ཟླ་གཡང་ལ་བྲིས་པའི་སྙིང་གཏམ།

        2020-05-15

ཚེ་སྔོན་ལས་ཀྱི་རྡེའུ་ཆུང་།།

ཡང་ཡང་བསྒྲུགས་པའི་རྟེན་དུ།།

ཁམས་ཀྱི་སྡེ་དགེའི་ལུང་པར།།

ལང་ཚོའི་མེ་ཏོག་བཞད་སོང་།།


ལྷ་ས་མི་ཚོགས་མཐུག་ཀྱང་།།

སེམས་པ་འཁོར་ས་མ་བྱུང་།།

ཁྱོད་རང་ལན་གཅིག་མཐོང་བས།།

སྙིང་ལ་ཀ་བ་བསླངས་སོང་།།


དྭངས་ལ་ལྷོད་ཤ་འཁྱིལ་བའི།།

ངག་རིག་སྙན་པའི་བདུད་རྩི།།

ཡིད་ཀྱི་སྤང་ལ་འཐོར་བས།།

ཚེ་ཡི་སྡུག་བསྔལ་བཀྲུས་བྱུང་།།


འཛུམ་པའི་ཟུར་མིག་ཁབ་རིང་།།

སྐྱེ་བོའི་གློ་སྙིང་ཟུག་སྟེ།།

རྣོ་ལ་ལྷུ་ཚིགས་དམ་པའི།།

རུས་པ་ཆག་ཆག་བཏང་འདུག།


གཤིས་ཀྱི་འདབ་མའི་སྟེང་ལ།།

མཛེས་པའི་ཉི་འོད་འཕྲོས་ཏེ།།

སྐྱེ་བོའི་མིག་ཟུང་ཁྲི་སྟོང་།།

མ་བོས་མགྲོན་དུ་ལྷགས་བྱུང་།།


མཚན་མོའི་ཟླ་འོད་དྭངས་མོ།།

སེམས་ཀྱི་སྒེའུ་ཁུང་ཕོག་ཀྱང་།།

ཁྱོད་ཀྱི་ངོ་གདོང་བསམས་ན།།

དཀར་རྒྱུ་ཅི་ཡང་མི་འདུག།


སེམས་ཀྱིས་བླངས་པའི་མགུར་མོ།།

དབེན་པའི་ནགས་ཁྲོད་མཆེད་དུས།།

རི་དྭགས་ཕོ་མོ་ཟུང་གིས།།

རྣ་བ་བླགས་ཀྱིན་མཉན་བྱུང་།།


ཁྱོད་ནི་མཆོད་པའི་ལྷ་ཡིན།།

ཁྱོད་ནི་སེམས་ཀྱི་ནོར་ཡིན།།

སེམས་ཀྱི་སྡེ་དགེ་ཟླ་གཡང་།།

དྲན་པའི་ཁུ་ལོ་ཆུང་ཆུང་།།


ཞེ་དྲག་སེམས་ལ་སོང་བའི།།

སྙིང་ཐུབ་ཡིད་འཕྲོག་ལྷ་མོ།།

མ་གསང་དྲང་བོའི་ངག་གིས།།

སྙན་མོའི་ཚིག་གཅིག་གསུང་རོགས།།


ནམ་མཁའི་སྤྲིན་པ་ལེབ་མོ།།

ཨེན་ཙམ་བསྡད་རྒྱུ་བྱུང་ན།།

སེམས་གཅོང་ཕྲེང་བར་བརྒྱུས་པའི།།

སྙིང་གཏམ་ཁྱོད་ལ་ཞུ་འདོད།།


ཡུན་རིང་དྲན་པར་བསྙལ་བའི།།

དྲི་མེད་ལྷ་དར་དཀར་པོ།།

དད་པའི་རླུང་བུར་བཅོལ་ཏེ།།

རྒྱང་རིང་བས་མཐར་བསྒྲོན་ཡོད།།


འཇམ་མཉེན་ལག་མཐིལ་པདྨ།།

ང་ཡི་གདོང་པར་ལྷུང་ན།།

ཚེ་སྲོག་རྒྱུན་ཐག་སྲིང་བའི།།

དུས་ཀྱི་གསོས་སྨན་བསྟེན་ཆོག།


མི་འདུས་ཁྲོམ་ཆེན་དཀྱིལ་ལ།།

གོམ་པ་ལྷོད་ལྷོད་སྤོ་ཞོར།།

གླུ་ཆུང་སིང་སིང་ལེན་པ།།

ལྷ་ཡི་གར་མ་འདྲ་བྱུང་།།


སྐྲ་ལོ་རྒྱ་ལྕང་ལན་བུ།།

རྒྱབ་ཏུ་ཨེན་ཙམ་གཡུག་དུས།།

མ་བསམ་གློ་རྡེག་ཅིག་ལ།།

ང་རང་སྐྲ་གསེབ་བཀྱིགས་བྱུང་།།


བརྩེ་བའི་ལུས་དྲི་ཞིམ་པའི།།

ན་ཆུང་གཤིས་བཟང་བུ་མོ།།

མཛེས་པའི་མེ་ཏོག་གཞུ་ཅན།།

ང་ཡི་སྙིང་ལ་བསྣུན་བྱུང་།།


མི་ཁའི་སྐྱི་བསེར་རླུང་བུ།།

ས་སྟེང་ཀུན་ལ་ཁྱབ་སོང་།།

ལ་མོའི་རྒྱབ་ཀྱི་ཁྱེད་རང་།།

སྙིང་གི་སྤང་སྟོད་ལང་ལོང་།།


གཙང་པོའི་ངོགས་སུ་བཞད་པའི།།

ཡིད་འཕྲོག་མེ་ཏོག་ཁེར་སྐྱེས།།

མགོ་ལྕོག་ཤིག་ཤིག་གནང་བ།།

ང་རང་འབོད་པ་ཨེ་ཡིན།།


སྒེའུ་ཁུང་ཕྱི་རོལ་འཕུར་བའི།།

བྱེའུ་ཆུང་ཚེ་རིང་ལོ་བརྒྱ།།

གསུང་སྐད་སྔ་པོར་མ་སྒྲོག།

སྙིང་གཏམ་བཤད་འཕྲོ་ལུས་ཡོད།།


སེམས་པ་སྐྱོ་སྐྱོ་མ་གནང་།།

རྐང་པ་གང་ལ་བཞག་ཀྱང་།།

ལས་ཀྱི་ཆར་རྒྱུན་ཟམ་ཟིམ།།

དབབ་པའི་དུས་ཤིག་ཡོད་འགྲོ།།


གྲེ་བའི་ཡུ་བར་བསྐྱིལ་བའི།།

གདངས་ཀྱི་འགྱུར་བ་བཅོ་བརྒྱད།།

རྟིང་མའི་ལོ་དང་ཟླ་བར།།

སྐྱེ་འགག་མེད་པའི་སྨོན་ལམ།།

༼ ཞོ་ར་བསམ་འགྲུབ་རྒྱལ། ༽


  • ལེ་ཚན་སྔོན་མ།:སྙུན།
  • ལེ་ཚན་རྗེས་མ།:ངག་གཞུའི་མདའ་མོ་ཤོར་བའི་ཤུར་སྒྲ།