དཀར་མཛེས་ཁུལ་ལས་རིགས་ལག་རྩལ་སློབ་གྲྭ་ནི་མིག་སྔར་ཁུལ་ནང་ཁུལ་གྱི་ཕྱོགས་བསྡུས་རང་བཞིན་གྱི་འབྲིང་རིམ་ལས་རིགས་སློབ་གསོའི་སློབ་གྲྭ་གཅིག་པུ་དེ་ཡིན་ལ། ཉེ་བའི་ལོ་ཤས་རིང་དཀར་མཛེས་ཁུལ་དང་དེ་བཞིན་མཐའ་འཁོར་ས་ཁུལ་ལ་ལག་རྩལ་ཅན་གྱི་ཤེས་ལྡན་པ་འབོར་ཆེན་སྐྱེད་སྲིང་བྱས་ཡོད་པ་རེད། ལིའུ་ཁྲེང་མིང་སློབ་གྲྭར་ཕེབས་ནས་དགེ་རྒན་གྱི་འཐུས་མི་ཧོ་ཕུའུ་ཧྲེང་དང་ཁྲེན་སི་ཤན་སོགས་ལ་འཚམས་འདྲི་གནང་ནས་སློབ་གྲྭ་ཡོངས་ཀྱི་སློབ་གསོའི་ལས་དོན་པར་དུས་ཆེན་གྱི་འཚམས་འདྲི་ཞུས་ཤིང་། སློབ་གྲྭས་ཉེ་བའི་ལོ་ཤས་རིང་དཀར་མཛེས་ཁུལ་གྱི་འཕེལ་རྒྱས་ཀྱི་དོན་དངོས་དང་ཟུང་འབྲེལ་བྱས་ནས་དངོས་སྤྱོད་ལག་རྩལ་ཤེས་ལྡན་མི་སྣ་གསོ་སྐྱོང་བྱེད་པའི་བྱེད་ཐབས་བཟང་པོར་བསྟོད་བསྔགས་དང་གདེངས་འཇོག་གནང་བ་རེད།

     ཁོང་གིས་གསུངས་དོན། ལས་རིགས་ལག་རྩལ་སློབ་གསོས་སྣ་མང་ཅན་གྱི་ཤེས་ལྡན་མི་སྣ་གསོ་སྐྱོང་དང་། ལས་ཞུགས་དང་ལས་ལམ་གསར་འབྱེད་ལ་སྐུལ་འདེད་གཏོང་བའི་འགན་འཁྲི་གལ་ཆེན་ཕྲག་ཏུ་འཁུར་ཡོད་པས། ས་གནས་ཀྱི་དཔལ་འབྱོར་འཕེལ་རྒྱས་དང་། སྤྱི་ཚོགས་འཆམ་མཐུན་དང་བརྟན་རླིང་ཡོང་བར་སྐུལ་འདེད་གཏོང་བའི་འདེགས་སྐྱོར་གལ་ཆེན་ཞིག་ཡིན། དཀར་མཛེས་ཁུལ་ལས་རིགས་ལག་རྩལ་སློབ་གྲྭས་འཕེལ་རྒྱས་ཀྱི་དོན་དངོས་དང་སྤྱི་ཚོགས་ཀྱི་དགོས་མཁོ་ཟུང་འབྲེལ་བྱས་ཏེ་ལས་རིགས་སློབ་གསོའི་སྒྲིག་སྲོལ་དང་ལམ་སྲོལ་སྒྱུར་བཅོས་མུ་མཐུད་གཏིང་ཟབ་ཏུ་བཏང་ཞིང་འབྱུང་འགྱུར་ལ་དམིགས་ནས་འབྲིང་རིམ་ལས་རིགས་སློབ་གསོ་དང་མཐོ་རིམ་ལས་རིགས་སློབ་གསོ་འབྲེལ་མཐུད་ཡག་པོ་བྱས་ཏེ་ཕུལ་བྱུང་གི་ལག་རྩལ་རྩེ་གྲ་ལྡན་པའི་ཤེས་ལྡན་མི་སྣ་དེ་བས་མང་བ་གསོ་སྐྱོང་ཧུར་ཐག་བྱ་དགོས་པར་བསྟན།