ལི་སྨད་ཉི་གཞོན། 2020-03-18
ཀྭ་ཡེ་གསོན་དང་སློབ་མ་རྣམ་པ་ལགས།།
ཁ་སང་དེ་རིང་རིམས་ནད་གནས་ཚུལ་ཏེ།།
ག་ས་གང་ནས་ཁྱབ་བསྒྲགས་བྱེད་པར་བརྟེན།།
ང་ཚོ་ཚང་མས་ཆ་རྒྱུས་ལོན་ཡོད་ཀྱང་།།
ཅ་ལེ་ཅོ་ལེས་ཉི་མ་མི་གཏོང་བར།།
ཆ་སྙོམས་ཉིན་རེར་དཔེ་ཀློག་ལས་བྱ་ཕྲིས།།
ཇ་ཐུན་ཟས་ཐུན་མེད་པར་ལག་པ་ཁྲུས།།
ཉ་ར་ལུས་པོར་བྱས་ན་བདེ་ཐང་འབྱུང་།།
ཏག་ཏག་ནད་འདིའི་འབྱུང་རྐྱེན་བཤད་པ་ན།།
ཐ་མལ་པ་འགས་ཕ་ཝང་ཤ་བཟས་ཏེ།།
ད་ལྟའི་ཏོག་དབྱིབས་ནད་ཡམས་འདི་བྱུང་ལ།།
ན་ཚོད་དབྱེ་བ་མེད་པར་ན་བཞིན་འདུག།
པ་པ་བཟས་ཏེ་ཁྱིམ་ནས་ཡག་པོ་སྡོད།།
ཕ་རོལ་ཁྱིམ་ཚང་གཞན་ལ་འགྲོ་དགོས་ན།།
བ་སོ་ལས་ཀྱང་དཀོན་པའི་ཁ་ཤུབས་གྱོན།།
མ་རུང་གློ་ཚད་འགོག་པ་ལྷོད་མི་ཉན།།
རྩེ་མོའི་འདུ་འཛོམས་གནས་སུ་འགྲོ་མི་རུང་།།
ཚ་བ་རྒྱས་ན་ངེས་པར་ཕ་མར་ཤོད།།
ཛ་དྲག་མ་བྱུང་གོང་ནས་སྨན་པར་སྟེན།།
ཝ་ལེར་རང་གཅེས་གཞན་ལ་གནོད་མ་བྱེད།།
ཞོགས་པར་སྔ་ནས་ལངས་ལ་ལུས་རྩལ་སྦྱོང་།།
ཟ་མ་གཙང་མ་དུས་ཚོད་ལྟར་དུ་ཟོས།།
འ་འུར་གསར་འགྱུར་རྫུན་མ་སྤེལ་མི་བྱ།།
ཡ་རབས་སློབ་མའི་རང་ཚུགས་དོར་མི་རུང་།།
ར་བ་གངས་ཀྱིས་བསྐོར་བའི་བོད་ཡུལ་གྱི།།
ལ་ལུང་རུ་སྡེར་གནས་པའི་སློབ་མ་ཚོ།།
ཤ་ཚའི་གཏམ་འདི་རང་གི་སེམས་ཚོར་ཡིན།།
ས་ཕྱོགས་སོ་སོའི་ཁྱོད་ཚོར་འཕྲོད་གྱུར་ཅིག།
ཧ་ཅང་ཚིག་སྦྱོར་སླ་བའི་སྙིང་གཏམ་འདི།།
ཨ་མའི་བུ་ཡིས་ལན་གཅིག་གཟིགས་དང་ནི།།
ཧ་ལམ་མི་ཤེས་མཁན་ཞིག་ཡོད་མི་སྲིད།།
ཨ་རོགས་ཁྱོད་ཚོར་ཕན་རེ་ཐོགས་ན་ཐང་།།
རྩོམ་གསར། 10