིན།ཆ་ལུགས་ཀུན་དང་བསྟུན་ན་བཟང་མོད་ཀྱང་།སྟོན་པའི་བཅས་པར་འགལ་ན་སྙིང་རུལ་ཡིན།གཞན་དོན་རེམ་པ་ཡ་རབས་ཡིན་མོད་ཀྱང་།རང་སྡུག་རང་གིས་ཉོས་ན་སྡུག་གྱོང་ཡིན།གཞན་ལ་ཁྱད་གསོད་མེད་ན་བཟང་མོད་ཀྱང་།།བཟང་ངན་གང་བྱས་ཁྱད་མེད་གླེན་པ་ཡིན།ནོར་ལ་ཆགས་ཞེན་མེད་ན་བཟང་མོད་ཀྱང་།གཅིག་བཟུང་གཉིས་ཤོར་བྱས་ན་སྟོང་ཟད་ཡིན།སྤྱི་དོན་རལ་ཆོད་མེད་ན་བཟང་མོད་ཀྱང་།ཧ་ཅང་སེམས་ཆུང་བྱས་ན་བཟང་མོད་ཀྱང་།ཧ་ཅང་སེམས་ཆུང་བྱས་ན་སྐྱག་ཤོར་ཡིན།རང་ལ་བསགས་པའི་ནོར་རྫས་མང་ན་ཡང་།མང་བོའི་གསེབ་ཏུ་བསྟན་ན་འགོང་འདྲེ་ཡིན།ཀུན་ལས་ཁྱད་འཕགས་ཚད་མར་འཁུར་ན་ཡང་།།ང་རྒྱལ་ཆེ་ན་རང་གཞན་ཕུང་བྱེད་ཡིན།།རང་ཉིད་དགེ་བའི་བཤེས་གཉེན་ཡིན་ན་ཡང་།ཁྱད་གསོད་མང་ན་དགྲ་བོའི་གཡབ་མོ་ཡིན།འོག་མ་བྱམས་པས་བསྐྱངས་ན་བཟང་མོད་ཀྱང་།འཁོར་ངན་བསྐྱངས་ན་ཁ་མཆུའི་སྣ་འདྲེན་ཡིན།གཞན་གྱི་ཚོགས་དཔོན་བཀུར་བར་འོས་མོད་ཀྱང་།ཆེ་ཆུང་ཁྱད་མེད་ལུགས་སྲོལ་ཉམས་བྱེད་ཡིན།རང་དང་མཉམ་ལ་བཀུར་སྟི་བྱེད་དགོས་ཀྱང་།ཧ་ཅང་མཛེས་མཛེས་མང་ན་སྤྲེའུ་ཡིན།དམ་ཆོས་ཀུན་ལ་བཤད་ན་ལེགས་མོད་ཀྱང་།ཧ་ཅང་མཛེས་མཛེས་མང་ན་སྤྲེའུ་ཡིན།དམ་ཆོས་ཀུན་ལ་བཤད་ན་ལེགས་མོད་ཀྱང་།ཧ་ཅང་མང་ན་སྤྲང་བོའི་མ་ཎི་ཡིན།ཁ་ཚོད་བལྟ་ལ་ལྷག་པར་བཤད་དགོས་ཀྱང་།ཧ་ཅང་བཤད་ན་རང་མགོ་གཅོག་བྱེད་ཡིན།ཆོས་ཀྱི་ཡོན་ལ་མི་བལྟ་གལ་ཆེ་ཡང་།གསེར་ལ་རིན་ཐང་མེད་ན་ས་རྡོ་ཡིན།མན་ངག་ཟབ་མོ་གསང་བར་འོས་མོད་ཀྱང་།ཧ་ཅང་གསང་ན་གདམས་ངག་ཁོང་རུལ་ཡིན།དེ་ཡང་རགས་པ་སྤྱི་ཡི་རྣམ་གཞག་ཡིན།སྙིང་གཏམ་ལགས་པས་ད་དུང་གསན་མཛོད་དང་།མངོན་ཤེས་མེད་ཕྱིར་གྲོགས་དང་འགྲོགས་པ་དཀའ།གཅིག་ལ་ཡིད་མི་ཆེས་ན་འདྲེ་དང་འདྲ།ཀུན་ལ་བློ་གཏད་བྱས་ན་རང་ཉིད་ཕུང་།འགྲོགས་ལུགས་དགྲ་ལ་ཚོལ་དང་ཟབ་པ་ཡིན།གཅེས་པའི་བུ་དང་སྙིང་གི་གྲོགས་ལ་ཡང་།སྙིང་གཏམ་སྔོན་དུ་མ་བཤད་རེ་ཞིག་གསོང་།།ཧ་ཅང་དགའ་བའི་དུས་དང་ཁྲོས་པའི་དུས།།སེམས་ལ་གང་ཡོད་ཁ་ལ་འཆོར་ཉེན་ཡོད།དེ་ཕྱིར་དྲན་ཤེས་སྔོན་དུ་བསྟེན་བྱས་ནས།ཁ་འདོན་གྲེ་བར་བསྐྱིལ་དང་བཙུན་པ་ཡིན།སྐྱོན་མཚང་ངན་པ་ཁ་ནས་གསང་ན་ཡང་།།འོང་ལོ་རྗེས་ནས་བུད་ན་ངོ་རེ་ཚ།དེ་ཕྱིར་ལུས་ངག་བྱ་བྱེད་ཀུན་གྱི་སྟེང་།མཚང་ངན་ཕྱི་ལ་མི་འཆོར་མཁས་པ་ཡིན།རང་དཔེ་གཞན་ལ་སྦྱར་ན་ཤིན་ཏུ་འཕྲོད།གཞན་དཔེ་རང་ལ་སྦྱར་ན་ལྷག་པར་འཕྲོད།དེ་ཕྱིར་དཔྱད་ནས་བསམ་བློ་གཏོང་བ་གཅེས།གཞན་སྐྱོན་ལྐོག་ནས་གླེང་བ་མི་ངན་ཡིན།ཤེས་བཞིན་དྲང་བོར་མི་བཤད་བསམ་ངན་ཡིན།འོན་ཀྱང་སྐྱོན་མཚང་བཤད་ན་ཤེས་མཁན་དཀོན།དེ་ཕྱིར་གཞན་སྐྱོན་གློད་ནས་བཞག་ན་བདེ།བློ་གཏད་མི་ལ་གང་ཡག་བཤད་མི་དགོས།གང་ཞིམ་གང་བཟང་དེ་ལ་སྟེར་མི་དགོས།གལ་ལ་ཐུག་དུས་སྐྱིད་སྡུག་ཅི་བྱུང་ཡང་།བསླུ་མེད་སྙིང་ནས་བསྐྱངས་ན་ངོ་མཚར་ཆེ།།སྙིང་གཏམ་ལགས་པས་ད་དུང་གསན་མཛོད་དང་།མི་རིགས་མི་གཅིག་མོག་མོག་རྟ་སྤུ་འདྲ།བསམ་པ་མི་གཅིག་བལ་བོའི་རས་ཁྲ་འདྲ།དེ་ཕྱིར་སྔོན་དུ་ཁ་ཚོད་མ་བླངས་པར།།འཕྲད་མ་ཐག་ཏུ་སྙིང་གཏམ་འཆད་པ་མཚང་།ཆང་འཐུང་གླུ་ལེན་ཤོ་དང་མིག་མངས་རྩེ།གོ་ཚད་མཐོང་ཚད་ཀུན་གྱི་ལད་མོ་བྱེད།སྣང་བར་གང་དྲན་སྨྱོན་པ་ལྟ་བུ་ཡི།བག་མེད་མི་ལ་བྱ་བྱེད་འཆོལ་བ་མཚང་།ཁྱི་ལ་ཤ་རློན་བཅོལ་བ་ལྟ་བུ་ཡི།།ཤ་མི་ཚ་ལ་ཕུག་ནོར་བཅོལ་བ་མཚང་།།ཐལ་མོ་སྦྱར་ནས་བླ་མར་འཕྱ་བ་ཡི།།དད་པ་མེད་པ་སློབ་མར་བསྟེན་པ་མཚང་།ནོར་དང་གདམས་དག་བརྗེ་བའི་ཉོ་ཚོང་མཁན།སྙིང་རྗེ་མེད་པ་བླ་མར་བསྟེན་པ་མཚང་།།ཅི་ཙམ་འབད་ཀྱང་ཕན་ངོ་མི་ཤེས་པའི།།ཁྲེལ་གཞུང་མེད་པ་གྲོགས་པོར་བསྟེན་པ་མཚང་།།ནོར་དང་ལུག་ལ་སྐད་ཆ་བཤད་པ་བཞིན།།མི་ཉན་པ་ལ་ཁ་ཏ་བྱེད་པ་མཚང་།།སྔ་ཕྱི་གང་ཡང་འདང་རྒྱག་མེད་པ་ཡི།།མི་ཤེས་པ་ལ་གྲོས་ཕུགས་འདྲི་བ་མཚང་།།མཚང་དུ་ཤེས་ཀྱང་ད་དུང་མི་འདོར་ན།རང་ཉིད་སྨྱོན་པ་ཡིན་པར་ཤེས་པར་བྱ།།སྙིང་གཏམ་ལགས་པས་ད་དུང་གསན་མཛོད་དང་།ཞག་གསུམ་ལོན་ན་ཨ་བ་བསད་ཀྱང་བརྗེད།།ནོར་རྫས་བསྟན་ནས་ཨ་མའི་སྐེ་ཡང་ལེན།།གལ་ལ་ཐུག་ན་བླ་མའི་དབུ་ཡང་སྐོར།འདོད་པ་ཡོད་ན་རང་གི་བུ་ཡང་བཙོང་།།དུས་ངན་མི་ངན་སྤྲིན་བར་ཉི་མ་འདྲ།ཉེ་རིང་ཡོངས་ལ་ལོ་གཅིག་མ་བརྟེན་པར།།བྱ་བྱེད་འཆོལ་ན་མྱུར་དུ་ནོངས་པར་འགྱུར།།རང་ལ་བརྟེན་པའི་སྐྱོན་མཚང་ངན་པ་དེ།།གཏམ་ངན་རླུང་གིས་ཁྱེར་ན་ཟིན་དུས་མེད།བརྒྱ་སྡེ་ཁ་ལོག་སྟོང་སྡེ་ངོ་ལོག་ཀྱང་།ཁྲེལ་མེད་གཅེར་བུར་བུད་ན་ཞབས་འདྲེན་ཟེར།།ཧ་ཅང་མཐོལ་བཤགས་མང་ན་རང་རྒྱུས་འཆོར་།།དག་ཚང་ཐབས་ཀྱིས་ཤེས་ན་མཁས་པ་ཡིན།རྣམ་རྟོག་ཅན་ལ་འདྲེ་དགུ་འཁོར་བས་ན།།དོགས་པ་རང་གིས་བསུས་ན་བདུད་རིགས་དགའ།ཕུང་བྱེད་གྲོགས་སུ་བསྒྱུར་པའི་ཐབས་ཤེས་ན།དགའ་རབ་དབང་ཕྱུག་གིས་ཀྱང་ཐུབ་པ་དཀའ།།ཁྱི་རྒན་རུས་པ་སྐམ་པོ་སྲུང་བ་བཞིན།ཟས་ལ་ཞེན་པ་མ་ཆེ་མི་ལ་བྱིན།ཡི་དྭགས་ཉམ་ཐག་གཏེར་ཁ་སྲུང་བ་བཞིན།ནོར་ལ་སེར་སྣ་མ་ཆེ་ཆོས་ལ་ཐོངས།དབྱར་དུས་སྤྲིན་བར་ཉི་མ་ཇི་བཞིན་དུ།།བཞིན་ལ་འགྱུར་ལྡོག་མ་མང་འཛུམ་གྱིས་བསུས།རི་རྩེའི་དར་ལྕོག་རླུང་གིས་བསྐྱོད་པ་བཞིན།དགྲ་ཟུན་གཤག་རལ་མ་མང་སྤྱི་སྙོམས་བསྟེན།ད་ལོ་བཟང་ཡང་སང་ཕོད་ངན་པ་ཡོད།འཁོར་ལ་བསྟོད་ར་མ་སྔ་བློ་ཁོག་ལྟོས།།ངན་པ་ཡིན་ཀྱང་བཟང་བོར་འགྱུར་བ་སྲིད།མྱུར་དུ་སྨད་ར་མ་བྱེད་ཐབས་ཀྱིས་སྐྱོངས།ཁས་བླངས་སྒྲུབ་པར་མ་ནུས་ངོ་ཚ་ཉོ།།སུ་ལ་ཁས་ལེན་མ་བྱེད་ལག་ལེན་སྐྱོངས།།སེམས་སྡུག་ལྷག་པར་བསྐྱེད་ལ་དགོས་པ་མེད།། གང་ལ་ཉེས་ཁ་མ་འདིངས་བྲོད་ཁ་བསྐྱེད།སྙིང་གཏམ་ལགས་པས་ད་དུང་གསན་མཛོད་དང་།ཁ་ངན་ཁ་ལ་ཟོར་བ་ཐོགས་པ་དེ།།དགྲ་བོའི་དམག་སྣ་འདྲེན་པའི་གཡབ་མོ་ཡིན།དུག་གི་ཁ་རླངས་སྤྲོ་བའི་དུག་སྦྲུལ་འདྲ།དེ་ཕྱིར་ཁ་ལ་ཚོད་ཅིག་ཡོད་པར་མཛོད།གང་དྲན་ལག་ཏུ་ལེན་པའི་བྱ་མང་དེ།ཕུང་འགྱོད་སྣ་དགུ་འདྲེན་པའི་ཕོ་ཉ་ཡིན།།ལུས་སེམས་གཉིས་ཀ་འབྲད་པའི་སེག་བརྡར་ཡིན།དེ་ཕྱིར་བྱེད་རྒྱུ་མ་མང་ལྷོད་ལ་སྡོད།སེམས་ལ་དྲན་རྒྱུ་མང་བའི་བློ་མང་དེ།འདུན་མ་གཅིག་ལ་མི་ཞོག་དཀྲུག་ཤིང་ཡིན།ཉིན་པར་སེམས་འཁྲུག་མཚན་མོར་གཉིད་མི་འོང་།དེ་ཕྱིར་བློ་སྣ་མང་པོ་རྦད་ཀྱིས་ཆོད།ཅུང་ཟད་ཙམ་ཡང་མི་བཟོད་གཤིས་ངན་དེ།།ཚེ་འདིར་ལུས་སེམས་གཉིས་ཀའི་སྡུག་བསྔལ་ཡིན།ཕྱི་མའི་དགེ་རྩ་འཇོམས་པའི་ཕྱགས་མ་ཡིན།དེ་ཕྱིར་ཁོག་ཡངས་རང་བཞིན་བཟང་བོ་མཛོད།ནང་གི་རང་སེམས་དགྲ་རུ་མ་ལྡང་ན།ཕྱི་ཡི་འདྲེ་གདོན་སུས་ཀྱང་ཐུབ་པར་དཀའ།།དོན་མེད་དོགས་པ་ཟ་བ་ཆོ་འཕྲུལ་ཡིན།རྣམ་རྟོག་སྡུག་འདྲེའི་ཕུང་ཁྲོལ་ལགས་པས་སྤོངས།ཡོན་ཏན་རང་བཞིན་བཟང་བོའི་ཙན་དན་ཤིང་།འཁོར་ངན་སྦྲུལ་གྱིས་དཀྲིས་ན་འཁོར་མཁན་མེད།མེ་ཏོག་བཟང་བོ་ཚེར་མས་གཡོགས་འདྲ་བའི།།འཁོར་ངན་གཏམ་གྱི་གཞི་མ་ལགས་པས་སྤོངས།ཟླ་བ་དཀར་ཡང་རི་བོང་གཟུགས་ཀྱིས་སྦགས།མེ་ཏོག་ལེགས་ཀྱང་དྲི་ངན་འཐུལ་བས་སྦགས།མཛོ་སྦྲེལ་གཡང་ལ་ལྷུང་བ་ལྟ་བུ་ཡི།གྲོགས་ངན་འགྱོད་པའི་རྩ་བ་ལགས་པས་སྤྲོངས།ངས་ཐུབ་ངས་ཤེས་གླ་མེད་གཡོག་པོ་ཡིན།མི་ཆོས་རྐང་བའི་ཐི་གུ་ལགས་པས་སྤོངས།སྙིང་གཏམ་ལགས་པས་ད་དུང་གསན་མཛོད་དང་།ཆགས་སྡང་ཆེ་ན་རྩྭ་སྐྱ་མེ་ཤོར་འདྲ།དུས་ངན་སྙིགས་མའི་ནག་ཕྱོགས་རླུང་གིས་བསྐྱོད།ཆོས་པ་ཡོངས་ཀྱི་སྒབ་འདྲེར་ཆགས་སྡང་གནོད།གང་དུ་ཕྱིན་ཀྱང་ཆགས་སྡང་ཆུང་བར་མཛོད།དམན་སར་བསྡད་ན་མཐོ་སར་བསླེབ་པར་འགྱུར།ཇི་ལྟར་བགྱིས་ཀྱང་དམན་ཆ་བླང་བར་འཚལ།དེང་དུས་སྐྱེ་བོའི་ཚོགས་རྣམས་གསར་འགྲོག་ཆེ།ཟླ་འགའ་ལོ་འགའ་ལོན་ནས་གཟབ་པར་འཚལ།སྒུར་སྒུར་ཞུམ་ཞུམ་བྱེད་ཚད་ཆོས་པ་མིན།ཆོས་མིན་ཆོས་པར་རྫུ་ལ་གཟབ་པར་འཚལ།གང་འཇམ་གང་ལེགས་བཤད་ཚད་བསམ་དཀར་མིན།ཁ་འཇམ་ཁོང་རྩུབ་ཕྱོགས་ལ་གཟབ་པར་འཚལ།སྐྱོན་མཚང་བྲུས་ནས་བཤད་པ་བསམ་དཀར་རྟགས།རང་གི་ཁོང་ཁྲོའི་ཕྱོགས་ལ་གཟབ་པར་འཚལ།ངས་ཐུབ་ངས་ཤེས་ཟེར་བ་བློ་གཏད་མེད།བསླུ་བྲིད་མགོ་སྐོར་ཕྱོགས་ལ་གཟབ་པར་འཚལ།འདིར་བྱོན་འདིར་བཞུགས་ཟེར་བ་བཀུར་སྟི་མིན།རང་མཉམ་གྲལ་མཉམ་ཕྱོགས་ལ་གཟབ་པར་འཚལ།གང་བཟང་གང་ཆེ་སྟེར་བ་ཕན་སེམས་མིན།ཁ་ལན་སྐྱིན་པའི་ཕྱོགས་ལ་གཟབ་པར་འཚལ།མཐོ་ལ་ཁྱད་གསོད་མ་བྱེད་བྱམས་པས་སྐྱོངས།མཉམ་ལ་གྲལ་རྩོད་མ་བྱེད་མཉམ་པར་འགྲོགས།འཕྲལ་དུ་མིག་གིས་མཐོང་རྒྱུ་མ་བྱུང་རུང་།དཀར་པོ་དགེ་བའི་ལས་ཀྱི་མཐའ་འདི་བཟང་།ནག་ཕྱོགས་དམུ་རྒོད་མགོ་འཕང་མཐོ་ན་ཡང་།ལས་འབྲས་མི་བསླུ་ནམ་ཕུགས་རྒུད་དེ་འོང་།ལག་པས་བདེ་བ་ཅན་ལ་འཕེན་མཁན་མེད།རྐང་བས་བཟུང་ནས་དམྱལ་བར་འཕེན་མཁན་མེད།རང་གི་སྐྱིད་སྡུག་རང་གི་ལག་ན་ཡོད།རང་གིས་རང་ཉིད་མི་བསླུ་ཤིན་ཏུ་གཅེས།མཐོ་སར་བཞག་ཀྱང་འོག་ཏུ་ལྷུང་ཉེན་ཡོད།དམའ་སར་བསྡད་ཀྱང་གོང་དུ་འཆོར་བ་ཡོད།སྐྱིད་པོ་ཚོད་མ་ཐིག་ན་ཐ་མ་སྡུག འོ་ཟངས་ཁ་ལེབ་བརྒྱབ་ན་འཕོ་འདོད་ཡིན།རྒུད་ཀྱང་རང་ཉིད་བཟང་ན་སྐྱིད་དེ་འོང་།ཟླ་བ་མང་ངོའི་རྗེས་ན་ཡར་ངོ་ཡོད།།
བསླབ་བྱ་བཤད་ན་སུས་ཀྱང་ཤེས་མོད་ཀྱང་།དགོས་དོན་ལག་ལེན་བྱེད་པ་ཉིན་སྐར་ཙམ།གཞན་ལ་མགོ་སྐོར་ཐུབ་པ་གཡོ་སྒྱུ་ཡིན།ཀུན་ལ་སྐྲག་རྒྱུ་མེད་པ་དཔའ་བོ་ཡིན།བཤད་ན་ངོ་མཚར་ཆེ་བ་ཁ་གསལ་ཡིན།རྒྱུན་དུ་རང་དོན་འབད་པ་མཁོ་ཉག་ཡིན།དེ་དག་རྣམས་ལ་མཁས་པ་ཟེར་བ་མིན།གཞན་ལ་གཡོ་སྒྱུས་མགོ་སྐོར་ཐུབ་ན་ཡང་།ཉིན་གཅིག་ལེ་ལན་རང་ལ་འཁོར་ནས་ཡོང་།སྐྲག་རྒྱུ་མེད་པ་དཔའ་བོ་ལོས་ཡིན་ཀྱང་།ཚམ་ཚོམ་མེད་པ་ཕྱེ་ལེབ་མེ་ལྕེབ་འདྲ།།གཞན་དོན་དཔྱད་ན་གསལ་བོ་ཡིན་ན་ཡང་།མར་མེ་རང་རྩར་གསལ་བ་ཤིན་ཏུ་དཀའ།རང་དོན་འཕྱུག་པ་མེད་ན་མཁས་པ་ཡིན།ཕན་པར་སྨྲ་བ་བླ་མ་ཡིན་ཡང་དཀོན།དེ་ལ་ཉན་པ་བུ་ཚ་ཡིན་ཡང་དཀོན།བསླབ་བྱ་ཞུ་བ་མང་ཡང་སློབ་པ་དཀོན།དམ་ཆོས་བཤད་པ་མང་ཡང་སྒྲུབ་པ་དཀོན།ཚིག་གི་བཟང་ངན་ཙམ་གྱིས་ཕན་ཐོགས་མེད
ཡུན་དུ་དཔྱད་ན་ཤིན་ཏུ་ཕན་པར་ཡོད།ཆུང་ངུའི་དུས་ན་ཚུལ་བཞིན་བསྟེན་པའི་བུ།ཕ་རྒན་སྙིང་གི་གཏམ་འདི་སེམས་ལ་ཆོངས།ཕྱིན་ཆད་འདི་འདྲ་རྣ་བས་ཚོར་རྒྱུ་མེད།ཡོད་རུང་སྙིང་གཏམ་ཡིན་མིན་ཤེས་པ་དཀའ།ཆ་རྒྱུས་ཡོད་མེད་གང་དུ་བསྡད་ཀྱང་རུང་།གཏམ་འདི་སྙིང་ལ་ཆོངས་ཤིག་ཕ་ཡི་བུ།།（རྩོམ་སྒྲིག་པ་བདེ་ཆེན་དབང་མོ།）