ཁམས་སྨྱུག་གསར། 2020-11-18
རྟོག་བཏགས་འཆར་ཡན་འཁྱམ་པོས།།
སྣང་བའི་འདབ་ལྕེ་འགུལ་ཚེ།།
རྒྱུས་མེད་ས་མཐའི་ལྗོངས་སུ།།
ངེས་མེད་དལ་གྱིས་འགྲིམ་འདོད།།
གཙང་བོའི་རླབས་དང་འགྲོག་པའི།།
མི་ཚེའི་ཤིང་གྲུ་ཆུང་ཆུང་།།
ལས་ཀྱི་རླུང་གིས་གཡོས་ཚེ།།
མི་བསྐྱོད་རང་དབང་མི་འདུག།
ཉ་མོ་གར་ལ་རོལ་བའི།།
མར་འབབ་ཆུ་བོའི་གཞུང་ལ།།
རླུང་བུས་འདབ་གཤོག་བརྐྱངས་ཚེ།།
པད་མའི་མགོ་ལྕོག་ལྡེམ་བྱུང་།།
དྲི་བསུང་ན་བུན་ལྡང་བའི།།
བསིལ་ཁང་མཛེས་པོའི་འགྲམ་ནས།།
བརྩེ་བ་དབྱངས་ལ་དྲངས་ཚེ།།
སེམས་པ་གདུང་བས་མནར་འདུག།
དུང་བ་ཡིད་ཀྱི་མེ་ཏོག།
མཁའ་ལ་འཇའ་ཚོན་བབས་འདྲ།།
ཉི་མ་རི་ལ་ཡིབ་ཚེ།།
སྣང་བའི་རྨི་ལམ་ཙམ་རེད།།
གཙང་བོའི་ཟིལ་བ་ཆགས་པའི།།
འདབ་མ་རླུང་གིས་ཁུར་ཚེ།།
རྣམ་ཤེས་བཀུག་པའི་དྲི་ཞིམ།།
སྣང་བའི་ཚལ་ནས་ལྡང་བྱུང་།།
ཉི་མས་ཕྱི་མིག་ཕོག་པའི།།
ལྗོན་པའི་དབུ་ལོ་ལྡེམ་ཚེ།།
འཕྲེད་གླིང་འབུད་པའི་བྱེའུ།།
ལོ་མའི་གམ་དུ་ཡིབ་འདུག།
འོད་ཟེར་རི་ལ་འཛེག་པའི།།
ནུབ་མཐའི་སྤྲིན་པ་དམར་པོས།།
སེམས་ལ་གཟིམ་དུང་འབུད་ཚེ།།
འཁོར་བའི་རང་མཚང་རྟོགས་བྱུང་།།
ཁ་བའི་འདབ་མ་གཡོ་ཞིང་།།
གཙང་བོར་དར་ཁ་རྒྱས་ཚེ།།
མི་མེད་ཕུག་པའི་ཁུད་ནས།།
སེམས་ངལ་གསོས་ན་སྐྱིད་པ།།
གྲང་རླུང་འདུ་འཛིའི་ཁྲོད་ནས།།
ལྕང་མས་ཁེར་གཞས་གྱེར་ཚེ།།
ཏིང་འཛིན་ཡིད་ཀྱི་ལྷ་མོ།།
དབེན་པའི་རི་ལ་ཕྱོགས་སོང་།།
དབྱར་ལ་མེ་ཏོག་སྤྲས་པའི།།
མཛེས་སྡུག་གཡུ་ལོའི་ལྗོན་པ།།
འཁྱག་རླུང་བསེར་མས་བསྒུལ་ཚེ།།
སྐམ་རིད་ལུས་པས་སྐྱོ་ཨང་།།
བརྩེ་བའི་དབྱངས་ལ་འཁྲེང་བའི།།
ན་ཆུང་དར་མའི་སྣང་བ།།
རེ་དོགས་རྨི་ལམ་ཁྲོད་ནས།།
སྒྱུ་མའི་གར་ལ་རྩེན་འདུག།
རི་ལ་ཁ་བ་བབས་ཚེ།།
སྐད་ཅོར་སྒྲོག་པའི་བྱེའུ།།
རྫ་བྲག་མཐོན་པོའི་རྩེ་ནས།།
སྣང་བ་གྲོང་ལ་ཕྱོགས་འདྲ།།
ན་བུན་སྨིག་རྒྱུའི་སྐེ་དཀྲིས།།
རི་བོའི་མགུལ་དུ་འཁྱིལ་དུས།།
ཟླ་བོ་མེད་པའི་གཞོན་པ།།
སེམས་པ་སྨྲེང་བས་བརླན་འདུག།
སྣང་བའི་སྐར་ཆུང་དེ་ཡང་།།
རྟོག་པའི་རླབས་ཀྱིས་འདར་ཚེ།།
མི་ལུས་ཁམ་བུའི་མེ་ཏོག།
དགའ་སྐྱོའི་ཁྲོད་ནས་རྙིང་སོང་།།
མི་སྡུག་བྱེ་མའི་དུར་ཐང་།།
ངེས་མེད་ལྷོད་ཀྱིས་ཉུལ་ཚེ།།
ཤིང་སྐམ་འཇག་སྐྱའི་འདབས་ན།།
སྨྲེང་བའི་ཉམས་ཤིག་ཤར་འདུག།
ཚོར་བའི་ཟིལ་བ་ཆགས་པའི།།
འཆར་ཡན་སྨུག་པའི་ཡོལ་རས།།
སྒྱུ་མའི་རི་གསེབ་དེ་རུ།།
ངལ་མེད་དལ་གྱིས་ལྡང་བྱུང་།།
འཁྱོག་པོའི་ལུང་ཁུད་དེ་ནས།།
ཆུ་བོ་བཞུར་བའི་གཉེར་རིས།།
ཁོ་བོའི་སེམས་དང་འདྲ་སྟེ།།
སྣང་བའི་རླུང་གིས་བསྒུལ་སོང་།།
རྟོག་པས་བཞེངས་བའི་འཇིག་རྟེན།།
གཡུང་དྲུང་རི་མོ་འཁྱུག་འདྲ།།
སེམས་ལ་མཛེས་པར་འདུག་ཀྱང་།།
རྟག་བརྟན་མེད་པས་སྐྱོ་བྱུང་།།
ཡིད་ཀྱི་ཏིང་འཛིན་རྐུ་བའི།།
རྟོག་པའི་ཟིལ་བ་ཡོམ་ཚེ།།
སྡེ་ཆེན་རི་གྲོང་ཕྱོགས་སུ།།
སྣང་བ་ཆང་གིས་བསླུས་འདྲ།།
ལས་ཀྱི་མེ་ལོང་ངོགས་སུ།།
བརྩེ་བ་དབྱངས་ཀྱི་རྒྱུད་སྐུད།།
ཚོར་བའི་རླབས་ཀྱིས་འདར་ཚེ།།
རེ་ཞིག་སྙན་པོ་ཡོད་འདུག།
རྒྱང་ན་བསྐྱོད་པའི་ལྗང་ལོ།།
དུས་བཞིའི་རྒྱུ་ལམ་གསེབ་ནས།།
ཁ་དོག་གཞན་དུ་འགྱུར་ཚེ།།
འཁོར་བའི་གཤིས་དེ་སྟོན་འདྲ།།
རླུང་དང་བསྡེབས་པའི་གཙང་བོས།།
ལྡེམ་པའི་རླབས་རིས་ཕབ་སྟེ།།
ངལ་མེད་རྒྱལ་ཁམས་ཉུལ་བ།།
མདང་གི་རྨི་ལམ་ཡིན་འདྲ།།
སྣང་བའི་སྒོ་ཆེན་ཕྱེས་ནས།།
འདོད་པ་ཆང་གིས་གསོས་ཚེ།།
ཚོར་བ་སྐྱ་བོའི་ཕྱོགས་སུ།།
འཁྲེང་བའི་མེ་ཏོག་འཁོར་འདུག།
གྲིབ་རིས་གཙང་བོར་ཟུག་པའི།།
ལས་ཀྱི་བཀོད་པའི་ཟམ་པར།།
མི་ཚེའི་རྐང་རྗེས་ཕབ་ཚེ།།
གཏམ་རྒྱུད་ཟད་པ་མི་འདུག།
རྟེན་འབྲེལ་སྣོད་ཀྱི་མཛེས་པ།།
བདག་གི་བློ་དང་མཐུན་འདུག།
གཞས་ཆུང་རླུང་ལ་བསྐུར་བའི།།
གྲུ་མཁན་སྣང་བ་བཟི་འདུག།
མི་ཚོགས་ཁྲོམ་ཆེན་དབུས་ན།།
འཛུམ་པའི་གར་ལ་རྩེན་པའི།།
ན་ཆུང་སྒེག་པའི་ཟུར་མདའ།།
ཁོ་བོའི་སྙིང་ལ་ཕོག་སོང་།།
འོན་ཏེ་དགའ་སྐྱོའི་བར་ནས།།
དེ་དོགས་ན་བུན་དམར་པོ།།
སྣང་བའི་ཁམས་ལ་ལྡང་ཚེ།།
ཡིད་ལ་དགའ་བ་མི་འདུག།
སེམས་ལ་བབས་པའི་དབྱངས་དེ།།
རི་སུལ་རྫིག་པོའི་འདབས་ནས།།
བསེར་མ་རླུང་གིས་བསྐྱོར་ཚེ།།
རེ་དོགས་མེད་པས་སྤྲོ་སོང་།།
རྨི་ལམ་མི་ཚེའི་སྣང་བ།།
སྡེ་ཆེན་མི་ཁའི་ཁྲོད་ནས།།
དོན་མེད་དབྱིངས་ལ་དྲངས་ཚེ།།
གསོན་དང་མ་གསོན་ཅི་ཡོད།།
ཉི་ཟླའི་བཞུར་ལམ་འོག་ན།།
འཚོ་བའི་ཉིན་སྲིབ་གཉིས་ཀར།།
ཚོགས་དྲུག་སྣང་བ་ལྡོམ་པོ།།
ལྷོ་སྤྲིན་རླུང་གིས་སྐྱོད་འདྲ།།
བདེ་སྡུག་དགའ་སྐྱོའི་གསེབ་ནས།།
ཚོར་བའི་གཞས་ཤིག་གྱེར་ཡོད།།
འཁོར་བའི་ཆང་ཁང་ནང་གི།།
སྣང་བའི་རྨི་ལམ་མཚོན་ཐུབ།།
ཟླ་འོད་གསལ་བའི་མཚན་ལྗོངས།།
པིར་གྱིས་རི་མོ་བྲིས་འདྲ།།
དྲན་པའི་སེང་རས་ངོགས་ན།།
མ་བྲིས་ཝ་ལེ་ཝ་ལེ།།
ཚོར་བའི་སྤྲིན་པ་བསྐྱོད་ན།།
དྲན་པའི་སྒེའུ་ཁུང་འགྲམ་ནས།།
འདས་སོང་ལོ་ཟླའི་སྐར་མདའ།།
རྨི་ལམ་གཞུང་ལ་བབས་བྱུང་།།
གདོང་ལ་རྫུ་བག་གྱོན་པའི།།
མ་གིའི་རི་གྲོང་དཀྱིལ་ནས།།
གཡོ་སྒྱུའི་འཛུམ་པ་མཐོང་ན།།
སེམས་པ་གཏིང་ནས་སུན་འདུག།
འཇིག་རྟེན་སྨིག་རྒྱུའི་ཁྲོད་ནས།།
འདུན་པ་ལྷ་ལ་བཅོལ་ན།།
འཁྲེང་སེམས་བློ་རྩ་ནག་པོས།།
ང་ལ་བར་ཆད་མ་གནང་།།
སྒེག་ལྡན་ཡིད་དགའི་མེ་ཏོག།
དབྱིངས་ཀྱི་ལྷ་ལ་མཆོད་ན།།
མི་འགྱུར་བདེན་པའི་ཀུ་མུད།།
སེམས་ཀྱི་གཞུང་ནས་མངོན་ཤོག།
དད་པའི་ཤིང་ལོའི་རྩེ་རུ།།
རྒྱལ་བ་ཆོས་ཀྱི་དེད་དཔོན།།
མི་འབྲལ་རྟག་ཏུ་བསྙེན་ན།།
བདེན་པའི་ལམ་སྣ་སྟོན་མཛོད།།
ལས་ཀྱིས་བཀོད་པའི་མི་ཚེར།།
རེ་འདོད་མཐུན་པོ་བྱུང་ན།།
ཤ་པགས་ཁྱི་ཡིས་ཟོས་ཀྱང་།།
སེམས་ལ་འགྱོད་རྒྱུ་མི་འདུག།
ཕྱི་མའི་རྒྱ་མཚོའི་གཞུང་དུ།།
བསོད་ནམས་གྲུ་ལ་ཞུགས་ནས།།
འབད་མེད་ལྷོད་ཀྱིས་བརྒལ་ན།།
སངས་རྒྱས་སྟོང་གིས་སྲུངས་ཤིག།
རྩོམ་གསར། 10