ཁུ་བྱུག

སྐྱ་རེངས་བསུ་བའི་སྐུ་མགྲོན་ཐོག་མ།

ལྡེམ་ལྕུག་ལྕུག་གི་ལྗོན་པའི་ཡལ་གར་བབས་ཏེ།

གྲེ་བ་ངག་ལ་འཁྱིལ་བའི་སྐད་གསང་མཐོན་པོས།

སྙན་འཇེབས་ཀྱི་དབྱངས་རྟ་འགུགས་པར་བྲེལ་དུས།

ཞོགས་ཟིལ་སྟེང་ལ་འཕྲོས་པའི་ཉི་ཟེར་གྱི་ལྡོག་འོད་དེས།

སྟ་གོ་བགྱིས་པའི་ཁུ་བྱུག་གི་རེ་འབོད་ཀྱི་ཞོགས་གླུ་དེ་འགག་པར་བྱེད།

ཁུ་བྱུག་གིས།

ཡང་བསྐྱར་ཨོལ་ཀྲོང་མིད་པའི་མདུད་པ་གློད།

རེ་ཞིང་སྒུག་པའི་དབྱངས་གསལ་གྱི་ས་བོན་སོ་བཞི།

གདེང་ཐོགས་པའི་གསོམ་སྡོང་རིང་བོའི་མགོར་བཞག་སྟེ།

ཞོགས་གླུ་སྙན་མོའི་ཅོང་བརྡ་དེས་རི་ལུང་ཐམས་ཅན་བྲོད་དུ་བཅུག

ས་འབུ་ནག་རིང་གིས་ཀྱང་གླུ་དེར་ཉན་ནས་མགོ་བོ་ཡར་ལ་བཀྱགས།

དེ་དུས།

ཉི་འོད་རིམ་གྱིས་ས་གཞིར་ཁྱབ།

ལྡོག་འཕྲོས་ཀྱི་བཟི་ཁ་སྔར་ལས་གཉོམ།

དབང་ལ་མི་དབང་བའི་ཞོགས་གླུའི་ཅོང་བརྡ།

དབྱངས་གསལ་སོ་བཞིར་གདངས་ལ་བརྒྱུས་ཤིང་ངག་ལ་དྲངས།

དེ་དུས། ཁུ་བྱུག་གི་གྲེ་བ་ཡོད་ཚད་ཞོགས་གླུའི་འགྱུར་ཁུག་དང་བསྡོངས་ཏེ།

རི་གྲོང་ན་གནས་པའི་མི་ཟོག་ཐམས་ཅད་དགའ་བའི་དགོད་སྒྲ་

ལྷང་ངེར་གྱུར།

དེ་དུས།

ང་དང་སྣོད་བཅུད་ལ།

སྲུང་འཁོར་ལྟ་བུའི་ཕ་སྐད་ཀྱི་འཚོ་བཅུད་འཛོམས།

ཁུ་བྱུག་གིས་སྣོད་བཅུད་ཀྱི་དོན་ལྔ་སྣོད་དྲུག་ལ་ཟུངས་ཀྱི་དྭངས་མ་གནང་།

ཚོར་ཤེས་ཀྱི་འདུ་ཤེས་ངར་ཆིལ་ལེར་ང་དང་སྣོད་བཅུད་ཀྱི་སྲོག་རྩ་བརྟན་

དུ་བཅུག

ནམ་ཡང་ངའི་བླ་ཚེ་སྲོག་གསུམ་ལ་གསོན་ཤུགས་ཀྱི་འབོད་སྐུལ་ཐེངས་

གཅིག་མིན་པས།

ཁུ་བྱུག་ལགས། སྐུ་དྲིན་མ་ཆུང་། ང་ཚོར་གནང་བ་མང་དྲགས་པས་འོ་

བརྒྱལ་མྱོང་སོང་།

ང་དང་སྣོད་བཅུད་ལ།

སྐུ་དྲིན་ཆེ་བའི་ཁུ་བྱུག་སྔོན་མོ།

དྲིན་ཆེ་ཞིང་དྲིན་ངོ་ཤེས་པའི་ས་བོན་སྣ་ཚོགས།

ཡང་བསྐྱར་ཁྱེད་ལྟ་བུའི་ཞོགས་པའི་ཅོང་བརྡ་ལ་རེ་བཅོལ་བྱས།

ཤི་མ་གསོན་གྱི་སོས་ཀའི་གསར་འབུས་ཀྱི་ལྗང་ལོའི་འོག་གི་འབའ་འབུ་དང་།

གཉོམ་དུང་དུང་གི་དབྱངས་གསལ་གྱི་ས་བོན་གཉོར་བའི་རྒོད་པོ་ཤ་ཞེན་

ཅན་ཚོར།

ཕ་སྐད་ནི་གསར་དུ་འབུས་པའི་མེ་ཏོག་ཆུང་ཆུང་ཞིག་ཡིན་པ་བརྗེད་

དུ་མ་བཅུག

འདི་ནི་ཁུ་བྱུག་ཡིན།

ཁུ་བྱུག་གི་གསང་བའི་སད་མདའ་ཡིན།

འདི་ནི་ང་དང་སྣོད་བཅུད་ཡིན།

ང་དང་བརྟན་གཡོའི་མཛེས་ལྗོངས་ཀྱི་གོས་ལྭ་ཡིན།

འདི་ནི་ཕ་སྐད་ཀྱི་འབོད་པ་ཡིན།

ཕ་སྐད་ལ་རེ་བའི་དབྱངས་གསལ་གྱི་མེ་ཏོག་ཡིན།

འདི་ནི་སྣོད་བཅུད་ལ་གཟི་མདངས་སྣོན་པའི་གཞན་གསོས་བུ་མོའི་ཞོགས་

གླུ་ཡིན།