གོ་གསོས་སྨན། 2019-11-20
དགུན་ཟླ་སྐྱ་མོའི་བྱ་ཁྱུ་འཕུར་ཐེངས་རེ་རེར།
རྫ་རི་མཆོང་སྨུག་གི་ཞལ་གདོང་གས་ཐེངས་
རེ་རེར།
ངས་ཆིག་ལབ་རིང་མོ་ཞིག་གི་དབུ་འཁྱུད་བྲིས་ཏེ།
འགན་འཁྲི་དང་བཅས་ཏེ་འོངས་ཤིང་།
དགྱེས་འཛུམ་དང་བཅས་ཏེ་ཕེབས་སོང་བའི་
སྐྱེས་བུ་ཞིག་དྲན་ཡོང་།
མཚན་སྨག་གི་མཛེས་སྡུག་འབར་བའི་ཡུལ་ལྗོངས་ནས།
སྒེའུ་ཁུང་གི་ཡོལ་བར་ཕོག་པའི་ཟླ་ཟེར་ཡང་།
རབ་ཏུ་སུན་ཞིང་།
ཧ་ཅང་ཞེད་པའི་དུས་ཚིགས་འདི་དག
ངའི་དྲན་པར་བཏགས་པའི་གསང་བ་ནི།
ཁ་བ་བཞིན་དུ་གཙང་ཞིང་།
སྟོན་ཟླ་བཞིན་དུ་དྭངས་ངེས།
ཐ་སྙད་ཀྱི་མེ་ལྕེས་བཙོས་པའི་སེམས་པ་འདི།
གླེགས་བམ་གྱི་ཉིན་སྲིབ་བར་གསུམ་ལ་
ཉུལ་བ་ནས་བཟུང་སྟེ།
ཆག་གྲུམ་ཤོར་བའི་སེམས་ཀྱི་རྨ་ཁ་དེ།
ལ་ཁའི་རླུང་བུས་དེད་ཅིང་།
ལུང་གཤོངས་ཀྱི་ཁ་བས་ཀྱང་མནན་མྱོང་།
སྒྱུ་མའི་འཕྲུལ་འཁོར་གྱིས་གྲུབ་པའི་རྒྱལ་ཁམས་ནས།
འཕུར་སྐྱོད་ཀྱི་ཐག་སྣེར་བཟུང་བའི།
ལོ་ཟླའི་དཀྱོག་མཚམས་ཀྱི་གཞོན་ནུ་མས།
རི་ཀླུང་ནས་འཕོས་པའི་ནེམ་རྩྭ་དང་།
རྒྱ་མཚོ་ནས་འཕྱུར་བའི་ལྦུ་དཀར་བཞིན།
ཤམ་བྷ་ལ་ཡང་ཡིད་འགུལ་ཐེབ་པའི་གླུ་ཆུང་སྟེ།
ཁ་བ་དང་ལྷན་དུ་བླངས་ཤིང་།
བསིལ་རླུང་ལྷན་དུ་གྲགས་མྱོང་།
ཐུ་བྷོད་རི་བོའི་གངས་འདབས་ནས་བཞུར་བའི།
ཟུངས་ཁྲག་གི་ཆབ་རྒྱུན་དམར་པོ།
སྒང་དྲུག་ཁ་བའི་རི་ལུང་ནགས་གསུམ་ལ་
བཞུར་བ་ནས་བཟུང་སྟེ།
གླུ་ཨ་ལ་ལ་མོའི་དབྱངས་རྟའི་ཚེ་སྲོག་དང་།
མ་ཐ་ལ་ལ་མོའི་ངག་རིག་གི་ལྗང་མྱུག་
བལྟམས་སོང་།
ཉི་ཟླའི་རྣ་ལུང་བཏགས་པའི་རི་ཕྲན་ཚོས།
དུང་མདོག་གིས་གཡུ་མདོག་བསུས་ཤིང་།
སླར་ཡང་གསེར་མདོག་གིས་དུང་མདོག་བསུ་
བའི་བྲེལ་འཚུབ་ཁྲོད།
བལྟས་ཀྱང་མིག་ཟུར་ཟུམ་ཞིང་།
སོང་ཡང་རྐང་ལག་འཁུམ་པའི་ལོ་ཟླ་སྐྱ་བོ་ནས།
འཁྲབ་གཞུང་རང་གིས་བརྩམས་ཤིང་།
འཁྲབ་ཁྲིད་རང་གིས་བྱས་པའི་མི་ཚེའི་
གཏམ་རྒྱུད་རིང་མོ།
གངས་འཁྱགས་དང་ལྷན་དུ་འཛུམ་ཞིང་།
སྲོད་རླུང་དང་ལྷན་དུ་ཚར་དགོས་པ་འདྲ།
རྩོམ་གསར། 10