ནུབ་ཁའི་མཚམས་སྤྲིན་འོད་ཀྱི་ཚོམ་བུ་ལས།།

རྒྱང་བཞུད་ཉི་མ་གཞོན་ནུའི་ཕྱི་མིག་གཉོམ།།

སྲོད་ལ་ལྡང་བའི་གྲང་འཁྱག་རླུང་བུ་ཡིས།།

ཡིད་ལ་གཞལ་མེད་སྐྱོ་བའི་འཕྲིན་པ་ལྷུང་།།

བརྩེ་བའི་གདུང་བ་ལྕི་བའི་ན་ཚོད་འདིར།།

སྡུག་གི་མཚོ་མོར་ལྷུང་བ་ལན་གཅིག་མིན།།

ཨེ་མ་བདག་ནི་རླུང་གིས་རབ་གཡོ་བའི།།

དར་གྱི་ཤམ་བུ་ཡུག་ཡུག་བསྐྱོད་ལ་ཆགས།།

དུས་ཀྱིས་ཟད་པའི་སྐེད་རགས་ལྗང་གུའི་སྣེར།།

ཞེ་མཐུན་ཞིག་དང་འདྲིས་པའི་གཏམ་རྒྱུད་ཡོད།།

དུས་ཀྱིས་མ་སུབ་དྲན་གདུང་སྐྱུར་མའི་ཆང་།།

སྐྱོ་གདུང་སྙིང་རྩར་འཁྱིལ་བ་ལན་གཅིག་མིན།།

རྟག་ཏུ་བརྗོད་མེད་སེམས་ཀྱི་གཙང་བོའི་ཁར།།

ཁྱོད་ཀྱི་མཛེས་པ་ཉིད་ཀྱི་གཟུཊ་བརྙན་འཁོར།།

འདར་བའི་ངག་གིས་ཁྱོད་ལ་ཁམས་བདེ་ཞུ།།

ལྡིང་བའི་སྙིང་ཆུང་ཁྱོད་དང་ཉེ་བར་བཅར།།

འདི་ནི་ཚེ་སྔོན་ལས་འཕྲོའི་ཞགས་པ་ཡིས།།

གཅིག་ཏུ་བཅིངས་པ་ཨེ་རེད་སྙིང་མཐུན་ཀྱེ།།

འབྲལ་ཁ་གྱེས་ཁའི་རྒྱབ་གཟུགས་མོག་པོ་དེ།།

མཆི་མ་འཁྲིགས་པའི་སྤྱན་གྱི་སྒྲོག་ལ་ཚུད།།

རྣམ་དག་སྨོན་པའི་ཚིག་ཅིག་སྐྱེས་སུ་འབུལ།།

ཁ་དྲོ་ཡོང་བའི་གཏམ་གྱིས་སྐྱེལ་མ་ཞུ།།

ཚེ་འདིའི་ལ་མོ་བརྒལ་བའི་ཕ་རོལ་ནས།།

ཞེ་འདྲིས་བཞིན་དུ་འཕྲད་ཤོག་སྙིང་མཐུན་ཀྱེ།།