གུ་དཔལ་ཤིས། 2019-09-04
གྲྭ་ས་ཞེས་པའི་མིང་ལྗིད་པོ་འདིས།
ང་རང་སྡུག་ལ་སྦྱར་བར་བགྲང་གིས་མི་ལངས།
དོན་དམ་དུ་དཔེ་ཆ་བ་རྣལ་མ་ཞིག་བཅའ་
ཐུབ་མེད་པས་ལོས་ཡིན།
དེའང་འཁོར་བ་ལྗན་ལྗིན་དུ་སྒོམ་པའི་ངེས་འབྱུང་
ཅན་གྱི་ཆོས་པ་དག་མ་ཞིག་མིན་པས།
ཕ་ས་ཕ་ཡུལ་དང་རང་མི་རང་ཁྱིམ་དག་
བློས་ཐོངས་ཀྱིན་མེད།
དེ་བས་ང་ལ་ཕ་ཡུལ་ནི་ཕྱིར་འདོར་
ཐབས་མེད་པའི་འཚོ་བའི་
གྲུབ་ཆ་ཞིག་ཡིན།
ཡིན་ནའང་ཕ་ཡུལ་དུ་ལོ་རེ་ལ་
ཐེངས་མ་གཅིག་ལས་
ལོག་ཐུབ་ཀྱིན་མི་འདུག
དེ་ཡང་བརྩོན་པས་གོ་ཆ་བགོས་
དྲགས་པས་མ་ཡིན་ལ།
སྒྱིད་ལུག་དང་འཚོ་བའི་སྟ་གོན་
མ་འཛོམ་པས་ཡིན།
ཕ་ཡུལ་གྱི་རང་ཁྱིམ་སྙེག་ཐེངས་རེར།
རྒྱབ་རི་སྨུག་གེར་འགྱིང་བའི་ཨ་ཕ་
ལགས་ལས་ཀྱིས་ང་ཚོ་ལ་མ་དབང་རུང་།
བྱམས་བརྩེའི་འཛུམ་དྲོད་
འཁྱིལ་བའི་ཨ་མ་དང་།
འཚོ་བའི་རྒྱབ་རྟེན་ཡིན་པའི་ཕུ་བོ།
སྐྱིད་སྡུག་གི་སེམས་དྲོད་སྲོ་བའི་ཨ་ཅེ།
རྟག་པར་དྲན་རྫོང་ནས་ཡལ་བ་མེད་
པའི་ནུ་བོ་དག་ཡོད་པས།
ང་ནི་ཡིན་ལྕོག་ལྕོག་གིས་ཟས་ཀྱི་
ཕུད་དང་གོས་ཀྱི་རྩེ་དག་ལ་
རོལ་ནས་འདུག་ཆོག
ཁ་ཁུ་སིམ་པའི་འབྲོག་པའི་ཞོགས་པར་
མལ་ལས་སད་ཐེངས་རེ་ལ།
ཨ་མས་མ་ཎི་མགུར་དབྱངས་སམ་འོད་
མཚན་འདོན་པའི་
སྒྲ་དབྱངས་སྙན་མོས།
ང་ལ། སྨྲ་བསམ་བརྗོད་འདས་ཚོར་
བ་ཟབ་མོ་ཞིག་ངང་གིས་སྤྲད་འོང་།
རྩོམ་གསར། 10