2020-08-20
ཀུན་ཏུ་བཏེགས་པའི་ཡིད་ཀྱི་སྒྲོལ་མ་ལྷ།།
སེམས་སུ་བསྒྲོན་པའི་མིག་གི་ཟླ་བ་ལྷ།།
རྣམ་ཀུན་དག་པའི་བརྩེ་བའི་མི་ཡི་ལྷ།།།
བྱམས་པ་ཁ་སེམས་སྦྲེལ་ལ་གུས་ཞུ་གསོལ།།
དང་པོ་ཟླ་བའི་ཞལ་ཞིག་ཟུང་གིས་ཟིན།།
འདྲེན་བྱེད་མིག་གི་རྒྱུ་ལམ་སྣང་བས་ཟིན།།
ལྟ་བའི་ཕྱག་དང་ཕྱོགས་སུ་མ་ཡིན་ན།།
ཨེ་མ་སྟོན་པ་དེའང་ཁྱེད་ལས་སུ།།
བསྐལ་བའི་ཆགས་འཇིག་ཆུ་ཡིས་བྲན་པ་ནས།།
སྟོང་གསུམ་གཙང་བོར་འདྲེས་པའི་སྣང་བ་དེ།།
ཟ་ཟི་རྒྱུ་བའི་ལམ་གྱི་སྣེ་མོ་རུ།།
བཏེགས་པ་དེའང་བྱམས་པར་འཁྲེན་པའི་དོན།།
འབྲོག་ཐང་ནམ་མཁའ་སྐར་མས་ཟིན་ཚད་ནས།།
བྱང་སྐར་སྤུན་བདུན་བོད་ལ་འཕྲོས་ཚད་ནས།།
རི་བཞི་སྒང་ལ་ཉུལ་ཡང་མ་རྙེད་པའི།།
པདྨའི་ཟེའུ་འབྲུ་ལྟ་བུའི་བྱམས་པ་མ།།
ཡིད་ཀྱི་ཁུད་དུ་བྲིས་པའི་གཏམ་རྒྱུད་དེ།།
བརྗོད་བྱས་མ་ཟིན་རྨི་ལམ་འཁའ་རུ་ཤར།།
མཁའ་ཡི་བརྗེད་བྱང་ལྟ་བུའི་མིང་ཡིག་དེ།།
གཏམ་རྒྱུད་ཁྲི་རུ་འཕོས་པའི་དཔེ་རུ་བཀོད།།
ཡིད་འཛིན་རྨ་ཁའི་གསེང་ནས་བྲུས་པའི་གཟེར།།
ལོ་དང་ཟླ་བའི་ཁོག་གི་ཟ་འཕྲུག་བཞིན།།
ཡོད་ཚད་མེས་པོའི་མངའ་ཐང་སྟོངས་པ་ལྟར།།
བདག་གི་གློ་སྙིང་མཆིན་གསུམ་འཕྱུང་ནས་ཐལ།།
གཏམ་དང་མི་ཁའི་རླུང་ཆེན་ལྡང་བ་དེ།།
ཆར་ལྟར་ཟོལ་གྱིས་བབས་ཀྱང་ཆད་སྣང་དང་།།
འབྲུག་ལྟར་སྟོབས་ཀྱིས་གྲག་ཀྱང་ཞེད་སྣང་གི།།
འཇིགས་པ་བདག་ལ་ཡོད་པ་རུས་སྦལ་སྤུ།།
ཤོག་གའི་ཉིན་དང་སྲིབ་ཀྱི་བར་ཤད་དུ།།
ང་དང་ཁྱོད་གཉིས་གནས་སྡོད་འཆའ་ནའང་།།
ཞེ་སེམས་རྟིང་མ་བློ་རུ་ཟུག་རྐྱེན་ལ།།
ཁྱེད་ཉིད་དྭངས་བའི་མཚོ་ཡི་ཟླ་བ་འོ།།
བར་རྐྱེན་བསིལ་འཇམ་རླུང་བུ་དགྲ་ཇག་བཞིན།།
མི་ཁའི་རྟ་ལྕག་བཅིངས་ཏེ་འོང་ན་འང་།།
འོ་ཆུ་བསྲེས་པ་བཞིན་པའི་ཞེ་སེམས་དེ།།
རྟ་དཀར་བཅིབས་པ་ལྟ་བུའི་བརྩེ་སེམས་ཡིན།།
བརྩེ་བ་ཆུ་ལ་ཆུ་བཞག་སྣང་བས་གྱོན།།
སྣང་བ་སྦུ་རག་ཧྭ་ཨར་ཚོར་བས་འཐུངས།།
ལས་ཀྱི་འཇའ་འོད་ཕྱོགས་སུ་འཆར་བ་ཡིས།།
སྒྲོལ་མ་ལྷ་དེ་བྱུ་རུའི་མེ་ལོང་ཡིན།།
གོས་དང་རྒྱན་གྱིས་སྤྲས་པ་མ་ཡིན་ཞིང་།།
རྒྱུ་དང་འབྱོར་བའི་བཏེགས་པ་མ་ཡིན་པའི།།
སེམས་ཀྱི་དགའ་བའི་ཉི་འོད་འཕྲོ་ས་སྟེ།།
ཟླ་བ་ལྷ་དེ་གཡུང་དྲུང་རི་མོ་ཡིན།།
གཡོ་དང་ཟོལ་གྱིས་བསླུས་པ་མི་སྲིད་ཅིང་།།
རྒྱ་ལྕང་སྐྲ་ལོས་འཁྲུལ་བ་མིན་མདོག་གི།
སེམས་རྒྱུད་བལ་དཀར་ལྟར་དུ་འཇམ་པ་ཡི།།
མི་ཡི་ལྷ་དེ་རྗེ་བཙུན་སྒྲོལ་མ་ཡིན།།
བྱམས་པ་ཁ་སེམས་སྦྲེལ་དེ་ཁབ་སྐུད་ཀྱིས།།
འཚེམ་ལྟར་བཙན་གྱིས་སྦྱར་བ་མ་ཡིན་པར།།
ཆུ་ཁའི་རྨ་བྱ་འབྲུག་ལ་ཞེན་པ་ལྟར།།
ལྷུན་གྱིས་གྲུབ་པ་ཞིག་ཏུ་ངེས་སོ་ལོ།།
༼ འཁོན་བུ་སྟག་རྒྱལ་ཚེ་རིང་། ༽
རྩོམ་གསར། 10