འཁོར་བའི་ལྷ་མོ་དང་གཞན་དག

གཙོད།        2020-09-21

མཐོང་ལ་སྤྲོ་དགའི་ཚོར་བའི་འདུར་འགོད་ལས།།

འཛུམ་གྱི་མེ་ཏོག་གདོང་ལ་བཞད་ཀྱིན་པ།།

བརྩེ་འདང་འོ་མ་ཆུ་ལ་མ་རྒྱུ་ཡང་།།

སེམས་ཀྱི་བག་ལ་ཉི་མའི་འོད་སྣང་རྒྱས།།

མི་ཚོགས་སྨྲ་ལྕེས་སྒྲུང་རིང་མ་གདོན་གོང་།།

གསང་བའི་སྐུད་པ་རུམ་ལ་དམ་དུ་བཅིངས།།

ལྐོག་ལ་གཏམས་པའི་རྟོགས་བཏགས་ལྷ་མོའི་ཞལ།།

སེམས་ཀྱི་བར་ནས་ཤབ་ཤུབ་མངོན་ཙམ་བྱས།།

དྲན་བའི་ཁུད་དུ་བསིལ་རླུང་རྒྱུ་ཙམ་གྱིས།།

འཁོར་བའི་ལྷ་མོ་ཡང་ཡང་སྤུར་བ་ནས།།

རྔུལ་ནག་ཐོད་ཀྱི་འགྲོགས་སུ་གྱུར་ན་ཡང་།།

ངལ་བའི་ཚིག་ཅིག་སེམས་ལ་ཡོང་མ་ཡིན།།

ལོ་ཟླ་འགྲོ་ཞིང་འགྲོ་བའི་ལམ་ཁ་ནས།།

བརྩེ་འཛུམ་རྒྱུ་ཐག་ཉེ་རུ་བཏུད་པ་ན།།

སྨྲ་བ་མེད་བའི་བྱིས་པའི་ངང་ཚུལ་བཞིན།།

ང་ཡི་དྲུང་དུ་དལ་གྱིས་བཅར་བ་བྱས།།

གློ་བུར་ཞིག་གིས་མིག་འདུན་འདྲུད་པ་དེ།།

གློ་བུས་རྒྱང་དུ་འདོར་ངེས་མ་ཚོར་བ།།

འཚོ་བའི་རི་མོ་བྲང་ལ་སྦྱར་གྱིན་ནས།།

དྲན་འཛིན་མེ་ཏོག་འཚོ་བའི་བཅུད་དུ་སྒོམ།།

ཁྲི་ལམ་རིང་མོའི་རྒྱུ་སྐུད་མ་དཀྲོལ་བ།།

སྡེ་ཆེན་བརྒྱད་ཀྱི་ཁ་ཟུར་འདུར་གྱི་ནས།།

ཞེ་རུ་ཐོགས་པའི་ལྷ་མོའི་གར་སྟབས་ལ།།

སྦས་པའི་འདང་བརྩེས་སུད་སུད་འཇལ་བ་བྱས།།

འདྲེས་ཤིང་འགྲོགས་པའི་ལམ་ལ་ཟིན་པ་ན།།

འཇམ་པོ་ལག་གིས་བྱིལ་བྱིལ་མ་བྱུང་བ།།

རྩུབ་མོ་ཚིག་གིས་རྣ་བ་མ་སྒྲུག་པ།།

འཛུམ་པའི་སོ་ཕྲེང་ངོས་སུ་གཡེང་བ་བྱས།།

ཡུན་གྱིས་བགྲོད་པའི་ཚོར་བའི་གོམ་ཞགས་ལས།།

མིག་ལ་སྦྲུམ་པའི་མེ་ཏོག་ཕྱི་རུ་མངོན།།

མྱི་ཁའི་སྒྱེ་མོ་གྲོང་གི་དཀྱིལ་དུ་ཤོར།།

མགོ་བོའི་སྐྲ་ལོ་རྡོག་པའི་བར་དུ་བཅུག།

ཚེ་ཡི་ཉི་མ་ནུབ་པ་མ་གྱུར་བས།།

འཚོ་བའི་གཞིས་ཁང་ཐབ་མེ་སྦར་དགོས་བྱུང་།།

མི་ཚོགས་ཀློང་དུ་ལག་པ་འཇོག་དུས་སུ།།

ངོས་རིས་ལན་ཅིག་བརྗེ་བའི་ཚུལ་ཞིག་བྱས།།

འདང་ཆེན་མེ་ཏོག་ལྷང་ངེ་བཞུགས་གྱུར་པས།།

འདབ་མའི་ལང་ཚོ་སུ་ཡིས་བཏུ་བར་དོགས།།

ལོ་ཟླའི་མཚམས་སྐར་མཐུད་པའི་སྲིད་ཁམས་ནས།།

ངས་ནི་མ་མཆི་སེམས་འདི་དམྱལ་བར་འགྲིམ།།

ཟླ་ངོ་ལོ་ལ་བརྩེགས་ནས་རྒྱུ་བའི་མཐར།།

སེམས་ངོགས་སྒོམ་ཆུང་ཁྲ་མོ་ཟྭ་ཕྱེས་ཏེ།།

སྐར་མའི་མེ་ཏོག་ལག་མཐིལ་འཛིན་གྱི་ནས།།

ཚིག་གི་ཚོམ་བུ་ངག་གིས་ཡངས་པོ་དཀྲོལ།།

དགའ་བདེའི་གཞས་ཆུང་ངག་ལ་སྐྱོར་ནས་བཤད།།

འཚོ་བའི་དྲོད་ཅིག་ཉི་མ་ལྡེ་ནས་ལབ།།

བྲང་ཁོག་ཕྱི་ལ་འདྲུད་ནས་སྟོན་བྱས་ཀྱང་།།

གོམ་གསུམ་འགྲོགས་འདྲེས་ཕྱི་ལ་ནུབ་ཤོར་བ།།

འཁོར་བའི་ལྷ་མོ་ཁྲེལ་གྱིས་དགོད་ཀྱིན་ནས།།

དར་སྐུད་དམར་པོ་ཕྱག་གིས་བཤིག་བྱས་པ།།

འཁོར་བའི་ན་བུན་སླར་ཡང་ལྡང་པ་འདིས།།

ང་ཡི་ཡིད་ལ་མཚོ་མོ་དལ་གྱིས་རྒྱུ།།

ཡིད་འོང་མཁའ་འགྲོའི་སྐྲ་ལོ་སྣོམ་བྱས་ཀྱང་།།

ཁྱི་ལྡོམ་འུར་གྱིས་འདུར་བའི་ཚུལ་ཞིག་ལས།།

སྲིད་ཁམས་འདུན་མའི་དྲོད་རྒྱུན་མ་ཟིན་པ།།

ཡུན་རིང་འཛུམ་པ་བཅོས་མའི་ངང་དུ་གྱུར།།

ཚེ་རབས་འཁོར་བའི་རྡོག་པ་འཇོག་བྱས་ནས།།

འཛུམ་པའི་གདོང་ཤུན་སྲིད་པས་གཡོལ་བྱས་པས།།

སྐྱོ་བའི་ཆུ་མོ་མིག་ནས་བཞུར་གྱུར་ཀྱང་།།

གསོན་པའི་དམྱལ་ཁམས་འགྲིམ་པ་ཐོག་མ་ཉིད།།


  • ལེ་ཚན་སྔོན་མ།:དད་པས་མ་ཟིན་པའི་ཁྱེད།
  • ལེ་ཚན་རྗེས་མ།:བུ་མོ་དེའི་གླུ་དབྱངས་ཐོས་དུས།