སྦྲ་དུངས་སེམས། 2019-11-22
གླེགས་བམ་གྱི་གདོང་འབག་གྱོན་པའི་ཤཱཀྱའི་དགེ་སློང་ཞིག
ཨ་མདོ་ནས་རྐང་པ་བརྒྱབ་སྟེ་ལྷ་ས་དག་པའི་ཞིང་དུ་ཕེབས།
རྟག་བརྟན་གྱིས་བརྩོན་པ་ཆུ་བོ་བཞིན་བསྟེན་ནས།
མ་རིག་པའི་གདོང་གཏད་དུ་འགྲེང་སྟེ་མཐའ་མཇུག་གི་རྒྱལ་ཁ་བླངས།
ཀྱེ་ཞྭ་སེར་བསྟན་པའི་བདག་པོ་ཙོང་ཁ་པ།
ལོ་ངོ་ག་ཙམ་འགོར་ཡང་ད་དུང་ཁྱེད་རང་གླེང་གཞིར་གྱུར།
ཁྱེད་ཀྱི་མི་ཚེ་ལ་གླེགས་བམ་གྱི་གསེར་འོད་བཀྲ་ཞིང་།
བྱམས་པ་དང་བརྩེ་བའི་ཀློང་ནས་འགྲོ་བ་ཡོངས་ལ་བདེ་སྐྱིད་བསྐྲུན།
དེའི་ཕྱིར་ད་དུང་མི་རྣམས་ཀྱིས་ཁྱེད་ལ་སྟོན་པ་གཉིས་པ་ཞེས་འབོད།
སྔོན་བྱོན་གྱི་གསུང་རབ་ཡོད་ཚད་ཀྱི་ཉིང་བཅུད་ཕྱོགས་གཅིག་ཏུ་བསྡུས་ཏེ།
མདོ་སྔགས་ཀྱི་གཙང་བོ་དེ་གཉིས་ཆུ་དང་འོ་མ་བཞིན་དུ་འདྲེས་པར་བཅུག་ནས།
གངས་ཅན་གྱི་ལྗོངས་སུ་མཉམ་གཅིག་ཏུ་བཞུར་དུ་བཅུག
སྔོན་བྱོན་གྱི་མཁས་པ་རྣམས་ཀྱི་དགོངས་པ་ཡང་དག་པར་འགྲེལ་ཏེ།
རི་བོ་དགེ་ལྡན་པའི་གཞིས་ཁྱིམ་ཁྱེད་ཀྱིས་གསར་དུ་བསྐྲུན།
བསྟན་པ་དང་འགྲོ་བའི་སླད་དུ།
ཁྱེད་ཀྱི་མི་ཚེ་ས་མཐའ་ནས་ཟད་དུ་བཅུག་ཀྱང་།
ཁྱེད་ཀྱི་མཚན་སྙན་གོ་ལ་ཟླུམ་པོའི་ཡང་སྟེང་ན་ཉི་འོད་དང་ལྷན་དུ་རྒྱུ།
ཁྱེད་ཀྱི་མཛད་རྗེས་ཀྱིས་ཁམས་གསུམ་གཡོ་བར་བྱས་ཤིང་།
འགྲོ་བ་སྟོང་ཕྲག་མང་བོའི་རྒྱུད་ཀྱི་མ་རིག་པའི་ལོག་རྟོག་སེལ་བར་བྱས།
སྐྱེས་ཆེན་ལགས།
ཡང་ན་ཁྱེད་ཀྱི་ཚེ་སྨད་དགའ་ལྡན་དག་པའི་ཞིང་མཆོག་ནས་ལུས་ཀྱང་།
མི་ཚེ་གླེགས་བམ་དང་བྲལ་མ་མྱོང་བའི་རྐྱེན་གྱིས།
འཛམ་གླིང་རིག་པའི་རྒྱལ་ཁམས་པ་བློ་བཟང་གྲགས་པ་ཞེས།
ཀུན་གྱི་སེམས་ཁོང་ན་དགོངས་པ་གཅིག་དང་དབྱངས་གཅིག་ཏུ་གྱུར།
གང་ལྟར། སྐྱེ་བ་འདིར་ང་ཁྱེད་ཀྱི་བསྟན་པར་ཞུགས་པ།
ཨེ་མ་ཧོ་རྨད་བྱང་སྐལ་བ་བཟང་།
སྒྱིད་ལུག་དང་ལེ་ལོའི་དབང་དུ་གྱུར་ཏེ།
ཁྱེད་ཀྱི་གསེར་གྱི་གླེགས་བམ་དག་ལ།
ངས་ཐོས་བསམ་རྣལ་མ་ཞིག་བྱེད་མ་ཐུབ་པ་ནི་འཕང་སེམས་རི་བོ་ལས་ཀྱང་ལྕི།
སྐྱེ་བ་ནས་སྐྱེ་བར་ང་ཁྱེད་ཀྱི་རྗེས་སུ་འཛིན་པར་ཤོག
རྩོམ་གསར། 10