བློ་བཟང་ཟླ་བ། 2020-04-01
དཔྱིད་ཟླ་བ་གསུམ་པའི་ནམ་མཁའ་ལ།།
རྡུལ་སྤྲིན་པས་མ་སྒྲིབ་སྔོ་བསང་ཅན།།
དགུང་ཉི་མ་གསེར་འདྲ་ཤར་བའི་ཚེ།།
སྟན་དྲོ་འཇམ་ཅན་གྱི་ཕ་ཡུལ་དྲན།།
འབའ་ཚ་ཚུ་ཁ་ཡི་ནེའུ་གསེང་སྟེང་།།
ཤིང་རྒྱ་ལྕང་བུ་མོའི་ལན་བུ་རྣམས།།
རླུང་དལ་བུས་ལིང་ལིང་གཡོ་བའི་ཚེ།།
སྐྱིད་ལྕང་མ་ཚ་ཆུའི་ཕ་ཡུལ་དྲན།།
གྲོང་ལྷིང་འཇགས་ཅན་གྱི་ར་བ་ན།།
མངར་འབྲས་ཤིང་ཡལ་གའི་རྩེ་མོ་ནས།།
བྱེའུ་འཇོལ་མོའི་གྲེ་འགྱུར་སྙན་པའི་ཚེ།།
ཡིད་སྣང་བ་སྤྲོ་བའི་ཕ་ཡུལ་དྲན།།
འབྲུ་སྣ་ལྔ་སྨིན་པའི་ཞིང་ཁ་ན།།
མཛེས་ཁམ་བུ་མེ་ཏོག་ཤར་བ་དང་།།
འབུ་སྦྲང་མའི་འཕུར་ལྡིང་རྩེ་བའི་ཚེ།།
གོང་ལྷ་ཡུལ་ལྟ་བུའི་ཕ་ཡུལ་དྲན།།
དགུང་ནམ་མཁའི་དབྱིངས་ཀྱི་ཕོ་བྲང་ནས།།
ཀླུ་གཡུ་འབྲུག་སྔོན་མོའི་ངར་སྐད་གྲགས།།
སྤྲིན་ལང་ལོང་གསེབ་ནས་ཆར་བབས་ཚེ།།
ཆར་དུས་སུ་འབབ་པའི་ཕ་ཡུལ་དྲན།།
ཁྱིམ་གྲུ་བཞི་ཅན་གྱི་ནང་བཅུད་དུ།།
དྲིན་ཕ་མ་ནོར་བུ་ཆ་གཅིག་བཞུགས།།
གཉེན་དགའ་འཛོམས་སྐྱིད་གླུ་ལེན་པའི་ཚེ།།
དྲིན་འཁོར་ཐབས་བྲལ་བའི་ཕ་ཡུལ་དྲན།།
རྩོམ་གསར། 10