དུས་དང་གཞིས་ཀའི་བར་ལ།།

དབྱངས་ཀྱི་ཟམ་ཞིག་འཕངས་ཡོད། །

རྒྱལ་བ་ཚངས་དབྱངས་རྒྱ་མཚོ།།

ཟམ་སྣེ་བརྒྱུད་ནས་ཕེབས་ན།།

སྒེའུ་ཁུང་ལྷོ་རུ་བསྐོར་ཡོད།།

མིག་མཐའ་ཟིལ་བས་བརླན་ཡོད།།

ཇ་ཕོར་ནང་གི་རླངས་པར།།

ཡིག་འབྲུའི་གཤོག་པ་ཐོགས་ཤོག།

བྱ་བརྒྱས་གཤོག་རུ་བརྐྱངས་དུས།།

ཐང་དཀར་བྲག་ནས་ལུས་སོང་།།

བྲིས་པའི་ཡིག་ཆུང་ནག་རིལ།།

རི་གསུམ་རྩེ་རུ་བོབས་ཤོག།

རི་ལ་ཁ་བ་བབས་ནས།།

རྫི་རྩེར་བ་མོ་བཞག་ཡོད།།

ཁྲུང་ཁྲུང་དཀར་མོའི་གཤོག་རྡང་།།

ཡ་ཆུང་སྙིང་ལ་ཟུག་འོང་།།

མུན་པ་སེམས་སུ་འཐིབས་ཏེ།།

གཙང་ཆུའི་ཁ་དོག་བསྒྱུར་ཡོད།།

གླེགས་བམ་གསེབ་ཀྱི་ཡིག་ཆུང་།།

འཁོར་བའི་ལྡེ་མིག་ཡིན་ནམ།།

ཁྲེལ་དང་ཕྱི་ཐག་ཀློང་ནས།།

མེས་པོའི་ཞལ་རས་བོར་སོང་།།

རི་གསུམ་སྤོ་ཡི་དར་ལྕོག།

སྙིང་གི་རྨ་ཁར་གྱུར་ཡོད།།

བདེན་པའི་མེ་ལྕེ་སྦར་མཁན།།

ཁྱོད་དང་ང་ལས་མི་འདུག།

སྟོན་མཇུག་ལོ་མ་སེར་པོ།།

ཡིད་མཚོའི་གཏིང་ལ་ཟགས་བྱུང་།།

མ་བསྒོས་སྣང་བའི་ཁ་དོག།

སེར་པོ་གསེར་ལས་བྲིན་པ།།

མཇལ་འདོད་སེམས་ཀྱི་དང་བ།།

དམར་པོ་མེ་ལས་ཚ་བ།།

གསེར་སྐུར་བྱིན་རླབས་ཡོད་མེད།།

སོ་སོའི་སེམས་ལ་དྲིས་དང་།།

རི་སྐེད་ཤ་བ་སྨུག་ཆུང་།།

ཕྱི་མའི་ལས་མཁན་མིན་འགྲོ།།

རི་དང་གཙང་བོའི་གཞུང་ལ།།

ལུས་དང་རྣམ་ཤེས་འཐིམས་ཡོད།།

སྐྱིད་ཆུ་ལུང་བའི་མཐིལ་ནས།།

ཚེ་གང་བསྡད་རྒྱུ་བྱུང་ན།།

ལོ་དང་ཟླ་བའི་བར་ཐག།

མུན་པའི་སྒམ་དུ་སྦས་ཡོད།།

ཤ་དང་རུས་པའི་མདུད་པ།།

ཙོང་ཁའི་ཡུལ་ན་ལུས་ཡོད།།

ཆང་ཕོར་ནང་གི་ཉི་མ།།

བླུ་བསམས་ཐུགས་ཀྱིས་མ་ལོན།།

སྲིན་པོ་རི་ཡི་སྤྲིན་པ།།

སྔོན་མོ་མཚོན་ལས་རྣོ་ཨང་།།

འབྲི་ཤོག་སྟེང་གི་ཉི་འོད།།

དཀར་པོ་བལ་ལས་འཇམ་ཡང་།།

ཨ་མའི་དབུ་སྐྲའི་ཁ་དོག།

པོ་ཏ་ལ་རུ་འཐིམས་ཚར།།

སྐྱས་ལམ་རྡུལ་གྱིས་གཡོགས་པའི།།

གནའ་བོའི་མི་རྟ་དེ་ཚོ།།

ལན་གཅིག་དྲན་པ་ཙམ་གྱིས།།

གོམ་གསུམ་རྨང་ནས་འཆོལ་འགྲོ།།

སྨྲེང་སྐྱོ་དར་གྱི་མདུད་པ།།

སྲིད་པའི་ཡས་མཐར་བརྒྱབ་ཡོད།།

ཁྲི་ཤོར་རྒྱལ་མོའི་དབུས་ནས།།

ཉི་ཟླ་སྐར་གསུམ་འཆར་ན།།

སག་ལྷམ་ཞབས་ཀྱི་རི་མོར།།

མེས་པོའི་དྲོད་ཁོལ་འཁྱིལ་ཡོད།།

དབྱངས་གསལ་སྐྱོར་བའི་ཁྱེའུ།།

གླིང་བཞི་བསྐོར་ནས་སླེབས་ཤོག།

རི་ཆུས་བཅད་པའི་ལོ་ཟླ།།

གཙང་ཆུའི་གཞུང་ལ་བསྙལ་ཡོད།།

ངང་ཆུང་གསེར་མགོའི་ཁྱུ་ཚོགས།།

བར་དོའི་འགྲོ་རོགས་མིན་འགྲོ།།

ཁ་གཉིས་དོན་གྱི་གཡུ་ཕྲ།།

མ་ཉོས་རང་གར་འོང་གིས།།

ཉོས་པའི་གཡུ་ཆུང་དྲུག་དཀར།།

ལྷ་སའི་ཁྲོམ་ནས་ལུས་སོང་།།

མ་བྲིས་ཡིད་ཀྱི་རི་མོ།།

རི་མོ་བཀྲ་ཤིས་རྟགས་བརྒྱད།།

རྟགས་མགོ་གཞིས་ལ་གཏད་ཡོད།།

རྟགས་རྔ་བྱེས་སུ་ཕུལ་ཡོད།།

ཡར་སྟོད་ཉག་ཁའི་རྨུ་ཐག།

མེས་པོའི་ཞལ་ཆེམས་འདྲ་ལེ།།

སྨུག་སྤྲིན་ནང་གི་སེམས་ངལ།།

འཛུམ་གྱིས་མ་ལོན་བསྐྱུར་ཡོད།།

འཁོར་བའི་བདེན་ལུགས་ཟེར་བ།།

སྨིག་རྒྱུའི་རི་མོ་ཞིག་སྟེ།།

རི་མོའི་ཕར་ནང་ཚུར་ནང་།།

ཁྲག་དང་རྣག་གིས་ཁེངས་འདུག།

ཚེ་རབས་ལས་ཀྱི་ཐོ་ཡོར།།

སྲིད་པའི་མཐོ་སར་བསླངས་ཀྱང་།།

སེམས་བྱུང་འཛིང་བའི་མཐའ་རུ།།

མུན་པའི་བླ་རེ་ལྷབ་ལྷུབ།།

སེམས་ཀྱི་ཤོག་བུའི་སྟེང་ལ།།

མཐོན་པོ་རི་ཞིག་བྲིས་ཡོད།།

ཞལ་རས་གསེར་གྱི་ཟླ་བ།།

རི་བོའི་ཟོམ་ནས་འཛུམ་ཤོག།

སྐྲ་ལོ་རླུང་གིས་བསྒུལ་ཡང་།།

དུང་སོ་སུམ་ཅུ་འཐོར་མེད།།

ཡུལ་གྱི་རྩྭ་རྐང་ཕན་ཆོད།།

རུས་པའི་རྐང་ལ་སིམ་ཡོད།།

གངས་དང་མཚོ་མོའི་བར་ལ།།

འདོད་རྒུའི་དངོས་གྲུབ་འཁྱིལ་ཡོད། །

གོང་མོའི་དྲུག་འགྱུར་སྙན་མོས།།

རུ་སྡེའི་ཁ་ཞེང་བསྟབས་ཡོད།།

ཕར་ཕར་ཡལ་བའི་སྤྲིན་པ།།

མིག་ཆུ་ལས་ཀྱང་གཤེར་བ།།

ཡ་ཆུང་ཁོག་གི་མུན་པ།།

ལོ་བརྒྱར་བཀྲུས་ཀྱང་ཡལ་དཀའ།།

ཕོ་བྲང་ནང་གི་དྲོད་ཁོལ།།

ལྷ་སའི་ཇོ་བོས་བསྲུངས་ཡོད།།

བར་སྐོར་གླིང་གི་མཛེས་སྡུག།

སྤྲང་ཚོགས་མང་པོས་བཟུང་འདུག །

འཛུམ་ནང་རལ་གྲི་བསྐུངས་ནས།།

ཚིག་འབྲུ་དུམ་བུར་བགོས་སོང་།།

སོ་སོའི་ལམ་གྱི་སྣེ་མོ།།

རི་ཟོམ་སྨུག་པར་འདྲེས་ཡོད།།

གཡས་རུ་གསེར་གྱི་རི་ལ།།

སེམས་ཀྱི་རི་མོ་བབས་ཡོད།།

སྒྲོལ་མའི་སྒོ་དར་ཁྲ་བོས།།

གཡང་གི་རུ་མ་བསྲུངས་ཡོད།།

དཔྱིད་རླུང་གདོང་ལ་འཇམ་མིན།།

རྒྱ་ལྕང་ལོ་མར་གཟིགས་དང་།།

ཉི་མའི་གྲོང་གི་ཕོ་བྲང་།།

དབྱངས་གསལ་གཉིས་ཀྱིས་བཀྱགས་ཡོད།།

མི་དགེའི་དུད་དྲེག་ནག་པོ།།

ཡིག་འབྲུའི་གསེབ་ལ་ཆགས་ཡོད།།

སྡེ་ཆེན་མི་ཁའི་ཁག་དཀྲིས།།

ཆུ་ཁའི་རྡོ་ལས་འཁྱགས་པ།།

གངས་ཟོམ་རྒོད་པོའི་གཤོག་འགྱུར། །

རུས་པའི་རྐང་ལ་འཐིམས་ཡོང་།།

ཨ་གསར་ཨོ་ལོའི་བློ་རྒྱ།།

ཁྲོན་པ་ལས་ཀྱང་དོག་པ།།

བསགས་པའི་དགེ་རྩ་ཇི་སྙེད།

སེམས་ཅན་སླད་དུ་བསྔོས་ཡོད།།

མ་སྡུམ་ཞེ་གཅོང་དགུ་སྒྲིལ།།

མ་ཕམ་གཡུ་མཚོར་གཏད་ཡོད།།

ཡ་ཆུང་སྙིང་གི་སེར་ཐིག།

སྔོན་མོ་སྤང་ལ་ལྷུང་ཡོད།།

ཨ་ཇོ་གངས་ཆབ་སྔོན་མོ།།

སྲིད་པའི་མཐའ་རུ་འགྲེངས་ཡོད།།