རྒན་གོང་ཨོ་རྒྱན་རྡོ་རྗེ། 2020-02-21
སྟོད་མངའ་རིས་སྐོར་གསུམ་སྙན་རེ་གསོན།།
བར་དབུས་གཙང་རུ་བཞི་སྤྱན་རེ་གཟིགས།།
སྨད་མདོ་ཁམས་སྒང་དྲུག་ཐུགས་ལ་ཞོག།
ང་རྒན་པོར་གཏམ་གསུམ་བཤད་རྒྱུ་ཡོད།།
ནད་ཏོག་དབྱིབས་ཟེར་བའི་བདུད་འདྲེ་དེ།།
སྐྱིད་མི་ཡུལ་ཁམས་ལ་ཆག་སྒོ་ཆེ།།
སེམས་དམར་ཆུང་མང་པོར་འཇིགས་པ་བསྐུལ།།
མི་ཆེ་ཆུང་ཀུན་ལ་བར་ཆད་གཏོང་།།
ཉི་མ་རེ་རེའི་དུས་ཀྱི་ཞོགས་པ་ལ།།
ཁྲུས་མ་བྱས་སྐད་འཕྲིན་ཚུར་ལ་བླངས།།
བལྟ་ཐོག་མ་ནད་དུག་སྐོར་ལ་བལྟས།།
རིག་ཐོག་མ་ཨང་ཀི་མང་པོ་རིག།
ཁྱོད་དཀར་མཛེས་ཁུལ་ལ་འཕར་འདུག་ཟེར།།
ཁམས་རྟའུར་ཇེ་མང་རེད་སོང་ཟེར།།
ང་རྒན་པོ་རེ་ཞིག་ཧད་དེ་ལུས།།
སེམས་བསམ་པ་ཤིན་ཏུ་སྐྱོ་བར་གྱུར།།
ངེད་འདུག་ས་དབུས་གཙང་ཕྱོགས་སུ་རེད།།
ཁྱོད་གནས་ས་མདོ་ཁམས་སྒང་དྲུག་རེད།།
ངེད་སྤྲེའུའི་རིགས་རྒྱུད་གཅིག་འདྲ་རེད།།
ང་རྒན་པོ་མི་སྐྱོ་ཅི་ལ་སྲིད།།
ནད་ཏོག་དབྱིབས་གདུག་རྩུབ་ཆེ་ན་ཡང་།།
ཁྱོད་རྟའུས་བཟོས་ལེ་མ་རེད་ཀོ།།
མི་འགྲུལ་ཟམ་ཆེ་བའི་དུས་འདི་ལ།།
ཁྱོད་རྟའུར་བར་ཆད་བྱུང་ལེ་རེད།།
རྒྱུ་འབྱོར་པ་ཡོད་ན་རོགས་རེ་བྱོས།།
ཁམས་རྟའུ་དཀའ་ནས་ཡོད་ལེ་རེད།།
སྟོབས་ནུས་ཤུགས་ཡོད་ན་ལག་རེ་འཐེན།།
ཁམས་རྟའུར་བར་ཆད་བྱུང་ལེ་རེད།།
རྟ་འདོ་བ་བཞོན་ན་མཉམ་ཞོན་རེད།།
གུར་དཀར་པོ་རྒྱག་ན་ཁ་འཕྲོད་རེད།།
ནད་ཏོག་དབྱིབས་འགོག་ན་མཉམ་འགོག་རེད།།
ངེད་གདོང་དམར་རུས་པ་མཁྲེགས་ལེ་རེད།།
གོང་ཏང་གི་མགོ་འདྲེན་ཡོད་ལེ་རེད།།
བར་ལྷ་རྗེའི་འབད་པ་ཡོད་ལེ་རེད།།
འོག་འབངས་ཀྱི་རྒྱབ་སྐྱོར་ཡོད་ལེ་རེད།།
ཁྱོད་རྟའུ་འགྱེལ་ལེ་མ་རེད་ཀོ།།
ལུས་ཐང་པོ་ཡིན་ན་གཟབ་པར་བྱོས།།
ནད་ངན་པས་བཟུང་ན་ལྷ་རྗེ་སྟེན།།
ནད་ཏོག་དབྱིབས་མཐའ་ལ་མ་ཐོན་བར།།
ཡུལ་རྟའུ་རིག་པ་སྒྲིམས་ཤོག་ཨང་།།
རྩོམ་གསར། 10