ལྷོད་ཆགས་པའི་ངག

གུ་དཔལ་ཤིས།        2020-01-20

    ནམ་ཟླ་དཔྱིད་འགོར་ཁ་བ་བསྟུད་མར་བབས།།

    ནོར་འཛིན་སྒེག་མོས་དངུལ་གྱི་ལྭ་དཀར་ནབ།།

    གནམ་མདོག་འཐིབས་ནས་ཁངས་ཤིག་ཨེ་འབབ་ན།།

    སྙམ་པའི་གྲང་རླུང་ཙག་གི་འཇམ་ཤ་རྒོད།།


    གྲྭ་ཤག་སྒེའུ་ཁུང་ལྷིང་འཇགས་དབྱངས་ལ་སིམ།།

    ལྷ་ཁང་རྒྱ་ཕིབས་གསེར་གྱི་འདབ་གཤོག་བརྒྱངས།།

    གྲྭ་བཙུན་རེ་རེས་དམིགས་མེད་མཉམ་བཞག་ངང་།།

    གསོལ་འདེབས་དངོས་གྲུབ་ཀུན་འབྱུང་ཕྲེང་བར་བཅད།།


    སྤྱི་ཡི་བསྟན་དང་འགྲོ་བ་ཐུགས་ཁུར་འོག།

    དགོས་སུ་ཚེ་དང་སྒྲུབ་པ་མཉམ་ཆེད་དུ།།

    འདི་ལྟར་བརྩོན་པའི་བས་མཐའི་དགེ་སྦྱོང་དག།

    འདི་དང་ཕྱི་མའི་དད་རྟེན་ཅིའི་མ་ལགས།།


    ཡུལ་སྐོར་བ་དང་མཆོད་མཇལ་དད་འབངས་དག།

    དམིགས་ཀྱི་འདུན་མ་གཅིག་ཏུ་མི་མཐུན་ཡང་།།

    བྲེལ་བའི་ངང་ནས་སྒྱུ་འཕྲུལ་སྲང་ལམ་ཀུན།།

    འདུ་འཛི་ཁེངས་ཤིང་རང་རང་ལས་ལ་བྲེལ།།


    གཟིམ་ཤག་རབ་གསལ་གློག་སྒྲོན་འོད་ཀྱིས་བལྟམས།།

    ཡང་སྟེང་རེ་ན་དབང་གི་དར་ལྕེ་ལྷེམ།།

    ཡུལ་འདིའི་མཚན་མོར་ལམ་སྒྲོན་ཁེར་ཧྲེང་དག།

    སྨྲ་བ་མེད་པར་ཀྲོང་ངེར་ཁོར་ཡུག་སྲུང་།།


    ཕྱི་ཡི་འབྱུང་བཞི་འཁྲུག་ཀྱང་འཐད་ཀྱང་རུང་།།

    ནང་གི་ཀུན་རྟོག་ཞི་བསིལ་ལྗོན་པའི་ཚལ།།

    རེ་དོགས་ཉོན་མོངས་འཆིང་བ་མ་ལགས་པས།།

    ཞེ་བློ་བདེ་བའི་སྐྱེ་འགྲོའི་ཡིད་གར་འཛུམ།།

  • ལེ་ཚན་སྔོན་མ།:ཚོར་བའི་མགུར།
  • ལེ་ཚན་རྗེས་མ།:མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་གསུམ་པར་ཆེད་བྲིས་སྙན་ངག་སྣང་གསལ་མར་མེ་ཚེ་འབར་ཞེས་བྱ་བ།