སྐུ་ཚ་ཨོ་རྒྱན་དོན་གྲུབ། 2019-11-08
ཐུབ་བསྟན་ལུང་རྟོགས་བསྟན་པའི་བདུད་རྩིའི་བཅུད།།
མ་ལུས་འཐུང་བའི་ཆ་ཤས་ཀུན་ནས་རྫོགས།།
མཁྱེན་བརྩེ་འོད་དཀར་འཇམ་པོའི་དཀྱིལ་འཁོར་ཅན།།
ཉན་ཤུལ་འཇམ་དབྱངས་གྲགས་པ་སྲིད་ན་རྒྱལ།།
ཉམས་མེད་ཙོང་ཁའི་རིང་ལུགས་རིག་པའི་བཅུད།།
ངོམ་མེད་འཐུང་བའི་ཡེ་ཤེས་དགོངས་པའི་ཀློང་།།
གཅིག་ཏུ་རྫོགས་མཛད་དུས་མཐའི་རྣལ་འབྱོར་བ།།
གྲུབ་པའི་དབང་ཕྱུག་ཉན་ཤུལ་རིགས་ཀྱི་སྲས།།
མཁྱེན་པའི་དབྱིངས་ནས་ཤེས་བྱའི་དུང་ཟླ་གསལ།།
བརྩེ་བའི་ཐུགས་རྗེས་རིགས་ཀྱི་ཀུ་མུད་བསྐྱངས།།
ནུས་པའི་སྟོབས་ལ་མཁས་དགུས་གཙུག་ཏུ་བཀུར།།
མགོན་ཁྱེད་དུས་ཀྱི་མ་ཧ་པཎ་ཆེན་ཡིན།།
རབ་འབྱམས་ཤེས་བྱའི་ཕྱི་ནང་ཡོན་ཏན་ཀུན།།
མ་ལུས་བསགས་མཛད་རིག་པའི་བདུད་རྩིའི་བཅུད།།
སྐལ་ལྡན་གདུལ་བྱའི་ཚོགས་ལ་འགྱེད་མཁས་པའི།།
སྨྲ་བའི་ཁྱུ་མཆོག་མཛད་འཕྲིན་འོད་རླབས་ཅན།།
ཐོས་བསམ་སྒོམ་པའི་ལྷ་ལམ་ཡངས་པོ་རུ།།
མཁས་བཙུན་བཟང་བའི་ཉི་བྱེད་འོད་ཀྱིས་འཚེར།།
འཆད་རྩོད་རྩོམ་པའི་བརྩེ་བའི་དྲོལ་ཁོལ་ཀྱིས།།
གདུལ་བྱ་པད་ཚལ་བསྐྱངས་བའི་ཚུལ་འདི་རྨད།།
མདོ་སྨད་རབ་སྒང་རིང་མོའི་ས་ཡི་ཞིང་།།
མཁས་མང་གསེར་གྱི་ས་འཛིན་ཕྲེང་བའི་དབུས།།
ཉན་ཤུལ་རིག་པའི་ཚང་ཚིང་འཁྲིགས་པའི་ཀློང་།།
ཁྱེད་ཉིད་ཤེས་རབ་མཛོད་ཀྱི་ཀ་ཆེན་ཡིན།།
ལྔ་རིག་མཐའ་བྲལ་ཀུན་གསལ་ཡངས་བོའི་ཁྱོན།།
ཐོས་བརྩོན་སྟོབས་ཀྱིས་གཤོག་རླབས་བསྒྱུར་བ་ན།།
རིགས་པའི་དཔའ་བོ་དུས་ཀྱི་མཁའ་ལྡིང་ཆེ།།
ཉན་ཤུལ་འཇམ་དབྱངས་གྲགས་པ་སྨྲ་བའི་དབང་།།
ཁྱེད་ཐུགས་ཤེས་རབ་ཉི་མའི་འོད་གསལ་བས།།
གྲུབ་མཐའི་ཆགས་སྡང་སྨུག་སྤྲིན་མ་འཁྲིགས་ཤིང་།།
ཁྱེད་ཀྱིས་བསྐྱངས་བའི་བསྐལ་ལྡན་གདུལ་བྱའི་ཚོགས།།
རིགས་ཀྱི་ལས་ལ་ཞབས་ཞུའི་བསྐལ་བ་བཟང་།།
ལུགས་གཉིས་མཛད་འཕྲིན་བཟང་པོའི་ཉིན་བྱེད་དབང་།།
གངས་རིའི་བསོད་ནམས་ཞིང་གི་མཁའ་ནས་གསལ།།
རིགས་ཀྱི་གདུལ་བྱའི་པདྨོ་ལེགས་བསྐྱངས་བའི།།
བླ་མེད་སྐུ་དྲིན་སྒང་བ་བོད་ལ་ཆེ།།
རིགས་ཀྱི་འདུ་ཤེས་དགོས་པའི་བཀའ་སློབ་དང་།།
མི་ཚེ་ལེགས་ལམ་སྟོན་པའི་གདམས་ངག་སོགས།།
གཅིག་མིན་ལན་མང་གནང་བའི་ཐུགས་རྗེའི་མཐུས།།
སྐུ་ཚའི་མི་ཚེར་བཀའ་དྲིན་ལྷག་ཏུ་ལྕི།།
ཚེ་ཡི་འདུ་བྱེད་བསྡུས་པའི་ཚུལ་བསྟན་ཡང་།།
སྐྱེ་འཆི་རང་དབང་འབྱོར་བའི་སེམས་དཔའ་ཆེ།།
རེ་ཞིག་ཞིང་གཞན་གཤེགས་པའི་མཛད་ཚུལ་འདི།།
ཤུལ་ལུས་ཚ་བུ་ང་ལ་གདུང་བ་ལྗིད།།
ཁྱེད་སྐུ་ཡོངས་འདུའི་ལྗོན་བཟང་རྒྱས་པའི་ཚེ།།
ཞལ་གསུང་གསེར་གནག་རིལ་བུའི་གདམས་པའི་ངག །
ཐུགས་དགོངས་ཞལ་ལྕེ་ཀློང་ནས་གནང་བ་འདི།།
ཕྱི་དྲན་སྒོ་གླེགས་ཕྱེ་ན་སྐྱོ་བའི་གཞི།།
སྐུ་ཚེ་རིག་པར་འགྲོགས་པའི་ཐུགས་རྗེ་དང་།།
ཐུགས་དགོངས་རིགས་ལ་བཞེས་པའི་འདུ་ཤེས་སོགས།།
ཁྱེད་ཀྱི་མཛད་འཕྲིན་ཕྱག་རྗེས་དཀར་པོ་དེ།།
གངས་ཀྱི་རི་བོའི་ངོས་སུ་ལྷམ་མེར་མངོན།།
དགོན་པར་ཕེབས་ནས་ཆོས་ཀྱི་འཆད་ཉན་སྤེལ།།
སློབ་གྲྭར་ཞུགས་ནས་རིགས་ཀྱི་གདུལ་བྱ་བསྐྱངས།།
བོད་ལ་ལུགས་གཉིས་མཛད་རྗེས་རབ་ཆེ་བའི།།
ཀྱེ་མ་ཞང་རྒན་ཁྱེད་ཉིད་ཡང་ཡང་དྲན།།
གསུང་རྩོམ་པོ་ཏི་བརྩིགས་པའི་བང་རིམ་ན།།
མི་ཉག་རབ་སྒང་རིང་མོའི་བྱུང་རབས་ཀྱི།།
སྔར་མེད་ལོ་རྒྱུས་གསལ་བའི་ཞལ་གསུངས་འདི།།
མདོ་ཁམས་ལོ་རྒྱུས་རིག་པའི་ནོར་བུ་ཡིན།།
མཁྱེན་དཔྱོད་གཏེར་ལས་འཁྲུངས་པའི་བརྡ་སྤྲོད་གཞུང་།།
སུམ་རྟགས་རྣམ་བཤད་ཆུ་བོ་གཅིག་འདྲེས་རྒྱུན།།
དཀའ་གནད་མ་ལུས་རྟོགས་པའི་བློ་དམན་པས།།
ད་ནི་བརྡ་སྤྲོད་བཀའ་འདྲི་སུ་ལ་ཞུ།།
བསྟན་སྲིད་འགྲོ་བའི་དོན་ཆེན་ཁུར་བཞེས་ཤིང་།།
རྒྱལ་ཁམས་རིག་པས་བསྐོར་བའི་བཀའ་ཐུབ་པ།
གངས་རིའི་སྟོད་སྨད་ཞིང་གི་གནའ་ཤུལ་ཁག །
ཞབས་ཟུང་གསེར་གནག་བཅགས་པའི་ཐུགས་རྗེ་ཅན།།
གོང་དཀར་སྟོད་ལུང་གཞུང་གི་ས་ཆ་རུ།།
སོག་གྲི་ངར་མ་གཡུག་པའི་རལ་ཁ་ནས།།
སྡེ་སྲིད་སངས་རྒྱམ་དབུ་མགུལ་ལྷུང་ཤུལ་དེར།།
ཁྱེད་ཀྱི་སྤྱན་ཆབ་ལྷུང་བའི་ལོ་རྒྱུས་ཡོད།།
གངས་ལྗོངས་ཆོས་རིག་སྒྲོན་མེའི་གཟི་འོད་དེ།།
མ་རུང་དུས་རླུང་འཚུབ་མས་གསོད་ཉེ་ཚེ།།
ཡང་དར་སྲིད་བཟང་དུས་ཀྱི་དྲོད་ཁོལ་འོག །
ཉིད་ཀྱི་མཛད་པའི་རི་མོ་གང་གིས་མཚོན།།
སྔོན་ཞིག་བཞི་དགུ་ལ་ཡི་འགྲམ་ལོགས་ན།།
ས་མིག་གཡང་གི་རྟེན་འབྲེལ་འགྲིག་ཡོད་ཅེས།།
རིག་པའི་རྒྱུད་ཀྱི་ཆད་མེད་འཁྲུངས་རབ་ཀྱི།།
ཞལ་གསུངས་དྲོན་མོ་འདི་དག་དྲན་པའི་གཞི།།
ཁྱེད་ཞལ་དུང་མདོག་ཟླ་བའི་དཀྱིལ་འཁོར་ལ།།
མི་རྟག་དགྲ་གཅན་མཆེ་བས་གཙིགས་པ་འདི།།
གངས་ལྗོངས་རིག་པའི་ཚལ་གྱི་གྱོང་ཡིན་པས།།
ལས་དབང་འདི་ལ་ཤུགས་རིང་སུས་མི་གཏོང་།།
ཁྱེད་ཉིད་ཞལ་གྱི་པད་མོ་བཞུགས་རིང་གི།།
ཟླ་ངོ་གཅིག་ཙམ་གོང་གི་ཕྱི་དྲོ་ཞིག །
ཕྲན་ཆུང་མ་འབྱོར་ཡུན་རིང་འགོར་སོང་ཞེས།།
རེ་སྒུག་ངག་འཕྲིན་དྲན་ན་སྐྱོ་བས་གཟིར།།
ལྕགས་ལའི་ཕ་མཁར་རིང་མོ་ཞིག་ཤུལ་ནས།།
ཞང་རྒན་ཁྱེད་ཉིད་དྲན་པའི་སྐྱོ་གདུང་གི།།
མིག་ཆུ་སྨྱུག་རྩེར་དྲངས་པའི་ཟིན་ཐོར་འདི།།
ཉན་ཤུལ་གྲལ་མཐར་སྐྱེས་པའི་ཚ་བུས་བྲིས།།
རྩོམ་གསར། 10