མ་ངེས་པའི་སྐྱོ་བ།

མགོ་ལོག་ཆུ་ཐིགས།        2020-01-18

            ༡

    དོ་ཞག་སེམས་ཀྱི་ནང་ལོག་ཏུ།།

    སུན་སྣང་དང་བཅས་སྐྱོ་བ་ནི།།

    གྲོང་ཁྱེར་ནང་གི་མཁའ་དབུགས་ལྟར།།

    ངོས་ཀྱི་བར་སྣང་སྒྲིབ་ཀྱིན་འདུག།

    ཡིད་དུ་འོང་བའི་མ་འོངས་པའང་།།

    རིམ་བཞིན་སེམས་ནས་འབོར་གྱིན་འདུག།

           ༢

    ལས་ཀྱི་མཚན་མོ་ཚེས་པའི་ཚེ།།

    ང་ཡིས་ཟླ་བ་མི་འཚོལ་ཞིང་།།

    མཚན་མོའི་སྲང་ལམ་དག་ཏུ་ཡང་།།

    ང་རང་གཏན་ནས་འགྲོ་མི་སྲིད།།

    དེ་དུས་ངོས་ཀྱིས་རྩྭ་ཐང་ནས།།

    གངས་རི་ཁོ་ན་བསྲུང་བར་བྱ།།

           ༣

    བརྩེ་བའི་མེ་ཏོག་མི་སྐྱེ་བའི།།

    བྱེ་མའི་ཐང་ཆེན་ཉུལ་ཏེ་འགྲོ།།

    སྟོང་བར་ལུས་པའི་ལུང་བ་རུ།།

    སེམས་ངལ་ཅུང་ཙམ་གསོ་བར་བྱ།།

    ཁྱོད་ནི་སེམས་ནས་མི་དྲན་པར།།

    ཆང་དང་ཐ་མག་ཅི་དགར་རོལ།།

           ༤

    མུན་ནག་མཐོང་བའི་ཕར་ནང་ན།།

    སྙིང་དུ་སྡུག་པའི་ཞལ་རས་ཚེས།།

    འཆི་བ་སྒུག་པའི་གོ་རིམ་ནི།།

    རང་དབང་ཐོབ་པའི་བྱ་ཁྱུ་བཞིན།།

    བྲེལ་བ་ཆེ་བའི་ནམ་མཁའ་ནས།།

    ཐ་མའི་སེམས་ངལ་གསོ་བར་བྱ།


  • ལེ་ཚན་སྔོན་མ།:གྲོང་ཁྱེར།
  • ལེ་ཚན་རྗེས་མ།:ང་ཡི་ལག་ཤུབས།