འབད་འབུངས་ཡར་བརྩོན་གྱིས་འབྱོར་འབྲིང་ཕྱོགས་སུ་བསྐྱོད།

ཀུན་དགས་བསྒྱུར།        2020-05-20

གངས་འཁྱགས་ཞུས་ནས་རི་ཀླུང་རིམ་གྱིས་དྲོད།།

དཔྱིད་ཀྱི་དཔལ་མོས་ས་གཞི་གཉིད་ལས་བསླངས།།ཐོལ་གྱིས་བྱུང་བའི་ཏོག་གསར་གློ་རིམས་ཀྱིས་རང་ཁུལ་དབུལ་ཐར་འགག་སྒྲོལ་གྱི་གོམ་སྟབས་འགོག་མི་ཐུབ། སྤྱི་ཟླ2པའི་ཚེས18ཉིན་ཞིང་ཆེན་སྲིད་གཞུང་གིས་རང་ཁུལ་གྱི་ཉག་ཆུ་དང་རྟའུ། བྲག་མགོ། དཀར་མཛེས། ཉག་རོང་། སྡེ་དགེ དཔལ་ཡུལ། སེར་ཤུལ། གསེར་ཐར། ལི་ཐང་། འབའ་ཐང་། སྡེ་རོང་སོགས་རྫོང་ཁག12པོ་དབུལ་ཕོངས་རྫོང་གྲས་ནས་ཕྱིར་འཐེན་བྱ་རྒྱུའི་ཆོག་མཆན་སྤྲད་ཡོད་ཅིང་། 2018ལོའི་ཟླ་བ8པའི་ཚེས2ཉིན་ལྕགས་ཟམ་རྫོང་དེ་ཁུལ་ཡོངས་ཀྱི་དབུལ་ཞྭ་ཕུད་པའི་རྫོང་དང་པོར་གྱུར་པ་དང་།2019ལོའི་ཟླ་བ4པའི་ཚེས29ཉིན། དར་མདོ་གྲོང་ཁྱེར་དང་རོང་བྲག་རྫོང་། བརྒྱད་ཟིལ་རྫོང་། ཕྱག་ཕྲེང་རྫོང་། འདབ་པ་རྫོང་བཅས་ཀྱི་དབུལ་ཞྭ་ཕུད་ཡོད། ད་བར་དུ། རང་ཁུལ་གྱི་གྲོང་ཁྱེར་གཅིག་དང་རྫོང་ཁག17ཚང་མ་ཁྱོན་ཡོངས་ནས་དབུལ་ཕོངས་ལས་ཐར་བ་རེད། འདས་དོན་ལ་ཕྱིར་འདང་ཞིག་རྒྱག་དུས2015ལོའི་སྤྱི་ཟླ11པའི་ཟླ་མཇུག་ཏུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྒྱལ་ཡོངས་མི་དམངས་ལ་དབུལ་ཐར་འགག་སྒྲོལ་སྐོར་གྱི་སྐུལ་སློང་བཀའ་རྒྱ་གནང་བ་སྟེ། དབུལ་ཐར་བྱེད་པ་དང་དམངས་འཚོ་ལེགས་སུ་གཏོང་བ། ཐུན་མོང་ཕྱུག་འགྱུར་ཡོང་བ་བཅས་ཡིན་ཞིང་།དབུལ་ཐར་འགག་སྒྲོལ་གྱི་ལས་དོན་དེ་ལོ6རིང་ལ་དཀར་མཛེས་ས་ཆེན་དུ་ཚ་ཚ་འུར་འུར་ངང་སྤེལ་ཡོད་སྟབས་ད་ཆ་དབུལ་ཐར་མང་ཚོགས་ཚང་མ་ཁུལ་ཨུ་དང་ཁུལ་སྲིད་གཞུང་གིས་འགྱུར་མེད་སྟོབས་ལྡན་གྱི་མགོ་ཁྲིད་འོག་ཕྱར་བ་གྲུ་འདེགས་ངང་འབྱོར་འབྲིང་ཕྱོགས་སུ་སྐྱོད་བཞིན་ཡོད།།

རྒྱུན་ལྡན་མིན་པའི་ལོ་དྲུག་རིང་གི་འབད་འབུངས།

ད་ཆ་ནི་རྒྱལ་མོ་རྔུལ་ཆུའི་འབབ་རྒྱུད་ཀྱི་གྲོང་སྡེའི་དར་རྒྱས་དཔེ་སྟོན་ཁུལ་དང་ལྕགས་ཟམ་རྫོང་རི་མཇུག་གྲོང་རྡལ་གྱི་སེའུ་དམར་པོར་ལོ་ལེགས་བྱུང་བའི་དུས་ཚིགས་ཡིན།

མའོ་ལུའུ་རི་གྲོང་གི་སྦྱིན་བདག་ཧྭ་ཅན་གྱིས་དགུན་དཔྱིད་མཚམས་སུ་ཐོན་པའི་རིམས་ནད་དེས་ང་ཚོའི་འཚོ་བར་བར་ཆད་དང་ཤུགས་རྐྱེན་བཟོས་བྱུང་། ང་ཚོས་སྲིད་གཞུང་གི་འབོད་སྐུལ་དང་ལེན་བྱས་ནས་ཡུལ་མིའི་སྣེ་ལེན་སྡོད་ཁང་སྒོ་བརྒྱབ་ཡོད་པས་དཔྱིད་གསར་དུས་ཆེན་རིང་ལ་ཡུལ་སྐོར་ཡོང་འབབ་རྩ་ནས་རག་མ་བྱུང་། འོན་ཀྱང་ང་ཚོས་སྲིད་གཞུང་གིས་སྤྱད་པའི་བཀག་སྡོམ་ཚོད་འཛིན་གྱི་བྱེད་ཐབས་ཚང་མ་མང་ཚོགས་ཀྱི་ཚེ་སྲོག་ཉེན་མེད་ལ་བསམ་བློ་བཏང་བ་རེད་བསམ་བཞིན་ཡོད་ཅེས་བཤད།

སྤྱི་ཟླ4པ་ནི་ལྕགས་ཟམ་རྫོང་གི་སེའུ་དམར་པོ་སྨིན་ལ་ཉེ་བའི་དུས་སྐབས་ཡིན་ཏེ། མཚོ་གཉིས་ཡུལ་ཤོག་གིས་སེའུ་དམར་པོ་ཏུན400ལྷག་ཚོང་རར་འདྲེན་ཡོད། དེའི་ཁྲོད་གསེར་བྱ་ཐང་གྲོང་སྡེ་ཁོ་ནའི་ལོ་རེའི་སེའུ་དམར་པོའི་ཡོང་འབབ་སྒོར་ཁྲི300ཡན་ལ་ཟིན། སེའུ་དམར་པོ་ཁོ་ནའི་ཡོང་འབབ་སྒོར་ཁྲི4ཡན་ཟིན་པའི་ཞིང་དུད་མང་བ་དང་། གྲོང་སྡེ་ཡོངས་སུ་ཡོང་འབབ་ཁེ་གཙང་སྒོར་ཁྲི10ཡན་ཟིན་པའི་དུད་ཚང20ལ་བསླེབས་པ་རེད། རྨོ་ཞིང་རྒྱ་ཁྱོན་མུའུ2900ཙམ་ལས་མེད་པའི་ཡུལ་ཤོག་ཅིག་ལ་ད་སྔ་སེའུ་དམར་པོ་འདེབས་འཛུགས་ཁུལ་མུའུ1500ལྷག་ཡོད་ཅིང་། སྤྱི་ཟླ་བཞི་པར་སེའུ་དམར་པོ་སྨིན་པ་དང་། སྤྱི་ཟླ་ལྔ་པ་ནས་བདུན་པའི་བར་ཁམ་བུ་ཐོན་པ། བརྒྱད་པ་དང་དགུ་པའི་བར་སྟར་ཁ་ཐོན་པ། བཅུ་པར་ཀུ་ཤུ་ཐོན་པ། བཅུ་གཅིག་པ་ནས་ཕྱི་ལོའི་ཟླ་བ་བཞི་པའི་བར་འབྲི་ཏ་ས་འཛིན་དང་དར་ཤིང་འབྲས་བུ། སྔོ་འབྲས་སོགས་ཐོན་གྱི་ཡོད་པས་ལོ་གཅིག་དུས་བཞི་ལ་ཤིང་འབྲས་སོས་པ་རྒྱུན་མི་ཆད་པར་ཐོན་གྱི་ཡོད། མཚོ་གཉིས་ཡུལ་ཤོག་ནི་རང་ཁུལ་ཤར་རྒྱུད་ཀྱི་རྒྱལ་མོ་རྔུལ་ཆུའི་འབབ་རྒྱུད་དུ་སྐྱེ་ཁམས་ནགས་ཤིང་དང་ཤིང་འབྲས་ཐོན་ལས་ཁུལ་གཏོད་པའི་དཔེ་སྟོན་ཁུལ་ཞིག་ཏུ་གྱུར་ཡོད། རང་ཁུལ་ནི་རྒྱལ་ཡོངས་ཀྱི་གཅིག་སྡུད་ཡུག་སྦྲེལ་གྱི་དམིགས་བསལ་དཀའ་ངལ་ཡོད་པའི་ས་ཁུལ14ཡི་གྲས་ཤིག་ཡིན་ལ། ཞིང་ཆེན་ཡོངས་ཀྱི་དབུལ་ཐར་འགག་སྒྲོལ་གྱི་ཡུག་ཁུལ་ཆེན་པོ་བཞིའི་གྲུབ་ཆ་གལ་ཆེན་ཞིག་ཀྱང་ཡིན་པས་དབུལ་ཕོངས་མི་གྲངས་མང་ཞིང་ཁྱབ་རྒྱ་ཆེ་བ་རེད། 2014ལོར་རྫོང་དབུལ་ཕོངས18དང་གྲོང་སྡེ་དབུལ་ཕོངས1360དུད་ཚང་དབུལ་ཕོངས་ཁྲི5.1775དབུལ་ཕོངས་མི་འབོར་ཁྲི22.0289བཅས་གནད་སྨིན་དབྱེ་འབྱེད་བྱས་ཡོད། དེ་ནི་དཔེ་མཚོན་དབུལ་ཕོངས་ཁྲོད་ཀྱི་དབུལ་ཕོངས་དང་འགག་སྒྲོལ་ལས་ཀའི་ཁྲོད་ཀྱི་འགག་གནད་ལྟ་བུ་ཞིག་ཡིན་པ་རེད།

དབུལ་ཐར་འགག་སྒྲོལ་ལག་བསྟར་བྱས་ཚུན་ཁུལ་ཡོངས་ཀྱི་གོང་འོག་ཚང་མས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དབུལ་སྐྱོར་གསར་སྦོལ་འཐབ་ཇུས་ཀྱི་དགོངས་པ་སློབ་སྦྱོང་དང་ལག་བསྟར་ནན་ཏན་བྱས་ཏེ་ཏང་ཀྲུང་དབྱང་དང་ཞིང་ཆེན། ཁུལ་ཨུ་བཅས་ཀྱི་དབུལ་ཐར་འགག་སྒྲོལ་གྱི་ཐབས་ཇུས་བཀོད་སྒྲིག་དོན་འཁྱོལ་མཐའ་གཅིག་ཏུ་བྱས་པ་རེད།

ཉེ་བའི་ལོ་ཤས་རིང་། ཞིང་ཆེན་ཡོངས་ཀྱི་གནས་གཅིག་ཕྱོགས་མང་དང་ཁུལ་ལྔ་མཐུན་སྦྱོར་གྱི་ས་ཁོངས་འཕེལ་རྒྱས་ཀྱི་རྣམ་པ་གསར་པ་དང་། ཕྱོགས་བཞི་རྒྱ་སྐྱེད་དང་ཁོངས་ཡོངས་སྒོ་དབྱེའི་རྣམ་པ་གསར་པའི་ཁྲོད་ཁུལ་ཨུ་དང་ཁུལ་སྲིད་གཞུང་གིས་དབུལ་ཐར་འགག་སྒྲོལ་དེ་ཆབ་སྲིད་ཀྱི་འགན་འཁྲི་ཆེ་ཤོས་དང་དམངས་འཚོའི་འདུ་འགོད་ཆེ་ཤོས། འཕེལ་རྒྱས་ཀྱི་གོ་སྐབས་ཆེ་ཤོས་བཅས་ལ་བརྩིས་ནས་མཛེས་སྡུག་ལྡན་པའི་སྣོད་བཅུད་ཞི་མཐུན་དང་འབྱོར་འབྲིང་དཀར་མཛེས་ཀྱི་རྒྱང་སྐྱོད་ལམ་བུ་གསར་པར་ནུས་ཤུགས་ཡོད་རྒུས་བཏོད་པ་རེད། 2020ལོའི་ཟླ་བ2པར་སླེབས་སྐབས་རྫོང(གྲོང་ཁྱེར)18ཀྱི་དབུལ་ཞྭ་ཕུད་པ་དང་གྲོང་སྡེ་དབུལ་ཕོངས1360དང་མི་འབོར་དབུལ་ཕོངས222986དབུལ་ཐར་བྱས་ནས་དབུལ་ཕོངས་ཐོན་ཚད་བརྒྱ་ཆ23.17ནས0.23བར་མར་ཆག་ཡོད། ཁུལ་ཨུ་དང་ཁུལ་སྲིད་གཞུང་གི་ཕན་འབྲས་དཔྱད་ཞིབ་ཞིང་ཆེན་ཡོངས་ཀྱི་སྔོན་ཐོན་ཕྱོགས་སུ་སླེབས་པ་དང་ས་བབ་མཐོ་བའི་ཐག་རིང་ས་ཁུལ་གྱི་ལྷག་མའི་དབུལ་ཕོངས་དུད་ཚང564དང་མི་འབོར་དབུལ་ཕོངས2191ཚང་མ་འདི་ལོར་དབུལ་ཐར་ཐུབ་རྒྱུ་ཡིན་པ་རེད།

ཐོན་ལས་ལ་བརྟེན་ནས་ཡོང་འཕར་གྱི་སྒོ་མོ་འབྱེད།

བྲག་མགོ་རྫོང་ནོར་ཆུང་ཡུལ་ཤོག་གཞི་རི་གྲོང་སྡེ་ནི་འབྲོག་ཁུལ་ཞིག་ཡིན་ཏེ་དེ་ནའི་གྲོང་མི་ཚོས་ལོ་གཅིག་དུས་བཞི་ལ་སྔོ་ཚལ་གསར་པ་ཟ་རྒྱུ་མི་རག་ཅིང་། ཁོ་ཚོས་སྦྲ་གུར་གཅིག་དང་མེ་ཐབ་གཅིག ས་གདན་གཅིག་བཅས་རང་རང་གི་དགོས་མཁོ་ལ་བརྟེན་ནས་དེ་ལྟར་ལོ་ངོ་ཆིག་སྟོང་ལྷག་ལ་འཚོ་བ་རོལ་ནས་བསྡད།

འཚོ་བ་ཡག་པོ་ཞིག་བསྐྱལ་དགོས་ན་སྔོན་ལ་ཡོང་འབབ་གསོག་དགོས་པ་ནི་ཚང་མས་ཤེས་གསལ་རེད། གྲོང་སྡེར་བཅའ་སྡོད་བྱེད་པའི་ཧྲུའུ་ཅི་དང་པོ་དང་འབྲེལ་ཡོད་སྡེ་ཚན་གྱི་རོགས་སྐྱོར་འོག་གྲོང་སྡེར་ཤྭ་ཁྲ་གསོ་ཚགས་འཕེལ་རྒྱས་བཏང་ནས་ཤ་རྭ་དང་ཤྭ་སྦྲུམ་ལྡེ་གུ་སོགས་རྒྱ་ལུགས་སྨན་རྩྭ་འཚོང་རྒྱུའི་ཐག་བཅད་པ་རེད། ད་ཆར་གྲོང་སྡེའི་ནང་གི་ཤྭ་ཁྲ་གསོ་ཚགས་ཆེད་ལས་མཉམ་ལས་ཁང་དུ་ཤྭ་ཁྲ90ལྷག་ཙམ་ཡོད་པ་དང་ན་ནིང་ལོ་མཇུག་ཏུ་ཡིག་ཚགས་དང་བྱང་བུ་བཟོས་པའི་དུད་ཚང་དབུལ་ཕོངས་མི་རེར་སྒོར340བགོ་བཤའ་བརྒྱབ་པ་རེད།

སེར་ཤུལ་རྫོང་གིས་ལྷད་མེད་འབྲོག་ལས་ཐོན་ལས་དཔེ་སྟོན་ཁུལ་དང་སྐྱེ་ཁམས་ཞིང་ལས་དཔེ་སྟོན་ཁུལ་འཛུགས་སྐྲུན་ལ་སྐུལ་འདེད་གཏིང་ཟབ་བཏང་སྟེ་འདན་མ་ལྟ་སྐོར་སྐྱེ་ཁམས་ཞིང་ལས་ཚན་རྩལ་དཔེ་སྟོན་གླིང་དང་མཚོ་བོད་སྨན་ལུང་གི་ཁྱད་ལྡན་རྒྱ་བོད་ལུགས་སྨན་རྩྭ་རྟེན་གཞི་སྣེ་ཁྲིད་དུ་བྱས་ཏེ་སྟར་བུ་དང་གྲོ་མ། ལྕུམ་རྩྭ་སོགས་ཁྱད་ལྡན་ཐོན་ལས་གཞི་ཁྱོན་ཅན་འཕེལ་རྒྱས་ལ་སྐུལ་འདེད་བཏང་བ་རེད།

འབའ་ཐང་རྫོང་གིས་མ་དངུལ་སྒོར་ཁྲི2000ལྷག་བཏང་ནས3180གཏེར་ཆུའི་སྤུས་རྟགས་རྩེ་གྲ་བཏོད་པ་དང་ཁྱོན་དངུལ་སྒོར་ཁྲི3500བཏང་ནས་ས་མཐོའི་སྔོ་ཚལ་དྲོད་ཁང་ལས་གཞི་བཏོད་དེ་དབུལ་ཐར་འགག་སྒྲོལ་གྱི་ལས་ཀ་ཏན་ཏིག་བསྒྲུབས་ཡོད་ཅིང་། ན་ནིང་ནས་བཟུང3180གཏེར་ཆུ་བཟོ་གྲྭས་ས་གནས་དེ་གའི་ངལ་རྩོལ་པ16གདན་ཞུ་བྱས་ཏེ་མི་རེར་ཟླ་རེའི་གླ་ཆ་སྒོར3000ཙམ་ཟིན་གྱི་ཡོད།

གསེར་ཐར་རྫོང་གིས་སྐྱེ་ཁམས་དབུལ་སྐྱོར་ཐོན་ལས་ལག་བསྟར་བྱས་པར་ཕན་འབྲས་མངོན་གསལ་ཐོན་ཡོད། ནགས་བཟོ་མཉམ་ལས་ཁང5ཡིས་དུད་ཚང་དབུལ་ཕོངས345རྩ་འཛུགས་བྱས་ཏེ་ཁྲོན་ནུབ་ས་མཐོའི་སྐྱེ་ཁམས་ཉམས་ཞན་ཁུལ་གྱི་ཕྱོགས་བསྡུས་བཅོས་སྐྱོང་ལས་གཞི་ནང་ཞུགས་ནས་བྱེ་འགྱུར་ས་ཆ་མུའུ་ཁྲི1ལྷག་བཅོས་སྒྲིག་བྱས་པ་དང་མི་རེའི་ཆ་སྙོམས་ལས་ཞུགས་ཡོང་འབབ་སྒོར9629ལ་ཟིན་ཡོད་པ་རེད། གཞན་ཡང་དེང་རབས་སྐྱེ་ཁམས་འབྲོག་ལས་ཚན་རྩལ་དཔེ་སྟོན་གླིང་ཁུལ་གྱིས་མ་དངུལ་སྒོར་ཁྲི1000ཙམ་བཏང་ནས་མོ་ཕྱུགས་ཐོན་སྐྱེད་བྱ་རྒྱུར་སྤྱད་པ་དང་། མགོན་པོའི་ལག་ཤེས་བཟོ་རྩལ་དང་མིང་ཏ་འབྲི་གཡག་སོགས་ཆེད་ལས་མཉམ་ལས་ཁང་འཕེལ་རྒྱས་དང་སྟོབས་ཆེར་འགྲོ་རྒྱུར་རྒྱབ་སྐྱོར་བྱས། 2019ལོ་ནས་བཟུང་རང་ཁུལ་གྱིས་ཆེད་དོན་དབུལ་སྐྱོར་ལས་དོན་ལ་དམ་འཛིན་ཡག་པོ་བྱས་ཤིང་། དབུལ་ཐར་འགག་སྒྲོལ་ཐོན་ལས་ཀྱི་རིམ་སྤོར་འཛུགས་སྐྲུན་ཐད་དེང་རབས་ཞིང་ལས་ཐོན་ལས་རྟེན་གཞི་མུའུ་ཁྲི19.5བསྐྲུན་ཏེ་དམིགས་ཚད་ལས་འགན་གྱི་བརྒྱ་ཆ101.77ལེགས་གྲུབ་ཟིན་པ་དང་། ཞིང་ལས་ཚན་རྩལ་དཔེ་སྟོན་རྟེན་གཞི23གསར་སྐྲུན་བྱས་ཏེ་དམིགས་ཚད་ལས་འགན་གྱི་བརྒྱ་ཆ63.89ལེགས་གྲུབ་བྱུང་ཟིན། ཞིང་ཆེན་རིམ་པའི་ཡུལ་སྐོར་དབུལ་སྐྱོར་དཔེ་སྟོན་ཁུལ(གྲོང་ཚོ)མགྱོགས་མྱུར་བསྐྲུན་ནས་ཡུལ་སྐོར་གསང་སྤྱོད་ཁང19ལས་མགོ་ཚུགས་ཡོད་པ་དང་། རྒྱ་བོད་ལུགས་སྨན་རྒྱུ་མུའུ་ཁྲི8.43འདེབས་འཛུགས་བྱས་ནས་ལེགས་གྲུབ་དམིགས་ཚད་ཀྱི་བརྒྱ་ཆ99.18ཟིན་ཡོད། དཀར་མཛེས་དང་ལི་ཐང་སོགས་རྫོང་ཁག5ལ་རྒྱལ་ཁབ་རིམ་པའི་གློག་རྡུལ་ཚོང་དོན་གྲོང་སྡེར་སྤེལ་བའི་ཕྱོགས་བསྡུས་དཔེ་སྟོན་ལས་གཞི་འཛུགས་སྐྲུན་ལེགས་གྲུབ་བྱུང་ཡོད། དབུལ་པོ6955ལས་ཞུགས་གཞན་སྒྱུར་བྱས་ཏེ་དམིགས་ཚད་ལས་འགན་གྱི་བརྒྱ་ཆ57.38ལེགས་སྒྲུབ་ཐུབ་ཡོད། སྤྱི་ཕན་རང་བཞིན་གྱི་ལས་གནས13871གསར་སྤེལ་བྱས་ཏེ་དམིགས་ཚད་ལས་འགན་གྱི་བརྒྱ་ཆ81.72ལ་ཟིན་ཡོད་པ་རེད། རང་ཁུལ་གྱི་སྐྱེ་ཁམས་སྔོན་ལ་བཞག་ནས་ལྗང་མདོག་འཕེལ་རྒྱས་མཐའ་འཁྱོངས་བྱས་ཏེ་དབུལ་ཐར་འབྱོར་གྲུབ་སྤྱི་ལེ་བརྒྱ་ཡི་ལྗང་མདོག་སྐྱེ་ཁམས་ཐོན་ལས་ཁུལ3དང་། མུའུ་ཁྲི་བརྒྱ་ཡི་ཁྱད་ལྡན་ཞིང་ནགས་ཐོན་ལས་རྟེན་གཞི2དང་། རྒྱལ་མོ་རྔུལ་ཆུའི་འབབ་རྒྱུད་ཁྲེང་ཏུའུ་ནུབ་རྒྱབ་ཀྱི་མེ་ཏོག་ལྡུམ་ར་བདེ་གསོའི་ཐོན་ལས་ཁུལ་བཅས་འཛུགས་སྐྲུན་བྱས་པ་དང་། རྒྱལ་ཡོངས་ཀྱི་བོད་རིགས་ས་ཁུལ་དུ་དྲྭ་ཐོག་ཚོང་དོན་གྱི་དབུལ་སྐྱོར་ལས་གཞི་ལག་ལེན་བསྟར་བ། ཞིང་ཆེན་རིམ་པའི་ཡུལ་སྐོར་དབུལ་སྐྱོར་དཔེ་སྟོན་ཁུལ2དང་། དཔེ་སྟོན་གྲོང་སྡེ16 ཁྱད་ལྡན་ཡུལ་གྲོང26 རྩེར་སོན་གྲོང་སྡེ46བཅས་བསྐྲུན་ཡོད་པ་རེད།

རྫོང(གྲོང་ཁྱེར)ཁག་གིས་ཐོག་མཐའ་བར་གསུམ་དུ་རང་ངོས་ཀྱི་ལེགས་ཆར་གཞི་ཚུགས་ཏེ་ཐོན་ལས་འཕེལ་རྒྱས་གཏང་རྒྱུ་དེ་དབུལ་ཐར་འགག་སྒྲོལ་གྱི་གལ་ཆེའི་ནང་གི་འགངས་ཆེར་བརྩིས་ནས་ཡུལ་བབ་དང་བསྟུན་ནས་ཁྱད་ལྡན་ཐོན་ལས་འཕེལ་རྒྱས་གཏོང་བ་དང་། ནས་དང་འབྲི་གཡག རི་མཐོའི་སྔོ་ཚལ། རྒྱ་ལུགས་སྨན་རྩྭ་སོགས་ཁྱད་ལྡན་ཐོན་ལས་སྐྱེད་སྲིང་ཤུགས་ཆེན་བྱས་ཤིང་། གྲོང་ཚོ་ཚང་མར་དབུལ་ཐར་ཐོན་ལས་ཡོད་པ་དང་དུད་ཚང་ཚང་མར་ཕྱུག་འགྱུར་གྱི་ལམ་བུ་ཡོད་པ། ཁྱད་ཆོས་མངོན་གསལ་དོད་པ་དང་འདེབས་གསོའི་ཟུང་འབྲེལ་གྱི་ཐོན་ལས་མདུན་ལྗོངས་ཤིག་རིམ་པར་མངོན་ཡོད།

གསེར་ཐར་རྫོང་སྟག་རྩེ་ཡུལ་ཤོག་གནས་སྤོས་དབུལ་སྐྱོར་གཅིག་སྡུད་བཀོད་སྒྲིག་བྱ་ཡུལ་དུ་བོད་ཀྱི་ཁྱད་ཆོས་ལྡན་པའི་སྡོད་ཁང་གསར་པ་གྲ་སྟར་བསྒྲིགས་ནས་བསྐྲུན་ཡོད་ཅིང་། དེའི་བར་དུ་འཕྲེད་གཞུང་དུ་སྣོལ་བའི་ཨར་འདམ་ལམ་བུའི་ངོས་སྙོམས་ལ་གཙང་སྦྲ་ལེགས། ཐུན་མིན་བོད་བཟོའི་ཁྱད་ཆོས་ལྡན་པའི་རིག་གནས་ཐང་ཆེན་ཐོག་གྲོང་མི་ཚོས་མི་རིགས་ཀྱི་གྱོན་ཆས་གྱོན་ནས་དགའ་སྤྲོའི་ངང་ཞབས་བྲོ་འཁྲབ་པས་མ་ཚད་དུད་ཚང་སོ་སོའི་ཁང་ཐོག་ཏུ་སྐར་ལྔའི་དར་དམར་ལྷབ་ལྷུབ་ཏུ་གཡོ་བཞིན་མཆིས།

མགོན་པོ་ཚང་གི་སྨི་གྲུ་བཞི་མ80ཡོད་པའི་ཁང་པའི་ནང་དུ་བོད་ལུགས་ཀྱི་ཇ་ལྕོག་དང་བརྙན་སྒམ། ངོས་ལེབ་བརྙན་འཕྲིན་སོགས་ཁྱིམ་ཆས་མ་ལུས་འཛོམས་ཡོད། སྦུག་ཆུ་གཙང་མ་སྒོ་རའི་ནང་དུ་ཁྲིད་ཡོད་པ་དང་ལོགས་སུ་ཡོད་པའི་ཁྲུས་ཁང་དུ་གློག་གི་ཆུ་སྲོ་ཆས་ནང་དུ་ཆུ་ཚ་པོས་གང་འདུག་ལ་དུས་དང་རྣམ་པ་ཀུན་ཏུ་ལུས་པོ་བཀྲུ་ཐུབ་ཀྱི་ཡོད། འདི་ནི་དུད་ཚང་རེ་འགའ་ཙམ་མིན་པ་གཅིག་སྡུད་བཀོད་སྒྲིག་བྱ་ཡུལ་གྱི་དུད་ཚང35ལ་ངེས་པར་དུ་ཡོད་དགོས་པའི་ཚད་གཞི་ཞིག་ཡིན་པ་རེད།

མགོན་པོས་སྤྲོ་དགའི་ངང་དངུལ་སྐར་གཅིག་ཀྱང་མ་བཏང་བར་སྡོད་ཁང་གསར་པར་སྤོས་ཐུབ་པ་ནི་ཏང་ཨུ་དང་སྲིད་གཞུང་གིས་ང་ཚོ་དུད་ཚང་དབུལ་ཕོངས་ལ་སེམས་ཁུར་དང་རོགས་རམ་བྱས་པའི་འབྲས་བུ་རེད་ཅེས་བཤད།

ལོ6རིང་། རང་ཁུལ་གྱིས་སེམས་ཁྲལ་མེད་པ་གཉིས་དང་འགན་ལེན་གསུམ་ལ་དམིགས་ནས་ཡུལ་གཞན་དུ་གནས་སྤོས་དབུལ་སྐྱོར་སོགས་ལས་གྲྭ་ལག་ལེན་བསྟར་བས་མང་ཚོགས་དུད་ཚང་ཁྲི11.3གྱི་སྡོད་ཁང་གི་གནད་དོན་ཐག་གཅོད་ཐུབ་ཡོད། ཁྱིམ་ཚང་དབུལ་ཕོངས་ཀྱི་སློབ་མར་བརྒྱ་ཆ100ཡི་རོགས་དངུལ་སྤྲད་དེ་སློབ་གྲྭར་འགྲོ་མཚམས་མི་ཆད་པར་སློབ་གྲྭར་ཞུགས་ཚད་འགན་ལེན་གྱི་ཆེད་དོན་བྱ་སྤྱོད་སྤེལ་ཡོད། བདེ་ཐང་དཀར་མཛེས2030ལོའི་བྱ་སྤྱོད་ལ་སྐུལ་འདེད་བཏང་སྟེ་ནད་པ་དབུལ་ཕོངས་རྫོང་ཁོངས་སྨན་ཁང་དུ་སྡོད་པའི་མི་སྒེར་གྱི་གཏོང་སྤྲོད་བཟུང་ཚད་བརྒྱ་ཆ5ཡི་ནང་ཚུན་དུ་ཚོད་འཛིན་ཐུབ་པའི་འགན་ལེན་བྱས། རྩ་ཆག་བཅུ་དང་ཁ་གསབ་བཞིའི་སྲིད་ཇུས་ཕྱོགས་ཡོངས་ནས་དོན་འཁྱོལ་བྱས་ཏེ་ནད་པ་དབུལ་ཕོངས་ཀྱི་རྫོང་ཁོངས་སུ་མི་ཁྲི3.3སྨན་ཁང་དུ་སྡོད་པ་དང་། འཕྲོད་བསྟེན་དབུལ་སྐྱོར་ཐེབས་རྩར་རིམ་རྩིས་བརྒྱབ་ན་སྒོར་ཁྲི6389.1བཏང་ནས་མི་ཁྲི5.63ལ་རོགས་སྐྱོབ་བྱས། ས་གནས་དེ་ག་དང་ཐག་ཉེ་སར་ལས་ཞུགས་བྱེད་མཁན་མི33786ཟིན་པ་དང་སྤྱི་ཕན་རང་བཞིན་གྱི་ལས་གནས་ཀྱི་མཐའ་སྐྱོང་མི་ཐེངས་92010བཀོད་སྒྲིག་བྱས་ཡོད། ཡུལ་ཤོག་ལ་ཤར་གཏོང་ཐུབ་པའི་སྣུམ་ནག་ལམ་སྤྱི་ལེ3696དང་གྲོང་སྡེར་ཤར་གཏོང་ཐུབ་པའི་ཨར་འདམ་ལམ་སྤྱི་ལེ21894བསྐྲུན་ཡོད། གྲོང་སྡེ་དབུལ་ཕོངས902ཀྱི་འཐུང་ཆུ་གཙང་མའི་ལས་གྲྭ་སྲ་བརྟན་དང་རིམ་སྤོར་བྱས་ཡོད། གྲོང་སྡེའི་གློག་དྲྭ་དང་འཕྲིན་གཏོང་དྲྭ་རྒྱ4138སྒྱུར་བཀོད་རིམ་སྤོར་བྱས་པ་སོགས་མི་དམངས་མང་ཚོགས་ཀྱི་ཐོབ་སྣང་དང་སྐྱིད་སྣང་ཟམ་མི་ཆད་པར་ཆེ་རུ་ཕྱིན་ཡོད།

2020ལོ་ནི་ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་ཐུབ་པ་བྱེད་པའི་དམིགས་ཚད་མངོན་འགྱུར་བྱེད་པའི་ལོ་ཞིག་དང་ཕྱོགས་ཡོངས་ནས་དབུལ་ཐར་འགག་སྒྲོལ་གྱི་ལས་དོན་ལ་རྒྱལ་ཁ་ལེན་པའི་མཇུག་བསྡུའི་ལོ་ཞིག་ཡིན་ཏེ། ཁུལ་ཡོངས་ཀྱི་ལས་བྱེད་པ་དང་མང་ཚོགས་ཀྱིས་དུས་ཚོད་སྐར་ཆ་ཙམ་ལའང་བརྩོན་ལེན་བྱས་ཏེ་ཏང་དང་མི་དམངས་ལ་ཐོག་མའི་བསམ་འདུན་དང་འགན་འཁྲི་ལག་བསྟར་བྱེད་པའི་བློ་ཡིད་ཚིམ་པའི་རྒྱུགས་ཤོག་ཅིག་འབུལ་རྩིས་ཡོད་དོ།།

  • ལེ་ཚན་སྔོན་མ།:ལིའུ་ཁྲེང་མིང་གིས་རྒྱལ་ཁབ་གློག་ཤུགས་འབྲི་ཆུ་སྤྱི་གཉེར་ཁང་གི་སྤྱི་ཁྱབ་གཉེར་དཔོན་ཀྲང་ཅན་ཧྭ་དང་མཇལ་འཕྲད་གནང་།
  • ལེ་ཚན་རྗེས་མ།:དཔལ་འབྱོར་གསར་པ་དང་ཐོན་ལས་གསར་པ་མཉམ་སྐྱོང་བྱེད།
  • དོ་སྣང་ཆེ་བའི་རྩོམ།