མདུན་ཤོག > སློབ་གསོ།
 
ལི་སྨད་སློབ་ཆུང་གི་བྱུང་བ་བརྗོད་པ་རིན་ཆེན་ནོར་བུའི་ཕྲེང་བ།

2017-09-05   ལི་སྨད་ཉི་གཞོན།

 

 

གང་ཞིག་ཡོན་ཏན་གཏེར་གྱི་མཛོད་འཆང་བའི༎

བློ་གྲོས་དགོས་འདོད་ཆར་ལྟར་འབེབ་པ་ཡི༎

ལྷག་པའི་ལྷ་མཆོག་འཇམ་དཔལ་དཔའ་བོ་ལ༎

སྒོ་གསུམ་གུས་པའི་ངང་ནས་ཕྱག་འཚལ་ལོ༎

 

བླ་མེད་སྔོན་བྱོན་མཁས་པའི་མཛད་བཟང་དག།

དེང་རབས་བྱིས་པས་བློ་ཡིས་མ་དཔག་ན༎

གཤིས་བཟང་ཡོན་ཏན་མཐའ་དག་རྒུད་གྱུར་ནས༎

ནམ་ཞིག་རུལ་བར་འགྱུར་བས་འཆད་པར་བྱ༎ 

  དེ་ཡང༼རླངས་ཀྱི་པོ་ཏི་བསེ་རུ༽ལས།ལར་སྐྱེས་མི་ཡིས་རང་གི་སྐྱེ་རྒྱུད་མ་ཤེས་ན།། ནགས་གསེབ་རང་དགར་རྒྱུ་བའི་སྤྲེལ་འཁྱམས་འདྲ།། རིགས་རུས་ཆོ་འབྲང་གང་ཡིན་མ་ཤེས་ན།། གཡུ་འབྲུག་ཟོལ་མ་བཅས་པའི་དབྱིབས་དང་འདྲ།། ཡབ་མེས་རྣམ་པའི་ཡིག་ཚང་མ་ཤེས་ན།། མོན་ཕྲུག་ཡུལ་བོར་དོན་མེད་ཡན་པ་འདྲ།། ཞེས་པ་ལྟར་འདིར་གླེང་བར་བྱ་བ་ནི་ལི་སྨད་ཤེས་རབ་བྱམས་བརྩེ་སློབ་གྲྭའི་བྱུང་བ་བརྗོད་པ་ཙམ་ཡིན། སྤྱིར་སློབ་གྲྭ་ཞེས་པ་ནི་རིག་པའི་མེ་ཏོག་བཞད་སའི་ལྡུམ་ར་ཆུང་ཆུང་ཞིག་ཡིན་ལ་དེར་སྐལ་ལྡན་སློབ་བུ་རྣམས་ཀྱིས་བློ་གྲོས་ཀྱི་པད་མོ་རྒྱས་ཤིང་ཤེས་རིག་གི་ངད་ཁ་ལྡང་ནས་མ་འོངས་པའི་མདུན་ལམ་ལ་སྟ་གོན་བྱེད་ས་ཞིག་ཀྱང་ཡིན།

   སྤྱི་ལོ༡༩༦༠ལོའི་ཟླ༧པར་་སློབ་གྲྭ་འདི་ཐོག་མར་མདོ་མང་དགོན་དུ་བཙུགས་ནས་གེ་འཕན་ལི་ཁོག་མའི་ས་ཆ་འདིར་སློབ་གྲྭ་ཞེས་པའི་མིང་བྱང་དེ་ཐོག་མར་ཐོས་མགོ་བརྩམས།ལི་ཁོག་མའི་སློབ་གྲྭ་དང་གཙང་སྟོད་སྨད་ཀྱི་སློབ་གྲྭ་སོགས་ས་ཁུལ་བཞི་པའི་སློབ་གྲྭ་རྣམས་ལ་རྒྱལ་ཁབ་རིམ་པས༼དར་དམར་སློབ་ཆུང༽ཞེས་པའི་མིང་བཏགས།སྐབས་དེར་གོང་རིམ་གྱིས་མངག་བཀོད་ལྟར་ཕན་ཅིན་ཧྲིན་དགེ་རྒན་གྱིས་སློབ་གཙོ་མཛད་ནས་ལོ་གསུམ་གྱི་རིང་ལ་དགེ་རྒན་དྲུག་ལྷག་གིས་སློབ་མ་༡༢༠ལྷག་གི༼ཁྱོན་འཛིན་གྲྭ་བཞི་ཡོད༽རྨོངས་པའི་ཞྭ་མོ་དོར་ལ་ཤེས་རིག་གི་དབུ་ཁྱུད་འབྲི་མགོ་བརྩམས། ཡིན་ནའང་སྐབས་དུས་སྤྱི་ཚོགས་ཀྱི་འཚོ་བའི་ཆ་རྐྱེན་ཞན་པའི་སྟབས་ཀྱིས་སློབ་གྲྭ་འདིར་ཟས་གོས་གནས་མལ་གྱི་དཀའ་ངལ་བྱུང་ནས་དབྱར་དུས་ཀྱི་ཤ་མོ་དང་སྟོན་དཔྱིད་ཀྱི་གྲོ་མ་སོགས་ལ་བསྟེན་ནས་འཚོ་བ་ཅུང་ཙམ་རོལ་ཡང་བཀྲེས་སྐོམ་དང་གྲངའཁྱག་སོགས་ཀྱིས་སློབ་མ་གཅིག་རྐྱེན་ལམ་དུ་ཤོར་ལ་གཞན་པ་རྣམས་ཀྱིས་ཀྱང་མ་བཟོད་པར༡༩༦༣ལོར་སློབ་གྲྭ་འདིའི་དགེ་སློབ་ཚང་མ་མུ་གེའི་ངང་ནས་ཁ་ཐོར་དུ་འགྲོ་དགོས་བྱུང་། དེ་ནས་བགྲང་བྱ་བརྒྱད་ཀྱི་རིང་ལ་ཞིང་ཕྱུགས་ཀྱི་ལས་ལ་འབད་ནས་རིག་གནས་སློབ་པའི་གོ་སྐབས་མ་བྱུང་།

   ༡༩༦༩ལོར་ཡང་བསྐྱར་གཡག་སྙིང་ཁོག་ནས་སྦྲ་གུར་སློབ་གྲྭ་བཙུགས་ནས་སློབ་མ་བརྒྱད་དགུ་ཙམ་ལ་དགེ་རྒན་རིག་ཚེ་ཡིས་སློབ་ཁྲིད་གནང་། ལོ་དེའི་དགུར་ཁར་སློབ་གྲྭ་འདི་འབྲོག་པ་དགུན་སར་སྤོ་བའི་དུས་དང་བསྟུན་ནས་དབུས་ཞེས་པའི་ས་ཆ་རུ་སྤོ་དགོས་བྱུང་། སྐབས་དེར་དགེ་རྒན་རིག་ཚེ་ཡིས་སློབ་གཙོ་མཛད་ནས་སློབ་མ་བཅོ་ལྔ་ཙམ་དང་དགེ་རྒན་གསུམ་གྱིས་བོད་རྒྱ་རྩིས་གསུམ་གྱི་ཚན་ཁག་སློབ་ཁྲིད་བྱེད་མགོ་བརྩམས། ༡༩༧༡ལོར་གོང་རིམ་གྱི་འཆར་འགོད་ལྟར་སློབ་གྲྭ་དེ་ཡུལ་ཚོ་ཁག་དང་མཉམ་དུ་འཇག་ཀླུང་ནང་དུ་སྤོས་ནས་གཏན་ཁེལ་གྱི་གནས་བཙུགས་ཏེ་སྟབས་བདེའི་ས་ཁང་ཞིག་གི་ནང་ནས་སྔར་ཡོད་ཀྱི་དགེ་རྒན་རྣམས་ཀྱི་ཁར་ཚབ་ཁྲིད་དགེ་རྒན་གཉིས་བསྣན་ནས་འཛིན་གྲྭ་བཞི༼ཁྱོན་སློབ་མ་སུམ་ཅུ་ལྷག་ཡོད༽ལ་ལོ་དུ་མའི་རིང་ལ་འཚོ་བའི་ཆ་རྐྱེན་སྔར་ལས་ཅུང་བཟང་བའི་སྒོ་ནས་སློབ་ཁྲིད་བྱེད་ལ་དྲུག་གཅིག་བྱིས་པའི་དུས་ཆེན་གྱི་དགའ་སྟོན་ལ་ཡང་རོལ་མགོ་བརྩམས།འོན་ཀྱང་༡༩༧༣ལོར་ཧོར་བྲག་འགོ་རུ་ཚ་རིམ་༧་༩ཡི་ཡ་ང་བའི་ས་ཡོམ་ཁྲོད་ནས་ཁང་བ་རྣམས་བཤིགས་ཏེ་གནོད་སྐྱེན་ཚབ་ཆེན་བྱུང་ཡང་དགེ་སློབ་ཡོངས་ཀྱིས་དཔའ་མ་ཞུམ་བག་མ་འཁུམས་པར་དཀའ་ངལ་ཁྱད་དུ་བསད་ནས་སློབ་ཁྲིད་ཀྱི་འཚམས་མ་བཞག་པར་སྦྲ་གུར་ནང་ནས་མུ་མཐུད་དུ་སློབ་ཁྲིད་བྱས། ༡༩༧༥ལོར་དུས་ཚོད་ཀྱི་གཡོ་སྐྱོམ་ཁྲོད་ནས་ཡུལ་ཚོ་ཁག་དང་ལྷན་དུ་སློབ་གྲྭའི་དགེ་སློབ་ཚང་མ་རྨེ་ཆེན་ཁམས་མདོ་རུ་སྤོས་ནས་སློབ་ཁང་དང་དགེ་རྒན་གྱི་སྡོད་ཤག་སོགས་སློབ་ཁྲིད་ཀྱི་ཞོར་དུ་དགེ་སློབ་ཚང་མས་དཔུང་བ་མཉམ་གཤིབ་ངང་ནས་གསར་ཏུ་བསྐྲུན་ཏེ་དེང་རབས་ཀྱི་གོམ་འགྲོས་ལ་ཅུང་ཙམ་ཁ་ཕྱོགས་ནས་དགེ་རྒན་དགུ་ཙམ་གྱིས་སློབ་མ་༧༠ལྷག་ལ་སློབ་ཁྲིད་བྱས་ནས་སྔར་ཡོད་ཀྱི་སྦྱང་ཚན་བོད་རྒྱ་རྩིས་གསུམ་གྱི་ཁར་གླུ་དབྱངས་དང་ལུས་རྩལ། རི་མོ་སོགས་ཤེས་བྱ་གཞན་དག་ལའང་འཇུག་པའི་སྐལ་བ་ལྡན་ལ་སློབ་གྲྭ་འདིར་ལི་སྨད་སློབ་ཆུང་ཞེས་པའི་མིང་བྱང་ཏེ་དངོས་སུ་བཏགས། སྐབས་དེར་ལི་སྨད་སྡེ་བའི་རི་ཆེན་སོ་སོ་ནའང་ཡན་ལག་སྦྲ་གུར་གྱི་འཛིན་གྲྭ་རེ་རེ་བཙུགས་ཤིང་ཁོང་ཚོ་ལོ་རིམ་བཞི་པར་སླེབས་རྗེས་ད་གཟོད་རྨེ་ཆེན་ཁམས་མདོ་རུ་ཡོངས་ནས་སློབ་སྦྱོང་བྱེད་དགོས། དགེ་རྒན་རིག་ཚེ་ལགས་ཀྱིས་ལོ་ངོ་བཅུ་ཡི་རིང་ལ་སློབ་གྲྭ་འདིའི་ཕྱི་ནང་ཐམས་ཅད་ཀྱི་ལས་གཞི་ལེགས་པར་བསྐྱངས་ནས་ཁོང་གིས་སློབ་གྲྭ་འདིར་གསུབ་མེད་ཀྱི་བྱས་རྗེས་ཆེན་པོ་ཞིག་བཞག་ཡོད།

༡༩༧༨ལོའི་ཟླ་༡༠པར་དགེ་རྒན་སངས་འཕྲིན་ལགས་སློབ་གྲྭ་འདིར་ལས་བགོས་བྱས་ནས་ལོ་གསུམ་གྱི་རིང་ལ་ལི་སྨད་ལྟེ་གནས་སློབ་ཆུང་གི་སློབ་གཙོའི་འགན་བཞེས། སྐབས་དེར་དགེ་རྒན་བདུན་དང་ལོ་རིམ་དང་པོ་ནས་དྲུག་པའི་བར་དུ་སློབ་མ་བརྒྱད་ཅུ་ལྷག་ཡོད། གོང་རིམ་གྱི་རྒྱབ་སྐྱོར་འོག་ཏུ་སློབ་མའི་འཚོ་བའི་ཆ་རྐྱེན་ཇེ་ལེགས་སུ་འགྲོ་བའི་ཆེད་དུ་སློབ་གྲྭས་འབྲི་མོ་འགའ་ཉོས་ལ། དེ་ལས་བྱུང་བའི་མར་ཕྱུར་རྣམས་ཀྱིས་དྲུག་གཅིག་གི་བཟའ་བཅའ་ལ་ཁ་སྣོན་བྱས་ནས་གྲོ་མ་མར་ཁུ་སོགས་བོད་ཟས་ཀྱི་འཚོ་བར་ལོངས་སུ་སྤྱད་ནས་ཉིན་གཉིས་ཀྱི་རིང་དུ་དྲུག་གཅིག་ལ་རོལ་བ་རེད། ལི་སྨད་ལྟེ་གནས་སློབ་ཆུང་གི་ཐོག་དང་པོའི་མཐར་ཕྱིན་འཛིན་གྲྭར་ཁྱོན་མི་བཅོ་བརྒྱད་ཡོད། དེ་ལས་རྒྱལ་ཁབ་ཀྱི་ལས་གནས་སུ་ཞུགས་མཁན་གཉིས་དང་། རབ་བྱུང་གི་ལས་ལ་ཞུགས་མཁན་མི་བཞི་ཡོད། དེ་མིན་མི་བཅུ་གཉིས་ཀྱིས་འབྲོག་པའི་འཚོ་བར་རོལ་བཞིན་ཡོད། ༡༩༨༠ལོར་ཕྱོགས་སོ་སོའི་ཡན་ལག་སྦྲ་གུར་སློབ་གྲྭ་རྣམས་ལི་སྨད་ལྟེ་གནས་སློབ་ཆུང་དུ་བསྡུས་ནས་ཕྱོགས་གཅིག་ཏུ་འཚོགས། ༡༩༨༡ལོར་དགེ་རྒན་བཀྲ་རྒྱམ་ལགས་སློབ་གྲྭ་འདི་ནས་ལོ་གསུམ་གྱི་རིང་ལ་སློབ་གཙོའི་འགན་བཞེས་ནས་སློབ་མ་དྲུག་ཅུ་ལྷག་གསོ་སྐྱོང་མཛད། ༡༩༨༤ལོར་ཁོང་ལས་གནས་སྤོར་ནས་ཚབ་བྱེད་དུ་དགེ་རྒན་པག་གཅེས་ལགས་ཀྱིས་སློབ་གཙོའི་ལས་འགན་བཞེས་ནས། ༡༩༩༢ལོའི་ཟླ་བརྒྱད་པ་ནས་བཟུང་ལོ་རིམ་གསུམ་པའི་སློབ་མ་རྣམས་བཅའ་སྡོད་སློབ་མའི་གྲས་སུ་བཞག ༡༩༩༦་་་་་༢༠༠༦ལོ་ནས་བཟུང་དགེ་རྒན་མཚོན་པ་དང་དགེ་རྒན་ཚེ་པུས། དགེ་རྒན་དོན་དཔལ། དགེ་རྒན་འགྱུར་མེད་རབ་བརྟན་སོགས་ཀྱིས་རིམ་བཞིན་སློབ་གཙོའི་འགན་བཞེས། སྐབས་དེར་སློབ་གྲྭ་འདིར་སློབ་མ་ཉུང་བ་དང་ཁྱད་པར་དུ་ལོ་རིམ་མཐོ་བའི་སློབ་མ་ནི་དེ་བས་ཀྱང་ཉུང་། རྒྱུ་མཚན་ནི་སྔོན་ནས་རྒྱལ་ཁབ་ཀྱི་ཐོན་སྐྱེད་སྒེར་ལ་གཏད་ནས་ཕ་མ་ཚོས་རང་གི་དཔལ་འབྱོར་གོང་འཕེལ་དུ་འགྲོ་ཆེད་བུ་ཕྲུག་རྣམས་སློབ་གྲྭར་འགྲོ་བའི་དུས་ཚོད་གཡོལ་ཐུབ་བྱས་ནས་རྫི་བོ་བྱེད་དུ་འཇུག་པའམ། དེང་ཐོག་སློབ་གྲྭ་འདི་ནས་མཐར་ཕྱིན་པའི་སློབ་མ་ཤེར་ཐོ་དགེ་རྒན་གྱི་ལས་གནས་སུ་ཞུགས་ནས༢༠༠༦ལོར་མ་ཡུམ་སློབ་གྲྭ་རུ་ཕེབས་ནས་སློབ་གཙོའི་ལས་འགན་མཛད། སྐབས་དེར་སློབ་གྲྭ་ཡོངས་ལ་དགེ་རྒན་བཞི་དང་སློབ་མ་བཞི་བཅུ་ཞེ་ལྔ་ལྷག་ལས་མེད་ལ་ལོ་རིམ་དྲུག་པར་སློབ་མ་གཉིས་དང་ལོ་རིམ་ལྔ་པར་སློབ་མ་གསུམ་ཡོད། ལོ་དེའི་སྤྱི་ཟླ་གཉིས་པར་སློབ་གྲྭ་འདི་ནས་ཤེས་བྱའི་འཚོ་བཅུད་ལ་རོལ་མྱོང་བའི་མཁན་བསོད་དར་རྒྱས་ལགས་མ་ཡུམ་སློབ་གྲྭར་ལྟ་སྐོར་དུ་ཕེབས་ནས་སློབ་གྲྭའི་ཆ་རྐྱེན་དང་སློབ་མའི་གནས་བབས། སློབ་གསོའི་སྤུས་ཀ་སོགས་ཞན་པའི་གནས་ཚུལ་མཐོང་ནས་ཁོང་གིས་མ་ཡུམ་སློབ་གྲྭར་དྲིན་ལན་འཇལ་ཆེད་དང་མི་རིགས་སློབ་གསོ་གོང་འཕེལ་གཏོང་ཕྱིར། མ་ཡུམ་སློབ་གྲྭ་བསྐྱར་གསོ་བྱ་རྒྱུའི་དམ་བཅའ་བརྟན་པོ་ཐུགས་ལ་བཅངས།དེའི་ཕྱིར་ཁོང་གིས་ཐབས་བརྒྱ་ཇུས་སྟོང་གི་ངང་ནས་མང་ཚོགས་ལ་བྱིས་པ་རྣམས་སློབ་གྲྭར་གཏོང་དགོས་པའི་རེ་བ་དང་རིག་གནས་ཀྱི་དགོས་མཁོ། རིག་གནས་ཀྱི་རིན་ཐང་སོགས་ཀྱི་ཐད་ནས་བསླབ་བྱ་གྱ་ནོམ་པ་མཛད་ནས། ༢༠༠༧ལོའི་དབྱར་ཁར་ཁོང་གིས་རྫོང་རིག་སློབ་ཁག་དང་གྲོས་བསྡུར་ཐེངས་མང་བྱས་ནས་སློབ་གྲྭ་འདིར་སློབ་ཁྲིད་ཐོག་ཁང་དང་ཟ་ཁང་། སློབ་མའི་སྡོད་ཤག དཔེ་མཛོད་ཁང་། རྩིས་འཕྲུལ་ཁང་། སྐྱེ་དངོས་རྫས་གསུམ་གྱི་ཚོད་ལྟ་ཁང་། རྒྱང་བསྒྲགས་ཁང་། ཚོགས་འདུ་ཁང་སོགས་ལ་སྒོར་ཁྲི་༣༠༠ལྷག་གི་འགྲོ་གྲོན་བཏང་ནས་སློབ་གྲྭའི་ཕྱི་ནང་གི་ཆ་རྐྱེན་ཡོངས་རྫོགས་ཆ་ཚང་བར་གསར་བསྐྲུན་མཛད།  དེར་མ་ཟད་རྫོང་ཕྱི་ནང་ནས་དྭ་ཕྲུག་སོགས་ཆ་རྐྱེན་ཞན་པའི་སློབ་མ་གཙོར་བྱས་པའི་སློབ་མ་༡༨༠ལྷག༼འཛིན་གྲྭ་བརྒྱད་ཡོད༽ལ་ཟས་གོས་གནས་མལ་གྱི་རོགས་རམ་རྒྱ་ཆེན་གནང་བ་མ་ཟད།སྔར་ཡོད་ཀྱི་དགེ་རྒན་རྣམས་ཀྱི་ཁར་དགེ་རྒན་གསར་བ་༡༡་བཀོད་བསྒྲིག་བྱས་པ་དང་། ལྷག་པར་ཏུ་ཞིང་ཆེན་ཕྱི་ནང་ནས་རྒྱ་ཡིག་དགེ་རྒན་དུ་མ་གདན་འདྲེན་བྱས་ནས་སློབ་གྲྭ་འདིར་སྔར་ལས་ལྷག་པའི་སྒོ་ནས་མི་རིགས་ཁག་གི་རིག་གནས་ལ་ཤུགས་སྣོན་དང་སྦྱང་པ་མཐར་ཕྱིན་མཛད་པའི་ལྷག་བསམ་ཟོལ་མེད་ཀྱི་དགེ་རྒན་གྱི་དཔུང་སྡེ་ཞིག་རང་བཞིན་གྱིས་གྲུབ་ཡོད།

༢༠༠༩ལོའི་༨པར་དགེ་རྒན་རིག་འཛིན་རྣམ་རྒྱལ་ལགས་ཀྱིས་སློབ་གྲྭ་འདིར་སློབ་གཙོའི་འགན་བཞེས་ཏེ་ཡང་བསྐྱར་རྫོང་ཕྱི་ནང་གི་སློབ་མ་བརྒྱ་ལྷག་བསྡུ་ལེན་བྱས་ནས་ཁྱོན་བསྡོམས་སློབ་མ་༣༠༠ལྷག་༼འཛིན་གྲྭ་བཅུ་ཡོད༽དང་དགེ་རྒན་ཉེར་གཉིས་ཀྱིས་མུ་མཐུད་དུ་མི་རིགས་སློབ་གསོའི་ལས་དོན་ལ་འབད་འབུངས་དང་ཐུགས་ཁུར་གནང་བཞིན་མཆིས།བགྲང་བྱ་ང་གཅིག་གི་རིང་ལ་སློབ་གྲྭ་འདི་ནས་གསོ་སྐྱོང་མཛད།

 ༢༠༡༧ ལོའི་ཟླ་༨་པ་ནས་དགེ་རྒན་འཇམ་དཔལ་བཟང་པོས་སློབ་གྲྭ་འདིའི་གཙོ་འགན་བཞེས་ཡོད་ལ། ད་སྐབས་ཁྱོན་བསྡོམས་སློབ་མ༤༠༠་ཙམ་༼འཛིན་གྲྭ༡༡༽དང་དགེ་རྒན༢༦ཡོད། སློབ་གྲྭའི་ཟ་ཁང་དང་སློབ་མའི་སྡོད་ཤག་སོགས་གསར་འཛུགས་རྒྱ་ཆེན་གནང་བཞིན་ཡོད།

སློབ་གྲྭའི་ཉིན་རྒྱུན་ལམ་ལུགས།

 

གཅིག  སློབ་གྲྭའི་སྒྲིག་གཞི།

༡ སློབ་གྲྭའི་དོ་དམ།

དེང་རབས་སློབ་གསོའི་འཕེལ་རྒྱས་ཀྱི་འགྲོས་དང་བསྟུན་ནས་སྔར་ཡོད་ཀྱི་སློབ་གྲྭའི་བདག་གཉེར་དང་དོ་དམ་སོགས་ཀྱི་སྒྲིག་གཞི་རྣམས་འགལ་བ་སྙོམས་སྒྲིག་དང་སྙིགས་དོར་བཅུད་ལེན་བྱས་ནས། མི་རིགས་སློབ་གསོའི་དགོས་མཁོ་དང་ས་ཁུལ་སློབ་གསོའི་འོས་བབས་ལ་བསྟུན་ནས་སློབ་གྲྭའི་དགེ་སློབ་ཡོངས་ཀྱིས་དང་ལེན་བྱས་དགོས་པའི་བརྩི་མཐོང་ཆེན་པོ་བཞི་ཞེས་པའི་ཁ་ཕྱོགས་གསར་དུ་བཏོད། བརྩི་མཐོང་ཆེན་པོ་བཞི་ནི།༼སྤྱོད་བཟང་། ཤེས་བརྩོན། བདེན་འཚོལ། གྲོན་ཆུང་།༽བཅས་ཡིན། དེ་བཞིན་དུ་གོམ་གང་མདུན་སྤོས་ཀྱིས་སློབ་གྲྭའི་སློབ་སྟོན་ཁང་དང་འཛིན་གྲྭའི་འགན་ཁུར་བ། བསླབ་ཚན་དགེ་རྒན། གདོང་ལེན་རུ་ཁག་གི་འགན་ཁུར་བ། སྤྱི་དངོས་རྩིས་གཉེར་མཁན་སོགས་དགེ་རྒན་རྣམས་ཀྱི་མ་ཉམས་གོང་འཕེལ་དང་ཉམས་པ་སླར་གསོ་མཛད་ནས་རང་རང་གི་ངོས་ཐད་ནས་ལས་དོན་དག་མཐའ་འཁྱོལ་བར་སྒྲུབ་དགོས་པའི་སྒྲིག་སྲོལ་གསལ་བོར་བཏོན།

༢ བཅའ་སྡོད་སློབ་མའི་ལམ་ལུགས།

གོང་རིམ་དབུ་ཁྲིད་ཀྱི་བཀོད་སྒྲིག་ལྟར་༼གསུམ་གཙང་(三洗)སློབ་གསོ་དང་གསུམ་འགྲིག(三线)༽དོ་དམ་གྱི་ལག་ལེན་རྒྱུན་འཁྱོངས་བྱས་ནས་རོང་འབྲོག་མི་དམངས་ཀྱི་བྱིས་པ་རྣམས་ཀྱིས་གོམས་ལོབས་སུ་གྱུར་བའི་མལ་ཁང་དུ་རྐང་རྗེན་དུ་རྒྱུ་བ་དང་།གོས་ལྷམ་སོགས་གང་བྱུང་དུ་གཏོར་བ།གད་སྙིགས་ཀྱི་ཟས་རིགས་རྒྱུན་དུ་ཟ་བའི་གཤིས་ངན་དག་རིང་དུ་དོར་བར་རང་སྐྱོང་ཁུལ་ཁུལ་གཙོ་གཞོན་པ་ཤེའུ་ཁྲིན་ཤོས་(许春秀)སོགས་ཀྱིས་བསྟོད་བསྔགས་ཀྱི་མཐེ་བོང་ཡང་ཡང་བསྒྲེངས།

གཉིས། ཁྱད་ལྡན་སློབ་གསོ།

རང་སློབ་གྲྭས་སློབ་གྲྭ་གཞན་དག་དང་མི་འདྲ་བར་ཀུན་སྤྱོད་སློབ་གསོ་གཙོར་བཟུང་ནས་དེང་སྐབས་རྒྱལ་ནང་དུ་ཡང་བསྐྱར་ཉམས་སུ་ལེན་བཞིན་པའི༼སློབ་མའི་བསླབ་བྱ༽་དང་མི་རིགས་ས་ཁུལ་དུ་མཐོང་ཆེན་བྱེད་བཞིན་པའི༼ས་སྐྱ་ལེགས་བཤད༽སོགས་ལེགས་བཤད་གང་མང་ལ་འབད་པ་ལྷུར་ལེན་བྱས་ནས་རང་མི་རིགས་ཀྱི་དམུ་རྒོད་ཀྱི་རང་གཤིས་རྒྱང་དུ་དོར་ནས་ད་ལྟ་འཛམ་གླིང་ཡོངས་སུ་སྤེལ་བཞིན་པའི་བྱང་ཚད་སློབ་གསོར་བརྩི་མཐོང་བྱེད་དང་བྱེད་བཞིན་གདའ།གཞན་ད་དུང་མི་རིགས་རང་གི་སྲོལ་རྒྱུན་རིག་གནས་མི་ཉམས་པའི་ཆེད་དང་སློབ་མའི་རིག་ལམ་གྱི་སྒོ་མོ་འབྱེད་ཆེད་དང་སློབ་མའི་སྨྱུག་རྩལ་ལ་གསོན་ཤུགས་གསར་བ་ཞིག་རྒྱས་ཕྱིར་དུ་རྩོམ་རིག་གི་འགྲན་བསྡུར་འདི་ཡང་སྤེལ་འགོ་བརྩམས།

གསུམ། མ་འོངས་པའི་ཁ་ཕྱོགས།

རང་སློབ་གྲྭས་སྤྱོད་ཡོན་ཟུང་ལྡན་གྱི་སློབ་མ་མི་ཉུང་བ་ཞིག་གསོ་སྐྱོང་མཛད་ནས། མི་རིགས་ཀྱི་སློབ་གསོ་ལ་སྲི་ཞུ་དང་སྲོལ་རྒྱུན་ཀྱི་རིག་གནས་ལ་བཀུར་བསྟི། ཚན་རིག་གི་སློབ་གསོར་འདུ་ཤེས་གསར་བ་བཟུང་ནས་མ་འོངས་པར་རང་མི་རིགས་ཀྱི་སློབ་གསོའི་ལས་འགན་གོང་འཕེལ་དུ་གཏོང་རྒྱུའི་དམིགས་འདུན་དང་རེ་བ་བ་བརྟན་པོ་ཡིད་ལ་བཅངས་ཡོད།


 
 
 
 
རྩོམ་གསར། 10
དོ་སྣང་ཆེ་བའི་རྩོམ། 10