སྟོད་གངས་སྐྱེས། 2019-12-16
རབ་མཛེས་རྒྱ་གྲོང་སུམ་རྩེན་གནས་བཞིན་སྤྲོ།།
རབ་བརྗིད་ཆ་འཕྲིན་སྐར་ཚོགས་བཀྲམ་འདྲ་རྒྱས།།
རབ་ཡངས་འཇིག་རྟེན་སྙིམ་པའི་སྦུག་བཀོད་པའི།།
རབ་དགའི་དུས་གསར་ངོ་མཚར་གནས་ཀྱི་ཞིང་།།
མཁའ་ལ་འཕུར་བའི་གཤོག་ཟུང་མ་སྐྱེས་ཀྱང་།།
ཆུ་རླུང་རྒལ་བའི་རྐྱལ་རྩལ་དབུལ་ཡང་རུང་།།
ས་ལ་བགྲོད་པའི་བང་རྩལ་ཆད་ན་ཡང་།།
སྲིད་གསུམ་ཉུལ་བའི་འཕྲུལ་འཁོར་རྒྱུ་སྐར་ཟླ།།
དགུང་གི་ཟླ་བ་སྙན་གྲགས་ཆེ་ན་ཡང་།།
ཉིན་མཚན་ལྡོག་པའི་བཤད་གྲོས་མ་ཐོས་སྟེ།།
སྒྲོལ་བྱེད་ཉི་མའི་ཟླ་བོར་འགྲོགས་པའི་འོད།།
དེང་གི་གློག་འོད་ཁྲོད་ན་མེ་སྟག་ཙམ།།
དུས་གསུམ་ཁྱད་མེད་གསར་རྙིང་གནས་ཚུལ་རྟོགས།།
ཡུལ་གྱི་དབྱེ་མེད་ཕན་ཚུན་འབྲེལ་བས་བསྡམས།།
མཐོ་རིས་ལྷ་ཡི་མངོན་ཤེས་སྐྱེངས་བའི་གནས།།
ཆ་འཕྲིན་དུས་རབས་བློ་ལ་ཡ་མཚན་ཅན།།
གཞལ་ཡས་ཁང་བཟང་ཀླུ་ཡི་ཕོ་བྲང་རིགས།།
རིགས་ཀྱི་ན་གཞོན་སྣ་མང་གོས་ཀྱི་རྒྱན།།
རྒྱན་ཆའི་རྩེ་གྲས་ཚན་རྩལ་ཤེས་རིག་དར།།
དར་ཞིང་རྒྱས་པའི་སྤྱི་ཚོགས་གསར་པ་བརྗིད།།
དགོས་འདོད་ཤེས་བྱ་མི་ཐོབ་སྡུག་བསྔལ་མེད།།
རིན་བྲལ་ཐོས་པ་གསོག་པའི་མཐུན་རྐྱེན་མང་།།
བརྔམ་ནག་འཚོ་བའི་འགྲན་ཁ་དབལ་ན་ཡང་།
བཙན་པོའི་གོ་ཆ་གྱོན་པའི་ཐབས་སྒོ་ཡངས།།
དགོང་མོ་བྲེལ་བའི་ཐབས་ལས་གཞོལ་དགོས་མེད།།
ཉིན་མོ་དཀའ་བའི་ཞོ་མདོང་དཀྲོགས་དགོས་མེད།།
འཁེལ་འཐག་བྱས་ཏེ་རྒྱུན་དགོས་འཚེམ་དགོས་མེད།།
དུས་རབས་གསར་པའི་བུད་མེད་བག་ཡངས་ལྡན།།
སྡུག་རྩུབ་བཙན་པོའི་གཉའ་ནས་གནོན་མཁན་དང་།།
ཉམ་ཆུང་སྤྲང་པོའི་མཐའ་ནས་སྐྱོང་མཁན་ཏེ།།
རྒྱལ་ཁྲིམས་སྲོང་པོའི་དྲང་མོའི་མདའ་རྩེ་ལ།།
བརྟན་ལྷིང་འཚོ་བ་ཞི་བདེ་བག་ཕེབས་སྤྲོ།།
བྲེ་སེར་འབྲོང་གི་རྭ་རྩེད་ངོམ་ས་སྟེ།།
ནང་པ་ཆོས་ཀྱི་བསྟན་པ་དར་སའི་བོད།།
དུས་རབས་གསར་བའི་དཔལ་ཀྱི་སྙིང་པོ་འགྲོགས།།
དབུལ་ལམ་བཤགས་ནས་ཕྱུག་སྒྱུར་ལམ་བུར་བསྐྱོད།།
དགུན་གསུམ་ཁ་བའི་འཁྱག་རླུང་གཟེར་ན་ཡང་།།
རྒྱབ་གོས་ཆད་པའི་སྡུག་བསྔལ་ཁྱེད་ཚོར་མེད།།
མི་ཚེ་སྐྱ་མོའི་ལམ་ཐག་རིང་ཡང་རུང་།།
ལྟོགས་སྐོམ་མནར་བའི་འཇིགས་སྐྲག་ང་ཚོར་མེད།།
ཁྱོད་ཀྱིས་གངས་རི་དཀར་པོ་གདངས་ལ་གྱེར།།
ང་ཡིས་གཙང་ཆབ་སྔོན་མོ་ངག་ལ་བཀུག།།
འུ་གཉིས་མཐིང་སྨུག་སྦྲ་ཡི་ནང་རོལ་ནས།།
སྙན་ཚིག་དབྱངས་ལ་བཏགས་ནས་དུས་གསར་བསྟོད།།
དུས་རབས་གསར་པ་བདེ་ལྡན་ལྷ་ཡུལ་རེད་།།
དུས་རབས་གསར་པ་འཚོ་བའི་ལོངས་སྤྱོད་རེད།།
དུས་རབས་གསར་པ་མི་ཡི་བསོད་ནམས་རེད།།
དུས་རབས་གསར་པ་སེམས་ཀྱི་དག་ཞིང་རེད།།
རྩོམ་གསར། 10