འཇམ་དབྱངས་ཉི་མ། 2019-10-28
ཚ་གྲང་མི་སྙོམ་ལྷོ་ཕྱོགས་ཁ་བའི་ལྗོངས་ལས།།
ལས་དབང་གཅིག་པའི་མགོ་ལོག་ཡུལ་ཤུལ་གྲོང་ལ།།
ལ་ཐུར་མེད་པར་ཁ་བའི་མེ་ཏོག་འཐོར་དུས།།
དུས་མཐའི་འགྲོ་བའི་ལས་སྐལ་ཉག་རེ་ཕྲ་བ།།
བ་གླང་ཤྭ་བ་སྒོ་དང་ནོར་ནག་དཔུང་སྡེ།།
སྡེ་དང་སྡེ་བྱས་ཁ་བའི་གྲོང་ལ་འཐིམ་དུས།།
དུས་ཀྱི་ཐ་མའི་འགྲོ་བའི་ལས་དབང་ཡིན་ན༵མ།།
གནམ་གྱི་རྒྱལ་མོ་ཁྲོས་བའི་ཆད་པར་ངེས་སྙམ།།
ཉིན་མཚན་མང་པོར་བསྟུན་མར་ཁ་བ་བབས་པས།།
སྒོ་ཟོག་ཁྱུ་དང་རི་སྐྱེས་དུད་འགྲོའི་ཚོགས་ཀྱིས།།
དུས་ཀྱི་ཕོ་ཉའི་ཕྱག་གི་ཞགས་པར་ལྟ་ཞོར།།
རྩྭ་རྐང་རེ་འང་སྲོག་གི་འདང་བརྩེ་འཇོག་པ།།
གངས་ཅན་ཁ་བའི་འཚོ་རྟེན་རྟ་ནོར་ལུག་གསུམ།།
གནའ་ནས་ད་བར་འགྲོགས་པའི་རི་སྐྱེས་སྲོག་ཆགས།།
འདི་ལས་འདི་ལྟར་ཚེ་སྲོག་གངས་ལ་འཐིམ་དུས།།
བཟོད་མེད་ན་ཟུག་མདའ་མོ་སྙིང་ལ་ཕོག་སོང་།།
མ་བུ་ཁ་ཁར་སོང་བའི་ཉམ་ཐག་དུད་འགྲོའི།།
སྐྱོ་བའི་ན་ཟུག་བརྗོད་པའི་སྨྲ་སྒོ་འགགས་ཀྱང་།།
རྐང་གཉིས་ཚོགས་རྣམས་ཐག་རིང་ས་ནས་མཐོང་དུས།།
མཆི་མ་གདོང་ན་ཉུལ་བཞིན་ལྟ་ལུགས་མཚར་བ།།
བྱང་སེམས་གོ་ཆ་བགོས་བའི་དཔུང་དང་དཔུང་སྡེ།།
འགྲོ་ཀུན་མ་རུ་སྒོམ་པའི་ཐེག་ཆེན་ལམ་ཞུགས།།
སྙིང་རྗེ་ཉིན་བྱེད་གཞོན་ནུའི་འཛུམ་གྱི་དང་མ།།
རིས་མེད་ཡུལ་ཕྱོགས་འདི་ལ་ཁ་ལོ་བསྒྱུར་ཅིག།
རྩོམ་གསར། 10