ཉེ་ཆར། 2019ལོའི་རོང་བྲག་རྫོང་གི་ཤར་རྒྱལ་མོ་རོང་གི་གྲོང་གསེབ་ཀྱི་ཡུལ་སྲོལ་དུས་སྟོན་དེ་རོང་བྲག་རྫོང་དཔའ་དབང་ཡུལ་ཤོག་ཏུ་སྤེལ་འགོ་ཚུགས་ཤིང་། ད་ཐེངས་ཀྱི་བྱེད་སྒོ་དེ“ཐོག་མའི་བསམ་འདུན་མི་བརྗེད་ཅིང་འགན་འཁྲི་སེམས་ལ་བརྟན་པོར་འཆང”ཞེས་པ་དང“གནའ་བོའི་མཁར་རྫོང་དང་བོད་གྲོང་། མཛེས་མའི་ལུང་པ། ཀྲུང་གོའི་ཆེས་མཛེས་པའི་གྲོང་གསེབ”ཅེས་པ་གཙོ་དོན་དུ་བཟུང་ཞིང་། ཁག་ཕྱེ་ནས་ཉིན་གསུམ་རིང་ལ་དཔའ་དབང་ཡུལ་ཤོག་དང་སོག་པོ་ཡུལ་ཤོག  ཕྱོགས་ཟུར་ཡུལ་ཤོག་བཅས་སུ་སྤེལ་བ་རེད། བྱེད་སྒོའི་དམིགས་ཡུལ་ནི་རྒྱལ་རོང་གི་སྲོལ་རྒྱུན་རིག་གནས་དར་སྤེལ་གཏོང་བ་དང་། མང་ཚོགས་ཀྱི་རིག་གནས་འཚོ་བ་ཕུན་སུམ་ཇེ་ཚོགས་སུ་གཏོང་བ། ས་ཁོངས་ཧྲིལ་པོའི་ཡུལ་སྐོར་མགྱོགས་མྱུར་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ། དབུལ་ཕོངས་ལས་ཐར་ནས་འབྱོར་འབྲིང་སྤྱི་ཚོགས་སུ་བསྐྱོད་པ་དང་གྲོང་གསེབ་དར་སྤེལ་གཏོང་བའི་བྱ་གཞག་ལ་སྔར་བས་སྐུལ་འདེད་གཏང་བ་དང་། མི་དེ་བས་མང་པོས་རོང་བྲག་ལ་ངོས་འཛིན་དང་རོང་བྲག་ལ་ཤེས་རྟོགས་ཐུབ་པ་བྱ་རྒྱུ་དེ་རེད།

 རོང་བྲག་ལ་མཛེས་མའི་ལུང་པ་ཞེས་པའི་མཚན་སྙན་ལྡན་ཞིང་། སི་ཁྲོན་གྱི་ནུབ་རྒྱུད་དང་དཀར་མཛེས་ཁུལ་གྱི་ཤར་རྒྱུད་དུ་གནས་ཤིང་། ཁྲེང་ཏུའུ་དང་བར་ཐག་སྤྱི་ལེ365ཡོད་པ་དང་། རྫོང་མཁར་མཚོ་འཕགས་སྨི1860ཡོད་པས། དེ་ནི་ཤར་རྒྱལ་མོ་རོང་གི་ཡུལ་སྲོལ་རིག་གནས་དར་བའི་ས་ཁོངས་གཙོ་བོའི་གྲས་ཤིག་རེད།