མཚོ་ཐར། 2019-11-28
ཀྭ་ཡེ་གསོན་དང་བརྩེ་བའི་སློབ་གྲོགས་ཚོ།།
ཁ་ནས་མ་འོངས་ཟེར་བཞིན་མི་འདུག་པར།།
ག་ལེར་སྦྱོང་བ་ཅུང་ཞིག་བྱེད་འདོད་ན།།
ང་ཚོའི་དགེ་རྒན་རྣམ་གྱི་ཁ་ལ་ཉོན།།
ཅ་ཅོའི་འཆལ་གཏམ་མང་པོར་མི་ཉན་པར།།
ཆ་ལུགས་བཟང་པོ་དག་ལ་ནན་གྱིས་སྦྱོངས།།
ཇ་ཁང་ཆང་ཁང་ལ་སོགས་མི་འགྲིམ་པར།།
ཉ་གང་ཟླ་བར་འགྲན་པའི་འབད་འབུངས་བྱོས།།
ཏ་ལེན་ཕྲག་པར་ཁུར་བའི་གཅེས་ཕྲུག་ཚོ།།
ཐ་ཤུལ་མ་རབས་རྣམས་ཀྱི་རྗེས་མ་འབྲང་།།
ད་ནས་བཟུང་སྟེ་ཤེས་བྱ་ལེགས་པར་སྦྱོང་།།
ན་གཞོན་ཁྱེད་ཚོའི་བདེ་སྐྱིད་དེ་ལས་འབྱུང་།།
པ་སྡེ་ལ་སོགས་རང་གི་སྲོག་ལྟར་སྐྱོང་།།
ཕ་མའི་ཁ་ཏ་སེམས་ལ་ནན་གྱིས་ཟུངས།།
བ་གླང་ལྟ་བུའི་མི་ཞིག་མི་བྱེད་པར།།
མ་ལོ་རྣམས་ཀྱིས་ཡིད་ཆེས་བརྟན་པོ་ཡོད།།
ཙ་རི་ལ་སོགས་ས་ཆ་གར་སོང་ཡང་།།
ཚ་གྲང་དཀའ་སྤྱད་སོགས་ལ་མི་སྐྲག་པར།།
ཛ་ཏི་ལྟ་བུའི་འབྲས་བུ་ཐོབ་པའི་ཕྱིར།།
ཝ་མོ་ལྟ་བུའི་མི་ལ་འགྲོགས་མི་རུང་།།
ཞ་ར་དམུས་ལོང་རྣམས་ལ་རོགས་རམ་དགོས།།
ཟ་མ་ངན་ངོན་དག་ལ་མི་སྤྱོད་པར།།
འ་འུར་མི་ཚོགས་འདུས་པའི་ཁྲོམ་ར་ནས།།
ཡ་རབས་ཚུལ་དང་ལྡན་རྒྱུ་མ་བརྗེད་རོགས།།
ར་མ་ལུག་གི་སྐད་ལྟར་མི་བསྲེས་པར།།
ལ་ལུང་གང་དུ་སོང་ཡང་ཕ་སྐད་སྨྲོས།།
ཤ་དང་ཁྲག་ནི་བོད་ལས་ཆད་པའི་ཕྱིར།།
ས་ཆ་གང་དུ་སོང་ཡང་དེ་མ་བརྗེད།།
ཧ་ཧ་འདི་ནི་རང་གི་བསམ་ཚུལ་ལགས།།
ཨ་ལ་ཨེ་བདེན་ཁྱོད་ཚོས་བསམ་བློ་ཐོངས།།
རྩོམ་གསར། 10