འཇམ་དབྱངས་ནོར་བུ་ནས། 2020-05-14
ཀྭ་ཡེ་ཉོན་དང་གངས་རིའི་ནང་ལུང་གི།
ཁ་ཏོན་དགེ་ལ་དགའ་བའི་བོད་པ་ཚོ།།
ག་ས་གང་ལ་གློ་ནད་མཆེད་དུས་འདིར།།
ང་ཡིས་ཀུན་ལ་ཕན་པའི་ཚིག་འགའ་ཞུ།།
ཅ་ཅོ་འུར་ཟིང་ཆེ་སར་འགྲོ་མཚམས་ཞོག།
ཆ་རྒྱུས་མེད་པའི་མི་ལ་ཐུག་མཚམས་ཞོག།
ཇ་ཆང་ཞིམ་པོའི་བཅུད་ལ་རོལ་བཞིན་དུ།།
ཉ་མོ་མཚོ་ལ་གནས་བཞིན་ཁྱིམ་ནས་སྡོད།།
ཏ་ལེན་དུས་རྒྱུན་ཁུར་བའི་འབྲོག་པ་དང་།།
ཐ་མག་རྔམ་འཐེན་བྱེད་པའི་རོང་བ་ཚོས།།
ད་ནས་རང་སྲུང་ཐབས་ལ་མ་བརྩོན་ན།།
ན་ཚས་ལུས་པོ་གཙེས་དུས་རང་སྡུག་ཡིན།།
པ་སངས་ལྟ་བུའི་ལྷག་བསམ་མེད་ན་ཡང་།།
ཕ་མེས་སྲོལ་བཞིན་གཞན་ལ་གནོད་པ་སྤོངས།།
བ་གླང་བཞིན་དུ་གོ་བ་མེད་བསྡད་ན།།
མ་རབས་ནད་ངན་རྙེད་རྒྱུ་ཁོ་ཐག་རེད།།
ཙ་རི་གནས་ན་བཞུགས་པའི་སྒོམ་ཆེན་དང་།།
ཚ་གྲང་ཟུག་གཟེར་གསོད་པའི་ལྷ་རྗེ་ཡིས།།
ཛ་དྲགས་ནད་ངན་འདི་ལ་འཐབ་ཐུབ་ན།།
ཝ་འདྲའི་འུ་ཚོས་རང་ལུས་སྲུང་ལོས་དགོས།།
ཞ་ར་བཞིན་དུ་ཟིན་ཚད་ཟོས་པ་དང་།།
ཟ་འཐུང་སྡིག་ལ་རྔམ་པའི་རྣམ་སྨིན་གྱིས།།
འ་ཅག་མི་ལ་ནད་ངན་འདི་འདྲ་བྱུང་།།
ཡ་ལན་ཚིག་བརྩི་ཡོད་ན་ཟ་ཚོད་ཟུངས།།
ར་ཤ་ནོར་ཤ་སོགས་ཀྱིས་མ་ཆོག་པར།།
ལ་ལུང་སྲོག་ཆགས་གང་གནས་ཡོད་ཚད་ཀྱི།།
ཤ་ཁྲག་ལོངས་སུ་སྤྱད་པའི་རྣམ་སྨིན་གྱིས།།
ས་སྟེང་མི་ལ་ལས་འབྲས་འཁོར་བ་འདྲ།།
ཧ་ལས་དགོས་པའི་ཟས་ལ་རོལ་བ་ལས།།
ཨ་རོ་ཚིག་འདིར་ཉོན་དང་སྙིང་གྲོགས་ཚོ།།
ཧ་ལམ་རང་གིས་རང་ཉིད་བསྲུང་དགོས་པས།།
ཨ་གསར་མ་བྱེད་གཙང་སྦྲ་རྒྱུན་འཁྱོངས་བྱོས།།
༢༠༢༠ ༠༢ ༠༢ཉིན།
རྩོམ་སྒྲིག་པ། མགར་རྒྱལ་སྲས།
རྩོམ་གསར། 10